تخطيطي حق ماليزيا من خبيرات

[شذي الفردوس]

حبايبي خواتي
كالعاده اذا بغيت شي ما عندي غيركم
ابي خدمه ولها دعوة مستجابه باذن الله
ريلي مواعدني اتحمل الصيف عشان بيسفرني بعد العيد ماليزيا
حبيتها من مدحكم الي شفته بالمنتدى
سفرتنا 14 يوم مع اليوم السفر ويوم الرجعه
يعني بكون هناك 12 يوم
ابي احلى وحده وعن تجربة خبيره
تقولي برنامج المناطق الي اروحلها مع الفندق الزين بس مايكون فندق غالي وايد ابيه حلو وموقعه تمام
يعني اوصل .. وين ابلش اقعد ؟
وشكثرالمده بكل مكان؟
وبعدها اي جزيره تستاهل؟
وطبعا اخر شي كوالامبور اي فندق اقرر هو الاحسن من خدماته وموقعه؟
عشان التسوق جم يوم يكفيني مابي مراكض رايحه اريحح نفسيتي
ربي يوفقكم جميعا بدون استثناء يا احلى بنات بالعالم
للعلم انا رايحه بروحي مع زوجي ما كو عيال ولله الحمد

 

[q8nina]

حبيبتي انا توني واصله .. بقولج عن نفسي انا ولاني حاجزه من الكويت كل فنادقي فاستسلمت للامر الواقع
انا ثلاث ليالي بصن واي
وثلاث ليالي ببنانج
وثلاث ليالي بلتغاوي
وست ليالي كوالا لمبور

اللى اقول ثلاث ليالي بالمعني 4 ايام

سفرتي كلها 16 يوم

ومن خلال تجربتي بسويلج جدول

على عطلتج

اول ثلاث ليالي بصن واي
4 ليالي بلانكاوي
و4 ليالي كوالامبور

وتراها اسبوعين لاني احسب باليالي

لو الايام 4 ايام صن واي وخمس ايام لانكاوي وخمس ايام كوالالمبور


وبينانج ما احسها جزيره زحمه وناس وعماير وحيل حيل كبيره من المطار الى الفنادق ساعه تقريبا

اما لانغاوي خياااااااااااااااااااال حيل حيل ..

تابعي تقرير سفرتي بنزله خلال اليومين الجايين

 

[شذي الفردوس]

مشكوره وايد q8nina
ما قصرتي
اخاف ما اروح بيننج واتحسف
برنامجج حلو
خلنشوف تقريرج واراء البنات
بنات وييييينكم؟؟؟؟؟؟؟؟؟؟؟؟
ابي الخبيرات والتجارب
ساعدوني

 

[haneen]

هلا ياقلبي ..

بيننغ روعه وايد .. لازم تزورينها ..

وراح اعطيج مخطط شااامل ... لأجمل الاماكن ..

وان شاءالله يعجبج ..


اول شي اشرح لج شوية بعدين اعطيج الجدول ..





بسم الله ..


1
الرحلة الأولى :

منطقة سلانجور..
منطقة راقية وهادية .. تقعدين فيها بفندق صـن واي لاقــون فنتدق ومنتجع فخم و روعه .. كل شي فيه كااامل
خدماته وفخامته والراحة اللي فيه روعه .. وبعدين كل شي يمة يعني ماراح تطلعون برا .. لازق فيه مجمع كبييير
تروحين له خلال ممر فيه كل شي المجمع شوبنغ ومطاعم وجمعية وصالة تزلج .. غير بالفندق فيه قرية مائية كبيرة
جنااان غير المحلات اللي برا غير المجمع .. يعني هالفندق انصحج في وبشدة ..

صورة للفندق:

2
الرحلة الثانية :

جزيرة بيننانج..
جزيرة الحركة كل شي فيها من مجمعات ورحلات وحدايق غير الاسواق الليليه .. يعني جزيرة عجيبة وكل شي حلو فيها
رحلات بحرية وصيد وحدايق وقرية مائية .. كلها نشاط وحركة .. روووووووعة ,,
قعدي فيها بفندق شانغريلا غولدن ساندس .. فندق حلوووو وروعه.. والاحلى قريب من كل شي عجيب .. ووايد خدماته حلوة .. وشكلة عجيب وقريب حيل من السوق اليلي والمطاعم ..
وايد حلووو ..

صورة للفندق:

3
الرحلة الثالثة :

جزيرة لنكاوي
جزير الهدووووء والرومانسية .. بحرها روعه وهدوئها .. واهي جزيرة صغيرة موكبيرة مثل بيننغ
ورحلاتها معدودة .. اهي لراحة البال تنفع .. وعندهم رحلات حلوة بحرية وصيد وحدايق ,,
وقعدي بفندق اسمه .. لنكاوي لاقون .. روعه شوية عليه .. خدماته وااو وشكلة عجيب .. وفيه
اكواخ فوق البحر مباشرة ,, واهو 5 نجوم

صورة للفندق:

4
الرحلة الرابعة :

العاصمة كوالالمبور..
مدينة الاحلام .. اعجز عن وصفها عقب الوناسة بالجزر وسلانجور راحت تحتاجين للراحة والتمشي
والتسوق الاصلي .. راح تلقينها فيها وبما انج تحبين التسوق .. مالج الا فندق برجايا تايم سكوير ماشاء الله حلووووو ..
واهو فندق ضخم .. يحتوي على موول كبير في محلات روعه واسعارهم حلوة .. وفيه ملاهي ..
وحمام سباحة يونس .. والفندق كلة سويتااات 7 انواع ,, واسعااااره وايد حلووة مو غاليه ..
راح يناسبج وقت ما تمللتي نزلي المجمع تحتج وتسوقي على راحتج .. واهو 5 نجوم

صورة للفندق:

الجدول :

راح يكـــــون ..

