حياكم الله في مكتبتي ..

[الؤلؤة السوداء]

في رواية قريتها من زمان وعجبتني واااااااااايد وهي من كتبي المفضلة


الرواية اسمها If Tomorrow Comes للكاتب الرائع Sidney Sheldon

هذا الكاتب رواياته روووعة لكن فيه عيب واحد وهو إنه جرئ زيااادة عن اللزوم يعني يكتب تفاصيل مالها داعي

أما من ناحية القصة والشخصيات والتشويق فهو 10 / 10

المهم انيي حق الرواية .. هذي الرواية فيها إثاااارة فظيعة

القصة عن وحدة اسمها تريسي .. تنتحر أمها بسبب واحد غني خدعها وباق فلوسها
فتحاول تريسي إنها تنتقم لأمها لكن الغني قلب السالفة عليها واتهمها بتهمة وانسجنت بسبته
مرت الأيام والشهور وحصلت تريسي على عفو وطلعوها من السجن وقررت إنها تنتقم من اللي سجنوها


شنو بتسوي فيهم تريسي ؟
وشنو صار لها في الفترة اللي قضتها في السجن ؟
وشنو صار لها بعد ما طلعت من السجن وشلون بيتعاملون الناس مع وحدة كانت مسجونة ؟

هذا ما ستعرفونه لدى قراءتكم للرواية ههههه

أدري إن الملخص قصييير لكن مابي أخرب عليكم.. الرواية روووعة ولازم تقرونها وفيها إثارة وتشويق



في رواية ثانية لـ Sidney Sheldon أحب أتكلم عنها

اسمها The Other Side of Midnight

هذي أول رواية قريتها لسيدني شيلدون وأول حب ههههه

هي واااايد حلووة وما تقل مستوى عن If Tomorrow come لكن فيها حزن وايد لأنها عن الانتقام

هذي الرواية فيها بطلتين نويل وكاثرين وكل وحدة فيهم لها قصة

بالنسبة لنويل هي بنت جميييلة ومن صغرها وأبوها يعاملها مثل الأميرة

لما كبرت نويل وزاد جمالها قرر أبوها إنه يستغل جمالها ويعرضها أو بالأحرى يبيعها على واحد من الأغنياء

نويل انصدمت وانحاشت لباريس وقررت إنها تبدي حياة يديدة هناك

وتتعرف على واحد في باريس اسمه لاري وتحبه ويوعدها بالزواج لكنه سافر وتركها وهي حامل

فتتخلص من الجنين وتقرر إنها تنتقم من لاري اللي خدعها وحطمها فوق ماهي متحطمة..

هذا بالنسبة للبطلة الأولى نويل


البطلة الثانية كاثرين

كاثرين من صغرها وهي طموحة وودها تثبت نفسها

وفعلاً بعد ما تخرجت من الجامعة توظفت في شركة كبيرة ومعروفة

وتصير علاقة بينها وبين المدير لكنها بعدين تتعرف على لاري (اللي خدع نويل) وتحبه وتتزوجه

بصراحة هالرواية أكثر من رووووووعة وواااايد حبيتها لكن مثل ما قلت فيها حزن وايد

والضحية هي كاثرين اللي بتصير جزء من مخططات نويل للانتقام من لاري


الرواية طبعاً 10 / 10

​

 

[الؤلؤة السوداء]

Remember Me

هي كوميدية حق الكاتبة Sophie Kinsella وهي نفسها اللي ألفت Shopaholic و can you keep a secret

هي قصة عن وحدة اسمها لكسي يصير لها حادث وتفقد الذاكرة

بس مو كل ذاكرتها .. بس ذكريات آخر ثلاث سنوات يعني ماتدري شنو صار في الثلاث سنوات اللي فاتوا من عمرها

فتكتشف إنها تغيرت واااااايد وحتى أسنانها وشعرها وجسمها غير وتكتشف إنها صارت تشتغل في وظيفة كبيرة وعندها مساعدين

وصارت ما تلبس إلا ثياب وشنط ماركات وسيارة كشخة مع سايق

وإنها تزوجت من واحد وسيييم وفوق هذا مليونير

وطبعاً هي ما تتذكر متى صار هذا ومعقولة كل هالتغيير في ثلاث سنوات بس ؟!

