تقرير رحلتنا ل ( بـلجـــــيكا ) فضلووووا :))

[far007a]

بسم الله الرحمن الرحيم
السلام عليكم

طبعا حبيت اعرض لكم تقرير رحلتنا الصيف الفائت لعاصمة بلجيكا بروكسيل


من رايي بلجيكا حلوة ومناسبة للعائلات
وشفت ناس وايد يسألون عنها فقلت احط تقريري وانشالله يلاقي استحسانكم

كان تاريخ السفر من 15 اغسطس الى 31 اغسطس

على طيران الاتحاد سعر التذكرة كان 260 د.ك

طبعا الطيران عجيب
ترانزيت ابو ظبي -بلجيكا مافيها طيران دايركت

الجو : كنا نلبس صيفي وساعات نحتاج جاكيت الدرجة كانت من 14 - 25 يعني الجو حلو

السكن كان في فتدق holiday inn city centre brussels في شارع افنيو لويس

هذي الغرفة

الفندق اعطيه 7 من 10 اهو زين بس شوي بعيد عن محطة المترو يعني 5 دقايق مشي اما كخدمة ممتاز بس الغرف شوي صغيرة

طريقة التنقل في بلجيكا كانت عن طريق المترو (الاندر جراوند)
لان التكاسي مو متوفرة وتكلفة المترو ارخص واسرع

وهذي خريطة المترو

وانشالله ارح اشرح لكم بالتفصيل شلون نستخدمها

يتبع






​

​

 

[شقرديه]

@@ متابعه تقريرج ..,,..

 

[mona77]

ناطره

 

[أم عزيـز]

ناطرين تقريرج يالغاليه

 

[far007a]

في

اول يوم وصلنا بلجيكا كانوا موظفين الاستقبال اللي بالفندق متعاونين

عطونا خريطة لكيفية الوصول الى السوق و طريقة استعمال الاندرجراوند

طبعا احنا كان شوي صعب علينا لان لغتهم الرسمية الفرنسية
على الرغم من وجود مغاربة لكن عربيتهم صعبة ماكنا نفهم لهم عدل
طبعا اول يوم وصلنا على الساعة 6 المغرب قطينا اغراضنا وطلعنا بهالجو الحلو
الجو مغيمومطر خفيف

طلعنا من فندقنا مجابل فندقنا سوبر ماركت
وتمشينا في شارعنا وشفنا بنت اماراتية اتمشى بروحها
وسألناها عن بلجيكا وقالت صارلنا 3 سنوات نصيف هني

وهي دلتنا على شارع اللويزا 5 دقايق مشي من فندقنا الى الهاجن داز
وهذي صورة الشارع اللويزا

طبعا هذي المنطقة حية وتونس وكلها خليجيين هني هذا يسمونه شارع الماركات منكارتيير و لويس فتون وشانيل و فيرساس ....الخ طبعا تقريبا امتداده كيلو وفي بعد مطاعم فاست فود كنتاكي ومكدونالدز و بيتزاهت
وفي مطعم حلال نسيت اسمه والله بس اللي يشتغلون فيه مغاربة فيه عيش اهم شي جيكن اعتقد جذيه وباللون الاحمر
روحي لمحطة بورت دي نامور واول ماتصعدين من المحطة تلقينا عند السلم فوق كل يوم ناكل فيه نفس كنتاكي بس فيه عيش

وفي مجمع اسمه جاليريا هذا وايد حلو يصير قبل الهاجن داز والله فيه طحنا على محل فيه يبيع بلايز تهببببل على 15 يورو مع التخفيض وصاحبة المحل فرنسية تقول انها تييب بضاعتها من فرنسا وتبيعها هني والله كل مالبستهم يقولون لي شكله ماركة هذا ال جاليريا لاتطوفونه بضاعتهم حلوة باقي المحلات غالية من طقت الصالحية جذي بس هالمحل رخيص
وبهالشارع فيه محطة اللويزا اللي منها تروحين كل الاماكن السياحية
وهذي صورة ثانية للشارع بقولكم ديروا بالكم من هذا الباص اسمه ترام واهو ارخص من المترو بس ماعرفنا نستخدمه

