تقرير رحلتي الى امريكا ( كاليفورنيا+ لاس فيغاس +شيكاغو + نيويورك)

[*caramel macchiato*]

حياكم الله......














هذه السفره كانت العام 2009.....
ادري ان التقرير متأخر شوي ...بس ماكان عندي وقت اكتبه الا الحين ...لان كل الناس مساااافرة الا انا بالكويت قااااعدة بهالحر...وحيييل حيييل متشوقة حق امريكا ...وولهانه عليها ...عشان جذي بسترجع الذكريات معاكم واكتب لكم تفاااصيل سفرتي والي اعتبرها من اجمل السفرات في حياتي
وترا ممكن اتكون مرجع حق الي يبون يسافرون وان شاء الله يستفيدون...بس صج صج كانت هالسفرة مميزة بكل شي ..وكانت شهر عسل يديد مع زوجي ...وكانت فاتحة خير على وحملت عقب زواج 5 سنين (((من كثر ماستانست فيها )))....

اول شي نبدي بالتكاليف : (لشخصين)
الطيران الدولي كلفنا على اليونايتد 215 + 215 = 430 << لو شنو ماتحصلون هالسعر الحين ....(ماشاء الله )

بس بناات صج لي قال المثل حط افلوسك بالشمس واقعد بالظلال ...مو شي الطيرااان ومزعج والكراسي ضيجة ...وانا طوووول السفرة متقلقصة على يميني امريكي وعلى يساري امريكي وحسبي الله على ابيليسهم مارضوا يبدلون مع زوجي...فمارتحت ابد ابد ابد ..انا بالمرة الاولى يوم رحنا امريكا من قبل عالاتحاااد ...الصراااحة فرق كبير وشاسع ....

عالعموم نرجع حق محور حديثنا....
احنا قعدا شهر بامريكا من تاريخ 4/7 الى تاريخ 4/8...الفنادق كلفتنا تقريبا 1100
والسيارة لمدة اسبوعين 1200 <<<ترا اهي ارخص من جذي ...رفيجتي اقعدت نفس المدة وادفعت حق السيارة 300 وشي..بس ان ريلي ماخذ سيارة غالية ..يقوول مايصير قاعدين بـ LA وسيارتنا كحيانه ((كويتي ماكو فايدة))...

الطيران الداخلي: ركبنا 3 مرات طيران داخلي....وكلفنا كله 530.....
وتقريبا خذينا مصرف 3000 دينار... يعني التوتل = 5830 ((تقريبا بنااات ...يمكن اقل اشوي ويمكن اكثر اشوي..بس هلحروه)))

الحجوزات كانت على مواقع :
Expedia.com
Hotwire.com
priceline.com
..............................................................



لاحد يرد بلييييييييييييييييييييييز

 

[*caramel macchiato*]

يالله خنطير حق امريكاااا ......



قتلكم بالبداية ان كانت رحلتنا عاليونايتد ...ومانصح فيها ابد ابد ...الا اذا بتروحون عال جي كلاس او الفرست كلاس....

وصلنا بعد عناء طويل امتد ال 14 سااااعة وصلنا واشنطن ....بس عندما تطأ ارجلنا ارض امريكاااا ننسى كل التعب <<اشتغل تخصص العربي ...

والحلو والصدفة البحتة ان يوم وصلنا امريكا كان يوم الاستقلال عندهم واحنا ماكنا ندري بس يت من صالحنا...وكانت الشوارع مزينة والناس كلها لابس تي شارتات علم امريكا وصورة اوباما ....وكل مكان زينة ....عاااد احنا ماصبرنا ...باس قوي ...قطينا غراضنا ونمنا ساعتين وطلعنا...اول شي سوينا طلعنا خطوط امريكية من شركة at & t...



ورحنا تمشينا بارجاء واااشنطن ...الصراحة حلوة والجو حلوو وبرااااد ....رحنا المتحاف الي اهناااك ورحنا زرنا تمثال ابراهام لنكولن...وصورنا عند البيت الابيض...كان المكاان وااايد حلو وكله مشي لان مسكرين الشوارع بس امخلين الناس تمشي ....

اخليكم مع بعض الصور.....



























وطبعا بالليل ....لازم fireworks ((((((((((العاب نااارية))))))))





وبس قعدنا ليلة بواشنطن واسم فندقناTHE MADISON وايد حلو....





من باجر طرنا على خطوط amrican airline من واشنطن الى LA ....

 

[*caramel macchiato*]

Los Angeles

وصلنا بليل .... رحنا استلمنا السيااارة ...وخذيناها من شركة DOLLAR....وشغلنا الجي بي اس وطيرااااان عالفندق وكان فندقنا بالداون تاون واسمه WESTIN ...كان خووش فندق...