لكن بعدين

تكتشفت إن صديقاتها اللي كانوا أعز صديقات لها صاروا ما يكلمونها ولا يعطونها ويه

وإن الموظفين في الشركة يخافون منها ويحسبون لها ألف حساب

وإنها تخون زوجها !!

فتحاول تعرف شنو اللي صار قبل ثلاث سنوات وخلاها تتغير بهالشكل

وليش شخصيتها الطيبة تغيرت وصاروا الموظفين يخافون منها وصديقاتها ما يحبونها

طبعاً كل هذا في أسلوب كومييييدي .. صح في مواقف حزينة شوي وتقهر لكن الرواية بشكل عام حلوووووة وتوووونس

بس للأمانة النهاية شوي ما عجبتني بس يمكن تعجبكم

أعطيها 9.5 / 10 >> نقصتها نص عشان النهاية هههه

​

 

[الؤلؤة السوداء]

الحين باكتب رفيو حق كتابين لكاتب اسمه جيفري آرتشر وهو من أكثر الكتاب المبدعين اللي قريت لهم

أول رواية هي الرواية رقم واحد عندي وااايد حبيتها اسمها الأخوة الأعداء

الصورة من أمازون لووول

هي اسمها الأصلي Kane & Abel ومادري ليش سموها الأخوة الأعداء بالعربي مع إنهم مو اخوان

القصة باختصار تتكلم عن شخصيتين

الشخصية الأولى اسمه هابيل Abel

هذا حصلوه مقطوط في الغابة يوم كان صغير وربته عايلة فقيرة وصار كأنه واحد من عيالهم
مرت الأيام وكبر هابيل وصارت حرب عندهم (هو من بولندا) واضطر يهاجر لأمريكا
وهناك بدا حياته من الصفر..جد واجتهد وصار يدير سلسلة فنادق وصار من أغنياء العالم وشخصية ناجحة


الشخصية الثانية هو كين

كين عكس هابيل انولد في عايلة غنية وااايد
ومن صغره وهو ذكي ويحاول يثبت نفسه
وبعد ما كبر ورث شغل أبوه وصار مدير بنك وصار من أنجح المدراء في البلاد

الحين بتقولون شنو العلاقة بين كين وهابيل


مثل ما قلت هابيل صار يدير سلسلة فنادق وهي سابقاً كان يديرها شخص مقرب لهابيل
لكن في ذاك الوقت كانت سلسلة الفنادق تعاني من خساير كبيرة
فاضطر المدير إنه يلجأ لبنك كين عشان يساندونه مالياً وكين رفض
فراح مدير الفنادق وانتحر .. وصمم هابيل إنه ينتقم من كين ويحطمه

وهني راح تبتدي التحديات بين الاثنين .. كل واحد يحاول يحطم الثاني ويثبت إنه الأفضل والأذكى

طبعاً أنا اختصرت القصة وااااايد وماعطيتها حقها في الريفيو
لأن أحداثها وااااايد .. هي تتكلم عن الاثنين من يوم ولادتهم ليما كبروا وشيبو
الأحداث فظييييعة وماتنمل أبدا وتحمس



الرواية الثانية لجيفري آرتشر هي سجين بالميلاد

هذي بعد وااااااااااايد حلوة وأغلب أحداثها في السجن

بطل القصة اسمه داني
كان في ليلة من الليالي يتعشى في مطعم هو وخطيبته وأخوها واللي هو صديقه في نفس الوقت
كان في مجموعة شباب أغنياء معاهم ويتحرشون فيهم
تهاوشوا وانقتل صديق داني

وطبعاً بما إن الشباب كانوا أغنياء ومعروفين قلبوا السالفة على داني وإنه هو اللي قتل صديقه
وانسجن داني

طبعاً داني انقهرررررر أولاً لأنه انسجن ظلم ثانياً لأن خطيبته حامل ثالثاً لأن القضاء ترك المجرمين الصجيين بلا عقاب
وفكر في طريقة عشان ينحاش من السجن ويثبت براءته وينتقم من المجرمين ويفضحهم

