حياكم .. بشارككم بسفرتي لماليزيا .. بحلوها و مرها (( بالصور ))

[mrs_sugar]

السلام عليكم



شخباركم بنات



حياكم عندي اليوم بسولف لكم عن سفرتي لماليزيا بشهر فبراير 2009



هالرحلة كانت متروسة مواقف ضحكتني و مواقف بجتني



شغلات عجبتني و شغلات كلش ما عجبتي



كان فيها أخطاء و مقالب وايد



الفكرة من الموضوع مو اني بس براويكم صور و اسولف لكم



لأ لأ



الغرض من الموضوع انكم ما تغلطون الغلطات اللي انا غلطتها و ماني قايلة خربت سفرتي بس بقول فادتني



بالمرات الياية، مثل ما يقول المثل ( كل طراق بتعلوم )



بسم الله نبدأ



حياكم اول بردوا على قلوبكم عصير رقي ( احلى عصير ذقته بماليزيا )







الحين مع الفطاير و الجاي نتابع الرحلة








ملاحظة : الصور اللي ما عليها توقيعي هذي منقولة من النت لأني في صور شخصية تخص هالأماكن فما قدرت أحطها

و ذلك للأمانة



تابعوني
لا تروحون
​

 

[نووووونا]

حمدالله عالسلامه شقوره ومتاااااابعه معاج ان شاءالله


شوقيناااااااا,,

 

[mrs_sugar]

قبل السفر

بما اني اول مرة اروح ماليزيا فالتخطيط للرحلة كان بمساعدة اختي و حبيبة قلبي لوكريسيا و استفدت وايد من التقارير اللي حاطينها البنات بالمنتدى و من منتديات ثانية

المهم اخترنا التواريخ و الفنادق و انواع الغرف و حددنا عدد الليالي بكل فندق و ضبطنا كل شي بورقة مطبوعة و عطيناها مكتب السفريات علشان يسوون لنا الحجوزات

انا قلت بدال النت مو مجربة خلينا عالمضمون ( ركزوا على هالكلمة ) المضمون أحسن

خصوصا ان معاي بناتي و ابي ضروري الغرف يكونون متصلين مع بعض

خلصنا المخطط كامل و في كل المعلومات و سلمنا لورقة للمكتب

و هذي هي الورقة




قبل السفرة بجم يوم كلمتني الموظفة بالمكتب و قالت لي ان فندق Hotel First World بجنتنغ ما عطونا اوكي فراح اغيرلكم الفندق

قلت اوكي ما في مانع بشرط انه يكون بنفس المنطقة ( ركزوا ) و نفس السعر

قالت اي امبلة مثل ما تبين

قلت اوكي اتوكلى على الله

قبل السفر بيومين كلمتني الحجية و قالت لي تعالوا دفعوا الفلوس و استلموا التذاكر و فاوتشرات الفنادق

رحت و دفعت الفلوس و عقب ما دفعت سلمتني الأوراق

فتحت الظرف اجيك الأوراق ولا ....................

تاريخ السفر عقب التاريخ الي انا طالبته بيوم

انا طالبة و كاتبة بالورقة تاريخ 2 فبراير و الحجية حاجزة 3 فبراير و حجز الفندق على اساس الطيران 2 فبراير

هالكلام قبل السفر بيومين

المهم قالت لي لا تحاتين انا اضبطكم ما عليج

مر اول يوم لا حس ولا خبر

تخيلوا يوم 1 فبراير كلمتني العصر تقول ما حصلت لكم 2 فبراير ممكن تروحون 3 او الليلة الساعة 4 الفير

نعم ؟؟

او ممكن على طيران ثاني و تدفعون الفرق

يا سلام

بغيت ابجي لأول مرة بهالسفرة بس ما بجيت

المهم قلت لها ما اطير 3 فبراير لو شنو و ممكن اغير الطيران بس المكتب يتحمل فرق السعر او نطير اليلة الساعة 4 الفجر و تتحملون ليلة زيادة بالفندق

