تعبت من الصداع النصفي

[al.zena]

الله يخليكم ويوفجكم ابي حل للصداع اللي اعاني منه يوميا اكل مسكنات وماكو فايده ابي دكتور او اي معالج طبيعي او احد يعطي نظام غذائي اي شي واي مكان مستعده اروح

 

[جنوني عيونك]

حتى انام مثلك مره قريت تجلسين بمكان مظلم مثلا
بغرفتك وتطفين الليتات بس تضلين مفتحه ومسسترخيه وشوي شوي يقل لوو ماراح الصداع كله
انا يجيني مثلك صداع احيان اسببابه عضويه من العين او الأذن
شكلك تفكري كثير وعلى طول تاعبه نفسسك او كلا تبكين ريحي حالك
اتمنى لك الشفاء العاجل

 

[الدره الصافي]

ليش ما تروحين مستشفي العرف في دكتور زائر متخصص بصداع النصفي

 

[دارين العنبر]

اسم الله عليج ما عليج شر ان شاء الله
اختي انصحج بالحجامة النبوية ممتازة وخصوصا للصداع شوفي احد متخصص وسويها وبترتاحين ان شاء الله وابحثي واقرأي عنها عشان تقتنعين

 

[koky alnassar]

عزيزتي انا اعرف وحده نفسج و اقرب الناس لي معاها نفس الي معاج انتي و سالت متخصصين كبار بهالشي ودكاتره الزائرين الي من اوربا و امريكا و الهند وغيره ونفس الحجي وفحصت الاذن و العين و الراس و كل هالامور سوتها وما في فايده


و الدكتور قايل بالحرف الواحد هالصداع ما له علاج الا الراحه وما اكتشفو له علاج لانه غالبا ما يكون وراثي يعني بالجينات الوراثيه نفسها

بس لو فعلا تبين علاج و باذن الله تطيبين الحجامه مثل ما قالت الاخت دارين العنبر وباذن الله بتتشافين و سوي كلام الدكتور ريحي بالج و ريلاكس ولا تنفعلين على اي شي و ديري بالج تروحين لاي دكتور لانه ساعات يكون فيه دكاتره ما لهم خلق شي تشرحين له و توصفين له مدى الالم الي يجيج يعطيج حبوب الاكتئاب و المشكله هالحبوب يا حلوه فيها بالكرتون ورا 40 تحذير و غيرج الي معاهم هالصداع صارت فيهم هالحركه وبعضهم لحقو على عمرهم وبعضهم الله العالم شصار لهم من جذيه تحذري و الكلام لج و كل بنت تدخل على الموضوع سالفه عوار الراس ما فيها لعب يعطونكم اي علاج غير البندول فكري فيه مليون مره قبل ما تاخذينه و سالي عنه .. و تحياتي لج والله يشافيج و يعطيج الصحه والعافيه

 

[سر النور]

وفيه شغلات تسبب صداع مثل التهاب الجيوب الانفيه وانتي ماتدرين او نقص فيتامين د سوي لك تحاليل وتاكدي اذا اوكي سليمه فبعدي عن الدكاتره ودوري اللي يسمونه طب عرب

 

[7elwa&3soola]

اختي انا امي تعاني نفسج وخالتي بس فيه حبوب من المستشفى الحكومي تصرف للصداع النصفي ​

حبوب صفر صغار مدوره تسميهم امي الحبوب الصفر للصداع النصفي لوول قولي حق الدكتور راح يصرفهم لج​

وفي شغله ثانيه الحجامه اشتري آلة الحجامه موجوده بأغلب الاسواق الشعبيه ​

وكل ماحسيتي بالصداع حطيه ع مكان الألم خالتي تسوي هالطريقة ومرتاحه حيل عليها بس بدون دم​

مجرد انج تحطين الكوب وتشفطين الهواء وتخلينه 5 دقايق وتشيلينه راح ترتاحين وادعي لي

 

[koky alnassar]

اكيد الحجامه شي ينفع و سوي نفس ما قالو لج البنات فحصي و اذا طلع ما فيج شي ترا عادي هذا شي يكون جيني بالجينات نفسها و تتعالج بالحجامه و الراحه النفسيه اما دوا و طب كله مجرد مسكنات لا اكثر لانه هالصداع من الامراض الي حيرت الدكاتره الله يذكره بالخير دكتور جوين البلغاري متخصص و قال هالموضوع ما له علاج ابدا ابدا الا الراحه والله يشافيج

 

[للخير نمضي]

الله يشفيج اختي ويشفي جميع مرضى المسلمين

بس نصيحه لاتاكلين حبوب إلا وقاريه الاعراض يمكن تكون قووويه وتسبب لج اعراض

مرض الصداع النصفي اغلب الناس فيهم عليج بالحجامه والاستغفار

 

[Najla82]

قللي من السكريات وراح تتحسن حالتك ​

 

[روعة المنظر]

نفس حآلتي انا لما يصير فيني الصداع اكره نفسسي
قالي الدكتور لازم اقعد بالظلمه فصرت قبل لا انام اربط عيوني بالسكارف واحس الصداع يختفي واخلي يالليت مفتوح عادي
وكنت كله ع بندول اكسترا الاحمر

مع العلم انا فيتامين دال عندي مختفي مره وحده ~> منعني من الببسي وقالي اكثر اكلات فيها كالسيوم والحليب
وهم عندي ضعف نظر :/

والحين الحمدلله راح الصداع والله حيييييييل ارتحت

ولما يرد بس انسدح بفراشي واربط عيوني بالسكارف لما يروح الصداع عاد اقوم والحياه طبيعيه

والله يشفيج ويشفي كـل مريض ان شاء الله

 

[غلا-زوجي]

الحل الوحيد الحجامة

 

[jnon-bint]

حبيبتي انا اليوم فيني صداع النصفي الي ماتشوفين شي موبس صداع دايمن يجيني حتن عوار البطن شكلهم يتناوبون لووووووول انتي فيج انيميا اوفقر دم امكن في علاقه بينهم الاني فيني انيميا

 

[ياحلاتي قمر]

مثل حالتي بين تعبت منه وعندي الجيوب الانفية

 

[Blue Lily]

أسأل الله العظيم رب العرش العظيم أن يشفيكي وجميع مرضى المسلمين يارب

انا نفس الحاله عسى الله ياجرنا ان شاء الله
شكلي بجرب الحجامه

 

[شهرزاد الحكاية]

الله يشفيج ويشفي جميع مرضى المسلمين والله انا حالي من حالج تعبت من الصداع النصفي احسه وايد ينغص علي حياتي بس الحمدلله على كل حال تعودت عليه مؤخرا على المسكنات بندول بونستان وهالسوالف وساعات بالليل بندول نايت وانام الحمدلله الصبح يروح

لاتفكرين تروحين لاي طبيب ولاتاخذين اي علاج ...رحت طبيب الحكومة على اساس دواهم خفيف ومايضر عطوني دوا اكتئاب حسبي الله ونعم الوكيل فيهم ...يمتن و يتعب وكله ينوم .. ليما بطلت اللهم لك الحمد ...

حتى الكفرغوت رفيجتي يصرفونه لها بس يأثر على خلايا الذاكرة

مثل ماقلت لج خلج على المسكنات احسنلج انا صرت بس عليهم والحمدلله ​