رحنا وااااايد اماكن هنااااك ....رحنا WALK OF FAME ..ابهوليوود....كان مكاااان خيالي الصراااحة ومن اكثر الاماكن الي كااان ودي ازورها...وايد حبيتا ......وخذينا اهناك تور بالباص ودانا بفرلي هيلز ورانا بيوت المشاااهير توم كروز جاكي شان مادونا .... وبيت مااااايكل جاكسون ...وكان ذيج الفترة توه ميت صارله يومين او ثلاث مادري....بس كاااان البيت كله شرطة وكلة ورد وبطاااقااات وشموووع ...وكله صحفيين دار مادار البيت .....































ورحنا بعد اليونيفرسال ....الصرااحة حلوة بس مو مثل مالت اورلاندووو ...بس حلوة وتسوى ...وخصوصا الشو (( SHOWS انا عندي اهم من الالعاااب ....ايونسووون وايد ....والشخصيااات الي باليونيفرسال حدها اتونس ..ايووون فجأة ايطبووون عليييك ويصورووون معانا ...حدهم فريندلي....وقعدنا اهناك لي بليل وبعدين رحنا citywalk ...كله مطاعم ومحلات ومحل حق المساج ...ريلي سوى مساج بالماي ....وفي محل يونس اسمه it' sugar...نفس طقة sweet factoty ...بس يونس وكبييييييييير ....وحلاو اشكال والوااان ...وايد حبيته .....

وبعدين تعشينا بمطعم bubba gump...اعيز واقول ايهبل ...وخصوصا الي مثلنا من ربع السي فووود وخصوصا الربيان ...الصراحة طيحنا بهالمطعم وجم مرة انلروحله ...صج يسوى....

 

[*caramel macchiato*]

رحنا بعد مدينة اهناك اسمها سنتا مونيكا ..عجييييبة عجيييييبة اعيز واقول عجيييبة ....ماقدر اوصفلكم اشكثر حبيتها ...طبعا اهي مدينه ساحلية ..كل شي فيها نظيف ..جوها حلو ...وايد حلوة ...ودي اذا رحت مرة ثااانية كالفورنيا وي نسكن اهناك بدال لوس انجلوس داون تاون....رحنا شارع اسمه THE 3RD STREET...حده يونس ذكرني بالبرادايس الي باستراليا....شارع كله تمشي مافي سيااارات ...وعلى يمينا وعلى يسارنا مطاعم ومحلات ...وقعدنا من الصبح لي بليل ...الصراااحة اتونس حييل ...حبيتها .....






رحنا مجمع اسمه THE GROVE..هم عجيب ..نظااامه مفتوح على بعضه ....وطبعا من احلى المحلات الي اهناك NORDSTROM...وفي محلات امريكية اهناك حلوة ....وتغدينا ابمطعي المفضل THE CHEESE CAKE FACTOR....الاكل يهبل ولذيييييييييذ...اما الكيك خياااااااااااااااااااااااال ....(((ابي ابي ابي الحين كيكه)) ودخلنا MOVIE.....




















رحنا مدينة اسمها IRVINE...والله حلوة بعد المدينة ...وهاادية ...رحنا سوق IRVINE SPECTRUM CENTER....حلو ومفتوح ...يونس....وبعدين رحنا CONCERT حق فرقة NEW KIDS ON THE BLOCK...كان اليوم حلو حيييل ...وممتع وفيه انشطة واايد....














رحنا مدينة اسمها NEWPORT CITY....رحنا مول اهناك بس مادري شسمه ...ودشينا موفي ...اتذكر ان الموفي كان HARRY POTTER...بس مادري حسيتها ماتسوى العنوة ...بينها وبين LA ساعة ونص....


وفيه مجمع يقولون انه حلو اسمة اعتقد اسمه AMERICAN MALL...بس مارحتلة يمدحونه...

 

[*caramel macchiato*]

لا حد يرد بليييييز

 

[*caramel macchiato*]

رحت اوت لت عجييييييب اسمه DESERT HILLS OUTLET...وايد حلو...حتى المحلات الي فيه حلوة ... …PRADA ..DOLCE & GABBANA..JIMMY CHOO...ETRO …MARNI ووايد محلات حلوة اول مرة اروح اوت لت فيه هالماركات ...استانست فيه ...بس عيبه بعيد عن لوس انجلوس ...تقريبا ساعتين او ثلاث ..مادري نسيت ....بس يسوى....




