تعلمت من الغرب ..واستمريت عند العوده للشرق :)

[UK_Girl]

صباح الورد ..
شلونكم يا حلوين ..اتمنى يكون الكل بخير وصحه وسعاده في مشارق الارض ومغاربها بحق رب العالمين ..
اولا عطروا افواهكم بالصلاة على نبينا وحبيبنا محمد صلى الله عليه واله وصحبه اجمعين ...

حابه يا حلوين نتعرف على الامور التي استفدتوا منها خلال تواجدكم خارج بلدانكم لفتره زمنيه طويله اما لدراسه او لاي ظرف اخر ..ولكي اسهل عليكم الوصول لخباياكم والتعرف على امور اكتسبتوها او تعرفتاو عليها في الغرب اليكم بعض النقاط ممكن توصلكم للنقطه المطلوبه ..

ومن تملك اضافات وخبرات وتجارب حياتيه اخري الموضوع موضوعكم قولوا اللي تبونه وكتبوا كل شيء في بالكم لكي تعم الفائده المرجوه من الموضوع ونستفيد من بعض ..

والمهم حابه اعرف هل التطبيق والسلوكيات اللي تعلموتها في الغرب مستمرين عليها في بلدانكم ؟؟
ام ان كل شيء يعود كما كان عليه حال وصول الطائرة لمطار الكويت الدولي وملاحظتكم لكم الخلطبيطه والخبيصه في مجتمعنا ابتداءا من المطار ((مثال الطابور وانعدام النظام تقريبا وعادي رز ويهك واخذ دور الهندي لان هندي ))و لغاية اي صدمة تواجهكم ...والتي احيانا من الممكن ان تحتم عليك التعامل بفكر وسلوك شرقي بحت عشان تعيش بمجتمعكم سالم غانم !! باختصار خل نكون صريحين وواقعين ونتعرف على العوائق في مجتمعنا ايضا والتي تعيق من حركاتنا ...مع ذكر الاسباب ..

المهم اليكم النقاط :
تقدم الفكر ونمط التفكير ..
تطور الكلام ..الفاظ ..اسلوب....الخ كل ما يتعلق بهالامر ..
الاتيكيت في التعامل بكافه النواحي..
تغييرات بالشخصيه ملحوظه ام مخفيه ((لاتخافون عبراو..اقصد مخفيه في امور تعلمناها ولكن في مجتمعنا لا نفصح عنها لانها ممكن تكون مذمومه شكليا واجتماعيا فقط لاغير))
قوة تحمل وصبر ..
قدرة على التكيف في كل الظروف والاماكن..مهما كانت..
تغيير عادات سلوكيه ،غذائيه ،الخ ..
نمط معيشه..
مبدأ..قناعه ..خلق..قيم...
طريقة واسلوب حياة بشكل محدد..
اخلاقيات محدده..
نظام معين ...

اذكروا كل جانب سلبا او ايجابا اذكروا يلي تبونه ..تره مدلعتكم ومعطتكم حريه الراي والتعبير

فواكهه تجاربكم الغربيه اعصروها هنا لنعمل كوكتيل يلتذ به الجميع ويستفيد منه الكل ..تره توزيع الكوكتيل مجاني بس الكلاسات ((الكوب)) عليكم

ملاحظه :نرحب بمشاركات الغير مغتربات لنرى وجهه نظرهم بهالموضوع من ناحيه النقاط المشار اليها ومن الممكن مناقشة العضوات فيها وعطونا رؤيتكم لها خل نشوف نظرتكم لنا شلون صايره؟؟ ......اذا احببتم شاركونا

 

[Om_il3ubed]

اللهم صلي على محمد وال محمد

والله مواضيعج حلوه ويعطيج الف عافيه


بالنسبه لي للحين مشواري بالغربه باقي عليه شهر وينتهي... بس صج صج صج الغربه تعلم وايد اشياء
من استراليا تعلمت النظام و اوقف بالكيوو وانطر.. هههه حتى مره بماكدونالدز بالكويت.. واقفه وحاطه مسافه بسيطه بيني وبين الي جدامي... جان تيي وحده وتدش!!! عفوا اختي ترى احنا واقفين دور!! ها وي مادري شفتج واقفه بعيد! (انزين يعني لازم الزق بالي جدامي؟)

