خلونا نستفيد ....الجدول الاعمال اليومية للمتزوجة حديثا او ما عندها خدامة :)

[mostaqilla]

مساء الخير زززكويتياتي حبيباتي شلونكم اولا كلمة حق لازم تنقال والله اني استفدت وايد من هالمنتدى والأقسام الي فيه بخبراتكم الي ما تبخلون فيها عأ؛د و انشالله اصير خبيرة وافيد صغيرونات المنتدى من هالخبرة عقب ما يكبرون <====كتبت قصة

المهم الموضوع اكيد الوحدة اول م تتزوج ما اتييب خدامة و هم تكون موظفة كل وحدة فينا تقول شلون تقسم وقتها بين مسئوليات البيت ومسئولياتها كزوجة ومسئولياتها حق عمرها مثل طلعة صالون الخ الخ الخ.....

انا والله ارد من الدوام اطبخ غداي بعض المرات و مرات اخذ من اهلي نتغدا انام العصر اقعد اذا عندي طلعة ضبطت طلعتي يا اغسل مواعين بالليل يا يوم ثاني اخذ مرة بالاسبوع خدامة بيتنا حق مساح بالديتول وغيره ....

ناطرة جداولكم يمكن اقلدكم لان جدولي شوي مو عاجبني :q8:

 

[ms_royality]

ممم... يوم كنت حامل ما كانت عندي خدامه .. ساعات اطبخ و ساعااات لا .. و التنظيف كل يومين تييني خدامه امي ..

الحين ما عندي خدامه بس بطاليه ما عندي دوام و لا التزامااات لاني مو بالكويت ...

انصحج ... تشترين غساله فول اوتماتيك .. غساله صحووون ... و مكنسه كهربائيه ... و الشغل وااايد بخف عليج و ان كثرتي ساعه تخلصين الشقه كلها .. و مسح الطاولات و هالسوالف بالاسبوع مره ...

 

[mostaqilla]

غسالتي فل اوتوماتيك بس غسالة صحون ما ادري اخاف ما تنظف
مشكورة على الرد

 

[ms_royality]

بالعكس عجيـــــــــــــــبه ... حتى الجدووور تغسلهم و بماااااي حاااااااار انصحج فيها ....

 

[dalal]

بالعكس عجيـــــــــــــــبه ... حتى الجدووور تغسلهم و بماااااي حاااااااار انصحج فيها ....

9ajaaa 100% :icon30:

 

[برونزية رشيقة]

إوانااااا بعد وياااااكم ... رديت خدامتي المكتب عقب اللسان الطويل يننتني !!!!!!!!!!! وشكيت عندها سوالف مغازل لين طحت عليها الله يستر على بناتنا ...

المهم جدولي بدون خدامة :

طبعااااا انا موظفة ..

الطبخ يا مطاعم يا أهله يا اهلي على ما اتيي الخدامة اليديدة يارب تطلع بنت حلال ..

3 الظهر اغسل مواعين وامسح المطبخ ..

أرتاح بو نص ساعة ..

5 اجابل إعيالي نص ساعة .. أحط لهم شاي وبسكوت .. وشيبس وأطالع معاهم التلفزيون وأسألهم عن يومياتهم

6 إلى 7 وساعات 7 ونص أبلش غسالة ... وأشريت منشرين حاطتهم بدار ولدي الصغير وأشر بغرفته ...


8 أنووم اليهال وأبلش أوتي ... فقط الملابس الضرورية ...

وإلا أموووووووووووووووووووووووووووووووووووووووووووووووووووت من الأوتي !


اكوي بدلة دوامي + ملابس المدارس حق اليهال + غترة حق ريلي أجهزها حق دوامه ...


مسح الأرضيات يوم وترك .

غسل الحمامات يوم وترك .... بس حمام اليهال يومياااااااااااااااااااااااااااا أفرك وانتوا بكرامة ( المرحااااض ) بصابون وديتول ومعقم حمامات ويوميا مسح أرضيته بمعقم ..

وبس والله يعطيني ألف عافية ... لحد ما توصل اليديدة يارب العالمين .

