حزينة حدّ الإحتضار

[حنان العجمي]

.
.
.

التحليق هنا سيكون مختلف
متصفح فيه أخباري وأشعاري وخربشاتي وجديدي

فأهلاً بكنّ

 

[حنان العجمي]

رد : حزينة حدّ الإحتضار

بالصدفه وجدت رابط يخص قصيدة مزحي وجدّي

http://www.dhefaf.com/vb/showthread.php?t=6666

شكراً ياريم علي على كل شيء حتى على البكاء كنت أحتاج له في مثل هذه الأيام والوقت تحديداً
ودمتي قريبه مني

 

[حنان العجمي]

رد : حزينة حدّ الإحتضار

ماعدت اميّز بين مزحـي وجـدّي
والبارحه شفت الوضع فـي تـردّي
ماني على بعضي واعاني من ارهاق
امن الغثا وصّلـت يابـوي حـدّي
الناس ترقص فـي فرحْـك وتغنّـي
وأنا أصفّق والدمـع فـوق خـدّي
وقّفت ابرقص لك وفليـت راسـي
مثّلت فرْحي غصب ماهـو بـوّدي
كنت آتمرجح بين حزنـي وخوفـي
تعـدّت الأسبـاب حيـلات يــدّي
لا تلومني وإن بان ضيقـي عليّـا
لا الجزر جزري لا ولا المد مـدّي
مالي جدى ياكـود أشتـال بعضـي
والبعض الآخـر أتركـه للتحـدّي
مابيـن يتـم وحاجتـي للتنـفّـس
أو أستر جروحي ولا ابيـح سـدّي
يالله ياللـي تعلـم أسـرار تخفـى
ثوب الحزن ماعـاده اليـوم قـدّي
فرّج علي مـن ضيقـة ٍ جرهدّيـه
خل الظروف القاسيه بـس تعـدّي
أمي وراحت ألـف رحمـه عليهـا
ومن قبلها راحوا غوالـي وجـدّي
هي سنة الدنيـا كـذا ماأعترضهـا
لكن ّ من حرّ الولـه كيـف أهـدّي
يابويْ شف من عقبها شان لونـي
واللي بتجي للزومنـا مـا تسـدّي
ان قلت ابسكت عاث فيني حريقـي
وان جيت ابحكي وش بقول وابدّي
لا عاد تسأل خاطري ليـه ضايـق
أخـاف تزعجْـك الحقيقـه بـردّي
حاولت أغنـي لكـن القلـب عيّـا
واللي فضحني دمعة ٍ فـوق خـدّي


ودي

 

[حنان العجمي]

من شقّ ستري شقق الله ستره

رساله أوجهها لكل وحده طعنت بشرفي وقبيلتي وأخلاقي أو حتى مصداقيتي
إتقوا الله

اللي تقول ما تستحي هالعجميه واللي تقول مو متربيه واللي تقول ماوراها أهل ولا رياجيل ليش ؟

ما أبيح أي وحده تتكلم عني وحسبي الله ونعم الوكيل على كل من جاب سيرتي بغير وجه حق

 

[حنان العجمي]

رد : حزينة حدّ الإحتضار


بلّغو أعداء شعري يا عرب
ماعلي من هرج كل الحاقدين
من براسه شيٍ؟ إحساس وعتب؟
لا يجي إلاّ معه علم ٍ يقين!
إسمي اللي ماسترته باللقب
والله ان تبطي ترددْه السنين
ومن يلفّق قول وعلومٍ كذب
كل حكْيه يوم نحشر له يْدين
جعل حوباتي تحدّه للكرب
ولا يفرج له إله المسلمين
همي اللي حاصدٍ فرحي حطب
يدْفي العالم وأنا برد الكنين:
ما صنع منّي على قول العرب
غير وحده عن كثير العالمين

 

[حنان العجمي]

رد : حزينة حدّ الإحتضار

​

مرّ عمري خساره بين همّ / إحتياج
كنّي اللي بغيابه /لا سند أو تلد !