يا ترا شلون داني بيقدر يسوي كل هذا
خذوا جناطكم ويلا على أقرب مكتبة واشتروا الرواية ههههه

التقييم 10/10


​

 

[الؤلؤة السوداء]

رواية ثانية من روايات صوفي كنسيلا

The Undomestic Goddess

هذي بعد حلوة الرواية

عن محامية اسمها سمانثا تشتغل في شركة محاماة معروفة بلندن
مرة ارتكبت غلطة وبسببها خسرت الشركة مبلغ كبييير..فتنفصل من الشركة
طلعت من الشركة وهي ضايعة ومو عارفة شتسوي فتروح لمنطقة ثانية وهي مو حاسة بشي
بعد ما شافت إن الوقت تأخر راحت حق بيت من البيوت اللي في المنطقة عشان تريح
أول ما فتح الباب استقبلتها صاحبة البيت وحيتها وكأنها تعرفها
سمانثا استغربت وبعدين عرفت السالفة
السالفة إن صاحبة البيت كانت طالبة مدبرة للبيت (يعني أرقى من الخدامة بشوي هههه)
ولما شافت سمانثا ظنت إن هي مدبرة البيت
سمانثا انحرجت وماحبت تبين لها إنها غلطانة وقالت راح أنام عندهم والصباح رباح
لما صحت من النوم فكرت: أنا ليش ما أجرب وأشتغل عندها
لأنها حالياً ما عندها وظيفة وماتبي ترجع لبيتها عشان ما تصادف أحد تعرفه
واشتغلت سمانثا كمدبرة بيت

المشكلة الحين
شلون محامية تشتغل خدامة وهي لا تعرف تنظف ولا تطبخ ولا تكوي ولا تعرف تسوي شي؟!

القصة كوميدية
هي صحيح مو بمستوى باقي قصص كنسيلا بس بعد حلوة

أعطيها 9/10




توني مخلصة من رواية My sister's keeper

القصة تتكلم عن بنت اسمها آنا

اختها الكبيرة كيت فيها لوكيميا (سرطان الدم) من يوم عمرها سنتين يعني من قبل ما تنولد آنا

والحل الوحيد عشان تعيش هي إن واحد من العايلة يتبرع بكليته

لكن المشكلة إن الكلية لازم تكون بمواصفات معينة، ولا واحد من أهل كيت عنده هالمواصفات

فاقترح الطبيب على الأم إنها تحمل جنين تكون مواصفاته مطابقة لكيت ..

وطبعاً لازم يعطونها نوع من العلاج فترة الحمل عشان يصير تطابق

تحمل الأم وتجيب آنا .. البطلة

من انولدت آنا وهي ياخذون منها عينات دم ويسوون عليها فحوصات

وكلما تعبت كيت ودخلوها المستشفى خذوا آنا معاهم احتياط عشان إذا احتاجوا دم يسحبون منها

لكن لما صار عمر آنا 13 .. رفعت قضية على أمها وأبوها إنهم ما يغصبونها

إنها تتبرع بكليتها أو ياخذون منها دم يعني إن يكون لها حرية الاختيار

شنو راح يكون موقف أهلها من هالموضوع
وشلون راح تعيش معاهم في بيت واحد وهي رافعة عليهم قضية
وهل بتربح القضية أو لا
وشنو بيصير في اختها كيت لو ما تبرعت لها آنا بكليتها

كل هالشي تعرفونه من الرواية

رأيي الشخصي: القصة حلوة لكن حسيت إنها مملة شوي، طوفت وايد صفحات عشان أخلصها بسرعة وأعرف شنو بيصير
بس عموماً الرواية حلوة
شخصية آنا واااااااااااايد عجبتني أحسها أكبر من عمرها وذكية
وآخر الفصول صارت وايد مفاجآت وحتى النهاية غير متوقعة

تقييمي: 8/10
​

 

[الؤلؤة السوداء]