2 يوم ..... منطقة سلانجور ( فنــدق صــن واي لاقـــون )

3 يوم ..... جزيرة بيننانج ( فندق شانغريلا قولدن ساندز )

2 يوم ..... جزيرة لنكاوي ( فنــدق لنكاوي لاقون )

5 يوم ..... العاصمة كوالالمبور ( فنــدق تايم سكوير )



وكل محطة من اللي ذكرتهم .. تحتوي على وايد وايد رحلااااااات .. يعني يومج كله منوع بالترفيهه ..
وخصوصا كوالا .. طبعا الفندق او مرشد او حتى سايق التكسي يقولج عن الرحلات ,,
مثلا جنتق رحلة للملاهي فوق الجبال
افاموز رحلة للكابوي والحيوانات وقرية مائية
وعندج الشلالات
والحدائق ( الطيور - الفراشات - الورود )
السوق الصيني والمساجد والمتاحف ..
وغيرهااااااااااااااا كثير ,,




وان شاء الله يعجبج المخطط .. وبالامانه الاماكن روعه

والله يوفقج يارب وتروحين وتردين بالسلامة ..​

 

[شذي الفردوس]

حنين مشكوره والله انج شقرديه ما قصرتي
تعبتج يا قلبي وربي يجزيج كل خير
ربي يسهل عليكم اموركم
جدولج فضيييع استفدت منه واااايد وراح ان شالله امشي عليه ربي يسهل علينا سفرنا
والخبيرات الباقييين وينهم؟
عشان نشوف ونختااار
بعد طماااعه ابي اقتراحات من صاحبات التجربه والخبره؟؟؟؟؟

 

[عمشه المنتفشه]

الله يكتبلج السفره الحلوه يارب

انا اول امس راده زرحت مع ريلي بس

قعدنا ليلتين بصن واي بيراميد بس احيها وايد يعني اللي عنده يهال بيستانسون ولا ودهم يطلعون عشان مدينة الالعاب المائيه بس اللي ماعندها

عيال بتمل احنا كله نفتر بالمجمع ملينا


لنكاوي وايد فيها اماكن بس لاتروحين مجمعاتهم اساسا ماكو الا مجمعين ثلاث ومو مال تسوق جنهم سوق شعبي بس اقصد اماكن طبيعيه

رحنا ليلتين وصلنا المغرب راح علينا يوم لان المغرب كلشي يسكر وكل الرحلات البحريه والنهريه تخلص المغرب

اذا نزلتي مطار لنكاوي بيوزعون عليج منشورات من الشركه العربيه راعيها اسمه عمران انصحج فيها اسعاره حلوه وخدمه ممتازه حتى ثاني

يوم يدق يتطمن اذا في قصور او مشكله وعقبها رحنا بيننغ وصا واحد ينطرنا عند المحطه انا حسافه ماعندي رقمه جان عطيتج

روحي الرحله النهريه حلوه وممتعه

روحي الاكواريوم حلو


بيننغ لازم تروحيلها حلوه الشلالات وحديقة الفراشات والمعابد والسوق الليلي روعه وانصحج بمطعم اسمه لبنان لذيذ يم فندق هوليداي ان



جنتنغ ماتسوا تنامين فيها روحيلها يوم من كوالالمبور من الصبح لليل لانها عباره عن مدينة العاب يعني انتي مع ريلج بروحكم بدون يهال


بس دشوا اللسرك اللي هناك يوميا الساعه 9 اكو عرض ودشي لعبه اسمها belive it or not

هذي حلوه تعرضلج صور ومجسامات وفلم عن اشياء غريبه ماتتصدق احنا ظلينا داخلخا انا وريلي يمكن ساعه او اكثر نصور ونقرا

كوالا هي حق التسوق بس وارخص من الجزر وعشان الوزن بعد ترا الطيران الداخلي يشق شق بالوزن

روحي بكوالا المجمعات اللي بشارع العرب وحديقة الحيوان عجيييييبه صج تسوى وتشوفين اغلب الحيوانات يمج سورهم مو عالي

حتى النمر والاسد يفصلج عنهم نهر صغير مو نفسنا سور وسجن

روحي الماينز العصاري وكبي القارب قبل لاتغرب الشمس وااايد حلو

الفنادق :

