هلا والله فيج حياتي
البنات ماقصروا معاج من ناحية المجمعات
بس عندي نقطه مهمه اذا عندج يهال من 3- 15 سنه افضل تروحين مجمع الافنيوز لأن عندهم محل كبير اسمه "بروي" يتكون من دورين الدور الارضي تقدرين تحطين فيه اليهال من عمر 3-9 تقريبا وتخلينهم من الساعه 11 الصبح لما 10 بليل وسعر الطفل الواحد في نهاية الاسبوع 4.900 والخادمه 3.900 والسعر في ايام الاسبوع للطفل 3.900 والخادمه 2.900، واما الاطفال من 10-15 سنه تقدرين تودينهم الدور الثاني من "بروي" فيه صالة تزلج والعاب الكترونيه ،،، بالاضافه الى محل "ماجك بلانت" عباره عن ألعاب الكترونيه حلوه حق اليهال من 8-15 سنه تقريبا
وانتي تقدرين تتمشين في الافنيوز على راحتج ، وطبعا الافنيوز يعتبر من اكبر المجمعات في الكويت، والمطاعم فيه ما تنعد من كثرها "هذا اهم شي"
وفيه مجمع خاص لليهال اسمه "ديسكفري" حق الأعمار من 1-10 سنين تقريبا ، سعر الياهل 5 دنانير والخدامه ابلاش، وعندهم صالة للعب كرة القدم للأطفال ، بس مشكلة المجمع صغير وااايد ومافي محلات وايد وحتى محلاته خاصه باليهال، وطبعا فيه مطاعم حلوه مثل : "chocolate & macaron" و "chili's"و مطعم ياباني اسمه ساكورا ومطاعم ثانيه للوجبات السريعه
وعندج سوق شرق فيه يم السينما ألعاب الكترونيه للأطفال بس مو كثيره، وسوق شرق حلو يطل على البحر وتقدرين تتمشين على البحر
وعندج بعد مارينا مول فيه ألعاب الكترونيه للأطفال في "game wzzz" وطبعا المارينا يعتبر أفضل مجمع يطل على البحر وعنده مطاعم حلوه بعد بس المجمع موكبير نفس الافنيوز طبعا
وعندج مجمع 360 في محل للألعاب الالكترونيه بس أكثر الالعاب للاولاد من أعمار 7 وفوق يعني مثل "الاتاري والبلاي ستيشن" بس متطوره وأكبر طبعا، ويعتبر مجمع 360 من المجمعات الجديده والشيك وفيه العديد من المطاعم والكافيهات اليديده والغاليه والحلوه بس مشكلته مو كبير وايد
وعندج المركز العلمي فيه مكان خاص للعب الاطفال يكون على طريقه علميه وتعليميه حلوه بالاضافه إلى سينما ثلاثية الابعاد ومكانه حلو على البحر ، بس عيبه مافي محلات للتسوق ومافي مطاعم إلا مطعمين وكافيه واحد
كل المجمعات الي ذكرتها فيها سينما ما عدا "ديسكفري مول" لأنه صغيييييييير جدا وهذا موقع السينما الكويتيه اذا تبين تعرفين مواعيد الأفلام
www.kncc.com
هيل وزعفران تلاقين عنده فرع في المطار أنصحج فيه ولأنه مجهز للهدايا والصوغات، وعندهم فرع في منطقة الجابريه أكبر وهذا رقمهم 25329232
بالنسبه للمهرجانات الغنائية تبدي من تاريخ 3/2/2011 وفيه حفلات غنائية للكبار والصغار ، اقدر أذكرلج حفلات الأطفال وهي:
- حفلة طيور الجنه في تاريخ 7/2/2011 وعندهم عرضين في هذا اليوم : الساعة 5 عصرا والساعة 7 مساءا
- حفلة بارني من تاريخ 25/2/2011- 27/2/2011 وعندهم 3 حفلات يوميه وهاذي أوقاتهم : 11 صباحا و 3 عصرا و 6 مساءا
- حفلات السيرك من تاريخ 22/2/2011- 24/2/2011 وعندهم عرضين يوميا وأوقاتهم : 4.30 عصرا و 7.30 مساءا
أما حفلات الكبار كثيره، اذا وصلتي الكويت راح تلاقين اعلان خاص عن جدول مواعيد مهرجان ليالي فبراير في الجرايد وخصوصا جريدة "الوطن"
الأسعار لما الحين ما أعلنوا عنها، وهذا رقم خاص لجريدة الوطن للاستفسار عن أوقات وأسعار الحفلات 1822255
وتباع التذاكر في صالة التزلج وفروع شركة زين للاتصالات في المجمعات التاليه : الافنيوز ، 360 مول ، المطار
وفيه مسيره راح تكون في شارع الخليج العربي خاصه للاحتفال بالذكرى الخمسين لاستقلال الكويت بس الصراحه مادري اي يوم، بس عموما المسيرات عندنا زحمة وايد وترفع الضغط حرام تظيعين وقتج فيها
وانشالله اكون وفيت معاج
تحياتي وسلامي
:eh_s(9):
