تقرين روايات؟؟ تعالي قولي رايج ..

[سبائك]

مشاركة: تقرين روايات؟؟ تعالي قولي رايج ..

انا اول ما بلشت بلولو الصغيره يحليلها ويا سريويلها الكشكش خخخخخخخخخ
بعدين سوبرمان وطارق وباتمان والشله كلها
طبعا ما انسى ماجد وميكي عشنا معاهم احلى الايام
بعدين تختخ وربعه وادهم صبري وروايات الرعب المصريه
بعدين روايات عبير وزهور واحلام الله يزيد النعمه الحين لو تذبحيني ما اقراهم
بعدين لا عاد ارتفع المستوى مره وحده وقريت ذهب مع الريح بس شنو عشت مع الابطال كاني وحده منهم ومن كثر ما اعجبتني رحت شريت الفيلم بس طلع مو نفس المستوى للاسف
اوه نسيت قبل ذهب مع الريح طحت فتره باحسان عبدالقدوس خوش روايات
والحين احب اقرا قصص دينيه اكثر ......الي اهي قصص التوبه الواقعيه وايد استانس عليهم

 

[حبنا الله عليه]

مشاركة: تقرين روايات؟؟ تعالي قولي رايج ..

رجعتوني لأيام قبل النت ، طبعا لاتستهوني الروايات واكثر ماكانت قراءاتي بسيرة الرسول عليه الصلاة والسلام والصحابة والصحابيات لكن اذكر قريت من القصص :

- مجموعة ( الزمن القادم )

- عروس تزف الى قبرها

هذا اللي اتذكرهم فقططططط

 

[jolie_q8]

مشاركة: تقرين روايات؟؟ تعالي قولي رايج ..

ونسيت اقولكم

اني بديت اقرا (الزهير) لباولو كويليو

راح اعطيكم رايي عقب ما اخلصها

ولي عوده ...

 

[تفاخيه مبطوطه]

مشاركة: تقرين روايات؟؟ تعالي قولي رايج ..

lala2 :

على كثر ماسمعت عن عبير ! ماقط قريتها!! هاه أتشجع؟

خان الخليلي منو كاتبها؟ إشفيكم ماتعيدون القرايه مره ثانيه !!!

وي أنا عادي أقراها ثلاث مرات ! بس لما تمر سنه ولا زود عشان أنسى الأحداث شوي

تختخ نفس الأفلام الهنديه؟؟ لا الله يهداج صج في خرابيط وايد ويهالو يحوسون تالي الليل يبحثون عن المجرم ماتدرين وين أهلهم عنهم! بس مو فلم هندي عاد

مُناي :

أنا حتى مع النت مابطلت قراية الروايات

صج فجيت عنهم شوي بس نطري علي فتره تلقيني راده عليهم بقوه.. يعني على حسب المزاج

تصدقين توووووووووني خالصه رواية نساء صغيرات .. وهذي أول روايه إجتماعيه أجنبيه أقراها !! وشكلي مو آخر روايه قريت حق أجاثا كريستي بس فرررررررق! ذيك عادي تخلص الصفحه وأنا موفاهمه شي

ليش ماشريتي حق بنتج تختخ وربعه؟ ياحلوهم بسوق بو 100 ترى يونسووون ! ماطحتي فيهم؟

 

[تفاخيه مبطوطه]

مشاركة: تقرين روايات؟؟ تعالي قولي رايج ..

jolie_q8 :

شنو الروايات اللي عجبوج حق عبدالقدوس؟ يمكن يكونون نفس اللي عجبوني

نجيب محفوظ ما أفهم رواياته! عندي ( السراب - الطريق - حديث الصباح والمساء ) بس ماقريتهم عدل تصفحتهم ..

ياااااحلوووو يوسف السباعي بصراحه رواياته تونس شنو قريتي له؟؟

ولو إنه بعضهم مافيهم منطق ولي نقد عليهم .. بنقدهم المره اليايه إن شاء الله

شوقتيني على إني راحله! شكلي بشتريها !

