خبيرآت القطط تعـآلو أبيكم ضروووري

[هـلآوي]

السلآم عليكم ..
صبـآح \ مسـآء الخيـر

بنـآت أنآ قطوتي عمرهـآ شهـر ونص تقريبآ ..
أبي أعرف شنو أوكلهـآ .. وعـآدي أشربهآ حليب
وشكثر أوكلهـآ وشلون أعرف انهآ جوعآنة
في نآس تقول متى ما حنت عطيهـآ أكل ولآ حليب
وفي نآس تقول لآ تعطينهـآ حليب مو زين
والي تقول عطيهآ بس 3 وجبآت باليوم ولآ تكثرين الأكل قفشة وحدة بس
والله احترت شسوي ..

وبالنسبة للحمآم عزكم الله
قطوتي مدربة ومآ توسخ الا باللتر بوكس
بس بعرف شلون تمسحونهآ وتنظفونهـآ
لآعت جبدي هههههه

اي وبعد عندي سؤآل
أبي أسبحهآ والله أحسهآ وسخة مع اني كل يوم أمسحهآ وانظفهآ
بس أحس السبوح غير أبي يحوشهآ مآي وتنظف وريحتهآ تصير حلوة
في نآس يقولون مو زين مادري شنو توهآ صغيرة
بس أنآ سألت أكثرر وقآلولي اذا تبين تسبحينهآ لآزم تنشفينهآ وتدفينهآ عدددددل
ولآ يحوشهآ بررد وجذي عـآدي شرآيكم ؟

وبعدين صج أنآ للحين مآ وديتهـآ البيطري
بوديهآ يوم الجمعة ان شآء الله ..
تعرفوون مكآن سنـع !!

أدري طولت بالأسئلة بس عفية الي تعرف أي شي تقولي
لو سؤآل من هالأسئلة .. ومشكوورين مقدمـآآ :eh_s(7)::eh_s(7):

 

[بحيرةالبجع]

حبوبه هلاوى

انا لمن قطوى كان بعمر قطوتج كنت اوكله كل ما شفته انه يوعان ماحددت عدد وجباته بس بكميات صغيره

عطيها اكل العلب بس لا تعطينها نوع وسكس بو علبه بنفسجه لانه يخيس حلجها ويعور بطنها

ويطيح شعرها

اما بالنسبه للتنظيف بعد ما تخلص اللتر بوكس بروحها تنظف روحها

والتسبح انا كنت اسبح قطوى مره كل شهر بس نشفيها عدل

والبيطره الزينه مستشفى الرى نظيف وشرح احسن من الدهماء

وسلامتج

وان شاء الله البنات يفيدونج بتجاربهم

 

[brensesa]

هـلآوي

شوفي حبيبتي وانشالله افيدج باللي اعرفه​

​

​

الاكل

بالنسبه للاكل حبيبتي عادي عطيها باي وقت بس لا تكثرين
او تعطينها 3 مرات باليوم بكميه متوسطه
وتقدرين تحطين الاكل في صحنها الخاص ومتى ما تبي تاكل تروح تاكل
واحسن نوع اكل لقطة شهر ونص استخدمي النوعية هذي بس ابتعدي عن السي فود يعني التونه السلمون اي اكل بحري ابتعدي عنه
هذا النوع وايد يحبونه

او هذا بس استخدمي نوع الكياس مو العلب والدراي فوود

او الدراي فود بس مو وايد

​

اللتر بوكس​

وبالنسبه اللتر بوكس
عادي هي تنظف نفسها سبحان الله القط يستخدم طرف معين من لسانه يقتل الجراثيم
فعادي لا تلوع جدج والحمدلله ان القطة من انظف الحيوانات



الاستحمام

بالنسبه للسبوح عادي سبحيها ولا تسمعين كلام مني ومناك
عادي سبحيها بس استخدمي الشامبو الخاص للقطط او شامبو اطفال بلا دموع مثل نانو - جونسون
بس بعد السباحه نشفيها عدل ويفضل تسلطين عليها هواء الاستشوار لان بالشتا الجو بارد وبالصيف راح يكون تكييف

​

الطبيب
​

بالنسبه للطبيب وديها الري مثل ما قالت الاخت بحيرة البجع
لانه نظيف ومكان حلو وراقي ومختصين بالقطط والكلاب
وراح يفيدونج اول شي راح يجيك عليها ويشوف فيها فطريات او حشرات ويفيدج في وقت التطعيم
---ومستشفى الدهماء---- ما حبيته لويه وحوسه
وفي مستشفى رويال بعد وايد زين بس وايد غاااالي​

انشالله اكون افدتج بالمطلوب​

 

[هـلآوي]

يعطيكم ألف عـآفية عالرد ..
فديتكم مـآ تقصرون ..