 

[برونزية رشيقة]

وينكم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ خلونا نآزر من بعض

 

[lo0ola]

آنا بالكويت ماسوي شي،بس لما سافرت مع ريلي بره
كنت أزهب شغل الغدا بالليل قبل لا أنام أو عقب ما أصلي الفجر
والضحى أطبخ الغدا
نتغدى الظهر،والمواعين حسب المزاج يا العصر أو بالليل

أما الهدوم من أسهل ما يكون الفل أوتوماتيك

أما الأوتي فالله يعافي راعي الأوتي هههه

 

[سعـ كوول ـوديه]

شووفي انا ماعندي شغاله وعطاليه بطاليه اجلس من النوم12 الضهر واطلع دجاجتي واولحم او اي شي حق الغدى وانقعها بماي بعدين اروح اسويالي حليب واشربه بعدين ياطويلت العمر ابدى اروح صوب غرفتي واجمع الملابس حقت امس واحطهم في سلة الغسيل وارتب سريري وبعدين اطلع الى دورة المياه اعزكم الله واغسلها بالديتول واخلص وامسح الصاله وارتبها وبعدين اروح اقط ملابسي في الغساله واخش على المطبخ وابدا في الغدى اركبه وانقع ارز وطلع للغساله واحطها شطف وتجفيف وارجع وارح الثلاجه واجهز اغراض السلطه وصحون التقديم بعدين ارجع حق الغساله وطلع الملابس وانشرهم واروح اركض اجهزلي ملابس علشان الشور وارجع للمطبخ وقطع السلطه طبعن حق نفرين انا وزوجي وطلع الدجاجه واحطها بالفرن واكب الرز واخليه يطبخ شوي وقصر عليه النار واركب بخور حق البيت واروح اخذلي شووور على السريع السريع يعني ماجلس اتفرك واحط حمام وخربيط لانو زوجي قرب على الوصول اطلع بسرعه على المطبخ اطفي على النار واخذ البخور واروح غرفتي واحط فيه معمول دوسري اصلي ومعها مسقي الامارت عود مشرب وبخر شعري وادور على غرفتي بالبخور واحطه بصاله واروح دورة المياه تكون فيها شوية مويه من بعد الشور وانشفها بالفوطه الخاصه وبعدين اشغل الفواحه واحط فيها زيت من زهوررررر الريف واااو يجنن او من نكتار الي موجود بعدين اركض الغرفتي البس بجامه او قميص بيت وانشف شعري بالاستشوار واحط عطر احيااانن احط رتوش اذا معي وقت ومرات يدخل علي زوجي وممايمديني بعدين يبدل زوجي وانا اروح اجهز الغداء انجب على قولتكم واغرف على قولتناا<<<فاضيه هذره هههه المهم بعدين نتغداء ونسولف شوي واروح اشيل غداي زوجي يروح ينام شويات وانا انطلق الى مطبخي واغسل مووويعينات مالت الغداء يااابنات نصيحه اغسلوو اول باول حتى ماتتراكم عليكم وتنسد نفسكم وبعدين اروح افتح النت ولا التلفزيون بس الاغلبيه اجهز حلا حق قعدت المغرب مع القهوه لانو قهوة المغرب رسميه عندنا وبعد ماخلص الحلا اطير على غرفتي يكون المغرب اصحي زوجي واروح اطلعلي درعه مرتبه ولا جينز مرتب واحط ميك اب خفيف واظبط شعري ويكون زوجي صحى ولبس علشان ينزل عند اهله وانا البس عباتي وملفعي والقط حلاي وطيااااااره تحت واجلس مع خالتي يالبى قلبها ونتقهوى ونوزع الحلا بينا وبين الرجال حمواني وا فديتهم وبعدين يجون بعض الواقات مو دايم زوجات حمواني طبعن العشاء نااادر ماسوي ياناكل من برا او نتعشاء خفايف خبز جبن او نتعشاء عند خالتي واذا عنديكنت معزومه اكنسل النزله تحت وتجهز وطلع وهذي هي يومياتي بنااات والله ترتيب البيت اول باول والله مايتعب ومايخذ منك ساعه على بعضها ودعولي ان الله يرزقني بالذريه الصااااالحه يارب

 

[الصابرة المحتسبة]

السلام عليكم
حبيت أسولف لكم إذا ماعندكم مانع:

أول ما تزوجت لاخدامة ولا شي لأني كنت ربة بيت جدولي كان: - الزوج ماكان يحب يتريق مبجر لأنه قاط قطية الدوام بس تمرة أو بسكوته وقلاس عصير.
- يبتدي مشواري: أشغل الغسالة وتكون يومين أو يوم وترك.
- أخم الشقة وأغير الفراش .
- خلصت الغسالة والخم والتنظيف والمساح طبعا أكون مطلعة الإيدام مبجر إن كان دجاج أو سمج أولحم الجود من الموجود,,,,,,, أتريق ولي خلصت أدش المطبخ وشغل الراديو وابتدي الطباخ ,, الطبق الرئيسي والسلطة والحلو .
- طبعا الساعة 11 كل شي خالص ,,, الساعة 12 متسنعه ومبخرة الشقة ومزهبة السفرة ماعلي إلا النجاب.
ولما ربي سبحانه رزقني بأول جاهل ماتغير علي شي كنت أول شي أتفرغ له وأسبحه ونومه بعدين أجابل البيت,,,,, وبعدين ربي رزقني بالثاني والثالث والرابع جبت الخدامة للبيت فقط.

