خوات زوجي. وطليقته

[ايامناحلوه]

السلام والله مااحب اكتب مشاكلي الابالمنتدي هذا احس براحه الله يخليكن

على طول أبدا بالسالفه

انا متزوجه من مطلق والحمدلله وعيله زوجي يحبون الجمعات وكلنا نجتمع وطليقته تحضر العزائم وانا برضوا موجوده

وعادي اسلم عليها واجلس بس وش اللي يقهرني ان اذا اجتمعوا البنات يقعدوا عندها وسوالف وضحك والله اصوات عاليه وضحك وفرفشه

وانا يطنشني والله مره كنا جالسين وحده يميني والثانيه يساري اللي يمنيي جالسه تسولف مع اللي جنبها واللي يساري كنت انا وياها نسولف ودخلت طليقته المجلس وشوي وقامت من عندي وانا ضليت اططق بالايفون ومع مره أخوهن الثانيه ألاحظ تعاملهن غييييير احترام وانا زوجه أخوهن الكبير

والله كرهت الجمعات بسبهن ومره صارت جمعه بنات ويتصلن عليها يله تعالي ورفضن يحطن العشاء الايوم جت وجت الساعه 10 ونص ويوم شفهنا ضحك انا على طول بعد العشا طلعت ماقدرت أتحمل

وفوق هذا قبل الطلاق متكلمه عليهن حتى على أمهن وتعاير باخوهن اللي زوجه اول ضعيف شخصيه مو رجل وفوق هذا يركضن وراها ولا مسويات قروب بالواتس ماضفني عشان موجوده الطليقه ومره أخوهن الثانيه معهن بالواتس البلشه بعمري يعني السوالف مشتركه ومره أخوهن اكبر مني ويضحكن معها والله حتى طليقته تستأنس يوم تشوف أنهن خسراتني طيب يحترمن أخوهن والله لو يبغنا وهودوامه يطلع ياحرام.. بالله وش تفسرون هذا

 

[فلنتينو]

مالج شغل فيهم طنشيهم
وبعدين ليش طليقته تحظر عزايم بالعاده
تكون العلاقه متوتره
اهم شي زوجج وبس

 

[Model Look]

طنشيهم ولا تحترين

مالج شغل فيهم خلج علا طبيعتج وتصرفي باللي يرضي ضميرج

لا تقولين لريلج عن السالفه

 

[M!ssq89]

مالج شغل قطيعه

تلاقينهم خايفين منها ،-

مالج شغل باحد كلش اهم شي ريلج مالج شغل
وطليقته شكو ؟؟ تكون معاكم ٢٤ ساعه اهوا مطلقها من زمان ولا توه

ميخالف يمكن يحبونها وانها زينه معاهم بس ريلج كارهها ولا يبيها

انتي خليج على طبيعتج ولا تبينين لاحد انج متضايقه

وانتي مو مجبوره تروحين عزايم تغثج

اهم شي راحت بالج والله

انا اخوي مطلق مرته ومتزوج وحده ثانيه

وعلاقتنا بالاولى احسن من الثانيه لانها ما ضرتنا وزينه معانه وايد

بس ما تيي بيتنا احنا نروح لها

 

[محتارة وبصيح]

اكيد متعودين عليها خو عادي انتي طلعي واستانسي مو لازم تروحي معاهم

 

[مارشميلو..]

مالك شغل اهم شي علاقتك بزوجكاما خواته واهله عادي لاتعطينهم هذيك الاهميه عامليهم بأحترام
لكن لا ترجين محبه وغيره ان حصلت اوك ماحصلت لاتصير اكبر همك
بس مستغربه شلون مطلقه من اخوهم وعادي عينها قويه تدخل البيت المفروض خلاص تتواصل معاهم اذا تحبهم بس ماتجي البيت

 

[فوفو22]

ما يجوز تدخلين بعلاقات حمواتك بالطليقه

الموضوع باختصار شعرتي بالغيره من الطليقه

ولو هالبنت ما كانت طليقه زوجك

جايز الامر عادي عندك

حبيبتي

حتى تتجاوزي هالمشاعر

يجب ان يكون لديك ثقة كبيره بنفسك

وإلا سيكون سهل استفزازك من الجميع

فوفو

 

[بخـــارى]

الله يعينج
وبعدين صج رزة ويهه مطلقه من ولدهم ماله داعي رايخه وراده عليهم

 

[زوجة عزيز]

واهي ليش اتروح لهم تقرب لهم والا شنو علاقتها فيهم بالضبط وانا اقول لا اتروحين لهم والزم ماعليج راحتج

 

[gannan99]

ولاتهتمين ضحكي ولاتبين قهرك

 

[مالك غيري]

طنشيهم بس ولا عليك

ينخاف منهم حمواتك بس

مو لازم تروحين عزايمهم كل مره مرات روحي ومرات لا طلعي مع زوجج روحي للاهلج جذي يعني
وو
هاذي تبي تبين انها حليوه وجذي اهيا لما شافته طلقها ومافي امل ترد له قالت الف على اهله
طنشيها وخلك واثقه من نفسج حتى لو ماحد فيهم كلمك مو لازم ولا تبينين انك مقهوره
خليك عادي اوكي
سؤال: طليقته كانت تقرب لهم؟؟؟ اشوفها مو فاجه كل عندهم ؟؟

