خواتي انتو مثلي والا لا ؟

[ليالي نجد]

خواتي الطيبات من وفاة حبيبنا وابونا عساه بالفردوس الاعلى وانا ماحس للدنيا طعم وماني قادره اتفاعل مع اي تغير

مالي خلق عزايم ولا طلعات حتى عيالي مالي خلق لهم واتعوذ من الشيطان بس ارد ابجي واقول اشلون الكويت اتصير من غير جابر .........احس اني فاقده ابوي مع ان ابوي عايش اسم الله عليه بس فعلا احس فجوه كبيره بحياتي صارت وامي اتقول تعوذي من الشيطان خلاص ماينفعه الا الدعاء الحين بس ماقدر احط كحل والا حمره او اي شي

قلبي احس فيه فراغ كبيييير والله وللحين مو مستوعبه وفاته لكن لله ما اعطى ولله ما اخذ

انا لله وانا اليه راجعون

سمعوا قصيدة سالم سيار فيه اتقطع القلب

http://www.6rp.net/she3r.php?rp=sayar

 

[أوركيد]

مشاركة: خواتي انتو مثلي والا لا ؟

ليالي نجد...الله يمسح على قلبج وقلوبنا ...

والله آنا بديت اوسوس بنفسي...حالتي مثل حالتج...بس آنا البيت كله جذي صج مو قادرين ننسى وجنه اليوم متوفي الله يرحمه..

بس من رحت الدواام شفت الناس شيء ثاني ...الكل قاعديسألني شفيج ؟؟؟

متغيرة ؟؟؟منتي اللي عرفناج!!!

معقووله مو عارفين ليش؟؟؟

قمت اوسوس ....آن احنا نبالغ بالحزن وهذا شيء مو زين ...بس والله آنا مو قادرة ارد لطبيعتي ...

آخرتها اليوم رفيجتي بالدوام تو داقه علي وتسألني ...شالسالفة أحد مضايقج بالدوام ؟؟؟؟

اقول لا والله ماكو شيء ..بس نفسياً تعبانة...

أكو معانا مدرسة ذاك اليوم مداومة وبكامل زينتها ....تتوقعوون شسويت يوم شفتها ؟؟؟؟

رحت لصفي ومت من البجي....

احس العبرة لي الحين خانقتني ...

وعلى اقل شيء تطلع البجيه ...

نجووده ....تسلمين خليتيني افضفض اللي بقلبي..

عسى الله يرحم ابونا برحمته ويرزقه الجنان وشوفة الرحمن ...

يارب العالمين ...

ويجمعنا معاه في الفردوس الأعلى

 

[شادية]

مشاركة: خواتي انتو مثلي والا لا ؟

فتره وتعدي تعوذي من ابليس

 

[أم جوري]

مشاركة: خواتي انتو مثلي والا لا ؟

الله يرحمه تصدقون لما اسمع الاخبار او اقرا شي عنه على بالي انا حلمانة او انه يتهيا لي انه مات ...
بس والله من يسولفون عنه تجيني البكية

الله يرحمه

 

[ليالي نجد]

مشاركة: خواتي انتو مثلي والا لا ؟

الله يصبرنا على فقدان كل غالي وانا لله وانا اليه راجعون

وانا اقول لكل وحده وواحد ما تأثر بموت اميرنا الغالي انه مايستحق يكون كويتي ولا يشيل الجنسيه الكويتيه
وفعلا اوركيد كذا وحده مثل شكواج بالدوامات فيه حريم اعوذ بالله ما تستغني عن الماكياج والكشخه حتى باشد الاوقات حزن واسى وفيه مدرسات عمرنا ماشفناهم بدون مكياج لكن بوفاة ابونا الغالي ما حطوا ولا فتفوته مكياج احتراما لهذا الرجل العظيم
ودج كل وحده حطت ماكياج ولا احترمت عزا الكويت كلها يصيبها حكه وحساسيه بوجهها ولا تقدر تحط مكياج عقاب لها

طيب الله ثراك يابو مبارك ..............منساك ابد الدهر يابوي الغالي

 

[أوركيد]

مشاركة: خواتي انتو مثلي والا لا ؟

ليالي نجد ...آنا عندي قناعة تامة الحين انه عندنا جيل وناس ما يفرقوون بمشاعرهم وما يعرفوون شنو لازم تصرفاتهم تكون محكومة وملتزمه...

