تعالو عطوني رايكم وتجاربكم بالحمال ورا بعض

[ام برروك]

السلام عليكم ..... شلوونكم... انا اليوم حابه اخذ رايكم بهالموضوع ياليت كلكم تشاركون او ترفعون الموضوع عالاقل بنات وش رايكم بالحمل ورا بعض يعني يكونون عيالج مابينهم فرق وايد بالعمر منو يأيد هالفكره انج تيبينهم مره وحده وترتاحين:eh_s(10): وعشان هم بعد يتربون على قولتهم مع بعض ويكبرون مع بعض انا اعرف ناس ماشاءالله عليهم ييبون 5 او6 فوق بعض في بدايه اعمارهم يقولون عشان يبيون يفتكون ويتفرغون حق انفسهم وازواجهم وعشان من بعد 30 مايبون حمال وتعب تبي كل وحده تهتم بنفسها وترتاح وش رايكم منو مرت:bbbiu: بهالتجربه

 

[اخت خالتهم]

بالعكـس آنـا أشووفـه هـدام للطفـل .. خاصـه انهم صغـار شوفي ممكن اثنين ورا بعـض

بس أكثـر لااا من رايي
يعنـي أعرف وحده تبارك الرحمن تزوجت و حملت ورا بعض كل سنة حامل ما شاءالله
و كاهي متوهقة ولا مستانسة بالعكس راح شبابها يعني عمرها 26 و عندها ما شاءالله 5

آنـا أقول لو الوحده تييب 2 و بالعشرينات أحسن و آخر العشرينات اول الثلاثينات تحمل واحد كافي
واذا تبي زيادة اثنين

زمنا تغيـر و زمن صعب يبيله الأم تراااقب ولدها عددددددل و تربيه عدددل
لان قمنا نشوف حتى عيال الحمايل يغلطون و اللي نشوفها ملتزمة بنتها من وراها تخربط مو الكل طبعا
بس زمن يخرع
شلون زمن عيالنـا ؟؟

آنـا عن نفسي أفكـر أييب اثنين بسسسس و اذا صار عمري بالثلاثينات أشوف اذا اقدر أو لا ..

زمنـا يخرررع ولازم نعرف شنو نربي ..

بس آنـا عن نفسي ما أييـد يكونون ورا بعد على الاقل سنتين بين الاول والثاني
و 6سنين بين الثاني و الثالث

 

[ام برروك]

بس يقولون كل ماتاخرت الوحده بالحمل صارت ولادتها اصعب لان سبحان الله بعد السنه ونص يرجع كل شي لطبيعته بجسمها

 

[Zaina-al-zaina]

انا من راي اخت خالتهم

 

[اخت خالتهم]

عيل ليش يقولون الام مدرسة اذا اعددتها اعددت شعبا طيب الاعراقي
يعني تخيلي 5 صغار من سنة لي 5 سنين
شلون بتربين واحد واحد هذا اذا مو الخدامة قامت تسوي شغلهم

فرق اذا واحد والا اثنين تربينهم عدل

شوفي اللي عندها 5 او 6 صغار وايد واللي عندها 1 او اثنين تلقينهم فاهمين اكثر من غيرهم

 

[قموشه21]

اخت خالتها كلامها درر وكل اللي قالته 100%

 

[Um Ritaj]

انا عندي خمسه اسم الله عليهم وحامل بالسادس

عيالي الي بينهم فرق ثلاث او اربع كلش مو متوافقين وعيالي الصغار الي ورا بعض يلعبون مع بعض ومتفاهمين اكثر من الكبار

والحين عمري ٣٠ وان شالله اخر حماله وبتفرغ لنفسي

بالعكس الحماله ورا بعض تخلي الطفل اكثر اجتماعيه وماراح تقصرين باي حق فيهم لا تروحين لذاك الراي بالعكس احلا شي سويته يوم جبت عيالي الثلاث الصغار ورا بعض

لا تقولين ماراح تتفرغين لتربيتهم بالعكس تربيتهم وحده ويقلدون بعض يعني علمتي واحد جنج علمتي الباجي وسبحان الله بينهم تجانس وتوافق طبيعي من الله عكس عيالي الكبار الي بينهم فرق ما بينهم توافق او تجانس