غربتي عنْه كنْها للسعاده (سياج)
تايهه مع حنينٍ حـدّني ,,,,للبلد

ريقي اللي يبله بعد حلْوه /هماج
مانفعني تصبّر.. وإدّعاي الجلد

ياجروحي دريت إن رجعتي له / علاج
وبرجوعه ترى كنّ بشّروني بـ ولد

 

[حنان العجمي]

رد : حزينة حدّ الإحتضار

شميت ريحة عطر أمي الله يغفر لها وإنهرت :​

يا عين لا جاد الدمع بإنسكابـه
كنّك على فرقا لقاهـا تسقّيـن !
لا تدملين الجـرح دام الرحابـه
ما توسع إلاّ للمواجيع والبيـن !
دامي انا ويّـاك صرنـا غلابـه
تكفين لا نصبح عبِر للمساكيـن
لا تسألين الناس ويـن الإجابـه
وإنتي تعرفين الإجابـه وتدريـن
ما لك سوايا صحبـة ٍ أو قرابـه
وفاي ما يخلص سوى للوفيّيـن
غيرك تركنـي لقمـة ٍ للذيابـه
وإنتي ليامن (ضقت) بالذات تبكين
لا تصنعي من قلّ حيلي تشابـه
بيني وبين اللي سرق نومة العين
لا تسكبين الدمع محد ٍ درى بـه
كفيّه يا عيني على شان غاليـن
يذكّرك فيها كثيـر.. إنسكابـه ؟
حنّا على كثر المواجيـع حيّيـن

 

[حنان العجمي]

رد : حزينة حدّ الإحتضار





.

بلاش تزيد بعنادك وأنا والله محتاجه
لقلبك لانزل دمعي يشد أزري وإيديّه

خذيت اللي تبيه وما بقى لموادعي حاجه؟
وحق الله وبيت الله للحظه . أحسن النيّه!

إذا قصدك شعوري ذا تطّفي شعلة سراجه
ياعمي طزّ بأشيائي .. مدام بعزّتي حيّه

صحيح إني بعد عينك وأنا ماني بـ/دوّاجه
ماغير تسعسع رجيلي على دارك / هواويه

وإذا ضعفي محلّيني / وصوتي معلن إحراجه
أبيك تبادر بعطفك وتبشرّني بك بجيّه

فداك الناس وقلبٍ من زمن مافلّه احجاجه
يدوّر لي عليك وما لقى من ينطح الهيّه

دفن نفسه وصرت انته تفاصيله ومنهاجه
كأنك عمر ما أقدر ربع ساعه على طيّه

هذيك الدار يامسكر وراك اشباه مزلاجه
فلا يطري على بالك بتلقى ساكنه زيّه

سجينه داخلك وأدري أنيني يحرج إزعاجه
حزينه داخلك وأدري م َ غيري (صار) منسيّه

وش أحكي لك ؟
وعيني للسهر حضنه وديباجه
وش أحكي لك وبعيوني غلاك الـ.. فيها مارّيه

وش أحكي لك ؟
حنيني ما يبي في يوم إفراجه
وش أحكي لك وعطشانك لهاته تشحذك ميّه

وش أحكي لك ؟
وجرحي من بلاه ووصله اعلاجه؟
وش أحكي لك وش أخلّي وأنا اللي فيك منفّيه

إذا ربي كتب لي عمر أكيد إنّا بنتواجه
وأنا حقي عليك إنك تعوّض حرّة الكيّه

كذبت بكل شي إلاّ بأني صدّق محتاجه
لقلبك بدّت العالم/ وإنت لظلمتي: ضيّه

أنا جيتك وله لكن بعد في خاطري حاجه:
عليك الله وأمان الله ياقلبٍ (مات به) حيّه

 

[حنان العجمي]

رد : حزينة حدّ الإحتضار




وحكاية حزن لا تنتهي

لفتح ملف الفلاش - إضغط هنا

يا صباح الجرح والحزن الأكيد
يا هموم ٍ ما ْطعمت حلو الصباح

كل هذا الفرْح في عيني زهيد
من لبس عنقي قلايد من جراح

صار هذا الحلم عن ايدي بعيد
يوم ضيّق لي غيابك هالبراح

موجز الذكرى على بالي تعيد
كيف ضعـْتك يوم هبّت هالرياح

كل هذا الوقت عيّا لا يبيد
شوقي اللي يغرس بصدري رماح

كيف أبلبس ثوب وإحساس ٍ جديد
وكل ما أحبّ إندفن عقبك /وراح

صرت أترجمني بعد عينك قصيد
لو يقال الحكي عنّـا مو مباح!