وشنو لستتج يمكن في أحد قاري شي منهم !!؟

طوق البنفسج :

تقصدين اللي يصيرون إنجليزي عربي؟ ولا بس إنجليزي ! لأنه لما قريت نساء صغيرات كانت إنجليزي عربي .. حاولت أقراها بالإنجليزي بس وايد رجعت للعربي لأنه في كلمات ماعرف معناهم


رونه :

مافهمت جملتج ( بنات أحلى روايات وأحسنهم؟)!!

 

[تفاخيه مبطوطه]

مشاركة: تقرين روايات؟؟ تعالي قولي رايج ..

سبائك :

تصدقين بروح معرض الكتاب وهدفي الأساسي لولو وطبوش هههههههههههههه

ماتنلقى بالمكتبات ياربي مادري ليش ! مع إنه لها جمهور غفير !!

<--- إهي وخواتها

شوقتيني على ذهب مع الريح!!! يالله ضميتها للقائمه

ميكي هذا حبيبي الأول والخير بس ما أقرا قصص ميكي ويا الشبح ماواطنهم أمووووووووووووووت على بطووووووووووط

خوش شي قصص التوبه! لا وبعد عندج قصص الصحابه والتابعين أحلى وأحلى

حبنا الله عليه :

كلش ماقط قريتي بحياتج روايات!

أوكي مولازم روايه .. ميكي وبطوط ولولو وطبوش وماجد وتختخ! ولا شي ؟!

عروس تزف إلى قبرها! ياساتر

jolie_q8 :

يالله ناطرينج تخلصينها وتعطينا عليها ذاك النقد هاه بس مو تحرقين علينا الأحداث!!

 

[طوق البنفسج]

مشاركة: تقرين روايات؟؟ تعالي قولي رايج ..

هلا تفاخيه لا انا اقرا الي بس انجليزي عندي هذيل الي نص و نص بس امي كانت شاريتهم لي بس موذاك الزود احب الي بس انجليزي و شوقتيني بروح انبش بمكتبتي بشوف اذا في شي ماقريته اقراه ولو اني ما اعتقد الانه القصص اليديده احطهم عند فراشي لما اقضي عليهم ادخلهم المكتبه

 

[.]

مشاركة: تقرين روايات؟؟ تعالي قولي رايج ..

بسالكم عن ......

شنو احسن روايه قريتوها.....؟

 

[سبائك]

مشاركة: تقرين روايات؟؟ تعالي قولي رايج ..

تفاخيه حصلتي لولو ولا لا؟؟؟؟؟
عاد مو تنسين اخيتج الكبيره تراها ناطرتهم خخخخخخخخخخخ

 

[jolie_q8]

مشاركة: تقرين روايات؟؟ تعالي قولي رايج ..

شنو الروايات اللي عجبوج حق عبدالقدوس؟ يمكن يكونون نفس اللي عجبوني

ويه تفاخيه ..بترجعيني لأيام المراهقه التعيسه لووووول

اللي يحضرني الحين (انف وثلاث عيون- النظاره السودا- انا حره- اللص والكلاب- اين عمري ... وايد وايد- الوساده الخاليه - وايد وايد (الاسامي مو حاضرتي الحين)

نجيب محفوظ ما أفهم رواياته! عندي ( السراب - الطريق - حديث الصباح والمساء ) بس ماقريتهم عدل تصفحتهم ..

صح نجيب اسلوبه صعب شويه.. بس لو تعيدين قراءه اي روايخ الحين راح تفهمينها بسرعه

ياااااحلوووو يوسف السباعي بصراحه رواياته تونس شنو قريتي له؟؟

السباعي قريت اني راحله ... وناديه !! << نسيت اذا اهيا له والا حق واحد ثاني

وشنو لستتج يمكن في أحد قاري شي منهم !!؟

*أنثى العنكبوت -رواية - قماشة العليان

*مائة ورقة ياسمين -. شعر+ نثر + ترجمة - غازي القصيبي

*سبعـــــــــــــة -. روايــــــــــــة .- غازي القصيبي

*عيناك قدري .- مجموعة قصصية .-غادة السمان

*الخيميائي--روايـــــــة .-- باولو كويلو .