انا شخصيا تعلمت البساطه ... يعني كول وسمبل سواء باللبس او الشكل .. يعني خبة بنات الكويت راحت مني (حتى البعض صار يقول وييي ماتعرفين تلبسين) وهم ماعليه لان الحياة هني تحتم علينا ان نكون عملييين!

شخصيتي الدلوعه الي كل شي عندي فشله وعيب راحت... يعني منو يتخيل ان انا كنت بركب باص ولا امشي بالحر عشان اروح المكان الي ابيه؟ لوول يرحم ايام السايق و الشغاله... بس هم شي حلو الي تعلمته و لما تزوجت كنت بنظر زوجي وحده يعتمد عليها (مايدري عن قبل لووول )

وبعد روتين حياتي غير نهائيا.. وحاولت قدر المستطاع اني اسويه بالكويت بس مايصير مع الزوارات و الاهل واهل الزوج صعبه وايد

الغربه خلتني ابطل عيوني واطالع بمخي وما احكم بقلبي (الحساسيه والعاطفه الزايده عن اللزم بيباااي) ولا الواحد ما راح يقدر يعيش هني

والله مادري بعد شقول وايد شغلات بس هذا الي يطري على بالي الحين
بس سؤال يظل محيرني.... الحين الوحده تحس انها تغيرت للاحسن لان بالنسبه لي كانت عندي وايد سلبيات والحمدله تغيرت... بس ليش بنظر المجتمع فلانه صارت مغروره من راحت تدرس برى ؟!

سؤال محيرنيي...!

 

[UK_Girl]

في اشياء مشتركه واااايد..نفس حالتي ..برد اتكلم واسولف معاج بالنقاط اللي قلتيها لان نفس مواقفج صارت معاي بالضبط.... والله خليتيني اضحك من قلب لدرجه دمعت عيني ههههههه سلم قلبج والله

واي شي حابه تقولينه او تذكرينه دشي اي وقت وذكريه وباجي العضوات اخذاو راحتكم الموضوع مفتوح لكم 24 ساعه

 

[Om_il3ubed]

والله شوفي حبيبتي انا احس ان اغلب الي صج راحوا ورى دراستهم جذي صار حالهم... ويعني هذا موعيب بالعكس الواحد يحب يطور من روحه ويتغير للاحسن....

بس للاسف الحال بالديره مايسر لا عدو ولا صدييييج!!
لا وبعد ياشين الاهل لي قعدوا يكسرون مجاديفج.. اذكر اول سنه لما طلعت نتيجة الفاونديشن واني خلاص دخلت الجامعه استانست ووديت حلو وجذي بيت يدي... وانا اوزع الكل يباركلي الا فلانه وريلها (وي بس فاونديشن هذا الي قدرتي عليه) !

وانا لسان حالي يقول ( انزين جان بنتكم نجحت لو صج) ومامرت السنه الى بنتهم راده بدون شهاده ومع ريل (يمه احبه ويحبني وكلولولولوش تزوجوا)!
والحرب للحين قائمه لووول ليما اخلص اخر شهر من دراستي واهما وراي وراي

 

[Om_il3ubed]

الذين يشاهدون محتوى الموضوع الآن : 2 ( الأعضاء 2 والزوار 0)
‏Om_il3ubed, ‏Australia girl


طحتتتت علييج

 

[Australia girl]

خوش موضوع والله ..كلامي تقريبا نفس ام العبد الله يعطيها الصحه والعافيه..وزياده عليه ..

تعلمت احترم جميع الجنسيات والحمدالله من قبل انا جذي بس الحين اكثر ..يعني اذا رديت الكويت الهنود وغيره راح اتعاميل معاهم بانسانيه ..لاني هني حسيت بالغربه واهمه الله يعينهم ..