ماادري صار عندنا البعض عنده تبلد باحاسيسه ...ولا بالله اكو ناس يروحون الدفان والتليفونات بايدهم ....الكل يبي يصور ويدز لغيره...

ليش مو مستشعرين اللحظات اللي اهما عايشينها؟؟؟؟؟

اتوقع اهما زعلانين ومتضايجين ....بس للأسف اختلطت المشاعر واختلطت التصرفاات ...

والله يوم كنت اشوفهم ....وااااااي يتقطع قلبي من القهر ...يعني الموقف مهيب وبعض الحاضرين لاهي ...شي يعور القلب...



ما احب اتذكر صراحة

 

[قهوة عربية]

مشاركة: خواتي انتو مثلي والا لا ؟

السلام عليكم

حبيباتي ..ذكروا الله وصلوا على النبي

الحين مايفيد البكي والحزن على شيخنا ...........مايفيده إلا الدعاء والرحمة له

ومثواه الجنة والله يرحمه برحمته

وبعدين يا أخواتي ترا مايجوز تحزنون على الميت أكثر من 3 أيام

وبعدها تستمر الحياة طبيعية

وفي حديث فيما معناه عن الرسول صلى الله عليه وسلم أن المرأة لايجوز أن تحزن على المتوفي أكثر من 3

أيام حتى أبوها إذا توفي ....ترجع تتمكيج لزوجها وتتزين له بعد 3 أيام فقط من الوفاة ( إذا كانت متزوجة )


فقط الزوج تمتد فترة العدة والحزن 4 أشهر و 10 أيام ...وسألوا فيها المشايخ

وتجديد الحزن ليس من الإسلام

الله يقوي قلوبكم وادعوا أن الله يخفف عليكم ويصبرنا أجمعين

لكن لابد من مزاولة الحياة طبيعية

 

[أوركيد]

مشاركة: خواتي انتو مثلي والا لا ؟

قهوة عربية ...آنا ما اتكلم عن الحزن اللي الوحدة تلبس اسود وتهمل بنفسها ...لا هذا ما يجووز بدينا

آنا اتكلم بشيء تحسينه بصدرج ...تحسين لي الحين مو قادرة تردين لطبيعتج ...انتي ما تتعمدين هالشيء ...بس شيء بداخلج..

ما اتكلم عن المظاهر...ولو انه المبالغة بالزينة تعوور القلب ...

اتكلم عن احساسج الداخلي....

ان شاالله تكونين فاهمتني...

الله يرحمه برحمته الواسعة..

 

[anime]

مشاركة: خواتي انتو مثلي والا لا ؟

والله انا نفس الحاله بس صراحه مو بس انا البيت كله اهلي واهل ريلي نفس السالفه والله اذا قعدنا تقولين طرمان مالنا خلق نتكلم واذا تكلمنا باليالله والله صج تحسن في فراق والله مااتخيل ان صج مااات مع ان الموت حق والنعم بالله لله مااعطى ولله مااخذ بس والله من وعيت على الدنياااا وحنااا شيخنااا جابر مو معقوله في يوم وليله ننساه الله يغفرله ويرحمه ياااارب
اه يااا الدنيا الله يعين ويصبرنا على فراقك
ان لله وان اليه لا راجعون
ان القلب ليحزن وان العين لاتدمع وانا على فراقك يااااا بابا جابر لمحزونون​

 

[bambena]

مشاركة: خواتي انتو مثلي والا لا ؟

هذا كله بصوووووووووووب واللي سووا عرسهم الخميس صوب ثانيييييييي وللاسف وايد يقولون الله يرحمه توفى ونحبه لكن عرسنا حرام نكنسله ونخسر فلوس!! عفيه اوادم صراحه

 

[الحياة]

مشاركة: خواتي انتو مثلي والا لا ؟

ان لله وان اليه راجعون
حبيبتي تعوذي من ابليس وذكري ربج ..
اللهم لا اعتراض واكيد الله ما يسوي الشي الا وفيه خيره
اللهم اجعل افراحنا واحزاننا خيرة لنا

المهم الحزن فوق ال3 ايام

صج اهوه غالي علينا بس البجي يا حلوة مو زين له
فإذا تحبينه حاولي ما تبجين لانه البجي اللي عرفت عنه يعذب صاحبة بالقبر....

