خبيرات ميونخ و زلامسي

[da3doda]

السلام عليكم بنات انا ناوية اسافر هالصيف ميونخ - زلامسي - اوروبا بارك

و برنامجنا بنقعد ب زلامسي 10 ايام و عقب نروح اوروبا بارك بنسكن بفنادقها 3 ليالي و عقب بنروح ميونخ و عندي جم سؤال
وين اسكن بميونخ ؟ ابي مكان قريب من المواصلات و الاندر قراوند

وثاني سؤال احنا طيارتنا بتنزل بميونخ و بنروح على طوووول زلامسي بس شلون نروح هذا ؤالى بقطار احسن ولا تاكسي ؟
وجم التكلفه صج توصل 150 دينار ؟؟؟ و اذا بالقطار شلون الطريقه ؟؟

 

[pure.soul]

وعليكم السلام

انا رحت زلامسي بس من فيينا مو من ميونخ و رحنا بسيارة مأجرينها مع سايقها من الكويت .. جذي جنها ميني باص و بعد اكبر شوي و مغيمه كفتنا و مريـــحه تسدحنا و نمنا لانه الطرييج طوووويل بس المناظر مو صج تنسيج الوقت .. و بعدين بالطريج في استراحات ..

احنا سكنا بــ Grand Hotel اهوه احلى فندق اهناك و طبعاً كله كويتيــــــــــن و خليجيــــــن .. حده حلوو اذا حجزتوا خلو غرفتكم على البحيرة مو على سكة القطار .. بس اذا تبون شي بسيط و ما يكلف حجزوا شقه فندقية يم Grand في شكثر شقق فندقيه و زينيين مو اي شي لأنه في شقق بعيييييده عن البحيره و السوق و العالم و تلووع الجبد تحسون انكم بعالم بروحكم p;


نصيحة خلوا قعدتكم في زلامسي اكثر لأنه صراحه توونس اكثر و الطبيعة عجيبه خصوصاً الجو عند البحيره العصاري عجييييييب و ترا فيها اماكن واااايد .. قعدوا من الصبح و اخذولكم تاكسي و روحوا منطقة اسمها " كابرون " توونس ثلج و تيلفريكات .. و عندهم الشلالات .. يعني سوي سيرج قبل لا تروحين و جيكي على الاماكن لأنه صراااحه الكويتين يحرووني اهناك ما يقعدون الا العصر و يجابلونلج هالكفيهات و لووويه لي بليل بالسووق و المطاعم و بس !! عاد سوقهم حدده عادي بزلمسي ، وايد شعبي ..

ادري وايد قرقت بس حبيت انبهج على هالشغلات و رحلة سعيده

 

[da3doda]

مشكوره وايد حبيبتي

 

[جكورة]

زلمسي تهبل بس أتوقع عشر أيام كثير عليها إلا إذا بتروح مناطق ثانية من خلالهـــــا...
والمسافه من ميونخ لزلمسي مو بعيد أتوقع 200 كيلو يعني ساعتيـــــن وإحنا رحنا من زلمسي إلى ميونخ بسيارة بس موغالي يعني مو أكثر من 100 دينار ...
وإذا بتقعدين بزلمسي روحي الكابرون جبال الثلـــج تطلعين لها بالتلفريـــــك , البحيرة , الزحلاقيـــــة الصيفيـــــة , الشلالات... وترى سوقهم عادي مو ذاك الزود... خلي المشترى بمجمعات ميونخ تهبل ....

وتروحين وتردين بالسلامــــــــة

 

[RegaLoS]

هلا اختي احلى فندق بميونخ هوليدي ان سيتي سنتر او انتبهي على كلمه سيتي سنتر لان في وايد فنادق
المهم حبيبتي هالفندق كل قروبات الكويت تسكن فيه لان موقعه وايد حلو او عجيب بس اللوبي زحمه كلا كويتيين الفندق باختصار تحته سوق او جمعيات او تحته الاندر قراوند يعني لي صار مطر ماله داعي تتبللون او الاندر قراوند لي السوق ناسيه جم محطه يا وحده او محطتين بس او كل شي قريب منه او تحت الفندق مطاعم مثل سب واي او غيره او اهم شي صالونات يعني باختصار روعه انا كنت دايما اسكن في شيراتون فور بوينتس في منطقة ارابيلا بارك الفندق راقي حيل حيل او مافيه لويه او كل الي يسكنونه من الخليجيين الي رايحين علاج بس عيبه انه بعيد عن السوق او وراه في اندر قراوند يعني تمشين 5 دقايق توصلين للاندر قراوند بس اعتقد 5 او محطات توصلين السوق او اذا ظلمت الدنيا يضيق الخلق اتحسين معزوله عن الاوادم او اذا بغيتي مطعم ولا جمعيه تعالي افتري اما هوليدي ان سيتي سنتر كل شي يمج او صيدليات او الاهم في مكتب داخله خدمات للخليجيين او البوفيه الافطار قسم كامل كلا حلال لوووووول قرقت عليج وايد


