واليوم الثاني رحنا نتريق في المطعم لأنه حجزنا شامل مع الإفطار بس للأسف ما عجبني أكلهم
وهذا اللوبي المعلق وإلي يودي للمطعم و المسبح
وهذي صور المسبح وشفتو البرج الأزرق هذا فندق إنتركونتيننتال
أنطباعنا عن الفندق ممتاز ونظيف و العاملين فيه بشوشين خصوصا مع الأطفال وكرماء عكس بايا هوتيل البورصة كل يوم يحطون ماء و عدة الشاي والقهوة من غلاية وغيرها
وهذي صور غدانا في مطعم عراقي تركي بالشارع إلي يفصل فندقنا عن التقسيم والتقسيم يبعد مشي على الأقدام 5 دقائق وبشارع المطاعم مطعمين من المفضلين بيتزاهت وماكدونالدز
وكان المجموع مع 3 بيبيسي + 1 عصير برتقال 57 ليرة
وعقبه رحنا للتقسيم وبرأي التقسيم ما شفنا شئ من إلي يحذرون منه إن فيه نصابين ولا أشكال سيئة
وهذي صورة شارع المطاعم يفصل عن ميدان التقسم وعند الميدان باصات أوروبا الحمراء السياحية وعند بعد السلطان أحمد تاخذ جولة بإسطنبول التاريخية
وهذا أحد الطرارين بس بأدب يحرك الكورة بحركات بهلوانية
هذا مطعم برجر كينج مرات أخوي وأختي يتعشون فيه ونقعد بالسطح وجو حلو بس المدخنين الطاولة على الطاولة
وهذي قطاوا فريج التقسيم هههههه وأأختي من زوود الشجاعة توصوص ( تناديها ) لها ولا تجيها هالقطوه وتصيح من الخوف هههههههه والخارج يضحك هم داخل بناية أتوقع كنيسة ولا شئ
والترام الأثري
ودخلنا هالمول الموجود بالتقسيم وقعدنا بالكوفي وطاولتنا في البلوكونة وتطل على التقسيم
ومرو وأحنا قاعدين بالكوفي فرقة عسكرية موسيقية تعزف بالترام
وهذي الصورة في أحد الليالي في ستاربوكس وصار هو عشانا وغدانا أنا والوالد بس أنا أطلب موكا والوالد كوفي سادة ونتشارك في تشيز كيك فراولة والسبب يبين في ليلتنا الثالثة
وهذي صور الميدان يا حميدان وكنا نقعد فيه دائما لحد الساعة 12 ولا شفنا شئ من إلي يحذرون منه وفيه بياعين متجولين يبيعون مثل النباطة بس حلووووه مو يرمونها على عيونا بالصخر مثل الخليج الله يهداهم تروح مثل الصارووخ فوق وطلع ليت وبياعين ماء وشاي
وهنيه يلعبون عيال الخليج مع بعض كرة قدم ومع نباطاتهم الحلووووه
ونرجع لفندقنا ونام للأستعداد لليالينا الإسطنبولية ويحصل ما لم نتوقعه
وقعدنا من النوم بكامل النشاط ورحنا للنتريق بالفندق ونطلع لأسطنبول ولا ندري شنو بيصير لنا ويتغير جدولنا
وكان جدولنا
جسر غلاطة ــ ساحة امينونو ــ والجامع الجديد ( السيلمانية ) ــ سوق التوابل المصري Egyptian Bazaar ـــ برج غلاطة Galata Towerوأخيرا جولة بالبسفور لأنه نفس المكان
رحنا لساحة أمينونو مع التاكسي والحساب كان 29 ليرة
أمينونو تحتوي على جسر غلاطة ويتكون من طابقين الأول للسيارات أكيد وإلي تحت لمجموعة مطاعم ومحلات بسيطة والأتراك يحدقون الأسماك وسوق المصري ( سوق التوابل ) ومسجد السليمانية ومراكب مطاعم تشوي الأسماك و محطة ركوب العبارات للتجول بالبسفور وحافلات
وهذي صورة من جسر غلاطة بس ما رحنا تحت للظروف وتحت في أتراك يحدقون الأسماك وسطرة من مطاعم وكوفيات ومحلات
وهذا برج غلاطة حلو نصعد الرج بين الغروب والمساء لمشاهدة إسطنبول