تذكرت رواية قريتها من فترة وااااايد عجبتني وتأثرت فيها

اسمها رسالة في زجاجة للكاتب نيكولاس سباركس

طبعاً هالكاتب معروف برواياته الرومانسية والمؤثرة وأغلبها تحولت لأفلام

بالنسبة حق رسالة في زجاجة

قصتها عن وحدة اسمها تريسا كانت تمارس رياضتها المفضلة الجري على البحر

هناك لفت انتباهها زجاجة على شاطئ البحر وداخلها رسالة

الرسالة كتبها واحد حق حبيبته المتوفية ,, وكلماتها واااايد مؤثرة وأثرت وايد على تريسا

وصممت إنها تلقى صاحب هالرسالة .. ودورت ودورت حتى لقت اسمه ومكانه


الرواية جدااااا رووووووعة مع إني ما أحب الروايات الرومانسية وايد .. نادراً ماعجبني رواية رومانسية أو أتأثر فيها

التقييم: 10/10


​

ثالث رواية لهذا اليوم

اسمها ماري ماري حق جيمس باترسون

هذا الكاتب ما شاء الله رواياته شكثر .. كلما التفت في المكتبة شفت جيمس باترسون

فأخذت وحدة من رواياته وعجبتني وااااايد وخصوصاً إنها بوليسية وفيها جرائم قتل أحب هالنوعية

القصة عن وحدة سفاحة .. مهمتها قتل الشخصيات الشهيرة من ممثلات ومذيعات

وكلما قتلت وحدة كتبت تفاصيل الجريمة وطرشتها لوحدة من الجرايد ( يا جريدة يا محطة تلفزيون نسيت ههه)

فيبتدي عضو الاف بي آي أليكس كروس التحقيق في الجرائم

الرواية أعطيها 10/10

اللي يحب الروايات البوليسية بتعجبه أكيد


​

 

[الؤلؤة السوداء]

​

​

قوة عقلك الباطن من كتب تطوير الذات

مثل ما قلت قبل أنا ما أحب هالنوعية من الكتب

لكن هذا الكتاب وااااايد سمعت عنه مدح وأولهم من خالتي

عشان جذي شريته وقريته وعجبني وااااااااااااايد

الكتاب يتكلم عن شلون الواحد ممكن يحقق اللي يبيه بشي واحد بس

وهو الدعاء والإيمان بإن هالشي بيتحقق

الكاتب مسيحي لكنه مؤمن ودارس عن الأديان السماوية

عشان جذي وايد يتكلم عن الدعاء والصلاة والإيمان

وفيه قسم عجبني وهو التخلص من الخوف الغير طبيعي

وأنا إن شاء الله راح أطبق اللي قاله لأن وايد أشيا أخاف منها ومأثرة على حياتي

الحلو في الكتاب إن فيه قصص حق ناس جربوا الطرق اللي ذكرها الكاتب واستفادوا منها

التقييم طبعااااا 10/10
​

 

[الؤلؤة السوداء]

والحين باتكلم عن روايتين حق كاتبة إيرلندية تهبل اسمها سيسيليا اهيرن

الحلو في هالكاتبة إن أسلوبها سهل وحلووو وفيه كوميديا خفيفة

أول رواية اسمها

P.S I love You

عن وحدة اسمها هولي..زوجها يتوفى بسبب ورم في المخ

بعد ما توفى زوجها توصلها رسايل منه كتبها لها قبل ما يموت

عدد الرسايل 12 رسالة على عدد شهور السنة وكل رسالة مكتوب عليها شهر

وطلب منها إنها تفتح كل شهر رسالة

داخل كل رسالة فيها طلب أو بالأحرى أمر لازم تنفذه عشان تقدر تنسى وفاة زوجها وتواصل حياتها


الرواااية واااايد حلوة وفيها حماس لأن كل مرة تتشوقون وتعرفون شنو مكتوب في الرسالة اللي بعدها