 

[FJ style]

ابدا ما أؤيد

انا بين عيالي 3 سنين
يعني علما اييب الثاني الا اللي قبله دش الروضه او كان بالحضانه اصلا

كل طفل يحتاج وقت وعنايه
وغير التدريس لي اكبرو علما تدرسين لكبير الا تعلم يدرس بروحه وتتفرغين حق اللي قبله
هالزمن غير
وشدعوة اذا يبتيهم ورا بعض بتفتكين
كا احنا حريم اشكبرنا ولي يومج امنا تحاتينا وتحاتي اخواننا الصبيان

اللي بتييب ورا بعض اذا مو ربة بيت ما انصحها ابدا
والا حرام ماراح تعطيهم حقهم من الرعاية والعناية والتدريس والحنان وووو
وبدال الخادمة ثلاث
اما اذا في فرق
الاخوان الكبار يعينونج برعاية الصغار وتعلمينهم المسئولية ويكبرون معاج

ولا تفكرين بالحمل والانجاب ان هم وبنخلص منه
هذي نعمة انتي محسودة عليها

اما اللي تقول ان وراب بعض احسن للجسم
طبعا غلط
جسم المراة يرد عافيته ويستعد للي بعده بشكل افضل وكا الحمدلله ولاداتنا سهالات وكلما كان الطفل الثالث والرابع اسهلت الولادة لا تحاتين

اما اذا كنتي متزوجة ع كبر
اي ممكن نقول ييبيهم ورا بعض بسبب فرق العمر وتاثيره عالجسم اما غيره لا

 

[ام برروك]

والله صج اذا فكرتي فيها من ناحية التربيه صعبه شوي بس اذا فكرتي فيها انج تيبينهم وترتاحين يعني مو معقوله بعد ما اولد اجلس اضبط بعمري واسوي رجيم وكريمات وطبعا مايصير كل هذا الا بعد فتره يعني اقل شي سنه على مايرد لونج وجسمج ورشاقتج مثل اول مايمديني اخلص اهتمام بنفسي عشان ارد مثل اول الا مرت سنتين او ثلاث وارجع احمل مره ثانيه ويعتفس كل شي من جديد عشان جذي انا اقول انه تيبهم مرره وحده كلهم وتفتك عشان تتفرغ لنفسها

 

[أأأميرة الورد]

وراء بعض احسن صج تعب ومسؤلية بس على الاقل مرة وعقبها ترتاحين
وفي امووور ثانية تحكم الوضوع وهي اذا الام ربة بيت يساعدها هذا

 

[الهيــام]

حسستيني ان الحمال هم تبين اتيبين وتفتكين
حبيبتي فكري في عيالج كل ياهل له حق عليج وجسمج له حق عليج
وريلج له حق عليج
شلون بتوفقين بينهم كلهم
الحياه صعبه الحين الوحده يالله يالله تلحق على هالطلبات اللي ماتخلص
فكرري عدل والله يوفقج

 

[ام - وهابي]

انا حملت ورا ولادتي بثلاث شهور وراح يكون بينهم سنه بالضبط ان شالله
بس بتكون اخر مره لانه تعبت تعب مو طبيعي وصرت جني عيوز وانا توني ٢١

 

[غرور الريم]

انا ماييد ورا بعض لنتي راح تتعبين جسمج وعيون خلق الله عليج يعني بين اول وثاني سنتين حلوو
والثاني والثالث ثلاث سنين وكذا راح تترتاحين

 

[Um Ritaj]

هل تضمنين ان ما يصير شي يوقف الحمل عندج؟؟
خالتي جابت اول ولدين وقالت تبي ترتاح جم سنه وعقبها تحمل وصارلزوجها حادث بسيط انه طاح علي ظهره بس هالحادثه ادت الي عقمه
وجم وحده معاي في الدوام صار معاهم مشاكل بالرحم ( اما تكيس المبايض ووحده اسم الله علينا فيها ورمه فجاه اطلعت لها) ادت الي توقف حملهم اسم الله علي الي يقرون

فمسكينه الي تضمن ان الزمن مو غدار

هذي وجهة نظري حبيت اقولها

وبالاول والاخير القرار لج