المطاعم الي انصحكم انكم اتروحون لها بـ LA :

WAFFLE HOUSE







IN N OUT<<<<احلى برجر تذوقونها بحياتكم





OLIVE GARDEN




DENNEY'S <<< عشقي الاول والاخير...





RED LOBSTER ......




..............................................................

 

[*caramel macchiato*]

SAN DIEGO
قعدنا فيها يومين ....سكنا بفندق وااايد حلو وراقي...
GRAND HYATT MANCHESTER...وسكنا بالدور 32 اعتقد ...ونااااااااااسة انشوف التشراقيات بليل ....وانشوف اليحر كله ...يعني المنظر كاااان (WONDERFUL) بمعنى الكلمة....



اول يوم تمشينا فيها ...ورحنا السوق...وتعشينا بفرايديز.....

ومن باجر رحنا SEA WORLD...يونس ...بس كاااان خيييييييييييييييييييييييسة وحررررررررررر مو طبيعي ...هذا الي خرب علينا ....




ومن بااااجر ....حركنا السياااارة ....واتجهنا الى لا فيغاس.......




...........................................................

 

[*caramel macchiato*]

LAS VEGAS




WHAT HAPPENS IN LAS VEGAS STAYS IN VEGAS



احب هالديرة...بس عيبها انهااااا حاااارة وااااااااااااايد.....فكنا انام لي الظهر....وبعدين انروح نتغداااا ....وعقب انروح (SHOW ) الي حاجزينا.....

اول شي احناا سكنا بفندق اسمة TRUMP...ميزته ان مافيه صالات قمااار نفس الفنادق الثانية ..وهادي ومافي ازعاج ....وعيبه ان مو على السترب بالضبط ...بس يمه ....بس اذا نوينا انروح مرة ثانية ان شاء الله ماراح نسكن غير ((بلاجيو))....



كنا كل يوم انروح فندق نيويورك ونتغدا بيتزا....بيتزتا خيالية ...اسبووع كامل واحنا كل يوم نتغدا عندهم .....





..وعقب الغداا انروح نتمشى داخل الفنادق ...الصراااااحة سوق فيغاس حلووو...من احلى السوقة الي رحتلهم ....وعقب مانتسوق ونتمشى يكون عندنا شووو ...اول شو رحناله اهو LA REVE ....روعة بمعنى الكلمة...كله بالماااي ......غريب وحلو والموسيقى كانت حلوة .....






ثاني شوو رحناله كاان O SHOW...هم هذا كااان واااايد واااايد حلو بس نفس فكرة LA REVE ....كله بالماي....بس يسوى ....







ثالث شو رحناله كان ديفيد كوبرفيلد ...ملييييييييييييييييق ...لاحد يرووووحله ...مايسوى ....كبر الريال وخرّف.....

رابع شوو رحناله ...والي بالنسبة لي كاااان احلى شوووو اهو KA....وااااي اينن اينن اينن ...غريب عجيب ...وقصة بعد ....بس هذا كان التوب بالنسبة لي....خيال بخيال ..




وبعد فيه اوت لت عجيب PREMIUM OUTLET....

وبس هذي كانت رحلتنا في لاس فيغاس.....بس انوه واقول ((((((((( ماتصلح حق الي عنده عيااال صغار )))) وصاااااخة وين مانمشي يوزعون كروووت دعااارة كلها صور مفاااصيخ ...والكرووت طايحة بالارض....ماتصلح ابد حق اليهال ...وغير صالات القمااار ...يعني احنا كبااار انميز بين الصح والغلط ...بس الياهل اشعرفه (وجهة نظر)....


...........................................................

 

[*caramel macchiato*]

CHICAGO


رحنا ولاية انديانا وطرنا على طيران US AIRWAYS.....رحنا منطقة هناك اسمها Bloomington....عشان ريلي رايح يشوف رفيجه الي يدرس اهناك ...المنطقة كانت هادية حيل ..ومافيها اماكن سيااحية ..لان منطقة كلها جامعات وحق الدراسة ...بس استانست هناك مع مرت رفيج ريلي واعيالهم ....وقعدنا اهناك 3 ايام .....

وبعدين رحنا بالسيارة شيكاغو .......قعدنا اربع ايام هناك.....

سكنا فندق اسمه W HOTEL....كان حليو ...






وموقعة الاحلى الصراحة ....كان عند the Magnificent Mile ...يعني مشي خمس دقااايق...وهني كله اسوقه وكافيهات..وركبنا حنطووور بعد..وبعد كنا ساكنين عند ...navy pier...هذه نفس مدينة ملاهي صغيرة اهناك ...فيها سفينه اتمشينا عالبحر اشوي ...فيها العاب ...وتصلح حق اليهال حييييل ...فيها مطاعم حلوة ...ايه وبعد فيها قواري...حيل استانست صارلي يمكن سنتين مو راكبة قاري.....قمت انا وريلي وخذينا قواري ...وتسابقنا على طوووول البحر....لين انهد حيلنا <<< ماكو لياقة ابد .....









