حريم الحموان ،،، الموووت المووووت

[Sisyphus]

مرحبا بنات
اكيد كلكم مريتوا بمواقف مع حريم الحموان
و تعرفون غيرتهم من بعض و الحسد بينهم
و يمكن بعضكم متأذين من هالشي
انا بصراحة فبداية زواجي كنت جذي
كنت على نيتي اعلم زوجة حماي بكل شي اشتريه و اروح له و اسويه من باب انها اختي
بعد فترة اكتشفت انها من صج مو طبيعية
تلحقني و تسألني عن كل شي وانا الخبلة اعلم
و بعد فترة لما اسألها عن شي كله تقول مادري ولا اعرف
مره قلتلها ابي مقادير هالطبخة
جان تقول ناسيه والله هههههه توج مسويتها انا ضحكت قلت صج شر البلية ما يضحك
والله مواقف شكثر يبيلي سنة اكتبهم
بس ودي اسمع لكم و اخذ بنصايحكم
تنصحون تكون الامور رسمية؟
في ناس يستخدمون التطنيش
و في ناس على حسن نيه
و في ناس يستخدمون اسلوب الحره يعني تحرينها مثل ما سوت فيج
انتو شنو نظامكم ؟

 

[زوجة عزيز]

انا مره زوجة حماي كنا كلنا قاعدين في بيت اهل زوجي وانا اول مره اشوفها دخلت وسلمت عليهم كلهم الا انا بس ماتهمني لانها صج ماتسوى

 

[ام حسون24]

انا اخلي علاقتي معاهم سطحيه جدا احسن من عوار الراس

 

[Miss Eteket]

ليش رسميه ؟

بآلعكس آخذ و آعطي معآهآ مآ بخلي آحد يكرهني ..~

و ليش مآ آعلم ,, آكيد لآ خذيتهآ بآلطيب بلقآهآ آطيب مني ..~

و هذي وجهةة نظري "$

 

[نبض شرياني]

سطح علاقاتك تسلم

 

[دلووعه حبيبيي]

والله عادي إحنا مانشوف بعض لابصدفه. ههههههه. معنا عيشين بنفس البيت

 

[قوس قزح]

اذا ناس اجناب مو منكم مو من اولج تكونين ع طبيعتج لازم رسمية
وبعدين لمن تتعودين عليهم وتعيشين معاهم اكثر بتعرفينهم اذا تكونين ع طبيعتج ولا لا
ع حسب الشخصيات اللي جدامج
في ناس طيبة ومن تقعدين وياهم تعرفين نياتهم
وفي ناس من اول نظرة بتشوفين الشر من عيونها

 

[حواري]

انا نظامي اعامل الكل بنيتي و مافادتني نيتي

 

[هيبة ملك]

البيوت أسرار مو أي شئ أقوله

والحموات خلي علاقتج سطحيه جدا معاهم

 

[mannawy]

خلي علاقتج سطحيه اهيا بتم بنت ناس وانتي مو من اهلها وماراح تخاف عليج وتداريج كثر اهلها والحين يالله مصلحتي ومصلحه بيتي وعيالي ومن بعدي الطوفان.
انا عن نفسي اتحاشى اي شي ممكن ينمسك ضدي فتلاقين كلامي مع حمواتي وخالتي وحتى حريم حمواني سطحيييييييييه جدا جدا. ترا مردهم بيتكلمون فيج فخليهم مايذكرون اي شي عميق في شخصيتج او حتى حياتج مع ريلج. بصراحه مره بحياتي فضفضت حق حماتي عن اشياء تخص ريلي تنرفزني بس تحسفت قد شعر راسي مع انها والله يشهد ماتكلمت ولا قالت حق اي احد بس مادري لما كنت غامضه كنت وااايد مرتاحه الحين احس اني شفافه جدامها. ومايندرى ممكن في يوم تذكر هالكلام اللي صار بيني وبينها وتقوله للغير وممكن الله بيهديها وبتسكت وتستر على كل شي سمعته.

 

[Perfume]

زوجي ماعنده اخوان
بس لو كنت مكانج حبيبتي بخلي علاقتي رسمية وما اقول لها شي بس لو سألتني بجاوب عادي ماحب اجذب او اخش شي ماله داعي مثل لما سوت معاج عن الطبخة حركتها بايخة بالعكس لازم تستانس انه عجبتج وبتسوين مثلها
انتي خلج رسمية ولا تقولين لها شي ولا تهمج اصلا

 

[شادن33]

أنا على طبيعتي ما اعرف وايد الف وادور
وعلاقتي فيهم طيبه

 

[كـ غلا ــلي]

انا عن نفسي مالي شغل فيها ولا اهيا لها شغل فيني من اول ماطبت البيت بس سلام واشلونج

ما اخذ واعطي معاها ومرتاحه على جذي

 

[غزلان الشماليه]

شلج بعوار الراس سطحي علاقاتج معاهم

 

[ديانا سبنسر]

انا مع انه العلاقة تكون سطحية مع امل الريل عموما

 

[حيزبونة كيوت]

يمممه خرعتوني : /


>>> علي وشك زووواج


ممممممم انا اتوقع بعاملهم برسمية بالبداية وبعدين تجي زي ماتجي

 

[عسل سل]

يالله اكره الحريم الي من هالنوعيه تحسسني انها بنت بالابتدائي على هالحركات ههههه

 

[فوفو22]

شخصيتي وحده ما تغريها مرت حما ولا شريجه ولا خاله ولا عمه

حلو الانسان يكون له خط واحد يالحياه

ما يتلون حسب الشخصيات اللي امامه

فوفو

 

[قمرية الفيس]

الكل الحين اتخذ سياسة السلام وعليكم السلام وبس من باب انه اريح وفعلا اهوى اريح بواجد بس الدنيا صايرة مالها طعم الحموله بالبيت السلام وعليكم السلام والجيران ماعاد في ميانه وعلاقات قوية مثل قبل الكل ساك بابه وقاعد اللهم ياكافي بس هذا الطغى والعياذ بالله

 

[سارة ة]

وويع يا حريم الحموان قلووبهم مسسسستحيل مسسسستحيل تصفااا لج الله يكفيني شرهم وحسدهم ويبعد عني وعن زوجي المشاكل
شفت منهم مشاكل تشيب الراس