حاليا رواية ليالي الشتاء في مكتبة ذات السلاسل وبالعجيري وب52 ديجريز

[نونو^الدلوعه]

هاي بنات شلونكم ؟

أصدر الكاتب الكويتي محمد الكندري الطبعة الثانية من روايته الأولى ليالي الشتاء والرواية تتكلم عن قصة حب تجمع حصة وصقر في الجامعة وشلون تتحكم الصدفة في علاقتهم على مر السنين والرواية مكتوبة بالكويتي ...

وهذي كلمة الكاتب وموجودة ورا غلاف الرواية ..

​

ما الحياة إلا عبارة عن مجموعة صدف لم تكن في الحسبان ... ​

حتى لو تحقق ما كنا نتوقعه ... وما كنا نطمح إليه ...​

فلا بد أن يكون لصدفة دور فعال في تحقيق ما كنا نريد تحقيقه ...​

الحب ... الطموح ... الرغبة ... التغيير ...​

ما أجملهم لو كان للصدفة دور في غرسهم فينا ...​

والحياة كليالي الشتاء ... جميلة في روعة أجوائها ...​

لطيفة في أمطارها ... مرعبة عندما تبرق سمائها ...​

لو عشنا عالم مليء بالصدف ولياليه كلها ليالي الشتاء ...​

فكيف سيكون هذا العالم ؟

والرواية موجودة بمكتبة ذات السلاسل في الافينيوز ومكتبة العجيري وب52 ديجريز مجمع تلال =) وروايات الكاتب ( فرجينيا 999 ورصاصة منال ) .

إن شاء الله تعجبكم الرواية

وهذا غلاف الرواية

​

 

[رحيل المرافيء]

خووش دعاية

 

[أنثى اليمامة]

لفت نظري تنسيق الكتب بالمكتبة هذي اي مكتبة ،،

 

[سمسمة كويتية]

والرواية مكتوبة بالكويتي ..

مع احترامي
حسافة عليها اسم رواية اذا مكتوبة بالكويتي ......

 

[أنثى اليمامة]

هههه ، توي انتبه لجمله مكتوبه بالكويتي ..

 

[ليلو جبريت]

نونو دامه اخوج ياليت تكلمينه عن العامي

اللحين شوفي كم اصدار له على الاقل يغير شوي

 

[نبض الجود]

لفت نظري تنسيق الكتب بالمكتبة هذي اي مكتبة ،،

مدآخله : هذي مكتبه ذآت السلآسل

..

ان شآءالله بقررآهآ ، الكآتب محمد الكندري كآتب مبدع ،
آحب روآيآته
ويعطيج العآفيـه ،

:eh_s(17):​

 

[نونو^الدلوعه]

هلا فيكم مشكورين على المرور

محمد دايما يسألونه ليش تكتب بالعامية يكون جوابة ( كويتي وأفتخر بلهجتي ولهجة أبوي ويدي ) وأن يبي ينطلق من هويتة الكويتية وثانيا رد على الأخت إلى قالت حسافة عليها أسم رواية إذا مكتوبة بالكويتي فحبيت أقول لج أن اللهجة الكويتية هي إلي تشرف الرواية وخسارة إذا ما تنكتب بالكويتي هذا راي أخوي لما قلت له الرد وشاكر لج ...
وعلى سالفة التغيير فكلموه وايد ناس فقال أنا مستمر على هذا الخط الكتابة بالعامية ..

مشكورين عى المرور =)

 

[ليلو جبريت]

بس اللهجة الكويتية لهجة مشتقة من العديد من الدول

مثلا تركيا ، اليونان ، ايران والخ ........

خل يفتخر بلهجته ماعندنا مشكلة لكن يعرف شنو مفهوم الادب الحقيقي

يعرف ان اغلب دور النشر ترفض العامية


وليش مايفتخر بلغة القرآن مثلا

قوليله ، او انا بدوره وبقوله بنفسي

 

[ليلو جبريت]

بنات جبت لكم رابط التويتر

https://twitter.com/#!/mohamad_mh9

 

[ليلو جبريت]

وايد يلولوووووو

كله لوووول - لووول

 

[ليلو جبريت]

سمسمة هذي الكلام لج


إحدى الآراء إلي ضايقتني حول روايتي ليالي الشتاء إن حسافة عليها اسم رواية إذا مكتوبة بالكويتي فردي على من قال هذا الكلام هو إن اللهجة يتبع


إن اللهجة الكويتية هي إلي تشرف الرواية وليس الرواية إلي تشرفها واشكركم لما قلتوا هالكلام لأنه زاد تمسكي في الاستمرارية بالكتابة باللهجة يتبع

زاد من تمسكي في الكتابة باللهجة الكويتية في كل إصداراتي وبالنهاية أنا كويتي وافتخر بلهجتي ولهجة أبوي ويدي =)

 

[كراميلا مرة]

لولو
ماتجوزين خليهم بكيفهم
اللي يكتب بالعامي غالباً
يكون متمسك برايه مايغيره
ومادري ليش الافتخار مايصير الا لما اكتب روايه بلهجتي @@

شفت الحوار بينكم
وضحكني

 

[ليلو جبريت]

بخليه بحاله

شكله حبوب بس كنت ابي اوصل له شي وشكله وصل

وعنده امتحان مو حلوة اطول معاه

 

[كراميلا مرة]

اي احسن

لا تجمعين لج عداوات
ترى في ناس اذا احد انتقدهم يكرهونه

 

[غيدآء]

السلام عليكم

اختلاف الاراء لا يفسد للود قضيه

مع انني من مشجعات المواهب ولكن ياليت ينموون موهبتهم ..لانه الادب بشكل عام سواء روايه او قصه او شعر اثراء لغوي..!

انا من وجهة نظري الشخصيه انه الروايه اللي تنكتب كلها بلهجة الكاتب ماراح تزيد شيء يعني حالها حال السوالف الي نسولفها!

ولكن لو انها بـ الفصحى وفيها نكهه عاميه غير طاغيه ..! ممكن تخلي القارئ يحب انه يقرا كتب فصحى كثير وماتبعده عن لغة الضاد اللي العالم الغربي يحسدنها عليها!

والله يوفق الجميع

 

[أنثى اليمامة]

امكانيات وقدرات ..
​

 

[سمسمة كويتية]

بالضبط الامكانيات و القدرات .مثل ماقالت أنثى ، اختصرت كل الكلام

 

[ليلو جبريت]

كوكو عندنا منهم اشكال وانواع

بعضهم يعتبرونج عدوة نجاح خخخخخ

 

[7ikayat]

مشكلتنا انا ما نتقبل الراي الاخر اذا كان معارض لنوعية الادب المطروح
النقد البناء موجود فعلا, لكن غالبيتنا ننقد برعونة, ونتقبل بعد برعونة اكبر!
فعلا الفصحى هية لغة القران مثل ماقالت ليلو وهذه اعظم حجة
والعامية ضعف واخفاء لاسلوب الكاتب كانه يتخفى ورا الفصحى لاخفاء اخطائه اللغوية
اما كلامج عن اللهجة الكويتية وان الادب هو اللي يتشرف فيها فهذا كلام عام وبصراحة غير مسؤول
لكن معذورة دام الكاتب اخوج!​