 

[Om_il3ubed]

صاجه والله استراليه .. الواحد بعد يتعلم يقدر الوقت ويصير عنده حس باهميه الايام خصوصا لما يكون في اسايمنت ديو و وراه امتحان وقبله برزنتيشن... يعني يصير الواحد يقسم وقته مابين دراسته وربه ووناسته و تلقين الوقت يمممرررر ولا تحسين فيه

وتعلمت بعد ( easy come easy go ) المعلومه الي كنت اخذها بالساهل انساها ولي وقت الامتحان تطير... بس الدكاتره وطريقتهم انج بروحج تبحثين عن المعلومه خلتها تنزرع وماتروح لول

و مع اني مبتعثه عن طريق التعليم العالي وبنصرفلي معاش وكل شي... بس هم تعلمت اهميه الفلوس وشلون اوفر واحافظ عليها
يمكن البعض يعتبره بخل... بس انا اقول الفلس ينفع حق اليوم الاسود
يعني يصير غصبن علينا نقسم الفلوس مابين مصرف بيت و كتب واجار و نت و طلعات و غيره من الاحتياجات الاساسيه

 

[UK_Girl]

ابييييه ام العبد تره الحال من بعضه وبعد استراليا غيرل اهلا فيج وبكناغر استراليا كلها

صح في تحدي مادري ليش يصير! ..بس اذا تحدي شريف ميخالف بس اذا من باب ال ح س د والغيره اهني الغثا ..وان شاءالله الكل ينجح ويحصل على شهاده وريل هههههههه انا ماعندي حجر اضرب فيه الاثنين ((من باب ضرب عصفورين بحجر )) ياربي ماعرف ههههه

 

[Om_il3ubed]

ابييييه ام العبد تره الحال من بعضه وبعد استراليا غيرل اهلا فيج وبكناغر استراليا كلها

صح في تحدي مادري ليش يصير! ..بس اذا تحدي شريف ميخالف بس اذا من باب ال ح س د والغيره اهني الغثا ..وان شاءالله الكل ينجح ويحصل على شهاده وريل هههههههه انا ماعندي حجر اضرب فيه الاثنين ((من باب ضرب عصفورين بحجر )) ياربي ماعرف ههههه

ههههههه تصدقين نصيب.. انا كنت اتفلسف مابي اتزوج الا بعد التخرج
وكاني تزوجت وحملت وباقيلي شوي واتخرج لول

سبحان الله مو كل شي يمشي على حسب البلان لازم دايما يكون في plan B

 

[* بنت المطر *]

هاااي بنات ويه انتوا اهنيه جكيتكم .. لوووووووووووووووووووووووول

تدرون انا مارديت بعدني باستراليا تدرون شنو اهم شي تعلمته _ فن لغة الحوار _ الناس هنيه يحترمون لغة الحوار يتكلمون ويتناقشون

بكل شي يعطون للحوار مساحه كبيره من حياتهم وينتبهون ويتكلمون في ادق التفاصيل يعني بعطيكم مثال :

لارحتي تشترين شي من الصيدليه يسالونج عن مشكلتج وشاللي تبينه بالضبط ويشرحون طريقة استعمال الشيء ويعرضون

اكثر من شي !! احنا عندنا كله مستعيلين وشغل مش حالك .

 

[UK_Girl]

شكرا كويتيه باستراليا .....احنا عندنا لغة الحرب ..وخد لك بندوله يا باشا ..