وبعد جولتنا بالسوق المصري وجامع السليمانية قعدنا بأحد المطاعم والكوفيات نشرب القهوة والشاي ونطالع الناس وناخذ راحة
وهذا سوق الزهور
كان يوم مشمس ولا نشوف الوالد الله يشافيه ويحفظه لنا تعبان مو معانا في وادي ثاني أثاريه تعبان من نمنا ولا علمنا من أمس قام عليه القولون دائما يشتكي منه + ضربت شمس فرجعنا للفندق وعاد إذا صار جذي بالكويت الوالد الله يشافيه ما يطلع من البيت كذا يوم والله يهداه ما يحب مراجعة الأطباء
فرجعنا بسرعة للفندق الساعة 3 العصر ولا كان لنا نفس نطلع الراحة أولا فألغينا برج غلاطة وإلي تحت جسر غلاطة و البسفور
قعدنا من النوم الساعة 9ص ورحنا الساعة 10 للنتريق بالفندق والحمدالله تريقنا ورجعنا الغرف لأنه ما ودنا نطلع علشان الوالد الله يشافيه لين طلعنا ورحنا الساعة 2،30م إلى السلطان أحمد
وزرنا هاليوم ( السلطان احمد ( المسجد الأزرق ) ـــ صهاريج الماء المدفونة Yerebatan Sarayi ـــ أرستا الشعبي Arasta Hall ـــ اورتاكوي مساءا
البداية وصلنا منطقة السلطان أحمد ومليئة بالمتاحف بس الوقت ما كان في صالحنا وصلنا الساعة 3 العصر هو قريب بس التاكسي والزحمة أخرتنا
فدخلنا الساعة 3،10 العصر صهاريج الماء المدفونة
صهاريج الماء البيزنطية Yerebatan Sarayi مواعيد الزيارة يومياً ماعدا الثلاثاء من9ص-7م. والتذكرة 10 ليرة والدليل السمعي باللغة العربية 5 ليرة
فخلينا طلعتنا الساعة 2 الظهر رحنا مجمع جواهر نتسوق
قعدنا بهالكوفي وطلبنا خفايف كراسون جبن وحلوم وعصائر وقبل مانطلع كان أخوي يلعب بالألعاب ولا في صالة بولينج وطلب نتبارا الحمدالله غلبته مرتين
وطلعنا من المجمع الساعة 5،30
ووصلنا إلى أمينونو علشان نركب العبارة والجولة بالبسفور من ميناء أمينونو والتذكرة للكبار والصغار 10 ليرة لمدة ساعتين وتوقف في كذا محطة إلي يبي ينزل ينزل والأحسن يكمل لين أمينونو
وهذي الصور
وهذي المراكب إلي فيها تشوي الأسماك الوالد الله يطول بعمره وأخوي شرو صمون بسمك مشوي
وهذا الطير الوحيد إلي قدرت أصيده ولا الباقي الفوكس خرب عليهم
قعدنا من النوم الساعة 12م ونتجهزنا وخلصنا الشك أوت الساعة 1م وخلينا الجناط عندهم علشان الوقت عاده مبكر ولازم نكون بالمطار 7،45م
رحنا للتقسيم وتريقنا بستاربوكس وطلبنا كلوب ساندويتش مع عصير برتقال ودخلت غاب بالمجمع الموجود بالتقسيم وأشتري هدايا للأحبائي عيال خواتي عبادي ومناوي وترا هم السبب في تأخير التقرير لأنه كل شوي يسحبون بلاك لابتوبي خصوصا عبادي عمره سنة ونص الله يطول بعمره متعلق فيني
ورحنا عقبه الساعة 3العصر إلى دولمة بهجة
دولمة بهجة Dolmabahca Palace
دولمة بهجة Dolmabahca Palace يبدأ * مسجد دولمة بهجة Dolmabahca Moque * برج الساعة Clock Tower * بوابة السلطان Sultan Gate * حديقة السلاملك Selamlik Garden * والأهم القصر Selamlik والثاني قسم حرملك Harem يفتح يوميا ماعدا الأثنين والخميس من الساعة 9ص ــ3م والتذكرة لدخول القسمين 20 ليرة ـــ او تذكرة القصر 15 ليرة و قسم الحريم القصر الوردي 10 ليرة يمنع التصوير بس وأنا أختكم غلبتهم وصورت هههههههههه والخوف راكبني وحتى وقاعدة أكتب السطور أتخيلهم يكتشفوني
