جم كان مصروفج ؟؟

[حناينq8]

الموضوع كله فلوس دشي شاركي

حبيت ادردش وياكم

واشوف اجوبتكم ووجهة نظركم من الموضوع اللي باين من عنوانه

ولكن الجواب مو بس جم كان مصروفج

وجم صار ليمه وصلتي الجامعه

السؤال يمتد الي وقتنا الحاظر

وجم تعطين عيالج مصروف ؟؟
هل انتي شايفه ان الفلوس لمن تكون على قد حاجه ولدج او بنتج افضل

والا زياده الفلوس بيد الياهل افضل جدام ربعه او شي يغطي حاجته ويزيد

اي اريح لج بالحالتين ؟؟

*******

اول الثمانينات

كنا بالابتدائي

الفرصه الاولى ايام العز ريوقنا بالمطعم
شوربه العدس - مع التوست
البسكوت والحليب
التوست والجبن .... الخ

الفرصه الثانيه اهي اللي نطلع فيها المصروف
وكان

100 فلس

نشتري فيها بفك وسانكست

عقب سنتين او 3
انتهى من الوجود شي اسمه المطعم المدرسي

وزاد مصروفنا الي ربع دينار نشري صمونه وعصير وكاكاو ويكفينا بالفرصتين وحق راعي البرد بهالده

ما وصلنا الي رابعه ثنوي الا والمصروف صاير دينارين لزوم العزايم واذا حابين نشتري حق صديقاتنا ويانا


اجوبتي ........

عيال هالوقت

ماعاشوا العز اللي عشناه بالمدارس ايام الثمانينات

لازم ياخذ معاه جنطة الاكل وفيها العصير والساندوش او الكرواسان وبطل ماي وقطعه فاكهه وبسكوت
ونص دينار الي دينار حق الفرصه الثانيه والهده

انا ضد اني اعطي الياهل فلوس اكثر من حاجته
احب المصروف على قد ما يحب يشتري
وان طلب زياده وانا عرف السبب ما ابخل عليه ان يشارك بالمبلغ اللي يطلبه



والحين


هذي اجوبتي واتمنى اشوف مشاركتم وياي

على فكره


قبل ما انهي الموضوع

قبل لي زاد من مصروفنا

كنا نيمع الباجي برفيقة دربنا

هالحصاله العجيبه حصاله الجمل

واخر شي هذي مشترياتنا يحلونا

 

[الليدي...عمشه]

موضوع عجيب

ايام الابتدائي كنا ناخذ ربع والمتوسطه نص دينار والثانوي دينار

 

[طبعي راقي]

رد : جم كان مصروفج ؟؟

ياحلو ايام قبل كنا قنوعيييييييييين.كان المصروف من ربع ليييييييين وصل دينار ويزود بعد!!ونقط بالحصالة بعد
اما الحين...... ولدي بأول ابتدائي لازم مصروف راهيييي ومايرضي بعد باكل البيت يقول فشله يضحكون علي!!!!

 

[غلاتي ♥ الكويت]

رد : جم كان مصروفج ؟؟

الموضووع اينن انا اهلي صرفوا علي لي الثنوية ومو وايد بس من تخرجت نسووني ولا كانة عندهم بنت قمت اصرف على نفسي من اعانتي

 

[ضحـاوي]

خووووش موضوع ,, ذكرني بايام ياحلاتها

ابتدائي ما اذكر جم كانوا يعطوني بس لحقت على وجبات المدارس المجانيه باولى وثانيه

المتوسط كان ربع

الثانوي نص

بالكليه كان دينار ونص واحيانا دينار ( حسب مزاج ابوي لووول )

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

الحين عيالي اعطيهم جنطه فيها حليب كاكاو او فراوله وبطاط نايس بالدياي ابو ريحه يحبونه وايد :eh_s(2):

والمصروف نص دينار يشترون فطيره او كرواسون وعصير بالفرصه الاولى والباجي يخشونه للفرصه الثانيه

او لراعي البرد واحيانا يردونه والقاه بمخابيهم ولا يدرون عنه

 

[حمام شاقني فنه]

الابتدائية ربع
والمتوسطة مرينا بظروف صار مصروفي ميه فلس

والثانوي صار مصروفي دينار

 

[aṕriliå]

رد : جم كان مصروفج ؟؟

الابتدائي ربع ال نص

المتوسط نص الى دينار

الثانوي دينار

الجامعة 5


يعطيج العافية على الموضوع

 

[الحيـاء ~]

لازم ياخذ معاه جنطة الاكل وفيها العصير والساندوش او الكرواسان وبطل ماي وقطعه فاكهه وبسكوت
ونص دينار الي دينار حق الفرصه الثانيه والهده

لووووووووول
الحين النآس يسوون جذي عساس لآ ضآعت الجنطـه يكون عنده فلوس
و إذآ ضآعت الفلوس يكون عنده أكل

بالنسبه لي بما أنه توني بالمتوسط , فـ أذكر بالابتدائي مصروفي كان ما يتعدى النص
و الحين سبع ميه و خمسين يكفوني

و بالنسبه للمصروف بره المدرسـه مآ آخذ , بس إذا ابي شي امي و ابوي يشترولي و لآ أسال عن السعر

و شكرااا

 

[lovkom]

اممم والله ايام الإبتدائي ما اذكر لووول بس الاغلبيه كنت اخذ وياي اكلي ويمكن نص دينار وكنت ارجع الباقي بحصالتي لوووول ..

والمتوسط اول مادخلت سادس طبعا انا وبنت عمتي كنا نتعازم بالمقصف وميانه بس الاكثر كنت اخذ اكلي وياي ..