اممممممممم ام العبد b بلان اوكي بس عادي ارد باشقراني ههههههههp: ((اهم شي بالموضوع امي ماتعرف النت ولا تسمع بموضوعي ))بس انا نوعي ما اسكت بس ارجع باخذ رايها باالبي بلان وراح ابشركم بردها وراح يكون نفس رد امهاتكم عليكم ههههههههههه

 

[مينوووونه]

مواضيعج قنبله كلها دون إستثناء
والله أهنيج على هالطرح :eh_s(6):
وكان خاطري أعيش تجربة الغربه وأنقل اللي تعلمته بس للأسف
ماكو نصيب الوالد الله يحفظه على آخر شي بعد ما بلشت بالإجراءات رجع بكلامه
مو الحكوكه وآخر العنقود مو قادرين على إفراقي :0bee2e8d89:
على العموم
الله يوفقكم جميعا ويهنيكم برصيد الخبره اللي أخذتوا من الغرب تستاهلون كل خير
والله يردكم بالسلامه إنشاء الله

 

[UK_Girl]

صباح الورد ..
هلا مينونه ماعليه بييي يوم ان شاءالله ويوافقون ..بعد انتي الدلوعه اكيد مايقدرون يصبرون عنج ..شوفي البي بلان لج انج اول االايام تقنعينهم ييون معاج عشان يطمئنون عليج وتبينين لهم انج تقدرين تعتمدين على نفسج (هالشي الاهل يحاتونه وايد)وبعدين كل اجازة رجعي لاحضانهم او ممكن اهم يزورونج وبالتوفيج وتسلمين يا عمري

 

[جـــــــــوري]

السلام عليكم

انا اللحين بألمانيا مع اختي علاج لي تقريبا شهر

انا بمدينه ريفيه اسمها مونستر تعلمت منهم اشياء شكثر وان شاء الله اطبقها بالكويت

اولها افشاء السلام .. الاحظ في هذي المدينه تكونين وين ماتكونين جدام البحيره او بالاسنصير او بسوبر ماركت لازم يلقون التحيه .. واحنا كمسلمين احق بهذا الطبع

طبعا المدينه هذي ماشفت فيها اي خليجي .. وقله عرب مهجر .. انا واختي لابسين لبسنا الكامل كأنا بالكويت عباية راس ومايبين منا شي لا عيون ولا كفوف ولا شي ... البرفسور اللي يعالج اختي سأل المترجم ليش اهم لابسين جذيه قال عادات وتقاليد .. وانقهرت اختي واختي طليقه بالانقليزي مشاءالله ومن حسن حظنا الدكتور يعرف انقليزي.. وردت عليه قالت احنا لابسين جذيه لان الله سبحانه وتعالى حصن المرئه المسلمه وحب تكون مثل الجوهره لا ينضر لها الا زوجها وابوها واخوانها .. الخ ... واستانس الدكتور قال انا قريت عن الاسلام كثير وادري ان المرئه عندكم ماتصافح الرجل .. وكنت اضن اللباس الاسلامي فقط غطاء للرئس

وطباعا طول محنا ماشين بالشارع او بالمستشفى او بالسوق ينظرون لنا بعضهم يجي ويقول انتم من وين وبعضهم يلقي التحيه ويطالع ويمشي

تعلمت منهم حسن الاستماع والتصديق .. يعني اي شي تقولينه يحملونه بمحمل الجد والتصديق والاحترام . وان شاء الله غير اطبق هالشي بالكويت

 

[sereen]