وشلون هولي من خلال هالرسايل بتقدر تتخطى وفاة زوجها وتواصل حياتها بشكل طبيعي

التقييم 10/10

*****

الرواية الثانية اسمها

Where Rainbows End
ولها اسم ثاني بعد
Love Rosie

بصراحة أنا حبيت هالرواية أكثر من اللي قبلها لأن أسلوبها ممتع وغريب شوي

ممتع وغريب لأن أسلوب الرواية مب سردي .. لا على شكل مراسلات

مراسلات بين وحدة اسمها روزي مع صديق طفولتها اليكس

في ناس ما عجبتهم الرواية لهالسبب لأن كلها رسايل وإيميلات بس أنا بصراحة عجبتني

لأن رسايلهم تونس وممتعة وخفيفة دم وتضحك والصداقة اللي بين روزي وأليكس حلووة


والتقييم 10/10

​

 

[الؤلؤة السوداء]

وبس بابونج هذا اللي عندي حالياً
بس تدرين ما اعتقد كتبي بتعجبج ههه
لأن انتي الظاهر تحبين الروايات الخيالية والرومانس
أنا أكثر شي أقرا الروايات اللي تكون جريبة من الواقع
بس بعد أقرا روايات خيالية خصوصاً عن الفامباير أحب هالسوالف
​

 

[الؤلؤة السوداء]

بابونج قريت إنج ما تحبين روايات الجريمة

أنا ما أحب جرائم القتل ولما أسمع بجريمة تلوع جبدي وأحس باكتئاب

بس الروايات غير لأني أدري إنها مب صج عشان جذي أحبها لووول

خصوصاً قصص أغاثا كريستي هذي أمووت فيها وأحب سوالف المحققين

وأذكر قبل كان أحلى انمي عندي هو المحقق كونان وتميت أتابعه وعقب أيست منه لأنه طويييل ومب راضي يخلص لووول
​

 

[RowTow]

لوووول إي خلاص اقريها خل نشوف شرايج فيها .. و أنا أقولج حق الدوام أححسسسننن شي الكتب الصوتية تعيشين معاها عالم ثاني , حتى أختي أنا عطيتها جم كتاب صوتي حق الجامعة أدمنتهم لوووول عطيتها وايد من مكتبتي العجيبة لووول , و يعطيج العافية على الريفيو عاد أمس أنا قاعدة أنبش بكتبي اكتشفت إني قارية قصة ثانية حق أجاثا كريستي اسمها عدالة السماء .. الظاهر من كثر ما لاعت جبدي نسيت إني قاريتها لوووول
يالله ما عليه حياج الله بالكتب الياية و المهم لا تقطعييينننن

و الله يبيله صوتي بالدوام إن شاء الله.
هههه تدرين عاد إن عدالة السماء أصلا مو مالت أغاثا؟
هاذي قصه اسمها مدام إكس أو شي جذي. و أصلا مسوينها فلم هندي و فلم مصري قديم بطولة شاديه و عماد حمدي.

​

تسلمين على الريفيو أنا قبل كنت مدمنة أغاثا كريستي أموووت في كتبها بس صار لي فترة ما قريت لها
وما قريت هذي بس عموماً أفضل القصص اللي فيها بوارو تعجبني شخصيته أكثر من مس ماربل

​

آنا أموت على شي اسمه أغاثا, فعلا أحب قصصها
و آنا بعد شخصيتي المفضله هي بوارو ههه أحب لما يغتر بنفسه و يصدق عمره :eh_s(15):


​

ثالث رواية لهذا اليوم

اسمها ماري ماري حق جيمس باترسون

هذا الكاتب ما شاء الله رواياته شكثر .. كلما التفت في المكتبة شفت جيمس باترسون

فأخذت وحدة من رواياته وعجبتني وااااايد وخصوصاً إنها بوليسية وفيها جرائم قتل أحب هالنوعية

القصة عن وحدة سفاحة .. مهمتها قتل الشخصيات الشهيرة من ممثلات ومذيعات

وكلما قتلت وحدة كتبت تفاصيل الجريمة وطرشتها لوحدة من الجرايد ( يا جريدة يا محطة تلفزيون نسيت ههه)