قالت لي خل اشوف و ارد عليج

كلمتني الساعة 8 بالليل و قالت لي خلاص تطيرون الليلة و احنا نتحمل ليلة الفندق

تخيلوا الساعة 8 يالليل عرفت ان طيارتي 4 الفجر

مافي وقت

صرت جني ملوت القصة القصيرة كل شي بسرعة بسرعة

حاجزة صالون و راح على

ما حفيت

يا ربي شسوي

قلت مو مشكلة بس خل نروح

الصدمة الثانية كانت الساعة 11 بالليل


يتبع

 

[mrs_sugar]

صدمة اخر لحظة

كنت قاعدة اصور الفاوتشرات و التذاكر احتياط

جان تطيح عيني على فاوتشر الفندق الثاني اللي بجنتنغ اللي كان بدال first wolrd

اسمه كان ايكواتوريال

كنت انتظر آلة التصوير تخلص من الورقة اللي داخل و قمت اتقرا بالفاوتشر

امبيييييييييييييييييييييييه

طاحت عيني على سطر بغى يغمى على

الفندق البديل كان في الكاميرون هاي لاند و

ليس جنتنغ هاي لاند

اللأولى تبعد عن العاصمة 4 ساعات سيارة و ليس فيها مطار و الثانية تبعد عن العاصمة ساعة و نص

و الفرق شااااااااااسع بين المنطقتين مو مكان ذكر الفروق الحين

المهم انه هذي ديرة و ذيك ديرة ثانية

انزين الحين 11 بالليل و المكتب مسكر

اشوة عندي رقم هالحجية الدايخة

طرشت لها مسج ابلغها و ما ردت على

المهم تعوذت من ابليس و قلت تنحل مو مشكلة ما بي اعصب و اتنرفز زيادة كافي جرعة اليوم

سكرنا اغراضنا بسرعة البرق و رحنا المطار





يتبع
​

 

[mrs_sugar]

السفر

رحنا المطار و طارت الطيارة اون تايم الساعة 4 الفجر على طيران الامارات متجهة الى دبي



وصلنا دبي وقعدنا ترانزيت 4 ساعات خلالها طرشت ايميل شديد اللهجة للشركة التابع لها المكتب ابلغهم باللي صار و

اطلب منهم الحل




عاد ما وصلنا ماليزيا الا يايتنا مسج بتغيير الحجز و عطونا اللي نبيه

و طرنا عقب الى كوالالمبور 7 ساعات

وصلنا بالسلامة و خذينا تاكسي لفندق برجايا تايمز سكوير ننام فيه ليلة وحدة ( الي حجزوها المكتب على حسابهم ) و

من باجر الصبح نروح سن واي لاجون

اول صدمة في تايمز سكوير : ماكو غرف متصلة ؟؟؟؟؟؟؟؟؟

حنيت شوية و عطونا سويت و عدت الليلة على خير

الفندق كان معقول بس ما يسوى 5 نجوم




ثاني يوم الصبح طلعنا و اتجهنا الي سن واي لاجون سكنا في فندق sun way lagoon hotel and spa

بالتاكسي المسافة كانت تقريبا نص ساعة و التاكسي خذا منا 140 رينجت ( طبعا ماخذين ميني فان علشان الأغراض )

وصلنا سن واي لاغون الفندق رووووووووعة راقي و معاملة الموظفين تهبل و الغرفتين مثل ما تبي و كل شي

اوكي

هذا مدخل الفندق



و هذا الفندق من الجهة الخلفية مقابل حمامات السباحة



تمشينا بالفندق و استكشفنا المكان

كان عبارة عن حديقة مائية و مدينة ملاهي و حديقة حيوان يعني منتزه باختصار متصل بالفندق و متصل بمجمع كبير

كان يوم الثلاثاء و الحديقة المائية مسكرة .. تمشينا بالمول و تعشينا و ردينا الفندق

طبعا الحلو بالفندق انه فيه ممر يوصلنا للحديقة المائية و المول بدون ما ننزل الشارع

الأحل ن هذا ان غرفتنا كانت فيها بلكونة نطلع منها على ممر بين الحدايق الى الحديقة المائية و حمام السباحة


-

-هالصورة اول ما نطلع من البلكونة مالت الغرفة نمشى على الممر لغاية حماما السباحة و الحديقة المائية من داخل الفندق


بتنا ليلتين في سن واي كانوا يهبلون و خففوا من الضغط اللي كنت احس فيه




يتبع
​

 

[Miss 3asal]

ناطرينج و الحمدالله على السلامة

 

[.]