 

[تفاخيه مبطوطه]

مشاركة: تقرين روايات؟؟ تعالي قولي رايج ..

طوق البنفسج :

ويه نفس طريقتي !!! أحط الروايات يم راسي وأقضي عليهم وحده وحده

ساعات والله أندمج بالروايه لما أنسى العالم كله وبعدين فجأه ألقى نفسي مع الأبطال جد والله أنسى عمررررررررررري ! تالي فجأه أستوعب إنها روايه هههههههههههههههه

ماتصير فيكم؟؟

رونه :

سؤالج يبيله قعده! في روايات عجبوني وقريتهم أكثر من مره بس مو لي درجة أنعتهم للناس!!

بس الحين عقب ما خلصت نساء صغيرات أقولج بلشي فيها خفيفه وحلوه ولو إنه نهايتها تقهر

سبائك :

بروح الثلاثا إن شاء الله معرض الكتاب وأول شي بدوره لولو وطبوش أهـــــــــــم شي

 

[تفاخيه مبطوطه]

مشاركة: تقرين روايات؟؟ تعالي قولي رايج ..

jolie_q8 :

سؤالي محدد شنو الروايه اللي عجبتج مو شنو عندج حق عبدالقدوس الله يهديج يبتي رف الروايات وييتاي

أهااا يعني كل هاللي كتبتيهم عاجبينج؟

تصدقين ما أتشجع أقرى حق روائي ولا روائيه من الخليج!

مع إني قريت روايه إسمها (كويتي + كويتيه) وأتذكر إنها كانت حلوه لقيتها بمكتبة إبوي

وبخطاري أقرى وسميه تخرج من البحر حق ليلى العثمان .. بس لما الحين ماطرخت الفكره براسي

 

[طوق البنفسج]

مشاركة: تقرين روايات؟؟ تعالي قولي رايج ..

صاجه تفاخيه تصير فيني وايييييييد خاصه اذا صج كنت مندمجه بالكتاب والله مره قمت الصبح تريقت واختفيت وماطلعت الا حق الغدا و رديت اختفيت ليما العشا وانا مجابله الروايه حتى امي تقولي لو امتحان ماجابلتي جذيه بس صج متعه القراءه

 

[تفاخيه مبطوطه]

مشاركة: تقرين روايات؟؟ تعالي قولي رايج ..

أم هيا :

الزمن القادم مو جنه سووها مسلسل؟؟ منو الكاتب؟

طوق البنفسج :

تصييييييييير فيني تصدقين ماقدر أخليها مده وأروح بعرف شنو صار على الأبطال أقعد أحاتيهم

بس اللي أنا أقصده غير عن لما تنعزلين عن أهلج بالغرفه تنسين إنج بغرفتج وتنسين كل شي وتصيرين مع الأحداث ! تالي فجأه توعين على نفسج هذا اللي أقصده

 

[طوق البنفسج]

مشاركة: تقرين روايات؟؟ تعالي قولي رايج ..

اي نو مي تو تصير فينيهالحاله بس مودايما على حسب مدى اندماجي بالي اقراه

 

[تفاخيه مبطوطه]

مشاركة: تقرين روايات؟؟ تعالي قولي رايج ..

صاجه على حسب إندماجي بالقصه وأكثر شي تصير فيني لما أقرا تختخ :d

 

[تفاخيه مبطوطه]

مشاركة: تقرين روايات؟؟ تعالي قولي رايج ..

هاه منو راح معرض الكتاب ؟؟!!!

وشنو شريتو !؟

أنا أمس رحت وشريت من اللي قلتو عنهم ( إني راحله - ناديه - ذهب مع الريح )

وحسسسسسسسسسسسست على لولو مالقيت لها أثر أوف ضاق خلقي ملاقه !!

وشريت كتاب كنت مدورته بكل الكويت مالقيته إسمه للكون إله شكله حلو بس متيييييييييين مادري شلون بشيله عشان أقراه :d

يالله شنو شريتو ؟!!

 

[بنت الشمالي]

مشاركة: تقرين روايات؟؟ تعالي قولي رايج ..