ترا يمشي فجأة

وبنفس اليوم دشينا المترو وشرينا تذاكر حق 6 اشخاص
اللي علمنا على المترو مغربي الله يعافيه

شوفوا الصورة بوضح لكم شلون نستخدمه

شفتوا السهم الاحمر العريض اهني محطتنا
اتبعوا الخط البرتقالي فقط لانه فيه كل المعالم السياحية فيه وخصوصا السائح العربي

شوفوا نهايته مكتوب سيمونيس داخل المحطة اذا انتي من اللويزا بتروحين مادو وروجير اتبعي السيمونيس
واذا بترجعين من روجير الى اللويزا اتبعي الكلمنسو

اهي شوي معقدة بس مع الوقت بتصير سهلة

يتبع​

 

[far007a]

بعد ماتمشينا في شارع اللويزا و دخنا في المترو
وشوي ضعنا بس الحمدلله اللي يسأل ما يتوهش

ورجعنا اللويزا وتعشينا من مطعم اسمه كويك quick يم هاجن داز

رجعنا الفندق ونمنا احلى نومه

اليوم الثاني :

قعدنا الساعة 8 الصبح و تريقنا بالفندق ريوقهم عادي بيض مقلي وهاش براون ومشروم واجبان
بعدها توجهنا على محطة مترو اللويزا ورحنا حق محطة روجبر (محطة روجير اتطلعج على فندق الشيراتون )
يصير على ايديج اليمين كملي سيدة وخطري الشارع بتلقين نفسج في شارع city 2
هذي صورته

وهالشارع وايد حلو بدايته في سوق اسمه سيتي دو
هالسوق فيه محلات جواتي عجيبة واسعارهم حلوة وبصراحة شريت منهم وايد حقي وصوايغ

وفي بالسرداب مطاعم عادية بس في مطعم رخيص هندي هم عادي بس حق اللي يشتهي عيش برياني

وبهالشارع كله محلات يمين ويسار مانغو و لاسينزا و اغلبهم عندنا بالكويت بس حلو طبعا هالشارع ماتدخله السيارات
اي فيه مجمع اسمه inno هالسوق عجييييييييييييييب فيه كل اللي يرضي بالج
وبنفس الشارع فيه يبيعون الوافل ااااخ كل يوم اكل منها
واحلى وافل من هالمحل

وهالصورة لعيونكم طلبو عجينة وكاكاو بس لا تزيدون موحلوة تصير واكلوووها حارة

وبعد هالشارع الطويل تقريبا نص كيلو اتييج الجراند بلس

طبعا احنا وقتنا كانت مزينة بالورد فظييييعة كانت وريحتها تهبببببببل

بعدها قعدنا عند الورد وتصورنا ورحنا مكتب سياحة خلف الجراند بلس وحجزنا
رحلة لبروج و ل انترويرب
بس انصحكم لاتغلطون غلطتنا وتحجزون لانترويرب لان ماستفدنا
من الرحلة مع القايد الافضل نروح لها بروحنا بالقطار
لان كنا ملتزمين مع الجروب وما اخذنا وقت كافي في السوق

بعد ماحجزنا للرحلات

رجعنا للمترو وتوجهنا لمحطة ميدي كانت كبيرة وايد وضعنا فيها وسألنا المغاربة وعلمونا شلون نحجز حق باريس و يورو ديزني
وحجزنا ورجعنا تسوقنا في اللويزا وتعشينا ورجعنا الفندق بعد يوم مشي عالمي

انشالله نتكلم عن ديزني اللي كانت احلى رحلة بالنسبة لي

تابعوني​

 

[Miss-LuLu]

متابعين حبيبتي

ويعطيج الف عافيه

 

[Hello_kitty]

ما شالله تقريرج المحترفين

ما شالله تقريرج يهبل مثل تقرير المحترفين بالصور والشرح والتفاصيل

كملي متابعينج

 

[أم@الحلوين]

تسلمين عالتقرير الحلو


متابعه@@

 

[بتبوتااا]

