حليب الام لا يقدر بثمن .. الرضاعه عن طريق الشفط ..

[Om_HoBi]

السلام عليكم امهات

موضوعي عن الرضاعه الطبيعيه عن طريق الشفط

بما ان هالموضوع انا عايشته الحين وكان عندي فيه مشكله
بس يعطيها العافيه وحده من العضوات قالتلي اسوي سيرج عن الموضوع بمواقع اجنبيه و قريت و استفدت

يمكن سمعتو او بتجربتكم ان الشفط حده 20 يوم

وانا اليوم عمر بنتي 3 اسابيع (21) يوم
و لاحظت من جم يوم ان صدري مو قاعد ينترس فماقاعد يطلع حليب وايد

كان صدري ينترس و ثقيل و يعور اللي لازم اشفط و استخدمت شفاطه ميديلا الالكترونيه الدبل حق صدرين وكنت اشفط 3 مرات باليوم و كان كميته تكفي كذا رضعه و كنت اخش بالثلاجه

المهم مادري ليش يوم قربت 20 يوم بدا يقل و ماينترس


المهم قواعد الشفط اللي قريتها
اهم شي الشفط يكون كل ساعتين لي 3 بمده ربع ساعه لي ثلث ساعه من كل صدر
و تقريبا 7 مرات خلال 24 ساعه
ليش؟
عشان الصدر يعرف ان البيبي محتاج هالكثر حليب فيضخ اكثر
ولااازم يخلص الصدر ان تحسون ان بس ماقام يطلع حليب بالشفاط

*انا كان عبالي ان انطر صدري ينترس واشفطه كله و خلاص جذي ماينشف
بس طلع غلط

اما اذا كان بس 3 مرات خلال 24 ساعه فهذي يعطي الصدر اشاره ان البيبي بس محتاج 3 مرات فمايطلع حليب وايد و يبدي يقل

عشان جذي الوحده من توصل 20 يوم خلاص يبدي يخف يخف
و غير جذي الشفط اذا بتستمرون ترضعون طبيعي لازم تستمرون على هال 7 شفطات مده 9 لي 12 اسبوع
بعدين اقل بعدد الشفطات


انشالله بمشي على هالخطوات و يارب يرد الحليب و اكمل عالطبيعي

 

[Aloe Vera]

صح كلامج

لازم تشفطين كل ساعتين او ثلاث ساعات و تستمرين حتى بالليل
و الحليب الزايد حطيج بجياس تثليج حليب الام و ثلجية انا استخدم جياس ماركة ميديلا و اكتب عالجيس التاريخ و كمية الحليب

بصراحة المواقع الاجنبية وايد وايد تفيد

 

[q8_goga]

ياريت صاحبة الموضوع ترد تكتب شصار معاها بشوف اذا ممكن الواحد يستمر على هالطريقة ومايحرم البيبي من الحليب الطبيعي

 

[قرمووشه]

بعد قلبي ام هوبي ماقصرتي

انا صدري فيه حليب بس بشفط مايطلع منه الا شويه
بسوي اللي قلتيه وان شاءالله نرضع بيبياتنا
وايد مهم حليب الام

 

[أم حسوون]

السلام عليكم ، ليش ما ترضعين البيبي مباشره ليش تشفطين ؟ ما ني فاهمة؟ أنا باقولج تجربتي أنا أرضع طبيعي اللهم لك الحمد ومع أني موظفه ما كنت أشفط كنت أرضعه قبل ما أطلع واذا جاع مو مشكله ياخذ صناعي بس قبل لا أجي ما يرضعونه على الاقل مدة ساعتين وفعلا لما أجي يرد يرضع من عندي والحمدالله أرضع لفوق السنه وأحيانا سنه ونص ما أضطر للشفط الا في حالة السفرات السريعة ويكون الجاهل عند أمي ، فاشفط علشان ما ينقطع الحليب من صدري ، أو مرة كنت مريضه وأخذت مضاد قوي فالدكتور منعني من الرضاعه في الفتره هاذي والحمدالله عقبها رديت ، فأشوف أن الشفط يكون للطوارئ مو شي دايم.

 

[Koko7taty]

مع الأسف توني أشوف الموضوع الله يعطيج العافية ويرزقج على قد نيتج

حبيبتي اذا تبين الحليب يزيد اول شي ادلكين صدرج بعدين تعصرينه بيدج بعدين الشفاط
وتاخذين مدرات الحليب وطبعا مو كل شي راح يمشي معاج ولا بيوم وليله يدرلج الحليب لازم تستمرين على الشي اسبوع مع التعصير والشفط

مثال اشياء جربتها تدر الحليب

اشرب ماي واااااااااااايد قبل وبنص وبعد الرضاعه
الحلبه تطحنينها وتاخذينها مثل الدوا قفشة الجاي ثلاث مرات باليوم لمدة أسبوعين بس
السبانخ فرش او مثلج
انواع العصاير كلها

هذيل الأشياء اللي فادة معاي كتجربة شخصيه

واهم شي ما تسمعين كلام اي احد ولو منو مكان ان ما فيج حليب البيبي ما يشبع حرام عليج ذبحتي يويلج من الله عطي حليب صناعي شدعوه فيه خير حقج لين كبر

سدي اذونج وحطي لهم حد لان إدرار الحليب يعتمد على النفسية 90٪
و10٪ عوامل خارجيه مثل سوء التغذية وماتشربين ماي


ولا تقعدين توسوسين بروحج ترى الشيطان شاطر

وفي وحده جزاها الله خير وايد ساعدتني أهي دكتورة رضاعه طبيعية مصريه اسمها شروق الهتيمي الله سخرها وقريت كل مواضيعها وتجارب البنات وحاولت لمن الله قدرني

ادري قرقت وايد بس لمن كنت بنفس وضعج كنت محتاجه احد يقولي هل كلام بس ما لقيت بس ربي حبيبي مقسم الأرزاق كتب حق بنتي رزقتها والحمد لله على كل حال

 

[ملامح بريئة]

وفي معلومة قريتها ايام قبل ياحلو المجلات من مجلة سيدتي ان شرب الشاي قبل الرضاعه مفيد وكانو شارحين فايدته بس مااعرف اوضح والرضاعه الصجية انك ترضعين ٨ مرات باليوم واهي متعبة صراحة الله يجزا امهاتنا الجنة صج تعبو علينا رضاعة وتربية

 

[Cute mama]

ولدي الأول كنت ارضعه رضاعه طبيعيه مباشره من صدري وقليل كنت استخدم الآله والحمد لله رضعته فتره طويله
بولدي الثاني كنت ارضعه رضاعه طبيعيه وهم كنت اشفطله بس لاحظت الحليب كان اقل عن المره الاولى
لمن سالت الدكتوره قالتلي حركة الحلج مال الياهل بطريقة المص سبحان الله تخلي الحليب يزيد بالصدر غير عن الآله

 

[انتيكا]

مشكورة حبيبتي على افادتج لنا

 

[CuTe KuwaiTia]

مشكورين بنات نستفيد من كلامكم وتجاربكم

مشكورة صاحبة الموضوع