فيبتدي عضو الاف بي آي أليكس كروس التحقيق في الجرائم

الرواية أعطيها 10/10

اللي يحب الروايات البوليسية بتعجبه أكيد

​

هالروايه كانت حيييل شادتني و آنا أقراها
بس كان عندي تخوف بالنسبه حق تصوري للنهايه خفت من شي معين و هو اللي حصل باختيار الكاتب للنهايه و لشخصية القاتل و دوافعه
النهايه خربت علي متعة الروايه كلها :eh_s(16):
​

 

[الؤلؤة السوداء]

آنا أموت على شي اسمه أغاثا, فعلا أحب قصصها
و آنا بعد شخصيتي المفضله هي بوارو ههه أحب لما يغتر بنفسه و يصدق عمره :eh_s(15):



هالروايه كانت حيييل شادتني و آنا أقراها
بس كان عندي تخوف بالنسبه حق تصوري للنهايه خفت من شي معين و هو اللي حصل باختيار الكاتب للنهايه و لشخصية القاتل و دوافعه
النهايه خربت علي متعة الروايه كلها :eh_s(16):
​

أنا أقرا حق أغاثا من يوم ما كنت في الاعدادي (المتوسطة)
شنو أحلى الروايات اللي تحبينها حق أغاثا؟

بالعكس النهاية كانت حلوة وعجبتني
وأفكر بعد أشتري روايات ثانية حق جيمس باترسون وإن شاء الله تكون بنفس المستوى
​

 

[RowTow]

​

أنا أقرا حق أغاثا من يوم ما كنت في الاعدادي (المتوسطة)
شنو أحلى الروايات اللي تحبينها حق أغاثا؟

بالعكس النهاية كانت حلوة وعجبتني
وأفكر بعد أشتري روايات ثانية حق جيمس باترسون وإن شاء الله تكون بنفس المستوى

​

آنا بعد علاقتي بأغاثا بدت من لما كنت بالمتوسطه
من أحلى رواياتها عندي: جريمة في قطار الشرق السريع, جريمة على النيل, في النهاية يأتي الموت, قضايا باركر باين, و اختفى كل شيء, موت السيدة ماغنتي, ذاكرة الأفيال, الحصان الأشهب.
و واجد بعد :eh_s(22):
​

 

[الؤلؤة السوداء]

​

آنا بعد علاقتي بأغاثا بدت من لما كنت بالمتوسطه
من أحلى رواياتها عندي: جريمة في قطار الشرق السريع, جريمة على النيل, في النهاية يأتي الموت, قضايا باركر باين, و اختفى كل شيء, موت السيدة ماغنتي, ذاكرة الأفيال, الحصان الأشهب.
و واجد بعد :eh_s(22):

​

​

ما شاء الله كلهم قريتهم بس مو كلهم عجبوني
اللي عجبوني أكثر شي:
مقتل روجر أكرويد >> هذي كانت أول رواية أقراها لها عشان جذي أحبها وايد
جريمة في قطار الشرق >> ثاني رواية أقراها فظيييعة وايد أحبها
المرآة المكسورة
البيت المائل >> نهايتها صدمة بس وااايد رووعة
قطار بادينغتون
في النهاية يأتي الموت
لقاء في بغداد
كلب الموت
الأربعة الكبار
جريمة في الصحراء >> على ما أظن لها اسم ثاني بس ما أذكر
جريمة في ملعب الغولف
ليل لا ينتهي >> كئيبة بس واااايد أحبها
جريمة في القرية
ذو البدلة البنية
ثم لم يبقى أحد
مغامرة كعكة العيد

هذول أحلى الروايات عندي كلهم ترجمة دار الأجيال ماعدى جريمة في الصحراء
​

 

[RowTow]

​

ما شاء الله كلهم قريتهم بس مو كلهم عجبوني
اللي عجبوني أكثر شي:
مقتل روجر أكرويد >> هذي كانت أول رواية أقراها لها عشان جذي أحبها وايد
جريمة في قطار الشرق >> ثاني رواية أقراها فظيييعة وايد أحبها
المرآة المكسورة
البيت المائل >> نهايتها صدمة بس وااايد رووعة
قطار بادينغتون
في النهاية يأتي الموت
لقاء في بغداد
كلب الموت
الأربعة الكبار
جريمة في الصحراء >> على ما أظن لها اسم ثاني بس ما أذكر
جريمة في ملعب الغولف
ليل لا ينتهي >> كئيبة بس واااايد أحبها
جريمة في القرية
ذو البدلة البنية
ثم لم يبقى أحد
مغامرة كعكة العيد