اللهم صلى على محمد وال محمد , تعلمت من الغربه وايد اشياء طبعا كل اللى قلتوا بالاضافه الى كونى اشتغل فى مكان لتعليم الانجليزيه لغير الناطقين بها , حيل تغيرت 360 درجه من ناحية التفكير , التخطيط , التشاور , والكتمان ومافى قيل وقال طبعا تدرون مجتمع الحريم اشلون صاير عندنا , ماشاء الله انا سنه وحدة وقلت بس , حتى عرس سووووينا يعنى انا المكان اللى فيه ابداع بصراحه , على فكرة انا الكويتييه الوحيدة من 2 عايله اطلع واختلط , الباجى بصراحه قاعدين يطوفون فرص من حياتهم لا من لغه , ولا من تغير للشخصيه نفسها
بس همهم سوق ومطبخ , ترى امريكا فيها بلاوى لو تبين اتنبشين كلشى تلقين ,
حيل مرتاحه من الناحيه الصحيه الله يعافى التامين ططق و جابل فحوووصات شى ماشيات ممتاز , نعدل عمرنا قبل مانى الكويت
__
حبيت الامريكان حيييييييييييييييييييييل بس هم اخذ الحذر منهم حيل !!!!!! تعلمت منهم ادخل وبيدى وردة مو لازم اكل
تعلمت منهم احترام الوقققققققققققققققققققققققققت يالربع
تعلمت منم اخذى حقى بس بشرط امشى بالقانووون واوراقى معاى قاريتهم عدل مدل عشان لا يكون الشى ضدى
تعلمت ما اقط فاتورة لان كلشى يرجع بسهووووووووووووووووله الماى
تعلمت منهم الصرف بصراحه , اكبر مشاكلى الصرف والصرف , مو شى زين بس مصيبه المجتمع عندهم consumy : ) ترى مو صح الكلمه بس هذى من عندى من حر مافى قلبى من الصرف اللى انا فيه - consumer اهى الصح.
قاعدة اعيش كل american aspects من كنت طالبه الى الان ربة بيت وتشتغل
احضر حتى funeral لهم ابى فعلا اتعرف على المجتمع لههم , نسوى الهالوين ونقرقع , ننعزم على حفلات كريسمس بس الاهم دينج يكون
قوى وثابت ,
تعلمت اساعد اذا يطلع بيدى
تعلمت smily face, thank you , please
___
الحين صارت مشكلة العيال كبروا فيها وصاروا فى الثانوى وبلاويها , والقصاصيص اللى فيها
----
على العموم امريكا حلوووووة بس اللى مخربها العرب اللى فيها بصراحه للحين مو راضين يتسنعووون للحين فى ناس عايشه بنفس فكرها مو راضين ينظفون اخلاقياتهم , لانهم مايختلطون فى الامريكان مايدرون شنو المجتمع اللى قاعدين فيه وهذا غلطوا بحق نفسهم ,
اغتنام الفرص رحمه من الله وتطوير للنفس ونقلة للانسان

 

[بنت الديرة2009]

بالنسبة لي

انا بأمريكا

ريحة علاج مع ولدي

والحمدلله خلص العلاج وصار زين

المهم

انا قعدت هني 4 شهور

صراحة تعلمت من الامريكيين

السلااااااام

يعني من أمشي ولا اطلع من الشقة

لازم يسلمون

حتى لو ما يعرفوني

هاي هاو ار يو

وبعد تعلمت الابتسامة

الناس بس تبسم حق بعض

تخيلو بالكويت

كل واحد عااااااقد النونة

واذا احد سلم

يسالون تعرفونه

شالسالفة

لازم نعرفه عشان نرد السلام

السلام لله

وهني بعد ماشالله عليهم

وانا داخله مول ولا مجمع ومعاي ولدي

والله ان الناس تستبق بس عشان يفتحون لي الباب

سبحان الله

هني اخلاق غير المسلمين

وتخيلو بعد

قليل قليل واحنا بالشارع ولا عند اشارة

ان احد يطق هرن على اللي جدامه

يعني عندهم سعة بال وتحمل

وبصراحة ولدي العمرة سنتين صار مثلهم

من أطلع مكان

اهوا اللي يقول حق الناس

هاي هاي

ويستانسون عليه الامريكيين

يردون عله كلمة هاي ويضحكون بويهه

قاعدة اقول حق زوجي اذا ردينا الكويت الولد بيصير فيه

صدمه عصبية

تدرون ليش

المسكين بيقول هااااي حق الناس

ومحد راح يرد عليه

ويمكن يطالعونه بنظرة

ههههههههههههه

صج والله هذا الواقع

ناطره ردودكم على كلامي

سلاااااااااام

 

[Hello_kitty]

ما شالله موضوعج وايد حلوووووو

والحمدلله انج ذكرتي ان حتى المغتربات يقدرون ايضيفون اي شي يبوووووووونه

انه مو مغتربه واتمنى من كل قلبي تحصلي فرصه واتغرب فيها مع ريلي علشان امور وايد ودي اعيشها واتعلمها

المهم حبيبتي انه مره سافرت امريكا مع ريلي تقريبا قعدنا شهرين صج فتره صغيره حيل بس والله استفدت وتعلمت وايد وايد اشياء

لي درجه كنت اقول انه لو اتغرب سنه على الأقل راح اكون انسانه ثانيه..