وواااي حرتني ..

متابعه ..

اقول الحمدالله ع السلامه..

 

[mrs_sugar]

جنتنغ هاي لاند


و توجهنا عقب الى جنتنغ

خذينا ميني فان و خذا منا الطرق ساعة و شوية تقريبا و حساب السيارة كان 150 رينجت

وصلنا جنتنغ طبعا الفندق كان كبير بشكل يخوف

مصنف بموسوعة غينيس على انه اكبر فندق بالعالم مكون من برجين كبار و 24 طابق و 6118 غرفة

شكله من برة حلو بهلواني

الملون الفندق و المظلات هذي المجمع و الملاهي




دخلنا ولا امة الثقلين موجودة

رحمتك يا رب شنو هذا .. عاااااااااااااااااااااااااالم و زحممممممممممممة و ارقام و فوق 20 كاونتر استقبال



هذا اللوبي بس طبعا كان مو هالكثر ناس

لالا

اكثر منهم 3 مرات

و في كاونترين رقم 1 و 2 ما فيهم ارقام و لا عليهم ناس ولا دور كلش ؟؟ شالسالفة ؟

تاخذين رقم علشان الجيك ان ؟؟

صفينا دور علشان ناخذ الرقم

يوم وصل دوري علشان الرقم

شاف الفاوتشر قال لي world club ? go to counter 1 no need for number

المهم رحت الكاونتر رقم 1 ولا ما عليه دور لأنه الغرفة اللي حاجزبنها تعتبر اغلى غرفة عندهم و لها معاملة اسبيشال حتى المطعم غير مو مع الناس بس مع نزلاء الغرف اللي مثلها ( طبعا هالغرفة كانت ترضية من مكتب السفريات على الحوسة اللي سووها مو حجزنا الأصلي )

دخلنا المصعد صعدنا الدور 24

واي يمة المكان يخرع

الممر طويييييييييييييييييييييييييل

و رطب

و قمتة

و رييييييييييييحة وعععععععععععععععععععععععع



تميت يومين اخذ حبوب للوعة والله العظيم

مادري شالسالفة ؟ الريحة غريبة عمري ما شميت مثلها

و ما تنوصف

بس الغرف كانت نظيفة وواسعة



غير جذي كانت الرحلة اوكي الملاهي كانت حلوة و الجو كان بارد

و المنظر من الغرفة ... بدون تعليق

اخليكم تشوفونه بروحكم





المشكلة الثانية اللي كانت في جنتنغ ان ما حصلنا جمعية

لقينا وحدة صغيرونة بقلعة وادرين ( مو مكان صجي , هذا يدتي اللي يحفظها تقولها اذا المكان وايد بعيد )

و ما فيها ولا توست ولا جبن بس كاكاو و بطاط و بيابسي ( جمع بيبسي )

قزرناها ستاربكس و ماكدونالدز و مشى الحال

اخليكم مع شوية صور

- التلفريك



- محل كاكاو اسمه بارلي داخل مدينة الملاهي




تابعوني

​

 

[mrs_sugar]

بيننغ


و الحين المقلب العود يايكم استعدوا


:denya:

:0bee2e8d89:


هذا اليوم طبعا كان يوم البؤس و الهوان انا اسميه

اتعس يوم بالسفرة كلها

تييني القمتة الحين لما اتذكر هاليوم التعيس




خل اقول لكم اليوم هذا من اوله

من الليل قلت حق زوجي احجز لنا سيارة كبيرة علشان تكفي اغراضنا علشان نوفر البهدلة من الصبح خصوصا انه طالعين المطار علشان الطيران الداخلى الى بيننغ