هذول أحلى الروايات عندي كلهم ترجمة دار الأجيال ماعدى جريمة في الصحراء

​

آنا بعد قريت كل اللي قلتي عنهم و عجبوني. ما عدا مقتل روجر أوكرويد اللي ما قريتها.
و هم قريت جريمة في الصحراء القديمه و هي اسمها موعد مع الموت.

و على فكره آنا أحب المسلسل اللي يمثلونه عن شخصية بوارو و بعد عن ماربل, حيل حلوين و مو طبيعيين


ههه سوري مهندستنا شكلنا حيل طبينا ببحر أغاثا :eh_s(7):
​

 

[م.بابونج]

وبس بابونج هذا اللي عندي حالياً
بس تدرين ما اعتقد كتبي بتعجبج ههه
لأن انتي الظاهر تحبين الروايات الخيالية والرومانس
أنا أكثر شي أقرا الروايات اللي تكون جريبة من الواقع
بس بعد أقرا روايات خيالية خصوصاً عن الفامباير أحب هالسوالف
​

بابونج قريت إنج ما تحبين روايات الجريمة

أنا ما أحب جرائم القتل ولما أسمع بجريمة تلوع جبدي وأحس باكتئاب

بس الروايات غير لأني أدري إنها مب صج عشان جذي أحبها لووول

خصوصاً قصص أغاثا كريستي هذي أمووت فيها وأحب سوالف المحققين

وأذكر قبل كان أحلى انمي عندي هو المحقق كونان وتميت أتابعه وعقب أيست منه لأنه طويييل ومب راضي يخلص لووول
​

لووووووول حتى لو ما يعجبني بس ما يمنع إنج تحطين يمكن يوم أنطق على راسي و أقرر أقرا جذي لووووووووووول بس فيه جم قصة حبيتها و زين ذوقج ما فيه شي و على العموم أنا أبي الموضوع يكون منوع كثر ما أقدر مو بس كتبي بحيث الواحد يمل من الكتب اللي أعرضها ..
انتي و لا يهمج و مكانج بينا موجود و حطي كثر ما تقدرين و لا تحاتين ترى قريت ريفيواتج كلها بس صعب أعلق على وحدة وحدة .. بس عموما مثل ما قلتي أنا أحب الرومانس و فيها شوية خيال أو على الأقل ما فيها جرائم و مادري شنو و نهاية كئيبة لووووول

تابعي تابعي يا عسل :eh_s(9)::eh_s(9):

 

[م.بابونج]

آنا بعد قريت كل اللي قلتي عنهم و عجبوني. ما عدا مقتل روجر أوكرويد اللي ما قريتها.
و هم قريت جريمة في الصحراء القديمه و هي اسمها موعد مع الموت.

و على فكره آنا أحب المسلسل اللي يمثلونه عن شخصية بوارو و بعد عن ماربل, حيل حلوين و مو طبيعيين


ههه سوري مهندستنا شكلنا حيل طبينا ببحر أغاثا :eh_s(7):
​

لووول بالعكس متابعة حواركم .. حتى لو أنا ما أحب أقرا لها أحب أشوف راي الناس
عادي اخذي راحتج الموضوع موضوعج خخخخخخخخخخ .. و لا تستحين انتي الداشة و إحنا الطالعين لوووول

 

[RowTow]

لووول بالعكس متابعة حواركم .. حتى لو أنا ما أحب أقرا لها أحب أشوف راي الناس
عادي اخذي راحتج الموضوع موضوعج خخخخخخخخخخ .. و لا تستحين انتي الداشة و إحنا الطالعين لوووول