احس ريحه الورد وصلت لي عندي ماشاء الله

متابعه التقررررررررررررررررير

 

[bambena]

حمدلله على السلامه

انا رحت ضاق خلقي غلقه غلقه ابد ابد ماعجبتي وقعدنا بالهلتون بشارع لويس يمكم ظيم الديره

يمكن اللي ونسني شوي خذينا قطار ورحنا بروج ياحلاتها

الحمدلله انج استانستي فيها


متابعه تقريرج

 

[far007a]

مشكوووورين حبايبي على ردودكم


وهني بحط لكم شوي صور من الجراند بلس

وهذي بايام متفرقة عقب ماشالوا الورد حسافة كان بس لمدة يومين وكان كل سنتين مرة على حظنا كان موجود

وانشالله الحين بنتكلم عن اول رحلة خارج بلجيكا وهي يورو ديزني

في اول حجزنا تذاكر القطار وهو الثايلز من محطة الميدي بالمترو من محطة اللويزا باتجاه الكلمونسيه
سعر التذكرة من المحطة كان تقريبا 70 د.ك غالية شوي
وسعر تذكرة دخول ديزني 25 د.ك بس و الله تسوى الروحة

طبعا القطار كان يحرك الساعة 8 ونص الصبح واحنا ركضة الحق لا تلحق مواعيد الاوروبيين مضبوطة واذا تأخرتوا راحت عليكم التذكرة والله واحنا طلعنا من الفندق 8 ونركض بالمحطة ندور قطارنا والله تذكرنا فيلم home alone

ورحنا على محطة الميدي ندور قطرنا اي بوابة لازم تشيكون على البورد هذي

وشفنا رقم البوابة وركضه حق القطار وطبعا داخل المحطة في اكشاك عليها حرف i حق الاستفسارات والله يعلمون السواح بالتفصيل اذكر كان معانا امريكان وضايعين بالمحطة مثلنا وكانوا يمشون ورانا يحليلهم احنا احسن منهم

وهذا قطارنا اللي بودينا حق محطة اللافيلاج واهي فيها الديزني

طبعا القطار يوقف في كذا محطة اخر شي كانت اللا فيلاج وصلنا على الساعة 10 ونص المحطة وهي
محطة قطار فرنسية ليورو ديزني وتشمل بعد سوق الاوت لت لفرنسا
لكن كل الوقت قضيناه في الديزني ومامدانا نروح الاوت لت لان تعبنا وبعدين
طبعا اول ماتطلعين من المحطة تلقين الالعاب على ايديج اليمين ونااااسة كافي منظرها وهي يمج صج حلوة دقيقتين وانتي بوسط الديزني

ودخلنا الديزني كان المفروض نرجع المحطة الساعة 5 العصر لان اخر قطار يمشي لبروكسيل

وهذي صورنا في الديزني
هذا اول مادخلنا

لعبنا وركبنا أغلب الالعاب بس غيب الديزني ان مافيها مطاعم بس هذا وعادي فاست ود بس من اليوع والتعب

كلينا حتى القراطيس

وكانت روعة وعقب الغدا تسوقنا وشريت اكواب وسوفونيرات وايد

وحضرنا عرض الشخصيات يبدي مرتين باليوم الساعة 10 ونص الصبح لحقنا عليه
والعصر الساعة 4 ونص همن لحقنا عليه

ورجعنا محطتنا مع كان ودي ازور الاوت لت كان مقابل الديزني بس مافينا حيل ابد عقب الالعاب و الوناسة
ركبنا قطارنا ورجعنا لمحطتنا الميدي ومن الميدي ركبنا المترو الى محطة اللويزا المتجه نحو السيمونيس

ونكمل التقرير لرحلة انترويرب وباريس اخخخ تهبببل واخر شي بروج ومشترياتنا من الكاكاو

انتظروني

يتبع​

 

[بتبوتااا]

متاابعه

 

[تمنيتك]

حلوه

يسلمو عالتقرير

 

[far007a]

الرحلة التالية كانت لمدينة انتويرب

ماتسمى مدينة الالماس "وهذي تم حجزها عن طريق مكتب سياحة"
الباص اييج لي الفندق احلى شي ماكو ركضة للمحطة