انه زوجي ما شالله فلته بالإنجليزي والنطق عنده عجيب لي درجه لما يتكلم يشكون ان اهو عربي ما شالله
والفتره اللي رحنا فيها ما صادفنا وايد عرب..اضطرينا 24 ساعه نتكلم انجليزي وكان ريلي يشجعني ويخليني اتكلم واتعامل

مع الناس او بالسوق بنفسي واذا ما فهمت كلمه يترجمها حقي يعني حتى المنيو صرت اعرف كل المصطلحات اللي فيه ادق انواع النكهات والأكلات تعلمت معناها بالإنجليزي وصرت ما شالله ممتازه باللغه وبظرف شهرين بس..

تعلمت ان الأمريكان وايد عندهم نظره غلط عن الكويتين يعني اول ما نقولهم احنا من الكويت ما عندهم غير كلمه او بترول ولا ريتش بيبول
وحسبالهم ان احنا عاطلين باطلين ما نشتغل والفلوس تيي لي عندنا بعدين فهممه زوجي ان مو صحيح هالكلام وان انه وزوجي موظفين
ونشتغل ونكافح بهالحياة..

اساتانست على الأمريكان انهم وايد عشرين ويحبون السوالف والقرقه بعكس الأوربيين وكانوا وايد يسالوني عن حجابي ويمدحون طريقه الحجاب ومره كنت لابسه حجاب lv ووحده تشتغل بالمحل من كثر ما قعدت تمدح حجابي ريلي يقولي بعد فصخيه خل تلبسه
وحسبالهم ان احنا نلبسه غصب علينا وان احنا مثل السعوديه المراه ما تسوق وتتغطي غطاء كامل مجبوره ومن هالكلام بس طبعا فهمناهم
الإختلاف بينا وبين السعوديه..

اكثر شي ونسني فيهم حبهم للحياة والوناسه يعني ما عندهم عيب وفشله تلقين الكبير قبل الصغير قاعد يلعب بالملاهي ومستانسين يعني اذكر مره
بديزني لاند شفت شايب على ول جير وبخشمه واير لابس كبوس ميكي ماوس تشوفين الأم والأبو واليهال كلهم يلعبون ويضحكون ومستانسين
احنا ليش مو جذي لو واحد كبير نشوفه يلعب الحمدلله والشكر ونقعد نعيب ونستنكر!!

واستانست بعد على سالفه التصوير يعني حبوبين اذا شافوني انه وزوجي بروحنا وبيدنا كاميرا على طول يعرضون علينا تبون نصوركم يعني ياخذون الكاميرا منا ويضبطون لقطه حلوه ويصورونا..

الأمريكان حلووين بس اخذي الحذر منهم من سوالف السياسه كلش كلش لا تحاولين تتكلمين معاهم بالسياسه ترى يخرعوووووووون ويحاولون
ساعات يجرونج بالكلام..

الكويتين للأسف وايد تغيروا وايد صج الوقت يخوف بس مو لدرجه ان صاروا وحشيين يعني الواحد يفرح لما يشوف احد من ديرته احنا العكس

الاحظ الكويتين من يشوفون بعض يصدون ويتهربوووووون عاد ليش؟؟الواحد ما يبي من احد شي السلام والكلمه الطيبه للله


صادفت عراقيين بامريكا للأمانه اذكر هالمعلومه اكثر من عراقيه شفتهم وايد فرحوا حيل حيل ان احنا من الكويت والله وحده تشتغل بمحل باث اند بودي وركس يوم درت ان انه من الكويت عطتني جم شغله ببلاش وقعدت تمدح وتتحسر على الكويت وتقول انه ما شفت بلدي من عشرين سنه كسرت خاطري..