ههه تسلمين حبيبتي ما تقصرين.
تدرين المفروض إني ألحين قاعده أحضر شوي بالويك إند عشان أخفف على نفسي الشغل خلال أيام الأسبوع, بس الله وكيلج هديت التحضير و قعدت أقرا عايزه أتجوز ههه
آنا شفت المسلسل برمضان السنه اللي طافت و حيل استمتعت فيه و كنت مفكره من جم اسبوع إني أشتري الكتاب, و لقيته أمس بالصدفه بذات السلاسل و قلت آخذه رغم حضر المصارف الزايده
​

 

[م.بابونج]

ههه تسلمين حبيبتي ما تقصرين.
تدرين المفروض إني ألحين قاعده أحضر شوي بالويك إند عشان أخفف على نفسي الشغل خلال أيام الأسبوع, بس الله وكيلج هديت التحضير و قعدت أقرا عايزه أتجوز ههه
آنا شفت المسلسل برمضان السنه اللي طافت و حيل استمتعت فيه و كنت مفكره من جم اسبوع إني أشتري الكتاب, و لقيته أمس بالصدفه بذات السلاسل و قلت آخذه رغم حضر المصارف الزايده
​

لوووووول عايزة اتجوز؟؟شفيهم على الزواج حريمنا مرة لقيت كتاب بالانجليزي عن نفس الموضوع .. بشرينا شيصير معاج اوكي؟؟

 

[الؤلؤة السوداء]

RowTow

​

امبيي حتى أنا قريت رواية عايزة أتجوز وبصراحة وايد تضحك استانست عليها وأحلى شي إنها بالمصري
والمسلسل بعد حده فظيع ويونس
​

 

[Q8Buying]

رد: رد : حياكم الله في مكتبتي ..

بسم الله الرحمن الرحيم .

الكتاب الثاني اللي راح نتناقش فيه اليوم هو ..​

للكاتبة إليزابيث غيلبرت و الكتاب تم انتاجه كفلم و إهو حاليا في دور السينما​

1) القصة : الكتاب يحكي قصة الكاتبة الحقيقية في رحلتها لاكتشاف نفسها من خلال 108 قصص في كل دولة 36 قصة .. بالبداية تذهب إلى إيطاليا روما حيث تكتشف هناك اللذة في الطعام و تعلم اللغة الايطالية الجميلة المليئة بالرومانسية .. بعدها تنتقل بنا إلى بلاد الهند حيث تتعلم اليوجا في جو الهند الحار و تتعلم كيف تتأمل في داخل نفسها لتصل إلى مرحلة الاتحاد مع الكون .. و أخيرا نسافر معها إلى جزيرة بالي في اندونسيا حيث تأخذنا الكاتبة في رحلة في كيفية موازنة لذة الحياة مع العبادة بحيث تصل إلى السعادة و الاتزان الداخلي​

2) جو القصة : أنا قريت القصة في أول اسبوع لي في الجامعة يعني الاسبوع اللي طاف .. أنا كنت أسمعه audiobook لان ما عندي وقت أقرا صفحات و خاصة أنا معظم وقتي برة البيت و بالسيارة فكان الكتاب الصوتي أريح لي .. خلصته خلال 4 أيام و كنت أقدر أخلصه بأقل بس لأني كنت أدرس​

3) النهاية : راااااااااااائئئئئعععععةةةةةة بكل معنى الكلمة لدرجة أنا نفسي ما صدقت إن فيه كتاب يكون بهالروعة​

4) تقييمي للكتاب : لاول مرة في حياتي أعطي رواية 5 نجوم و بكل جدارة .. رائع جدا و لو إن فيه عيب واحد يمكن ما يعجب القارئ إن القصة وايد مفصلة شخصيات جانبية مالها داعي بس أنا هالشي يعجبني يحسسني بعمق الشخصيات أكثر ..​

الكتاب عندي متوفر صوتي و الكتروني اللي تبيه لا يردها إلا لسانها :q8:​

منتظرة مشاركاتكم ​

أمبيه! طحت على موضوعج متأخر ..

حبيته .. !

ومشكورة على الموضوع والمشاركة .. يعطيج العافية

أبي هالكتاب.. عندج ؟