زلمسي سوقها عادي احنا مره القروب سكنا في فندق نسيت اسمه نظام كوخ يونس بس دور ارضي او دور اول بس ماعجبنا من ناحية النظافه او موقعه يطل على جبل او ليقعدتي الصبح اتشوفين هالغزلان الي فوق الجبل امبي يشوق رومانسي
او زلمسي وايد عليها 10 ايام بالكثير 5 ايام اتوقع كافيه لان ممله او في وره الجسل جنج بتروحين كابرون سوق يونس تكرمين جواتيه رخاص حيل بس كد او مد او فناتق

الله يسهل سفرتكم او تروحين او ترجعين بالسلامه

 

[almassa]

زلامسي حلوووه بس ماتستاهل اكثر من 5 أيام
ونصيحه مروا ع المناطق اللي حواليها مثل كابرون تبعد عنها 5-10دقايق بس بالسياره
بصراحه حييييييييييييل حلوه واهدى من زلامسي وعائليه اكثر والطبيعه فيها مووووووصج

واذا بتروحون الثلج روحوا اللي بكابرون مو بزلامسي لانه احلى

اما عن ميونيخ عندج الهوليداي ان سيتي سنتر تحته الاندر قراوند اللي يوديج السوق على طول

اتمنى اكون فدتج واذا تذكرت شي برجع

 

[almassa]

على فكره

ماقريت رد regalos الابعد مارديت سبحلن الله نفس الرد تقريبا

هذا ان دل على شي يدل على صحة المعلومات

 

[مي الصغيره]

السلام
زلمسي طبيعه خلابة وراحه وهدوء اذا اتبين اماكن سكن رخيصه في وايد ومو لازم هوتيل عندج البانسيون ارخص ويكون على شكل كوخ وفي عوائل تاجر بيوتها بعدو واستاجروا سيارة روحوا لسويسرا وايطاليا قراب منكم
ميونخ انا ما حبيتها نفسيتهم مو حلوة كلش لا الفندق ولا بالسوق بس عنده حديقة حيوان نظام سفاري و ميزتهم ان كل الكازينوهات برة المدينة وفيها مقر هتلر بس انا ما حبيتها
روحي لساحة مارتن مارتن بلاتز ارخص بوايد من شارع الكساندر كله ماركات ونار احنا سكنا هوليدي ان ستي سنتر لان في واحد برة اللمدينة خذي بالج والمهم واحنا نتمشى لقينا سوق شعبي يهبل مثل نظام ستي سنتر السالمية كله شغل الماني و ارخيص وكان ورى فندقنا لو اعرف العنوان بالضبط جان كتبتة
رحلة موفقه

 

[الكونتيسه]

هاى جم كلفتكم السفر كلها

 

[mn.mn]

أحنا سكنا بكابرون بينها وبين زلامسي عشر دقايق وفعلا يكفي لها 5 أيام فيها وايد أشياء منها شلالات كريمل وبحيرات التجميع والتلفريك

وكنا نروح زلامسي بالسيارة لان ما فيها شي غير البحيرة يا تأجرين القارب الكهربائي نص ساعة تسوقونه بالبحيرة أو تركبين اليخت اللي فيها

ويكون داخله مثل كافيه والسوق مافيه شي كلهم جم محل وكافيهات واصلا اسعارهم اغلى من ميونيخ وبعدين يورب بارك ترى وايد بعيدة عن

ميونيخ بس الصراحة حلوة وتسوى وفنادقها يهبلون أنا مارحت لها بس من النت شفت موقعهم نصيحتي سكني بكابرون بدال زلامسي

منطقة هادية وروعة وكلها عوايل خليجيين وكويتيين لان زلامسي ترى ما فيها شي بس لازم تروحينها الطبيعة فيها خيال بس كابرون أقرب

حق الاماكن السياحية

 

[taiba2001]

حبيت أسأل الأخت mn.mn وين سكنتوا في كابرون ؟

 

[مي الصغيره]

اختي الكونتسية احنا شوي خربطنا بسفرتنا يعني فنادق 5 نجوم وتكاسي بدل الباصات و عشا بفندق :ggdw: غيرنا راحوا عن طريق حجز النت و كانوا يعرفونن ناس ضبطوا لهم سكن عند عايلة بالريف و اجروا سيارة فكلفت عليهم جريب 2000 بس

 

[الزمن ماله أمان]

انا ميزانيتي تقريبا 200 وشوي تكفي لميونخ وزلامسيفيدونا يا أهل الخبرة

 

[غربه؟]

انا من اتزوجت وانا اروح النمسا وميونيخ بس احسن شي فيها انك تستأجر سياره وتسوق بروحك .. يعني زالامسي نحن نسير نقعد فيها النهار كله بس ونرجع لأنه ما تحتاج اكثر يوم... يا جماعه في منطقه اسمها زلم زلر وايد روعه نحن نقعد فيها شهر كامل ومن خلالها ننتقل الى المناطق الثانيه ..

 

[{ ليت ظني كآن صآيب }]

بنات 2000 للشخص الواحد ولالشخصين .... !