 

[هـلآوي]

بنـآت بسألكم ..
قطوتي مآ تبي تـآكل الأكل الي أسويلهـآ بالبيت ..
لأني دورت بالنت .. وقآلو بهالعمر عطيهآ من أكل البيت خضرة ودجاج وعيش وهالسوآلف
بس طبعآ كله بالخلآط ..
مآدري شسوي معآهآ .. مرآت أوكلهآ بالغصب .. :s

 

[هـلآوي]

يـآ بنـآت يـآحلويــن ..
أبشرركم .. سبحت قطووتي ..
ومـآ شـآء الله عليهـآ فديتهـآ ..
مـآ تعبتني ولآ شي .. هـآآآدية وأنـآ أسبحهـآ ..
على غير عـآدتهـآ ..
مع أني كنت خـآيفة .. < أول مرة عليمية .. :$
بس أشوى عدت على خير ..
والحمدلله دفيتهـآ وسشورتهـآ ومشطتهـآ ..
اي جذي طلعت تهبــــــلل .. لوول

 

[هـلآوي]

وبالنسبة للأكل ..
الحمدلله بددت تتقبل الي أسويلهـآ ايـآه ..
حتى قمت أعطيهـآ سريلآك .. وصآرت تمووت عليه ..
وقطعت عنهـآ الحليب .. بس خـآطري أنوعلهـآ بالأكل أكثرر ..
وأبيه كله من البيت صحي .. لآ معلب ولآ خرآبيط وخيـآس ..
بصرآحة مآ أبيهـآ تتعود عليه ريحته اللهم يآ كـآفي ..
منو عندهـآ وصفـآت حلوة ومغذية .. تفيدنـي ..

 

[هـلآوي]

اي وصح ..
بغيت أسألكم يــآحلوين ..
أبي بيت حق قطوتي .. مـآلقيتلهـآ ..
شفت وحدة بمزآد تبيع .. بس مـآردت علي ..
مـآدري اذا عندهـآ ولآ لأ ..
وأبي طووق وألعـآب لهـآ ..
يعني باختصـآر أبي محل يبيع مستلزمـآت القطـآوة ..
لآ تقولون لي بيت زون لأني مـآلقيت عنده الي أبيه ..
ولآ تروفـآليوو .. مـآفيه شي !
ولولو هـآيبر رحت وحست لين قلت بس ..
مـآشفت ولآ شي حق القطـآوة ..
من ويــن أشتري .. حرآم كسرت خـآطري ..
أبيلهـآ مكـآن دآآفي .. أنـآ حـآليآ أخليهـآ تنـآم بسلتهـآ ..
حـآطلتهآ مخدة دآخل ومدفية المكـآن .. بس هم كـآسره خـآطري أبيلهـآ بيت !!
شررآآيـكم .. من ويــن .؟

 

[ghayoooda]

الله يهنيييك فيها انا امووووت على القطااوة بسس ماعندي وقت اغسلها وانظفها واحط لها اكل يعني ماارااح اهتتم فيييها

 

[مهايا]

هلا اختي مبروك عليج

واحسن شي تعودينها على اكل البيت
وانا قطوتي اعطيها سيريلاك تموت فيه عاااادي ترا بس افضل بالقمح او الارز بسسس

وممم ماله داعي العيش اختي ,, عطيها بس صدر دجاج مفيوح بماي بسسس بدون بهارات وولا ملح او كبدة دجاج
وسويلها جزر وكوسا واهرسيهم مع الدجاج
وعطيها الصبح بيضه مفيوحه ترا زينه لها حيييييييييل
وعطيها جبن مثلثات او جبن كيري ,,, بس افضل قليل الدسم

ومو شرط دايم دجاج ,, يعني مثلا عطيها جزر مفيوح + كوسا او فاصوليا
من افضل الوجبات الخضار المسلوق بدون بصل او ملح او توابل

فاصوليا بطاطس جزر كوسة (المفضل لدى القطط الفاصوليا ) ولا تكثرين من الكوسة عشان ما تسبب اسهال

----
وفعلا الوسكس whiskas مايمدحونه كلش يضر القطوه ويطيح شعرها
خلج على اكل البيت احسن او هذا ترا حيل حلو ومايسبب اسهال للقطوو وولا يطيح شعره

