جبايبي ساعدوني جزاكم خيير

[العطر 87]

السلام عليكم خواتي ....بغيت منكم خدمه جزاكم الله خير انا بطلب لولدي كرسي ومو عارفه شلوون كنت اعالجه بلندن وقالي الدكتور انه بحاجة كرسي ولما طلبت له هناك رفضوا الكتاب انه مو بحاجته طفل شلل دماغي اعاقه شديده لا يقعد ولايمشي اذا اهوو مو محتاج منو اللي يحتاج شي يحرق القلب اللي واسطته معاه ياخذ واللي ماعنده يتووكل على الله ماقول الا حسبي الله ونعم الوكيل ...المهم من لندن عطوني تقارير قالولي هذي تقارير لازم الولد يكون له كرس لانه ولدي بيكمل ثلاث سنين الله يشافيه ويشافي عيالكم اكلم المستشفى ودكاترته الحين كل من يقطني عالثاني بعرف شلوون اقدم لولدي عالكرسي وين اروح تكفووون ارشدوني .............وعندي استفسار ثاني انا ولدي دايم بالمستشفى دكتورته قالت لازم يكون بالبيت عندج جهاز السكشن حق شفط البلغم المهم يوم راح زوجي لصبحان يطلبه قالووله الجهاز 150 دينار معقوله انه مايستخق الجهاز من غير رسووم اذاهم قاعد يعطون الناس كراسي بالالف وميتين الحين جهاز حق الولد تعبان يبون عليه فلوس انا موذابحتني 150 دينار بس حبيت اعرف شنو الاجراءات اللي اسويها ومشكورين خواتي

 

[HearT ChocolaTe]

السلام عليكم ورحمة الله وبركاته

ربي يقر عينج بشفاه حبيبتي ~ طالما انتي عندج هوية من المجلس
اذن هو يستحق الكرسي للاعاقه الشديده

لازم الدكتور يحولج لعيادة الكراسي .. ودكتور العياده يقرر اي كرسي هو محتاج
تاخذين ورقه منه بالقياسات المطلوبه لطفلج تروحين فيها المجلس الاعلى للمعاقين
هم بدورهم يسوون لجنه وياخذون عرض لاكثر من شركه

وبعدين تراجعينهم يمكن بعد اسبوعين والله ما اذكر كم بالضبط يعطونج
اوراق لاكثر من شركه تشوفين اي كرسي تبينه

وع اساسه تردين لهم بموافقه من الشركه وخلاااااص لا واسطه ولا هم يحزنون
طالما طفلج اعاقته شديده هو يستحق الكرسي وكل الامتيازات اللي يعطيها المجلس الاعلى
بس ترى ما تستملين الكرسي مباشرة لا .. يتطلب وقت شهرين او اكثر


وبالنسبه للمخازن لازم تأمين حبيبتي ... شوفي هاللنك
http://www.q8yat.com/t320954.html
الله يصبرج ويصبر كل ام صابره ومحتسبه

 

[الصابرة المحتسبة]

وعليكم السلام

الله ياجرج ويبلغج بشفاء وليدج

الكراسي المتحركة للمعاقين حركيا والسماعات الطبية للصم​

تم في منتصف العام 2001م اعتماد المجلس الأعلى لشئون المعاقين لصرف الكراسي المتحركة والسماعات الطبية للمعاقين ، على أن يقوم المجلس بدفع جزء من التكلفة وبما لا يتجاوز الخمسمائة دينار
( 500 د . ك ) للكرسي المتحرك ، ومائة وخمسون دينار ( 150 د . ك ) للسماعة الطبية وذلك على ثلاث مراحل سنيه ، على أن يقوم ولي الأمر بدفع باقي التكاليف ، حيث يمنح المعاق المحتاج لكرسي كرسيا وبعد فترة زمنية يتم تحديدها يعطى كرسيا آخر وهكذا وبحد أقصى ثلاث مرات خلال حياته وذلك وفق الإجراءات التالية : -

• كيفية الحصول على الدعم : يتقدم طالب الدعم ( المعاق أو ولي أمره ) بكتاب يوجهه إلى المدير التنفيذي للمجلس الأعلى لشئون المعاقين موضح به نوع الدعم ( كرسي ، سماعة ) على أن يكون مستوفيا الشروط التالية : -

1. كويتي الجنسية ولديه شهادة إعاقة وعلى أن تكون نوع الإعاقة تتطلب توفير الكرسي أو السماعة .
2. لديه بطاقة مدنية .

• الإجراءات المتخذة من قبل المجلس : يتولى قسم الأجهزة التعويضية بالمجلس استلام الأوراق المقدمة بعد استيفاء كافة الشروط وتسجيلها على الحاسب الآلي وفتح ملف لمقدم الطلب وتحويله للجنة الطبية المختصة وهي لجنة الكراسي المتحركة أو لجنة السماعات الطبية لتقييم الحالة الصحية للمعاق وتحديد توصية ومواصفات ( الكرسي ، السماعة ) المطلوبة والتي تناسب حالته .
• بعد اعتماد اللجنة الطبية للحالة الصحية يقوم مقدم الطلب بإحضار عرض سعر من الشركات المعتمدة من وزارة الصحة ويتم تحويل عرض السعر إلى اللجنة لاعتماد مواصفات الجهاز المطلوب سواء كان كرسيا أو سماعة طبية وتحديد ملاءمته للإعاقة وللمعاق .
• ترفع الأسماء للأمين العام للمجلس الأعلى لشئون المعاقين لاعتمادها ثم تتم مخاطبة إدارة الشئون المالية والتنسيق معها بوزارة الشئون الاجتماعية والعمل لسداد مستحقات الشركات الموردة ( الكرسي ، السماعة ) عقب توريد عدد معين .

 

[((ام فروسي))]

الله يجيرك ويسهل امورك