تكفون مساعدة ضروري

[شيهانه المزيونه]

السلام عليكم
أبي مساعدة منكم ضروري
أنا تقدملي واحد سعودي يشتغل بالداخلية بالكويت ويدرس حقوق بمصر
وعندهم بيت ملك لهم وعايشين بالكويت
بس المشكلة إنا خاطبين منهم أختهم
ولحد الحين ماملجنا أو بالأصح مارفع اخوي اوراق الزواج
وجت اخته وخالته يخطبوني من اهلي
وابوي لما درا بالموضوع رفض
قال هذا معناه بدل اخذو منا وناخذ منكم
وانا الحين محتاره شسوي ابوي وامي رافضين وانا استخرت ربي وموافقه وخواتي موافقين ويحاولون بامي انها توافق واخواني سائلين عن الولد الحمد لله الكل يمدح فيه

ابيي نصايحكم شسوي بالمشكلة إلى أنا فيها الحين اوافق او ارفض

 

[هذا مزاجي]

دامج استخرتي معناته اي شي بيصير خيره لج
سواء وافقتي ولا لا
وعسى الله يوفقج ويكتبه من نصيبج

 

[هــنــوف]

هم مو حلوه يخطبونج وانتو خاطبين منهم وماصار شي مافيهم صبر لهدرجه وشي طبيعي ابوج بيرفض بس دام استخرتي الله يكتب الي فيه الخير خلي الامور تمشي على الي فيه خير لج انشالله

 

[Miss-ipad]

دامج استخرتي ربي بوفقج ,,,,,, ويكتب لج الخيرة
اذا الرجال زين واخلاقه زينه لازم احد من اخوانج يفهم أبوج ان الرجال موقصده بدل يمكن كان خايف ان ابوج يرفضه لانه سعودي بس لما تقدم أخوج وخطب قال فرصة اكيييد ما راح يرفضوني,,,,,
بعدين البدل اذا كان بدون مهر يعني (((اختي باختك))) هذا حرام وماأظن الرجال جذي قصده ابوج فاهمه خطأ.....وآخر شي اهم شي رضى الوالد لان فيه توفيق لحياتج لاتاخذينه واهو رافضه
ربي يوفقج ويكتب لج اللي فيه الخير اللهم ااااااميييين

 

[د.شريفة]

غاليتي الخيره فيما اختاره الله سبحانه وتعالى انتي استخرتي وربي يكتب اللي فيه الخير لج
سبحان اذا وافق والدك واقتنع فاعلمي ان الله هداه لصالحك واذا ظل على كلمته وظل رافض اعلمي ان الله يريد لك الخير فليس هذا الرجل اللي فيه الخير لج ويبي يعوضج باللي افضل واحسن منه

 

[الفدنه]

طيعي ابوج زواج البدل ما وراه الا الهم والمذله
والله يكتب لج اللي فيه الخير

 

[منو انت]

الله يكتب لج الخيره يارب وعلى فكره والله كل زواج البدل اللي اعرفه ان اي حركه يسويها اخوج ترد عليج من زوجج بامر من امه واخته اللي اهي مرت اخوج والله يكتب لج الخير يارب

 

[شوشو الشقيه]

زواج البدل
انتبهي منه
لو اخوج طلق بنتهم
بعدها زوج يطلقج انتي
من جذي ابوج خايف عليج

هاها
حطي في بالج

الولد لا يوجد عليه كلام
بس انتبهي
اذا طلق اخوج بنتهم
اهل زوجج بيخلون زوجك يطلقج
واايد عائلات صارت جذي

 

[سوسن1980]

حبيبتي البدل هم اللي يشرطون من البدايه نعطيكم بنتنا وناخذ بنتكم اما حالتك انتي يمكن مايقصدون فيها البدل مادري اذا اقتنع ابوك اتكلي على الله

 

[BomCHekaWawa]

تدرين عاد اول مره اسمع بزواج البدل !
من ردود البناتت فهمت ان اللي يصير بمرت اخوج يصير فيج !
تتطلق انتي تتطلقين .. يمكن تتهاوش مع اخوج لا سمح الله انتي ريلج يتهاوش معاج :\
والله مادري آنا اقول امشي على شور ابوج احسن
الله يكتبلج اللي فيه الخير و الصالح

 

[شيهانه المزيونه]

مشكورييييين
على الردود
وعلى قولتكم أخلي الأمور مثل ماهي
إذا فيه خير لي الله يسهل الأمر
بعدين هم موقصدتهم بدل ابوي حط اباله أنه بدل
بس يلا انخلي الامور تمشي ونشوف شنو يصير
ومشكورين مرة ثانية على الردود الحلوة كنت محتارة شوي
بس الحين بعد ردودكم الحلوة عرفت شنو راح اقرر

 

[أم توتو]

الله يختار اللي فيه الخير والصالح

 

[( المـلاك )]

حبيبتي حالتج هذي مو معناتها بدل
ليش حاطين ببالكم انها بدل و موقفين نصيبج عليها