تعتقدون مشروعي يمشي اذا بديت فيه؟؟؟ (محتاره)

[LUXURY]

السلام عليكم ورحمة الله وبركاته

يالحلوين انا اشتغل كروشيه وودي ابيع شغلي من بروشات وتيجان مزينه واكسسوارات وجناط وبلايز ونفانيف وودي ابيعهم اشرايكم قولكم يمشي والا لا؟؟ ماشاء الله اشوف الكل تعلم مادري اذا احد بيشتري والا لا

اشرايكم تشجعوني والا لا؟؟

بس مو سالفة اسوي واتعب واييب شغل زين وغالي ويقولونلي يبون يشترون برخيص

مثلا انا كنت اسوي عقود ب7 دنانير وحلوه وخرز زين

وودتهم اختي الدوام ما خذوهم ليش؟؟؟ لان وحده تبيع شغل مو حلو بصوف طالعه خبوطه وخرز رخيص ومو مرتب وتبيعه بدينارين ونص
شوفو الفرق


ورايكم ابيع بالمنتدى والا ادش معرض؟؟؟ لان جربت معارض ماكانت غاليه وايد يعني بيوت وما بعت وايد
ابتلشت

واي معرض اشترك؟؟؟

ناطره ردودكم على احر من الجمر:yaaaaaarb:

 

[فنتوقه]

شوفي يالغاليه بصراحه اذا شغلج نظيف وحلو توكلي على الله وفي بنات يبون شغل حي الله اي شي المهم رخيص حتى ما يكد معاها يومين وفي ناس تبي الجوده ومضمون وخاصة بالاشغال اليدويه يهمهم الفنشينغ لازم يكون نظيف وماا يهمها السعر
والمعارض حبيبتي لازم تروحين معارض معروفه ويكون دوس عليها والكروشيه مرغوب وعاااد انتي وشطارتج اشلون تكسبين الزباين وانا اقووول ليش ما تسوين عضويه تاجرة وتشوفين الاقبال منتي خسرانه شي لا تخلين شي يوقف شغلة انتي حابتها...ادري قرقت وايد بس ودي افيدج كثر ما اقدر وموفقه يااااااارب

 

[الباسمه]

شوفي حبيبتي مره اشتريت لخالتي دراعه من مشغل وحده كويتيه من بنات الدويسان بس والله ناااسيه اسم المشغل
المهم هو ورى مجمع البحر اللي بحولي
المهم كان فيه دراعه اعجبتني حيييييييل وكانت ب 200 وشي وسالت راعيه المشغل عن الغلااا قالتلي ان فيها شغل كروشيه ويكلفني لاني اوديه برى
المهم انا قلت لها في بنات كويتيات يتقنون هالحرفه وانتي تعاملي معاهم
وخذت رقمي بس ما دقت مع انها استانست على الفكره حيل
وللامانه المشغل راااااااااقي شغله حييييل
واذا انتي متقنه الشغله روحي للمشاغل وعرضي عليهم
انا اتوقع ان هالفكره افضل من المعاااارض وعوار الراااااس
اسفه على الاطاله

 

[منانا]

انا اقول توكلي على الله وجربي حظج بالمنتدى مشالله البناات ذويقين ويعرفوون يميزون بين الشغل بوطقو والشغل الرااقي وبصرااحه وااايد بناات يحبوون يشتروون الشي المتعووب عليه وسعره فيه والتجااره ترا حظ ونصيب وشطارة مع مغاامرة وانتي لا تسوين كمياات خليه عالطلب لان في ناس يبون موديلات معينه وصوري شغلج كله وسويلج كتالوج وعرضيه بالمنتدى عقب ما تسوين عضويه وان شاء الله بينفتح لج باب رزق لان الكروشيه مووضه

الله يوفقج ويوفقنا معااج

 

[فراشه]

حلو الكروشيه ان شاء الله يمشي توكلي على الله

 

[بيت التوت]

حلو شغل الكروشه عن نفسي احبه

بس قبل لاتبدين باي شي نصيحه استخير

يعني انتي استشرتي البنات

وخلاص نويتي صلي قبلها استخاره

واذا هالشي فيه خير لج ربج ايسهل امورج

واذا مافيه خير لج ............... بيبعدج عنه

واتمني لج التوفيج من كل قلبي

 

[أم عبووووود]

حبيبتي اذا شغلج حلو ومرتب حطي بالمنتدى وان شالله ربي يرزقج من الرزق لحلال الطيب

 

[AFRoDiT]

بالعكس والله نبي شغل كواليتي
واذا شفناه نظيف مانستخسر فيه الـ 7 دنانير ولا غيره ..

توكلي على الله حبيبتي

وبلشي شغلج

سوي نماين و خل شغلج ع الطلب عشان ل يطيح بجبدج شي


ولله ولي التوفيق

 

[بمبة المفترسة]

الله يعافي الصين الكروشيه بكل مكان وبأرخص الاسعاار

 

[LUXURY]

مشكورين بنات على التشجيع والردود وانا بديت اشتغل نماين
وان شاء الله اشترك بالعضويه واعرضهم


بمبه
هذا اللي اتكلم عنه في رخيص ومكود بس الغرز اهي نفسها ماتتغير والخيط مو ذاك الزود والشغل مو نظيف
روحي بركات قوليلهم يسوونلج شئ بتشوفين شاب نار
وانا ما افكر اسوي بسعر غالي كل الموضوع ان ابي دخل بسيط غير الاعانه
"قليل دائم خير من كثير منقطع"
ان شاء الله اذا سويت اشوقج وتكونين اول من يشتري وتغيرين رايج بالصين