ما انصح فيها مااستانسنا فيها وايد القايد وايد تقرقر واحنا مانفهم شي اتكلم فرنسي واسباني وايطالي

زرنا اماكن مشهورة في المنطقة وكنيسة وساحة فيها تماثيل واخر شي مصانع ومحلات الالماس

وهذي الصور

اخر شي زرنا معرض الالماس وللاسف ماعندي لها صور
بس الرحلة بايخة اعطيها 5 من 10

وهذا البطاط لعيونكم

بصراحة كان لذيييييييييييذ

يتبع​

 

[بعثرة محبره]

تقريرك جاااااء بوقته ..

يعطيك العافيه على التقرير الروووووعه ..

كملي كملي ..

بس بسألك سعر التذكره للشخص الواحد بس 70 دينار؟؟؟

 

[كشوخه]

متابعه حبيبتي كملي ...

 

[rawona]

عليج بالعافيه ..


بانتظار البقيه

​

 

[3e6er alwrd]

تصدقين انا رحت لها 2006 كلش ما اعجبتني لويه وايد فيها مغاربه وكل ما نمشي اشويه تطلع لنا وحده تقرى بخت او تكت فال او ساحره تقرى كف الي استانست فيه بس البص تور لا وبعد كانت اغلب المعالم امسكره علشان عندهم كان تعديلات بالستركجر والي وايد عجيييييييييب ما اذكر شنو اسمه اتومن او اتانومك الي يصير برج كبير على شكل ذرّه وتصعدين فوق وتستكشفين,, نصيحة الي بروح بلجيكا لا يطوف هالرحله

 

[far007a]

مشكووورين حبايبي على ردودكم الحلوة واللي تشجع الواحد ان يكمل التقرير

الحين بنتكلم عن رحلتنا بالقطار ل بـــــــــاريـــــــــــس

طبعا احنا كنا حاجزين تذكرة القطار من ثاني يوم وصلنا بلجيكا مع الديزني

وسعر تذكرة باريس 65 د.ك تقريبا وقتنا كانت الاسعار غالية وايد
كان المفروض الساعة 8 يحرك القطار
وركضنا ركض للمترو اللويزا

تخيلوا شكلنا احنا 6 اشخاص ونركض و
لان كنا متأخرين كالعادة وركض على محطة الميدي و توجهنا للبورد
وكانت محطتنا هالمرة لل جاردي نورد (المتوجهه لباريس) الحمدلله هالمرة ماضعنا

والحمدلله وصلنا القطار 7.59 هههههه اول ماصعدنا القطار قبل لانقعد مشى الحمدلله

هني من الركضة تدودهنا وقعدنا بكراسي الدرجة الاولى هههه عقب قومونا
لكراسينا
وهذي من دريشة القطار

المهم كان الطريج طويل وصلنا محطة الجاردي نورد الساعة 10 صباحا

ومن المحطة شفنا مغربية يعطيها ألف عافية علمتنا شلون نستخدم مترو باريس

وشلون نوصل لمحطة تشامب اليسيس Champselysées اللي اهي شارع الشانزليزيه

وتقريبا ثلث ساعة من محطة القطار لي الشانزليزيه بس ديروا بالكم بالمترو واتبعوا الخريطة بحذافيرها
وصلنا محطة الشانزليزيه

واول ماتصعدين السلم

بتطلعين على الشارع ويكون بويهكم قوس النصر

وكان كبييير وحلو طبعا احنا كان ماعندنا وقت لازم نرجع المحطة الساعة 4ونص العصر
فأول شي أجرنا باص سياحي بتلقونه يم قوس النصر
وكل السواق مغربيين ويتكلمون عربي وفعلا ركبنا وتجولنا باحلى وارقى مدينة في العالم باريس

وهذي صور من الباص السياحي

هذا بشارع الشانز

وهذا لاحلى كويتيات

وهني توقفنا عند احلى برج وتمشينا وتصورنا

نتوقف ونكمل عن باريس بعد شوي

يتبع​