لان بس اولد بسافر ان شاء الله شهر عسسسسسسسسسسسسسسل ... ! _03ba:

 

[$$مذهلة$$]

السلام عليكم

اللي راحوا زيلامسي واللي راحوا كابرون ابي اوتيل او شقة تكون بسعر مناسب وماتكون بعيدة وايد يعني كل شي حوالي

وميرسي ياحلوات

 

[أم جوني]

حبيبتي كوتيه نشيطه انا عندي القطار ارخص من الباص والسياره بوايد يمكن يطلع عليج اقل من 50 دينار والرحله حدها ممتعه كافي شوفة المناظر بس انا اييد كل البنات الي قالو انه زلامسي وايد عليها عشر ايام لانه صج وايد وايد عليها 5 ايام وزين اتسوين انج بتحزين بيوربا بارك انا رحتلها من بازل بسويسرا المسافه كانت ساعه بالقطار لانها كبيره ويبليها يومين على ماتخلصين منها بس هم راح تملين اليوم الثالث ولاتروحين يوم الأحد زحمه ذبحه جنج بالترفهيه يوم العيد اللعبه تنطرين عليها ساعه اما ميونخ فالصراحه كلش مو حلوه مافيها غير السوق ومو حلو وايد مقارنه بباجي الأسوقه في أروبا اما عن طريقة حجز القطار حيل سهله تروحين محطة القطار اهو قطار سفر فيه حمام وكافتيريا و كباين ودورين تروحين حق الكاونتر تسففسرين عن الرحلة الي بتودي زلمسي الساعه جم ومتى تطلع يقولج مثلا في كذا رحله في دايركت واكيد اغلى من الترانزيت الي كل شوي يوقف بمحطه بس هم حلو الوقفه ماطول دقيفه ويحددلج الوقت واكيد كل ساعتين في قطار لي الساعه 7 على حسب الدوله كل اوروبا جذي وبس اتقولييه قصلي تذكرتين مكتوب فيهم رقم القطار واي بوابه كاأنج قاصه تذكرة طياره حتى رقم الكرسي مكتوب وطريقة المحطة جنه المطار شاشه تحدد الوقت الرحلات وكتوب الوصول متى من هل الرحله الاقلاع متى جنه شاشة المطار واذا ركبتي القطار ومشى فيج بالسلامه فتحي اذنج عدل لانه مثل الطياره يقولج و يعطيج انذار قبل مايوصل المحطه بعشر دقايق انه راح يوقف مثلا الحين بزلمسي اتوجهي عندي الباب لأنه دقيقه يتبطل ويتسكر تعلمت من كثر ماركبت القطارات سهله وايد مره قالنا الي يشتغل بالكاونتر لما كنا بسويسرا بنروح من جنيف إلى دبلوري في قطار بيحرك بعد دقيقه وكان بالسرداب تخيلي حجزنا انا وريلي عمري وحياتي ماركضت جذي جني داشه سباق جري اطالع الساعه مكتوب 3 ثواني ويحرك وانا اركض و ريلي ركب واول ماحطيت ريلي جان يسكر الباب ومشا وانا عند الباب عاد خليج دقيقه بالمواعيد خاصة القطار مافي يما ارحميني يمشي على التايم اما عن المصاريف اعتقد 3 آلاف مصارف لشخصين كافي من غير تسوق طبعا السوق يعتمد على شنو تبين تشترين ماركات ولاشغلات عاديه ودايما في الرخيص وفي الغالي بس مو أرخص من الكويت

 

[Om_Ksha]

انا كنت مفكره بفرنسا الحين غيرنا لميونخ بس من ردودكم ماتشجعت لها ..
اما زلامسي انشالله اكيد ..فمادري الصراحه وين نروح !

 

[زيزية سمره]

أنا صارلي أربع سنوات وره بعض أروح النمسا و المانيا... طبعا احنا نسكن بكابرون واهي أهدى وأحلى من زلمسي بوايد... حدها عجيبة وفي بيوت وااااايد و شقق تقدرين تسكنين فيها... احنا نتعامل مع بيت فيه ست شقق وكل سنة نروووحلة.. أمبية المكان و الطبيعة حدها عجيييبه... صج حق راحة واستجمام... ميونخ ما أحبها ... وسوقها صاير يلوع الجبد و مايسوى و ماله داعي تسكنين فيها اذا سكنتي بكابرون تقدرين تروحين لها زيارة من الصبح ليما بلليل لأنها قريبه عليها... العام رحنا يوربا بارك ... ونااااااسة بكل معنى الكلمة بس حسافة ما قدرت العب ولا شي لأني كنت حامل ... انشاللة أروح لها هالسنة اذا اللة كتب... أنصحج تأجرين سيارة ... لأن وايد أوفر حق الرحلات و الطلعات لأن التنقل هناك غالي بس اذا عندج سيارة تقدرين تروحين كل مكان وبكل وقت.

 

[cadbury]

زلمسي وكابرون بشهر 4 بس ثلج ؟؟؟؟؟؟ تسوى اروحلهن ولا اضل بميونخ