ونسيت أقولكم : كنا نقعد العصر ونحط الجاي والقهوة ولازم هذي العادة والحلو والمكسرات والحمدلله,,,, وكان الحلو بشقتي إن تحتها صالون كنت أزرق لها وتسنع وأغير شوي بقصة أو إستشوار فصدقوني لاتقولون ماعندنا وقت نتسنع ولا نعدل بعمارنا ترى لي بغيتوا ترحون تسيورة ولا عزيمة تعرفون شلون تفرغون ترى الزوج أولى ويعل ربي يوفقكم ويحفظكم .

والسموحة .

 

[برونزية رشيقة]

السلام عليكم
حبيت أسولف لكم إذا ماعندكم مانع:

أول ما تزوجت لاخدامة ولا شي لأني كنت ربة بيت جدولي كان: - الزوج ماكان يحب يتريق مبجر لأنه قاط قطية الدوام بس تمرة أو بسكوته وقلاس عصير.
- يبتدي مشواري: أشغل الغسالة وتكون يومين أو يوم وترك.
- أخم الشقة وأغير الفراش .
- خلصت الغسالة والخم والتنظيف والمساح طبعا أكون مطلعة الإيدام مبجر إن كان دجاج أو سمج أولحم الجود من الموجود,,,,,,, أتريق ولي خلصت أدش المطبخ وشغل الراديو وابتدي الطباخ ,, الطبق الرئيسي والسلطة والحلو .
- طبعا الساعة 11 كل شي خالص ,,, الساعة 12 متسنعه ومبخرة الشقة ومزهبة السفرة ماعلي إلا النجاب.
ولما ربي سبحانه رزقني بأول جاهل ماتغير علي شي كنت أول شي أتفرغ له وأسبحه ونومه بعدين أجابل البيت,,,,, وبعدين ربي رزقني بالثاني والثالث والرابع جبت الخدامة للبيت فقط.

ونسيت أقولكم : كنا نقعد العصر ونحط الجاي والقهوة ولازم هذي العادة والحلو والمكسرات والحمدلله,,,, وكان الحلو بشقتي إن تحتها صالون كنت أزرق لها وتسنع وأغير شوي بقصة أو إستشوار فصدقوني لاتقولون ماعندنا وقت نتسنع ولا نعدل بعمارنا ترى لي بغيتوا ترحون تسيورة ولا عزيمة تعرفون شلون تفرغون ترى الزوج أولى ويعل ربي يوفقكم ويحفظكم .

والسموحة .

حبيبتي الصابرة المحتسبة ... أنا ألحين بدش الشهر الثالث بدون خدامة ..
الوضع لا يطاااااااااااااااااااااااااق لا يطااااااااااااااااااااااق لا يطاااااااااااااااااااااااااااااااااااااق ..
الصبح توصيل للمدارس وأداوم أرد البيت وشغل وكرف البيت ناطرني .. وإذا ما غسلت غسالة يومي ( جبال من الهدوم ) تنطرني ....
نسيت الزيارات والمواجيب وكل الحياة الإجتماعية .... وإنسي شي اسمه صالون ....
ألحين أنا سخونة ووإنفلونزا والكحة نازلة بصدري ... طبيب مو قادرة أروح ..
الخدامة على قولت الدكتورة ناعمة الهاشمي ( رحمة من الله حقنا والله مسخرها لنا) ومثل خدمة الأنترنت يا تسيئين إستخدامها أو تعرفين تستخدمينها صح .......

دايما تقووووووووووول : الخدامة وظيفتها الكرف بالبيت وإنتي وظيفتج :

1- تربية العيال

2- تتسنعين حق زوجج بكل الطرق الممكنة ( بلله وانا مهدود حيلي من الكرف ومحد يمسك أللي عندي بالبيت شلون أروح صالون أعدل نفس ي)

3- تسوين أكلة معينة يحبها زوجج من فترة ليه فترة ..