طنشني كالعادة و قال انتي ما عليج انا اتصرف و نمنا

الصبح سوينا جيك اوت من الفندق بور يحه

و طلعنا ندور سيارة كبيرة

ماكو

الحل ؟

اخذوا سيارتين صغار وحدة للشنط و الثانية للبشر اللي هم انا و ريلي و بناتي الثنتين

قلنا اوكي

ركبنا و اسم الله عليكم طارت فينا الطيارة على الأرض

السايق كا محشش مدري شنو شارب

يتحكحك طول الطريج و يلفلف يمين و يسار المهم الطريج بدال ساعتين خذا منا ساعة و ربع

نزلنا المطار نتحمد بالسلامة حق بعض و ننطر السيارة الثانية مالت الشنط

نزل راعي التاكسي المحشش حق ريلي يبي الفلوس

ما رضى ريلي يحاسبه الا لما توصل الشنط

و كلمة من هذا و كلمة من ذاك و صكت هوشة و تجمعوا العالم و نادوا الشرطة

المهم كان الحق ويانا و خلوا السايق ينطر لما توصل السيارة الثانية و حاسبنا الأثنين

طبعا انا خذيت بناتي و تنعزت بعيييييييييييييييييد و اطالع شنو بيصير ( مو يقول لي ما عليج انا بتصرف )

خلصت سالفة التاكسي

دخلنا المطار الداخلي كان لوووووووووعة

حر و رطوبة و زحمة المهم طلعت روحنا علما ركبنا الجناط و خلصنا طبعا دفعونا وزن زايد 400 رينجت

طرنا على Air Asia




ووصلنا بيننغ

خذينا سيارتين بعد و رحنا الفندق

كنت بموت من التعب و شد الأعصاب وصلنا الفندق

باراديس ساندي بيتش



و هذ اللوبي



حر و رطوبة و مشغلين مراوح حق موظفين الاستقبال بس و الناس كيفهم

شكل الفندق كان حلو و كان نظيف و كل شي

بس معاملة موظفين الاستقبال كانت ولا ببيزة

وصلنا و صفينا دور علما وصل دوري و خذت الفاوتشر

جان تقول لي سوري مام مافي حجز باسم السيد !!!!!!!!!!!!!!!!

نعم !!!!!!!!!!!!!!!!!!


واي يما قلبي





تابعوني
​

​

 

[mrs_sugar]

بيننغ 2

يا الله شنو هالحالة

قالت صبر اجيك مرة ثانية

و هالمرة الثانية صارت ساعتين

انا تعبانة و بطني يعورني و مو نايمين

و الشباب بالريسيبشن يتغشمرون مع بعض و يتعلجون و اخر مسخرة

حسيت بالمذلة بصراحة

احنا يصير فينا جذي ؟

ليش؟

و من منو ؟

من هالأشكال ؟

المهم حطيت لي مناحة



قام ريلي و اتصل بمكتب السفريات بالكويت

و لا مو مأكدين الحجز و الفندق لغى الحجز

انزين و الحل

عقب حوسة و لوية عطونا السويت اللي كنا حاجزينه بضعف السعر ( طبعا المكتب تكفل بدفع الفرق مو احنا )

وصلت الغرفة مهدود حيلي و ميتة من البجي



طبعا جذي كانت غرفة بناتي و غرفتي نفسها بس السرير نفرين

و في صالة و مطبخ صغير و حمامين تكرمون

و فيها بلكونة تشرح القلب تطل مباشرة عالبحر



دشيت غسلت ويهي و خذيت شور و طلعنا نتمشى و نتعرف عالمكان

نزلنا البحر ركبوا بناتي البراشوت و ردينا ما يبون لا جت سكي و لا بنانا بوت و ريلي مو راعي هالسوالف

عطيه حدايق و نوافير و هالسوالف

خذينا تاكسي ودانا مطعم اسمه ابو نواس مقابل سوق الليل حلو كان اكله و اليهال استانسوا

