تدرون شنو اكتشفت

[بنت النخيل]

اكتشفت انه ولدي حبيبي مو توحد وكانوا مشخصينه غلط كل هالفتره انا كنت حاسه من زمان انه مو توحد وانه تاخر عقلي بسيط ممكن انه ندربه ويتعلم وكنت ماشيه معاه زين اول الامر بس لما قالوا توحد تكاسلت شويتين واكتشفت هالشي اليوم بفضل الاستاذ احمد لانه قعد معاه ساعه وقال اللي يشوفه من اول مره يقول توحد لكن اللي يشتغل معاه يبين انه مو توحد
لانه تواصله زين وهدوءه ممتاز وتنفيذه للاوامر مضبوط بس معاه صفات توحد مثل رفرفه اليدين والحركات النمطيه الثانيه

وان حابه انكم تساعدوني بهالشي وتعطوني برامج اقدر اعلمه فيهم علي كل المهارات اللي يحتاجها تكفون ياخواتي لاتخلوني

لما يجي الموعد الثاني للجلسه

وجزاكم الله خير مقدما

 

[om deaj]

اول شي الحمدلله انه مو توحد
وثاني شي جان طلبتي من الدكتور نفسه تدريبات تساعده افضلج من لاحد يفتي عليج

 

[بنت النخيل]

مشكوره اختي ام دجي اهو قالي بعض الاشياء بس انا ابي اشياء موسعه مثل شنو الاولويه بالتدريب

 

[ام نوونه]

الحمدلله يارب

التشخيص اهني ماشالله عجيييب

انشالله البنات يساعدونج

 

[مشاعل الشمري]

الحمدلله وسجدي لله شكر وعرفان
والتشخيص لا تستندين له دايم خصوصا لما يقولون لج توحد والتدريب يعدل السلوكيات الصعبه مثلا
1استعمال الصور الايضاحيه للصح او الغلط
2تقعدين يدامه اذا كان ما يطالعج بعينه وتمرنينه على انه يتواصل معاج بالنظر
3تحاولين تدخلينه نادي او تشركينه مع عيال عمه او خالاته باللعب
4كل ما يسوي شي صح تعطينه معزز لان الطفل يحب الهدايا
5تصرين على رايج يدامه ولا يضغط عليج بالصراخ اوالبكي
هذا اللي متذكرته وانشاءالله يفيدج

 

[دمعه ندم]

مبروك ياقلبي والله يفرح قلبج اهم شي انه مو توحد لان التوحد شي صعب بصراحه
واحنا عاد بتشخيص حدث ولاحرج حبيبتي بسألج الدكتور احمد هذا وين صاير؟

 

[& الذاهبه &]

الحمدالله والله يقر عينج فيه .. تصدقي وسجدي لله شكر

حبيبتي لاتعتمدين على التشخيص

ابدي مع ولدج خطه علاج ( حضانه - استاذ تخاطب )

انتي قصدج احمد البرماوي ؟؟؟ والا دكتور ثاني بالتطوري

وانشاء الله تشوفين وليدج مشافى معافى باذن الله

 

[بنت النخيل]

جزاكم الله خير خواتي ما قصرتوا
ابه يا الذاهبه انا اقصد الاستاذ احمد البرماوي صراحه ما قصر وفهم لولدي علي طول

 

[& الذاهبه &]

بس اهو استاذ تخاطب مو دكتور ويشخص الحالاات ؟؟

اختي ديري بالج كل شي يهووون الا التشخيص اخذي راي اكثر من دكتور متخصص بطب الأطفال التطوري

انا بنتي شخصتها عبير وماخذتلها موعد بالتطوري بعد وبشوووف شنو يقولون

الله يطمنج عليه ما ابي اخوفج

بس عرضيه على دكتور متخصص احسن

 

[بنت النخيل]

حبيبتي الذاهبه لاخوفتيني ولا شي ولدي كانوا مشخصينه التطوري الدكتور عبد الرضا علي انه تاخر عقلي مع صفات توحديه

بس انا مثل كل ام ابي اسويله كل شي رحت لمركز التوحد وحجزت عند الدكتور ادم وقعدت انا وابوه واهو مع بعض ماسواله اختبار بروحه اعتمد علي كلامنا والحركات الي يسويها وكان كلام الدكتور قليل انا كنت اتكلم اكثر منه وبس قام جان يقول توحد انا ماكنت مقتنه بكلامه
كنت مرتاحه لتشخيص التطوري بس مادري شالي ضربني علي راسي وخلاني اروح لمركز التوحد لاني اعرف ولدي زين موتوحد لاني اقرا عنهم بكثره من سنه98 بس قدر الله وما شاء فعل والحمدلله علي كل حال

وعلي فكره الستاذ احمد اخصائي تعديل سلوك مو تخاطب

 

[الصابرة المحتسبة]

الحمدلله على كل حال

ويعل ربي يطمن قلبج أكثر وأكثر

تفضلي

- - تعليم أطفال التوحد (بالصور) (http://www.q8yat.net/showthread.php?t=539813)

 

[& الذاهبه &]

الحمدالله انا حسبالي بس ماشيه على تشخيص استاذ احمد

الله يطمن قليبج عليه

دخليه حضانه عاديه

انتي نفسي بالمنطقه الرابعه .. في حضانات شكثر بعبدالله مباارك

سويلج جدول للصيف وخلي عيالج او عيال خواتج يساعدونج وقت لما تكونين مشغوله

روحي تويز ار اس العاابهم تهبل وتعليميه

ونصيحه قطعي التلفزيوووون خليه يطالعه بس وقت الأكل

والله يطمن قلبج

 

[بنت النخيل]

مشكورين خواتي والله يجزاكم خير ماقصرتوا

ومشكوره اختي ياالصابره علي البرنامج

حبيبتي الذاهبه وين مكانه تويز بالضبط وشنو الالعاب الي تفيده
انا ادري اني ثقلت عليكم بس ميخالف تحملوني

 

[& الذاهبه &]

يا هلا اختي

توني جايبه بنيتي من جلستة التخاطب سوري تأخرت عليج

ولاتقولين ثقلتي علينااا ترى ازعل منج

شوفي تويز ار اس تلاقينه بمجمع 360 تحت بالسرداب صوب جمعية جياان

 

[بنت النخيل]

يارب ياعليم يارب ياكريم ياربي ياعظيم اشفي بنت اختي الذاهبه شفاء لا يقادر سقما وارزقها من حيث لا تحتسب علي مساعدتها لي
والله يااختي اني كالغريق الي يتعلق بقشه جلسات التخاطب الي تخذينها حق بنتج في مركز سالم العلي شلون اروح لهم يستقبلوني ولا لا

 

[& الذاهبه &]

تسلمين على هالدعوه ولكي بالمثل اختي (( جتني البجيه ))

الله يكشف همي وهمج ويفرج كربتج ،، انتي اختى والي تبين انا حاضره ،، والله اكتب وامش دموعي ،، الله يشرح صدرج

لا جلسات بنتي مو بسالم العلي بنتي تاخذ جلسات عند استاذ ابراهيم بحضانه كويت دريم سنتر

 

[بنت النخيل]

تسلمين لي اختي الذاهبه ماقصرتي والله يخليلج بنيتج ويقر عينج بشفاها

( وليس ذلك علي الله بعزيز )