وبعد رحنا رحنا chicago shedd aquarium....حلو ويونس....بس لان احنا رايحيين السي وورلد ..ماستمتعنا واااايد ....يصلح حق الي عنده يهال.....صج يستانسون ......










رحنا مطعم الي تكلمت عنه اوبرا مرة ...وان صاحب المطعم كان الشيف الي يشتغل عند اوبرا ....صج مطعم عجيييييييييييييييييب وراقي ...والناس كلهم كاشخين ..الا انا ....كنت لابس جينز ...ضاق خلقي ماتوقعت الوضع جذي حسيت نفسي داااااثرة بين الموجودين.....
اسم المطعم table 52.....المكان صغير حده ...وطاولة ابطن طاولة ....بس اكلهم عجييييب لذييذ حده ....




الصراحة وااايد استانسنا بشيكاغو ....ودعنا صديق ريلي ومرته واعيالهم ...وطرنا لنيويورك على طيران delta.....

 

[*caramel macchiato*]

NEW YORK

قعدنا فيها ليليتين .....سكنا بفندق westin hotel....وهو بالتايم سكوير....وااايد حلو الفندق ...والحلو فيه بعد ان داخله سينما....يعني انروووح الفلم بعدين نصعد غرفتنا وناااااام على طووول....لا تاكسي ولامشي ولاشي ......





طبعا بهاليومين نتغدى ونتعشى بالتايم سكوير ....دخنا m & m ...وشرينا كاكاو واغراض...رحت بشتري من فيرجن ويلا مسكر...مادري ليش....





الي اول مرة يروح نيويورك يركب باااص سياحي يسويله تور على اهم المعالم بمنهاتن ...بس احنا رايحين من قبل عشان جذي مارحنا هالمرة...


رحنا الـ central park....كان الجو رائع ....الناس كلها مستانسن ويضحكون ويسلمون ..جنهم يعرفونا...





وخذينا نفس سفينه مشتـّنا عند تمثال الحرية......وصورنا .......

The Statue of liberty






بعدين تسوقنا ....وردينا الفندق بليل .... عشان باجر راح انطير واشنطن ومن واشنطن الى الكويت .....


ورجعنا الكويت الحبيبة بالسلامة .......


امريكا من احلى واقرب الدول الى قلبي ...احبها وما امل منها ابد واشتااااقلها حييييل ...والشعب الامريكي طيب ..





..اتمنى يكون تقريري عجبكم و فادكم ...

 

[نينا الكويت]

روعه تقريرج وشوقتيني اروح امريكا مع اني ماكنت متشوقه لها
يعطيج العافيه

 

[*caramel macchiato*]

الله يعافيج حبيبتي نينا الكويت

 

[krkooora]

يعطيج العافيه

واااو شوقتيني على امريكا

 

[عروسه new]

ماشااء الله خوووش تقرير

 

[sweetkoko]

يعطيج العافيه فعلا انا اخوي وايد يمدحها وانشاالله ذكري تنعاد لكم

 

[جنى q8]

عليكم بالعافيه

وحمدلله ع السلامه

ومبروووك الحماال حبيبتي

 

[غديران]

رد : تقرير رحلتي الى امريكا ( كاليفورنيا+ لاس فيغاس +شيكاغو + نيويورك)

رووووووووووووووووووووعة

عليج بالعافية

تقريرج وااااايد حلو

 

[UMSAROON]

تسلميين حبيبتي على التقرير الاكثر من رائع..
بس حسافه مو امصوره وايد..

 

[MISS.D&G]

وااااااااو عليج بالعافية صج صج ودي اروح هالديرة بخاطري مبين حدها ونيسة

إلا شخبارج كراميل شمسويا ولهنا عليج من عقب قصة شيخة و الي رفع سابع سما ما كتبتي ؟؟
كانت حدها عجييييييييبة بجيت بجي واااااااااااي >>>> مو زين النفعال !!

طمنيني عليج حبي

 

[الدلال]

شوقتييييييييييييني والله

خوش تصوير ولقطات روووعه

بخاطري ارووح امريكا,اذا الله كتب االسنه اليايه بهوون من لندن وبروح امريكا

عليكم بالعاافيه ودوم الوناسه

والف مبرووك على الحمل والله يتمم عليييج