تلقينه بمستشفى الري اللي اقبال سوق الحمام اللي هو سوق الجمعه
خلف مستشفى الدهما البيطري
وتلقين عندهم بعد جم شغله حلوه انا اشتريت واحد جنه جنطه كبيره وداخله مثل المخده فرووو وسعره ثمانيه وسبعميه وخمسين اعتقد,,,, استانسو عليه قطاوتي

وتلقين بـ بت زون
دراي فود رويال كانن ترا يحبووونه حيل القطاوه بس علميهم جم عمر قطوتج عشان يعطونج النوع اللي مناسب لعمر قطوتج

 

[malak1982]

حبيبتي هلاوي شوفي بالنسبه للاكل ترا احسن شي اهو الدراي فود انظف و اضمن عندج meow mix اللي لونه و ردي للكيتنز وايد حلو عن تجربه وعلي فكره ترا القطوه تقدر تعيش عالدراي فود للابد عادي بالعكس مفيد لها لان فيه فيتامينات و مغذي و زين همن حق اسنانها ما يسوسون بسرعه.
بالنسبه لل وت فود للاسف تجربتي معاه فاشله اغلب قطاوتي كان يييهم اسهال لما ياكلون وت فود ، اللهم النوع اللي حاطته مهايا اللي بالتشيكن لونه اخضر هذا جربته حلو مره وحده بالاسبوع ممكن تاكلينه وت فود كمكافأه له و باجي الايام الدراي فود خليه قدامه طول الوقت ويمه الماي وترا ما يحتاج حليب لان اغلب القطاوه الحليب يسببلها اسهال ، فبلاش منه طالما مو شي اساسي مانبي نجازف لان راح تتعبين اذا ياله اسهال

بالنسبه للسبوح تقدرين تسبحينه باي وقت بس اهم شي ما تعرضينه للهوا، ان شا الله لو تسبحينه كل يوم ما من ضرر بس غطيه عدل و نشفيه و بعدين استشوري شعره، ايه في شغله مهمه لازم تسبحينه بشامبو للفطريات و البكتيريا كل الشامبوهات المخصصه للقطط تستوفي هذي النقطه ، حرام تسبحينه بجونسون و ينحسب عليه سبوح و في الاخر ما يستفيد منه بس ريحه عالفاضي

وبالنسبه للقطوه بعد ما تطلع من الليتر بوكس صراحه انا ما كنت اتقبل تطلع من البوكس من غير ما انا بنفسي اضمن انها نظيفه و مافي شي عالق مني ولا مناك و توصخلي البيت لاني وسواسه نظافه، فكنت اسوي التالي : اذا نمبر ون افراج ، اذا نمبر تو كانت اول ما تطلع من البوكس تلقاني واقفه فوق راسها و ناطرتها تخلص و بايدي مناديل معقمه كنت شاريتهم من محل في المستشفي البيطري اللي علي طريج الوفره مالقيتهم باي مكان ثاني وايد حبيتهم و كنت امسح المنطقه المعنيه ،بس مناجر انا وياها ما ترضي لحد ما تعودت ، ايه شغله مهمه نصيحه مني ييبي اللتر بوكس اللي يكون مغطى بس فيه فتحه من جدام اللي تدخل منه القطوه ترا انظف، لان القطاوه حزتها تنسي نفسها و تحفر وايد بالرمل و بعنف (خخخخ ذكرتيني بقطوتي حبيبتي وايد مشتاقتلها) راح تعفس الدنيا اذا البوكس ما كان مسكر

وهذا كل اللي عندي و اتمني يكون كلامي مفهوم قاعده اكتبه وفيني النومه و الوقت متاخر و عندي دوام واذا عندج اي استفسار احنا حاضرين
​

 

[malak1982]

بالنسبه للمستشفي البيطري اول ما شريت قطوتي وديتها مستشفي الدهما عشان افحصها وع ما عجبني حسيته وصخ كانت اول و اخر مره ادشه بصراحه، هذا رأيي ممكن غيري من البنات ما يوافقني بالرأي عادي اختلاف الراي لا يفسد للود قضيه :eh_s(7): ، اكثر مستشفي عجبني و حسيته نظيف المستشفي البيطري اللي علي طريج الوفره وايد زين و نظيف و قريب للي بالمنطقه العاشره بدال لا يطقون مشوار للري بس مشكلته الوحيده انه شوي غالي
هذي تجربتي باختصار
​