هذا اللي يا في بالي وسوري وايد اذا طووولت بالحجي ومشكوره مره ثانيه

 

[خبيرة اعشاب]

السلام عليكم

خلال 6 سنوات من الغربة تعلمت اولا :
- اللغة طبعا
- الرقي في التعامل و الاسلوب يا ربي الفرنسيين شكثر ذوووق و محترمين تمشين بالشارع لو قاطة ملابسج ما يخزونج ما حد يطالعج ... الادب من الكبير للصغير , وين ما رحتي لازم كل جمله ( sil vous plait ) اي لو سمحتي , و ختامها ميرسي اي شكرا

- احترام الوقت عندهم يا ربي بالدقيقة و الثانية بس النقطة هاذي كنت حارصة عليها اول ما رديت الكويت بس الحين لا عادي

- الاتصال قبل الحضور ... بفرنسا مستحيل احد يطب عليج على غفلة او رفيجتج تسير عليج بدون دعوة تكلمينها تقول لج اجيج 7 و الله مرة وحدة صديقتي جت قبل الموعد و انا اشوفها من الدريشة انها جت بس قعدت تنطر عند الباب الين وصلت الساعة 7 يا الله طقت الجرس يوم سالتها ليش جذي قالت لا طبيعي حنا معزومين 7 و من الادب نجي بالموعد لو عندنا جان صارت علوووم _03BA:

- العادات الغذائية : و هذا شئ للحين احاول اتمسك فيه نظامنا الغذائي بالكويت جداااا فاشل و هو سبب كل البلاوي و الامراض الي يعاني منها الكويتين ... الكويت الاولى عالميا بالاصابة بمرض السكري و غير امراض القلب و الكولسترول ... الخ و كله من ها المجابيس و العيوش و المعلبات .... اكلي بالبيت احرص انه يكون صحي و اكثر من الخضار و اطباق الشوربة و السلطة

بالاضافة ان اهم شي تعلمته البساطة , الكفاااااح الفرنسيين ناس بسطاء في كل شي يحبون الاناقة بدون تكلف , عمركم شفتوا فرنسية حاطة كيلوين ميك اب ؟؟؟؟ يعني حدهم بسيطين جدا جداااااا

الهدوووء و الاحترام اكثر شئ سائد بالديرة :tomato2:

الاعتماد على النفس : عيالهم يتوظفوون بكل مكان بارت تايم بماكدونالدز , كاشير بسوق مركزي ... بس عشان يحوشون مصرووف مو ينطرون اهلهم

** الكدح : الفرنسيين شعب كااادح بامتياز يحبون عملهم مهما كان و يبدعووووون فيه

في بنات واجد وياي من جنسيات عربية تعرفت عليهم بس اكثر ما كان يهمهم انهم يندمجون في المجتمع و يعيشون نفس الاجانب بس انا و لله الحمد اكثر شي حرصت عليه مو اني اغير من عاداتي و تقاليدي عشان اصير نفسهم

اكثر شي عجبني حرص صديقاتي على احترام معتقداتي لدرجة ان وحدة هولندية كان رمضان و كنت صايمة راحت سوت سيرج عن رمضان تبي تعرف ليش نصوم و شلون ؟؟؟و من باجر جابت لي اغراض وياها حق الفطور

اكثر من وحدة كانت تسالني عن الصلاة اشلون نرضى نحط راسنا بالقاع و عن الاسلام ... فكنت احاول اشرح لهم بشكل مبسط بس لاني اللغة عندي كانت محدودة ما كنت اقدر وصل المعلومة عدل الين رحت مركز اسلامي بباريس مرة و لقيت بنت فرنسية من اصول عربية داعية و خديت رقمها و كل ما سالتني وحدة سيدا عطيتها الرقم عسى الله يهديهم