تمشينا بسوق الليل و ردينا

ثاني يوم الصبح رحنا حديقة الفراشات و الفواكه

و رحنا متحف الألعاب

بالليل رحنا مرة ثانية السوق الليلي خذينا شوية سيفونيرات و تعشينا و ردينا نستعد للرحيل ثاني يوم الصبح الى

الأحصنة الذهبية

اخليكم مع شوية صور

هذي البطة تعتبر اجمل بطة بالعالم

شفناها بحديقة الفراشات


شوفوا الضفدع حطيت لكم دائرة عليه سبحان الله



اشرايكم بتصويري





هذي احلى وردة شفتها





عفية شوفوا هالحشرة جنها وجه انسان سبحان الله




يتبع
​

 

[mrs_sugar]

و الحين شوفوا متحف الألعاب يونس

عبارة عن مكان صغير في نماذج من كل الألعاب اللي مرت علينا كبار و صغار

استانسنا فيه وايد

ليون كنج



ماعرف شسمه بس انا و خواتي و بنات خالتي كنا نسميهم زعلميط

استانست يوم شفته



لا تروحون

 

[mrs_sugar]

 

[بطه فيها نطه]

متاااااااااااااااااااابعه وقلبي يعورني عليك

بس واضح جدااااااا ان المشكله باختيارك لمكتب السفريات

 

[mrs_sugar]

قصر الأحصنة الذهبية


صار الصبح و سوينا جيك اوت بسهالة و رحنا المطار و مشت الأمور عادية و سهلة

وصلنا قصر الأحصنة الذهبية

كان رووووووووووووووعة



هذا من داخل



الموظفين اخر ادب و اخلاق

مو مثل الحبربش ملوت بيننغ

خلصنا بدقايق و الغرف كونيكتد و كل شي نبيه سوولنا اياه

و هذي غرفتي



و الفيو من البلكونة يشرح القلب ( طبعا احنا طالبين lake view )



زاوية ثانية



حطينا اغراضنا

و طلعنا خذينا الووتر تكسي الى الماينز وندر لاند

هذا الووتر تاكسي






هدت علينا المطرة و حبستنا في عرض النوافير



كان يهبل مو طبيعي مع صوت المطر اخر ريلاكس


تمشينا شوية بالمول و ردينا الفندق استعدادا للرحيل في الصباح الى فندق استانا بكولا لمبور و كانت المحطة الأخيرة
​

 

[mrs_sugar]

متاااااااااااااااااااابعه وقلبي يعورني عليك

بس واضح جدااااااا ان المشكله باختيارك لمكتب السفريات

صدقتي والله يا بطة

المكتب كان سبب كل مشاكلنا

الله يسامحهم :eh_s(4):

بهدلونا اخر بهدلة

مع انه مكتب محترم و معروف على مستوى الكويت مو بو طقة

و المشكلة الأدهى و الأمر اني معطتهم كل شي التواريخ و الترتيبات و كل شي

 

[mrs_sugar]

كوالا لمبور

وصلنا فندق استانا و عطيتهم الفاوتشر

ماكو حجز !!!!!!!!!!!!!

ويح قلبي

بعد مرة؟

وين قطوتي ام عيون مبققة




انا لله و انا اليه راجعون

و بعدين مع هالمكتب

بدون نقاش كلمناهم بالكويت و عطونا الغرف الكونيكتد على طول

ما سألنا شنو المشكلة

مابي اعرف و اعور قلبي

المهم الغرف كانت حلوة و مرتبة

حطينا غراضنا و طلعنا نستكشف المكان

لقينا يمنا مجمع لوت تن دخلنا تسوقنا فيه شوية



كان مجمع صغير و بسيط

ما عجبني وايد

و المطاعم اللي تحت ما كانت نظيفة كلش

و عقب رحنا البافليون

يهبل بصراحة وايد عجبني

هذا من بره



و هني من داخل



ثاني يوم الصبح كنا مخططين بنروح التوين تاورز

عاد شوقر عشتو يالله من فضلك متمكيجة علشان التصوير يطلع حلو

جان يقول لنا راعي التاكسي اشرايكم اوديكم الشلالات تشوفونها و عقب نروح التوين تاور؟