كيف يا يمـّه أبفرح كل عيد ؟
دام روحي ماطْلبت طلق السراح

،

كل عيد ٍ مرّني ما هو سعيد
إنتي خذتي معْك أفراح الصباح

http://www.youtube.com/watch?v=kut3ikmIFKc&feature=player_embedded

للتحميل هُنا

 

[حنان العجمي]

رد : حزينة حدّ الإحتضار








ليه آتضايق وأختنق بالنهايه
يمكن محد يبكي عليّ وعشاني
أشيل همّ الناس وكل الحكايه:
(أعيش وأتكفن وماني بمكاني)
أطيح من عين الفرح بالبدايه
ونهايتي أوقف وأنا (بي) أعاني
أنا وسيلة كل حاجه وغايه
وأنا الضحيه دون حلم وأماني
أبكي علي وشلون /كل الوصايه
تكفون قولوها نيابه تراني:
مامتّ من قل اهتمام ودرايه
موتي خواتي مابكوني عشاني
أبكي خواتي مابكوني عشاني
أبكي خواتي مابكوني عشاني

 

[حنان العجمي]

رد : حزينة حدّ الإحتضار




بيض الله وجه جرحك والطعون
جمّلتني في عيون الحاسدين

خلّت العالم على قلبي تمون
وكبّرتني يا معنّيني سنين

علمتهم وش تكون ومن أكون
وعلمتني أنفث آهاتي حنين

هزّت الدنيا مدامع هالعيون
وطيّحتني يوم لي وجه ٍ حزين

ما وقعت بإيد منهم يتّقون
والمصيبه هالقرابه كافرين

بيض الله وجه جرحي والطعون
خلّدتني في قلوب الحاسدين

 

[حنان العجمي]

يعني وإذا منصب / وإذا كان طيّار
عنده لغات وسافر لكل ديره!

مدري إذا من حقّي اليوم أختار
بآعيش مرتاحه سعيده / فقيره

مابيه /ما أخلق على رفضي أعذار
مَ أنفع له بليله : جناب السفيره

لو جاب لي مليون والعزّ والدار
قلبه أمانه فيه أبلقى لي ديره؟

ما فيه خيرٍ باعها بعد مشوار:
ذيك السنين / الشاحبه والمريره!

من عقب مابانت تجاعيدها باااار
وأخته على الفرقا بدت تستشيره

عياله ان قالوا قريباته / اصغار
آمالهم في (بيّهم) مو صغيره!

كبير في عمره ولكن من العار
ياخذ بعد فعله ( حنان الكبيره )

كان بتبيعوني جسد / شبّو النار
يمكن مع الأيام / هالموت خيره

ماشفت نفسي وأطلب الله لو صار:
أمير / يستاهل حلايا أميره




​

الموت غيّب عن عيوني حبايب
يا ميّتٍ فيني وأنا فيك ما متّ

ماقلت لك فارق معزّم وتايب؟
من كثر ما أدقّك جفا ما تهدّمت؟

وشهوله ترسلّي كتاب وطلايب؟
تعبت أفهمّك الوضع ما تفهمّت!

لي قلب عن درب الهوى والرغايب
غسّل ذنوبه وإمتهن حرفة الصّمت

ماعاد ينفع بي علاج و | طبايب
ولا عاد يشفع هالـ حكي لو تكلّمت

ما يحنّن إحساسي حنين وقرايب
ماتشوفني من لحم حلمي تودّمت!

خمسه وعشريني تشّد الركايب
وأبدفن آمالي تراني تولّمت

هيّيت نفسي للحزن والمصايب
اسنين من لون الشقا ما تشيّمت

حكوا لك إني: ممطره كـ السحايب ؟
وإني بزين أمّي غديت وتوسّمت!

وأطير من نشوة هبوب الـ | هبايب
وأعطي بصدقي لاهويت وتهيّمت

وأزيّن الدنيا ولو كان غايب:
عن عين أحبابي:فرَحْهم / فلا نمت!

ما قالو إن : شفي ّ بـ الأحباب طايب!
وإنيّ من تراب الوجع قد تيمّمت !

وإنيّ أدوّر للتصدّد سبايب
في نظرتي للناس يا شيخ عمّمت

والحظّ لو يوقف ولو يوم /عايب
وإنّي إنظلمت ولا شكيت وتظلّمت

من وصْل هالعالم بأكفّ الوهايب
خذيت كلّي لـ إنعزالي وسلّمت

والله يا لولا الغضب والعقايب
قِطعْت بأقرابي كثر ما تألمت

العمّر عدّى ولـولات / ونحايب !
وفي يوم ما جابو عوَض |ما تقدّمت

متعوّده أمسح سواد النصايب
في صدري الأبيض ولا قد تندّمت

لاعاد تحرجني : مودّي وجايب
لو كنت ميّت بي أنا فيك مامتّ

درب الردى مَ امشيه لعيون شايب:
(من طيحته ياما بكيت .. وتعلّمت)

​

لو منصبه مغري فلا منطقه زين
مدري متى يا ناسي إبتفهموني !

مابي أبدّل رزمة الشين بالشين
وإن كان مرضيكم كذا / زوّجوني​

 

[حنان العجمي]