عندها جملة قووووية دايما تكررها : الحياة تغيرت والزمن تغير والمسؤولية غزدادت على المرأة ألحين .... إذا ما ريحيت نفسيتها شلووووون راح تتحمل ضغوط الحياة اليومية ؟؟؟؟؟؟ تضرب مثل بأمهات موظفات وبنفس الوقت عندها إعيال 3 او 4 أطفال وما عندهم خدم من كثر الضغط النفسي من شغل البيت يلجئون لضرب وشتم وسب إعيالهم .... من التعب والإرهاق النفسي والجسمي بدوووووووووون خدامة !!!!

وشغل البيت من طبخ وتنظيف ومسح وغسال بروووووووووووووووووووووووووووحه ضغط يومي .. والله سخر الخدامة هذي شغلتها بسسسسسسسس مو حق تربي إعيالج هذي وظيفتج كأم ...ومو حق تسوي كل شي متعلق بزوجج هذي مهمتج كزوجة ...

ملاحظة : راح أدور المقال وانزله حقكم بالقسم .

 

[ثلاثينية]

بتكلم عن حالتي بالوضع الحالي
انا غير موظفه ... وعندي بيبي عمره 3 اشهر... وريلي متقاعد وشوفوا جدولي
اقعد الساعه 9 الصبح ( يا حلات النومه بس للضروره احكام ) انظف الصاله واسنعها واجهز طاوله لزوجي عليها الجرايد ( اجباري )
اطلع الايدام واشوف شنو بطبخ.... احط الملابس بالغساله الاوتوماتيك.... انا جهز للطبخ اغسل مواعيني ال بأول وانظف بعد
اطبخ واحط الاكل بالسخان واجهز طاوله الاكل
انظف غرفه ولدي .. وبعدها انظف غرفتي والحمام الله يعزكم وبعدها ارتاح اشوي واتريق
وهالفتره يصحي وهابي من نومه اقعد اسبحه والعبه واجابله لما ينام ويكون وقتها صار وقت الغدا
عيالي يدشون وكل شي جاهز وبعد ما نتغدا يكون غسال الصحون بالتناوب على بناتي
احاول اغفي اشوي ... وهذا على حسب اخر العنقود
العصر اجهز الجاي وملحقاته .... وبعد الجاي احاول احوس على الخفيف بين تنظيف وترتيب اي شي جدامي
وبس طلع زوجي من البيت بعد صلاة العشا يا اكوي او اذا ما عندي شي ادخل المنتدي اللي ما استغني عنه
ويمر الوقت ويتعشون عيالي كل واحد على حسب مزاجه وانا اغسل مواعين العشا
وقبل النوم لازم ابدل كرمكم الله زباله كل غرفه وكل حمام
وارتب الصاله على السريع واتأكد من المطبخ مافيه ولا شي واجمع كل الملابس الوصخه واجهزهم للغسيل لثاني يوم
وطبعا شاور قبل النوم

 

[الصابرة المحتسبة]

حبيبتي الصابرة المحتسبة ... أنا ألحين بدش الشهر الثالث بدون خدامة ..
الوضع لا يطاااااااااااااااااااااااااق لا يطااااااااااااااااااااااق لا يطاااااااااااااااااااااااااااااااااااااق ..
الصبح توصيل للمدارس وأداوم أرد البيت وشغل وكرف البيت ناطرني .. وإذا ما غسلت غسالة يومي ( جبال من الهدوم ) تنطرني ....
نسيت الزيارات والمواجيب وكل الحياة الإجتماعية .... وإنسي شي اسمه صالون ....
ألحين أنا سخونة ووإنفلونزا والكحة نازلة بصدري ... طبيب مو قادرة أروح ..
الخدامة على قولت الدكتورة ناعمة الهاشمي ( رحمة من الله حقنا والله مسخرها لنا) ومثل خدمة الأنترنت يا تسيئين إستخدامها أو تعرفين تستخدمينها صح .......

دايما تقووووووووووول : الخدامة وظيفتها الكرف بالبيت وإنتي وظيفتج :

1- تربية العيال

2- تتسنعين حق زوجج بكل الطرق الممكنة ( بلله وانا مهدود حيلي من الكرف ومحد يمسك أللي عندي بالبيت شلون أروح صالون أعدل نفس ي)

3- تسوين أكلة معينة يحبها زوجج من فترة ليه فترة ..

عندها جملة قووووية دايما تكررها : الحياة تغيرت والزمن تغير والمسؤولية غزدادت على المرأة ألحين .... إذا ما ريحيت نفسيتها شلووووون راح تتحمل ضغوط الحياة اليومية ؟؟؟؟؟؟ تضرب مثل بأمهات موظفات وبنفس الوقت عندها إعيال 3 او 4 أطفال وما عندهم خدم من كثر الضغط النفسي من شغل البيت يلجئون لضرب وشتم وسب إعيالهم .... من التعب والإرهاق النفسي والجسمي بدوووووووووون خدامة !!!!