موفقه في حياتك يارب

 

[pusy cat]

كيفهم يمكن يحبونها وماكانو راضين على الطلاق

شعليج منهم اهم شي زوجج

 

[اينااس]

لا ترحين الباب الى يجي منه الريح سده وستريح

 

[لـــيل]

كبري عقلك ولا تزعلي وتضايقي كذا راح يحسون اللي يطنشك طنشيه لاتكوني حساسه يعرفون نقاط ضعفك هي خليك واثقه فيهم واحسن خلي علاقتك فيهم رسميه خلك بعيد حبك يزيد الميانه الزايده تتعب وتققل القدر اهم شي زوجك وبس والباقي طقق جدي

 

[ماحب اتدلع]

اي وحدة مكانج بتلعب فيها الغيرة ومارح تنسى ان هالانسانة كانت زوجة ريلها قبل
بس الي قلتية اعتقد انهم متعودين عليها .. طبعا لم انج تكوني متعودة تسولفي مع وحدة رح تضحكين وتتغشمرين معاها اكثر من انج تضحكين مع وحدة توج تتعرفين عليها

 

[الوفا غالي]

ماعليكي منهم اهم شي زوجك ولا تروحين جمعاتهم كل مره
ولا رحتى سولفي مع الموجودين
اهم شي انبسطي وطنشي...}؛

 

[!الجادل الصعب!]

اشوف ان انتي مدخله روحج بعلاقات ماتعنيج ..
انتي خلي لج حياة وعلاقات ورفيجات ليش رابطه نفسج
فيهم ..
تجمعو مع بعض .. روحي لمجموعه ثانيه .. يمكن من كثر
ما انتي متحسسه من الموضوع الناس نفرت منج ويتوترون بقعدتج
اذا هي من الاهل .. انتي ملزومه تعايشين معاها ..
خليج ريلاكس عشان ماتصيرين الزوجه الغيوره ..

 

[ايامناحلوه]

مشكورات بنات

طليقته بنت خاله والبلشه هم خلوه يطلقه لانها جننت تجنن وهو ياحرام يقول لا اصبر المهم خلاص طلقها وصارت مشاكل بسبها وقالت لهن وععع والله مو خساره على اخوكن
يعني السالفه واضحه بس هن مدري ليش قامن يتلزقن فيها وشلون اكون لي مجموعه ثانيه والبنات يصيرين مع البنات والحريم الكبار مع بعض يعني بس مجموعتين بالمجلس ومرات عزايمهم مااروح كثير اكون مسافره انا مااروح عمداً الا بيت اهله احضر

وتصير عزيمه بيت طليقته انا بعض مرات اروح اقول عشان مايقولون منقهره منها وبعض مرات لا وشرايكن اروح مرات ومرات
( ومره قلت لزوجي عن خواتها قلت ليش خواتك مدري يوم يشوفنها زين ماينهبلن من الوناسهويضربن لها احترام لان هو يشتكي من أبوها انه مايحترمه )
مره رحنا لعرس واخته معاي وهم برضوا حاضرين العرس تدرون وين راحت أختها لطاولتهم طيب والله قعدت عند الحريم الكبار طفششششت المفروض تكون معاي وسوالف وضحك والله اسولف واضحك مو رسميه معهن وتعليق فللله بس يوم يشفهنا ينسحبن وراءها المفروض يحسسنها بس ناس مالها كرامه والله غريبات ..
هذا حنا بس سلام عليكم السلام قطعنا بنات خالي بسبب أنهن ضربن جدتي ام ابوهن يوم يجنا للبيت نسلم ونقهوهين وسوالف سطحيه عشان جدتي حتى هن استحن على وجيهن ...

وهذا انا ماكملت سنه وهن معها وشلون بعدين والحمدلله متكشخه ولابسه واناقه وتسريحات شعر يعني مدري ليش متفشلات مني حتى طلقيته قامت تسوي مثلي من الكشخه يعني محترمه واساعدهم يوم يصير عندهم العشا ومره أخوهن بنص ترتيب السفره تدخل المطبخ انا مااقارن حالي بحالها وكل واحد وله شخصيه وبرستيج الحمدلله عقلي اكبر من عمري ولا فوق هذا محترمه خواته اخلي الكبيره تركب قدام بالسياره ومره أخوهن الثانيه مستحيل تخلي الكبيره تركب قدام صارت هوشه ..
والله أني عجزت افسر حركاتهن .. نسيت اقولكم حتى انا اصيرلهن !!

 

[جديده 1]

خليهم يضحكون و خليهم يسوون قروب بالواتساب .. و انتي عيشي حياتج و سعادتج مع زوجج ترى مو واقفه عليهم

 

[PuPa^^SWeeT]

يمكن اهم علاقتهم قوية ويا بعض


وانتي يبين على ويهج انج متضايقة من جذي باعدين عنج


عندج حلين يا انج اتطنشين و تبتسمين و اتصكين عليها


ولا تنسحبين من هاليمعات شوي شوي ماتيين الا وين وين


الزم ما على الانسان راحته


بس تقدرين اتقوليلهم ليش تعطونها اهتمام لأنه علاقتهم ببعض و كيفهم