ذبحينييييي على روايات عبيييييير وااااااو باليوم اخلص 2 واذا فاضيه 3

ومو شرط تكون اي كاتب المهم عندي ان الكاتب يكون عنده اسلووووب في الروايه ويخليييييج تعيشين جو مع الروايه

وبعدين انا ماحب اقرا القصص البوليسيه احس اني وايد اتنرفز منها واقعد على اعصابي شلي حادني
احب جو الهدوء الرومانسي واقرالي قصه قصتين من الرومانسيات

 

[تفاخيه مبطوطه]

مشاركة: تقرين روايات؟؟ تعالي قولي رايج ..

أم هيا :

دورتها بالمعرض بس ماكان بحثي بضمير

بس أتوقع ألقاها بجرير ولا العجيري ! مو لازم المعرض !!



بنت الشمالي:

على كثر ماقريت عن روايات عبير ماقط قريتهم!! ولا شريتهم أصلن!

أتذكر خواتي قبل يقرونها بس ماشدتني مادري ليش

تصدقين سمعت وحده بالمعرض تسأل البياع عن روايات عبير جان يقول لها بالمكان الفلاني يوم راحت قال حق رفيجه : روايات عبير هذي من 20 سنه كنا نقراهم لما الحين ينباعون!!

 

[تفاخيه مبطوطه]

مشاركة: تقرين روايات؟؟ تعالي قولي رايج ..

شكلي برد على أسألتي الحين ..

1-شنو نوع الروايات اللي تحبين تقرينها ( رومانسيه - بوليسيه- إجتماعيه.. إلخ )

رومانسيه + إجتماعيه

2-منو (الكاتب/الكاتبه) اللي تحبين تقرين له ؟

كنت إحسان عبدالقدوس بس عقب ماقريت حق يوسف السباعي عرفت الفرق

فصار يوسف السباعي ..

3-شنو الروايه اللي مهما تعيدين وتزيدين فيها ماتملين (تقرينها أكثر من مره ) وليش ؟

بصراحه لما الحين مالقيت هالروايه!! يمكن عدت قرايه بعض الروايات بس مو من زود إعجابي فيهم .. لا والله من الفراغه

4- إذا بخطارج نقد على روايه سواء بناء أو هدام قوليه لنا يمكن يكون راينا من رايج ..

رواية (نحن لانزرع الشوك) عبالي بتكون نفس اللي شفناها بالمسلسل ! البطله كانت تكسر الخاطر وتتعاطفين معاها .. بس اللي بالروايه الصجيه غييييييييير !

تروح شقق .... وعاشت عند واحد شهرين بدون زواج ووايد سوت خرابيط والمفروض نتعاطف معاها يعني !!!! الكاتب مصورها على إنها المسكينه اللي ماعندها أحد ..وإهي ماخذه حياتها طول بعرض !!

حتى أتذكر كنا أنا وأمي نقراها كانت جزئين ... أمي وصلت الجزء الثاني وأنا لما الحين بالأول يوم سألت أمي عن الجزء الثاني وينه!! جان تقول بالزباله

ههههههههههههههههههههه لاعت جبدها أمي

ورواية (السراب) حق نجيب محفوظ لوعت جبدي صج عاد!!

إهي تتكلم عن ريال ومرته متزوجين بالورق .. عشان جذيه إسمها السراب !

أحداث القصه ممله وايد.. ومن كثر الملل ماكملتها صراحه وقفت بنصها وحذفتها مع باجي روايات نجيب محفوظ اللي عندي

رواية (نساء صغيرات) تشووووووووق .بس اللي شافت البباي مالهم بتستانس بالروايه أكثر لأنه لما ترجموها لغو وايد أحداث واللي ماشافت البباي ماراح تحس بهالشي ..

الحلو بالروايه إنها قصت أربع خوات كانو أغنيا وصارو فقارا فتتعاطفين معاهم لدرجة قمت أبجي عليهم بسرعه أتأثر !!

بس نهايتها بطت جبدي ودي أقول ليش بس أخاف أحرقها على اللي ماقراها !!

يالله نقدو لنا الروايات اللي قريتوهم .. النقد مولازم يكون لروايه ماعجبتج!! لا حتى الحلوه نقديها نقد بناء