وشغل البيت من طبخ وتنظيف ومسح وغسال بروووووووووووووووووووووووووووحه ضغط يومي .. والله سخر الخدامة هذي شغلتها بسسسسسسسس مو حق تربي إعيالج هذي وظيفتج كأم ...ومو حق تسوي كل شي متعلق بزوجج هذي مهمتج كزوجة ...

ملاحظة : راح أدور المقال وانزله حقكم بالقسم .

ياقلبي يالقطوة الله يعين الموظفات ,,, وألف لاباس عليج وديري بالج على نفسج ألزم ماعليج صحتج والبيت ملحوق عليه,,,,
يعل ربي يسخرلج الخدامة اللي تبرد القلب عاجلا غير آجلا يارب.

 

[برونزية رشيقة]

آمين يارب العالمين .....

يزاج الله خير حبيبة قلبي ( الصابرة المحتسبة ) .

 

[*هبوبه*]

قطوه ليش ماتشترين غساله اتوماتيك وتريحين عمرج ولا راح يتكود الغسيل

 

[برونزية رشيقة]

قطوه ليش ماتشترين غساله اتوماتيك وتريحين عمرج ولا راح يتكود الغسيل

عندي بس حسبي الله عالخدامة إللي كاسرتها ... ويبنا تصليح غسالات جم واحد قالوا نفس الكلمة يبيلها قطعة غيار ب 70 دينار وشغل إيدهم إللي يبي 20 دينار وإللي يبي 15 دينار ... يعني بيطلع تصليحها 90 دينار ؟؟؟؟ صارلها 3 سنين خربانة وحاطينها ديكور في غرفة الغسيل .. حتى الوكالة مالتها قالوا لنا نفس الحجي قطعة غيار منكسرة وتكلفكم أقل شي من 60 إلى 70 دينار :0bee2e8d89:

فشرينا الغسالة العادية أم حوضين .. واااااااااااايد عالخدامات هذي .. وشدعوة مو كل شهر ياييني : ماما هدا غسالة كراب .. مادري شسوون فيهم ؟؟؟؟؟ :eh_s(14):

 

[*هبوبه*]

انزين صلحيها وانتي استخدميها اما خدامتج بس تستخدم غساله ام حوضين

ام حوضين متعبه حيييييييييييل صلحيها وفري على نفسج وقت الغسيل لان عندج عيال الله يخليهم لج

وان شاء الله تجيج خدامه سنعه وترتاحين من هم شغل وتنظيف البيت

 

[أميرة]

انا عن نفسي أول ماتزوجت كان دوام زوجي شفتات وكنت احب دوام الليل


--طبعا اللي زوجها دوامه شفتات يتخربط يومها عدل--

من الساعه 9 المسا يروح الدوام:: ابلش بالتنظيف اول شي اغسل الملابس عشان يمديهم ينشفون واقدر اكويهم

عقبها اغسل المطبخ والحمام وانتم بكرانه وبعدين امسح ارضيات شقتي والخم وغسيل الحمام كان يوم وترك بس التنظيف الكلي وقت دوام اللليل... ويكون شغلي خالص على صلاة الفجر اسبح واصلي وانطر سي سيد اكون مزهبتله الريوق نتريق وينام

طبعا هذا كان شهر 7 وشهر8

عقبها داومت بالجامعه وكنت توني حااامل وتعرفون الوحام شلزن اقشر ولله الحمد اقوم الساعه 6 الصبح وانظف اللي اقدر عليه


بس الحمدلله الحمدلله ان دوام زوجي تعدل صار صباحي فقط>>>>>>>>>>>>> اهني ذقت الراحه


وتغير علي الجدول :: الظهر ابلش شغل البيت تنظيف وغسيل هدوم والمغر ب انزل عند حمولتي

ومن صرت عندي خدامه ارتحت شوي ومعلمة خدامتي ماتصير الساعه12 الظهر الا التنظيف خالص مايكون عندها الا بنتي وعاد الاوتي اخليها تسويه المغرب

 

[المتفائله دائماً]

دام نتي اللي تشتغلين يا الغاليه وفري على نفسج الوقت والجهد
الله يسلم غسالة المواعين والفل اتوماتيك للملابس
وسخان الاكل والاوتي العمودي البخار والميكرويف

 

[المتفائله دائماً]

وكل شي يوفر الوقت والجهد
والشغل لو بيذبح
كان ذبح الخدامات
لما بيسافرون ديرتهم يطلعون يهبلون