الفرنسيين حيل حريصين على الثقافة و القراءة المكتبات دايما فل ..الكبير و الصغير يقروون و اعتقد ان هاذي العادة الطيبة الي للحين محتفظة فيها اني تعلمت هناك حب القراءة و للحين اقرا و احرص على اقناء الكتب في شتى المجالات

و اجمالا اعتقد ان اي مجتمع سواءا كان غربي او عربي فيه مزايا وسلبيات و الانسان لازم ينقح العادات الي يتعلمها و الخلاصة ان ما في نفس مجتمعاتنا العربية ,,,, من تلاحم اسري و كرم , نخوة , عزة .... و الامور هاذي ترى هم ما يعرفونها و يستغربون لا قلت لهم عاداتنا بالضيافة او تجمعات الاسرة ... الخ

تحياتي

خبيرة اعشاب

 

[Hello_kitty]

الموضوع عجبني وتذكرت شغله ذكرتني فيها ام خالد جزاها الله خير عن احترام المعتقدات

اذكره مره بمطار امريكا التفتيش طبعا بعد الأحداث اللي صارت صار وايد دقيق ومتعب خاصه للعرب والمسلمين

يعني بدون مبالغه بالمطار يفصخون الواحد كل شي تكرمون الجوتي والحزام والبالطوا وياخذون البوك والتلفون واي شي سائل

حتى والله الماسكرا ما خلوني اخذها قطوها على اساس انها سائل!!

المهم كنا مسافرين امريكا بالشتا وكنا يايين من المانيا فالجو كان وايد بارد صقيع

كنت لا بسه بودي نص جم من داخل وفوقه بالطول ثقيل وطويل وعند التفتيش اطلبوا مني افصخ البالطو امبيه اشلوووووون؟؟

انه لابسه نص جم!! قعدت اكلمهم اتراجاهم ان ما اقدر افصخ انزين مو مشكله افصخ البالطوا بغرفه صاده مو راضين

الهم انه اهني دمعت عيني وقعدت ابجي ابجي ياربي اشلون بتفصخ وانه متحجبه بعدين لما شافني المسؤل عندهم على طول

كلمهم وقالهم خلوها على راحتها لا تكلمونها وخلاني اطوف حتى بدون تفتيش

الحمدلله يارب يعني فيهم مرونه واحترام حق عادات وديانات الناس

 

[* بنت المطر *]

السلام عليكم :
اثاري كل الدول الاجنبيه طلع فيها تعاليم الاسلام !! عبالي بس الاستراليين ؟؟ لوووووووووووول

في حديث للرسول ( ص ) " تبسمك في وجه اخيك صدقه" _ وحديث ثاني " افشوا السلام بينكم " هالحديثين سبحان الله

مطبقين عند الغرب بحذافيرهم .. ليش احنا مانبتسم للناس ولبعض ؟؟ ليش الحرمه لاشافت حرمه بالشارع لوت بوزها مع

خزة حره مادري قهر !! واذا سلمتي اقعدوا يطالعونج مستغربين !!!

شي ثاني النظاااااااااااااااااااام يالله بكل شي منظمين _ دواماتهم .. مواعيد نومهم باليل من بعد التسع خرمس

ماتسمعين صوت والصبح الكل بدوامه _ والويك اند عندهم فعلا يعطونه حقه !!

الاحتراااااااااااااااااااااااام والهدوء امبيه حتى جهالهم هاديين _ لاطلعنا مكان عام بس صوتي انا وعيالي

لا وطالعونا مستغربين ياااربي شلون يسيطرون ع اليهال ياناس عيالهم هاديين وشايفين خير

شالسر بنات قولولي ؟؟؟؟ امبيه جد جد انا عيالي يفشلون

تصدقون بالالعاب اذا فيه جهال يلعبون ولعبوا عيالي معاهم ينزلون من اللعبه ويخلون عيالي ياخذون راحتهم

وااااااااااااااااااي ماشالله اش هالذوق خلف الله علينا