بس بعد سنه كله فلووس كله دينار .. بس كنت اشتري بنص واخلي النص بغرفتي يعني واليوم الثاني اخذ نص يعني امي تعطييني دينار حق المدرسه واليوم الثاني لي يت بتعطيني دينار اقولها يما مالا داعي عندي نص > لإنه ما اكل غير فطيرة جبن وكوتيل وككاو كتدر والفرصه الثانيه ما اكل شي لووول ..


وكله دينار ..

وطبعا ماعندي عياال لوول توني عنونو ..

واذا يبت اعيال بالمستقبل لوول

ارفض فكرة اني اعطيهم فوق احتياجاتهم لإنه بصراحه بجذي ماراح يتعلمون المسؤليه ..

 

[نهايتنا قبر و موت]

نفس البنااااات .~


الابتدائي ربع + الاكل ,, والمتوسطة نص ,, والثنوي دينار ومرات دينار ونص بعددد ابووي راهي معاي حييييل

 

[الجــادل]

رد : جم كان مصروفج ؟؟

الابتدائي والمتوسط ما اذكر

بس بالثانوي دينار

وبالجامعه ابوي بعد عمري كان يمشيلي شهري 200 حق تلفوني وكتبي والمطاعم والبحوث

بصراحه قبل الفلوس فيها بركه الحين الصغار لا بغو طلعه اقل من 20 حق كل واحد ما ياخذون ويالله تلحق العاب وسينما ومطعم

بنات لحقتو على الطوابع اللي نلزقها بدفتر بعدين نبدلهم بفلوس؟؟

انا لحقت عليهم بالابتدائي

 

[blue diamond]

امبييييييييييييي انا الذاكره عندي ممسوحه بالابتدائي والمتوسط والثانوي
اللي اتذكره بالجامعه ان كل ما فلست اروح عند ابوي

 

[حناينq8]

الليدي عمشه

مشكوره حبيبتي على المشاركه الحلوه

طبعي راقي

وانتي الصاجه كنا قنوعين عكس عيال هالوقت

غلاتي الكويت

يقلبي والله لا انشالله ما نسوج انتي بنتهم الغاليه
وعسى الله يبارك لج بفلوسج وتزيد ما تنقص

ضحاوي

نفس الحاله انا معاج
ومنوره الموضوع يقلبي

حمام شاقني فنه


شكرا على مشاركتج حياتي

رواسي الامل

الله يعافييييج حبيبتي

الحياء

يالله عقبال الدينار حبيبتي
وانتي الصاجه لي ضاع الاكل الا الفلوس موجوده والعكس

! Ab3ln˜·˜ ĵnό0όny !

يحياتي الله يخلي لج اميمتج
وعقبال مصروف الجامعه

نهايتنا قبر وموت

منوره يقلبي والله يخلي لج الوالد

الجادل

اي يقلبي انا لحقت على دفتر الطوابع جنه كان من بنك التسليف والادخار
كانوا يشجعونا على الادخار يريت يدرون هالشي حق عيالنا

blue diamond

اي التفليسه قبل اهي اللي تخلينا نلحق ابونا من مكان لي مكان
ومنوره حبيبتي

 

[**الخزامى**]

رد : جم كان مصروفج ؟؟

انا بالابتدائي كان نص دينار
والمتوسط هم نص
اما الثانوي كان دينار
والكليه الحين يعطيني ابوي كل يوم 3 من غير اذا مافيه رصيد يزدني فلوس الرصيد
وغير شغل الكليه بعد عمري كله عليه من كتب وبحوث وكل شي عليه
وما مصروفي الشهري اعانتي ويزيدني اذا نقصني شي
بعد عمري عساني ماخلى منه ويخليه لي يااااااااااااارب

 

[ReeM ^ Style]

ههههههههههههههههههههه

ااممممم الابتدائي نص دينار
المتوسط هم نص دينار
الثانوي دينار
الجامعه الاعانه 100 غير مصروف الوالد
مشكوره حبيبتي

 

[أم حمودي**MALL**]

لوووووووول
ذكرتيني باللذي مضى
ايام الابتدائي ربع دينار
وحتى المتوسطه

الثانوي رقوني صار نص خخخخخخ

وبالجامعه شيل نفسك بنفسك اصرف على روحي من الاعانه

الحين احط حق بنتي اكل وغير جذيه اعطيها ربع تشتري توها بأولى ابتدائي الله يستر من بعدين

 

[أم حمودي**MALL**]

الله على دفتر الطوابع وحصالة الجمل )))))
ولا تنسون دعاية البنك الوطني
هلا هلا زينه بحساب التوفير انشالله يصير عندك مال كتير كتير

 

[بنت^_^الشيوخ]

رد : جم كان مصروفج ؟؟

هههههههه خوش موضوع

اللي اذكره ان ايام الابتدائي ربع دينار

المتوسطه والثنويه نص دينار ههههههه

الجامعه دينارين ومايقصرون اذا ابي بعد اييييييي عيل شووون عيل زقرررررت لا وفوقهم عندي اعانه صج طماعه ههههههه

 

[حناينq8]

يا هلا ومسهلا منوريني يا تاجرات المنتدى


الخزامى

الله يخلي لج الوالد حبيبتي ويخليج له

ReeM ^ Style

العفو يقلبي منوره الموضوع

أم حمودي**MALL**

وانا نفس الحاله مع بنتي ومرات تطلب نص تبي تعزم رفيجتها

 

[حناينq8]

بنت الشيوخ

تسعدني مشاركتج الاولى بالمنتدى من خلال موضوعي
وحياج الله حياتي