لنكاوي قعدت بهوليداي فيلا مانصحج فيه مو حلو بس يمدحون فيل فيو بيتش

بيننغ هوليداي ان قعدت فيه يههههههههههبل

جنتنغ فيرست وورلد مانصحج فيه لاتقدين بجنتنغ ابد بس روحيلها يوم واحد بس

كوالا قعدت بنوفوتيل يهبل ويم شارع العرب

لاتنسين بشارع العرب مطعم ناب الايراني رووووعه طعمهم بحجلي ودي اكل الروب مالهم عجيييب واللبن لايطوفج والبرياني

وبعد مطعم الطربوش مقبلاته تهبل

واذا تبين اي شي امريني

 

[Judy abbott]

هلاا حبيبتي
انشالله افييدج :>
انا رحت تقريبااا 15 يوم لاني مع قروب (ماليزيا+ تايلند)
بقووول عن تجرتي
جوفي اول شي روحي كوالامبور قعدي 5 اياام << تستاهل اكثر الرحلات فيهااا والمجمعاات( حديقة الفراشاات +حديقة الطيوور +حديقةالوروود +مصنع الجلود+فندق الاحصنة+ الشلالات لا ايطووفكم وناااسة بس ايتعب او حر)
صنواي لاقوون << روحي زيااره حقهاا ما تستاهل اتنامين فيهاا حق يهال (اهياا بالعاصمة كوالامبور)
قعدي يوووم بجنتنق الصرااحة برااد والصبح الجو عجييب وغيييم
بييننغ<< قعدي فيهاا يوميييين وااايد رحلات فيهاا (حديقة الفواكة +المعبد+حديقة التوابل+حديقة القروود ... وايد اشيااء نسيتهم ) غير البحر ورحلات الصبد غير سوقهم الشعبي الي على الشارع وايد حلوو او عندة اشياء غريبة ورحي بلازا وااايد عجبني السوووق
بعديين روحي لنكاوي قعدي فيهاا 2 << وايد ناس مادحينهااا بس حسافة ما رحتلهاا
اخر شي روحي افاموزاا << صج الفندق اللوع الجبد بس واايد حلو المكان( عندج سوووق اتروحولة بسيارة ساعة الا ربع يبيلة تقريبااا 6 ساعات لانة ما في مطاعم بافاموزاا ولا شي ويووم كااامل اتروحون حديقة الحيوان فيهاا سينما او عروووض الحيوانات اخر شي مثل مسيرة او سيرك عجيييييييييييييييييييييييييييب كان وناسة
وانشالله تعجبج الرحلة او سوري ناسية اسم الفنادق بس اذكر اب بييننق هوليدي ان :s
يعني رحلتج (5 ايااام كوالامبور+يوم جنتنق+يومييين بينيينق+يوميين لنكاوي+يوميين افاموزاا)
وبالتوفييق انشالله

 

[شذي الفردوس]

عمشه مشكوره يا قلبي والله انتي ميه ميه
ربي يسهل لج امورج ويسعدج
كتبت الي قلتيه واسماء الفنادق
ما قصرتي
juddy شكرا حبوبه وربي يفرحج ويسعدج دوووم
والله البنات عندنا اكثر من خوات
كفايه انهم يعطون من وقتهم للمساعده
ربي يسعد بنات المنتدى كلهم ويوفقهم
بناات بعد ابي تجارب واراااء
يالله ترى كلشوي ادش واجيك
ابي اروح استانس واتوفق بالسفره لان بطلعة الروح مودييني ,,, ماكو اجازات
ناطره الحلوين ولهم دعوى من القلب

 

[المتألقة]

هلا والله حبيبتي انا رايحة مليزيه من قبل وانشاءالله بروحله يوم الخميس وبالصراحة انا لمن رحت لها كانت واااااايد حللللوه بس بالضبط مااتذكر الاماكن الي فيها وانشاءالله اذا رحت افولج شنو احلى الاماكن والقنادق وادزلج رساله

 

[نور النهار]

بصراحة البنات كفو ووفو والكل ماقصر ...

وانا اضم صوتي لهم احلى الاماكن بينبنغ,جنتنق,لنكاوي,صنوي لاقون,كواللمبور.

 

[شذي الفردوس]

المتألقه:
حبيبتي ربي يرجعكم بالسلامه وتستانسوووون عدل
يالله ناطرتج وناطره الاخبار الفرش من هناك
ربي يسهل عليكم ويوفقكم بسفرتكم
نور النهار: مشكوره يا قلبي ربي يسعدج ويوفقج
ان شالله راح اروح الاماكن الي قلتوا عنها
الواحد طاق طريج وتعنى لازم يزور ويشوف كل مكان لو يوم عشان ما يتحسف
الا الاماكن الي ما يمدحونها ما اضيع وقتي لان روحتنا محدوده
اجازته بس 14 يوم مع الروحه والرجعه
فعشان جذي ابي البنات يقولولي جدول عدل مدل حده بحده
والله ما تقصرون ربي يفرح قلوبكم
دعوة ام محروووومه ودعواتي مستجابه باذن واحد احد
حشى مو سفره هذي خخخخ
بس انا وايد يعجبني الي يساعد لله
ناااطره الباقيييي!!!!