اللهم وسع له قبرة وجعله روضة من رياض الجنة

اللهم أسألك حسن الخاتمة

 

[omneyaty]

مشاركة: خواتي انتو مثلي والا لا ؟

اللهم اغفر لعبدك جابر الاحمد واعفو عنه واسكنه دارا خيرا من داره


اللهم آمين

 

[QUMAR]

مشاركة: خواتي انتو مثلي والا لا ؟

انا معاااااااااااج قلبا وقالبا
لأني كنت أتوقع اني حساسه زياده عن اللزوم لكن طلعت مو بروحي
واللة العظيم كنت قبل شوي قبل لا أشوف موضوعج أسولف حق ريلي أقوله فيه غصه في بلعومي لي الحين ما راحت وأحس قلبي أنكسر مو متخيله انا أميرنا توفي اللهم لا أعتراض علي حكمك
ومثل ما قلتي فيه ناس يوم رحت الدوام اللي لابسه مخصر ولبس صراحه يضيق الخلق في ظل هالظروف اللي احنا نغيشها مادري العالم مات عندها الأحساس والا شنو انا ما طلعت من بيتي من يوم الوفاة الا لبيت أهلي او الدوام بس أحس ما أقدر ما راح أتحمل لأني لازلت أبجي اذا قريت عنه خبر أو شفت صورته
واااااااااااااااااااااااااي أحس طلعت شويه من اللي بقلبي وسامحيني حبوبه علي الاطاله
عسي ربي يغفر له وينور قبره
بعدين تصحيح لمعلومتج المقصود بأن الميت يتعذب عند بكاء أهله عليه مو عذاب معنوي القصد أنه يتأثر لبكائهم

 

[طير الحب]

مشاركة: خواتي انتو مثلي والا لا ؟

ذكروا الله وصلوا على النبي

القلب ليحزن وان العين لاتدمع وانا على فراقك يااااا بابا جابر لمحزونون

 

[ليالي نجد]

مشاركة: خواتي انتو مثلي والا لا ؟

عساها اخر الاحزان يارب ويسكن شيخنا فسيح جناته ويحشره مع الصالحين والاخيار

مشكورين خواتي على احساسكم والحمدلله اني لقيت احد مثلي وهذا مو اعتراض لا سمح الله انما حزن كفيل الزمن ينسينا بس ما ننسى جابر الخير
بس خواتي والله في بعضهم عديمين احساس ولا حتى مجامله قدام الناس ماهمهم حسبي الله ونعم الوكيل

واللي مسوي عرس وطقطقه وتدمبك والله اشلون استانسوا مادري ؟؟

الله يصبرنا على فراق ابونا جابر ويطرح الخير والبركه في كل من يمسك الحكم بعده ان شاء الله فيهم الخير والبركه ال الصباح عساهم ذخر

 

[**الثريــــا**]

مشاركة: خواتي انتو مثلي والا لا ؟

الله يرحمه برحمته


أنا كان عندي هالاحساس أول الأيام


ألحين أحس رجع لي ما أدري ليش


اهو فقدته شوية ؟

الله يرحمه وتحقق رغبته بتطبيق الشريعة الي في كل خطاباته يبي يطبقها وحاط لجنة لها


نصيحة لج إختي حاولي تسوين لج برنامج في اليوم

يعني قراءة جزء من القران أذكار الصياح
راح تشوفون نفسيتج تحسنت



جااااااااابر رجل والرجال قليل


الله يرحمك

 

[صاحبة المعالي]

مشاركة: خواتي انتو مثلي والا لا ؟

مو بس انتي يا الغاليه اللي مالج خلق شي
انا من توفى ابونا الله يرحمه ويغفر له
وانا لابسه اسود ..مالي نفس اغير ملابسي
وحتى موبايلي مخليته سايلنت وهزاز
مافيني اسمع رناته واغانيه
طلعات مالي خلق اطلع
واستغرب من الناس اللي يسوون حفلات ولاجنه صاير شي
عيل ثالث يوم بوفاته الله يرحمه
وحده من الجيران مسويه استقبال ؟؟؟؟؟؟ لا اله الا الله
صج لي قالت ايديده اللي يروح ..]روح من عمره
بس هم يبقى ابونا اللي مات مو اي احد
هذا اللي فتحنا عيونا على خيره وتربينا بعزه
الله يرحمه ويغفره له يارب العالمين