قلنا اوكي

رحنا الشلالات



كانت رحلة غيير موفقة

حر و رطوبة و جبل تصعدين لما يوقف قلبج



و فوق هذا يم شواذي من كل مكان يطلعون لنا

ما انصحكم ما يسوى كلش



الأخ واقف على الغصن اللي لازم نطوف من تحته

شلون بنطوف مادري

المهم نزلت على طول

و ويهي جنة معجون طماط من الحر و الرطوبة

و المكياج كله ساح و راح ولا بقى منه و لا نتفة

و زفيت راعي التاكسي

بعدين ودانا

بيترونا توين تاورز

هذي الصورة من تحت الأبراج عند النوافير



حجزنا تذاكر و رحنا نتغدى و تسوقنا لما صار وقت صعودنا رحنا و صعدنا فوق

هذي الصورة من فوق الجسر



ما رحنا وايد مجمعات لأنه رحلتنا كنت وايد قصيرة

بس رحت البافليون و لوت تن و سوريا كى ال سي سي

و التشاينا تاون

اللي عجبني بعد مجمع رخيص حده اسمه سونجي وانغ



مكانه مقابل مجمع لوت تن في شارع العرب

رخيص و اشياءهم حلوة

:q8:

و ردينا الكويت بالسلامة



بعد بقى شي اخير

تابعوني

​

 

[mrs_sugar]

تعلمت من هالرحلة

الأشياء اللي تعلمتها من هالرحلة حق الرحلات الياية هي :



الحجز عن طريق النت اضمن و احسن من المكاتب



اللي تروح سن واي لاغون تحجز في sun way lagoon hotel and spa و تاخذ الغرف اللي فيها بلكونة في الدور الخامس ركزوا الدور الخامس



جنتنغ ما تسوى يومين .. كافي رحلة يوم من الصبح لي بالليل و بس
و اللي تبي تبات تودي معاها ماجلة احتياط خصوصا اذا معاج يهال
لا تعتمدين تشترين من هناك



الأحصنة تحتاج اكثر من يوم واحد لمجرد الريلاكس الفندق يفتح النفس
و الغرفة حجزوا مطلة على البحيرة lake view



بيننغ تحتاج اكثر من يومين وايد فيها اماكن تونس بس ما مدانا نشوفها كلها



كولا لمبور تحتاج اكثر من 3 ايام طبعا اذا تبون السوق و أول شي روحوا سونجي وانغ شروا منه الهدايا و الصوايغ و عقب لفوا عالماركات بالمولات الكبيرة



طبعا رحلتنا كانت قصيرة لظروف خارجة عن ارادتنا بحكم شغل زوجي

بس اقل ما فيها شفنا ماليزيا و عرفنا الأشياء اللي نتفاداها للرحلات القادمة

اتمنى اني ما اكون طولت السالفة عليكم

بس حبيت تشاركوني رحلتي بحلوها و مرها

دمتم بود



أختكم


mrs_sugar




وي بعد في شي نسيته

















تذكرون لما قلت لكم ركزوا على تاريخ الردة ؟





















المكتب كانوا مخلصين الحجز لغاية ما نرجع الكويت بيوم بالفندق الأخير و مو منتبهين ان بهالتاريخ احنا كنا بالكويت

و لا احنا انتبهنا

:krkrkr:

 

[ام كتكوت]

مااااااااااااااااااااااااااااااااااااااااااااااااااااااااااااااشاءالله اكشن من اولها

صور الغيم رووووووووووعه رووووووووووووعه تسلم ايدج على هالصور

عليج بالعافيه والحمدلله ع السلامه

الفال ليييييييييييييييييييييييي

 

[mrs_sugar]

حياج الله ام كتكوت

نورتي الموضوع

راح انزل صور بعد زيادة كل جم يوم

مصورة شغلات حلوة

 

[ام عوض]

ماشاء الله على تقريرج .. وافي

اتضايق و الله لما اسمع احد تبهدل في سفرته .. واتخيل نفسي مكانه ..

حسبي الله عليهم من مكتب ..

ع العموم ..الله يوفقكم في سفراتكم الياية ..