خيانه زوجي

إنضم
30 أكتوبر 2010
المشاركات
8
مستوى التفاعل
0
النقاط
0
السلام عليكم ورحمه الله وبركاته


انا متزوجه من سنتين ونص ومن اول الايام وانا اشك بزوجي طحت عليه كذا مره يا يطلعني انا

الغلطانه او انه البنت اهي اللي ناشبه له واهو مسكين ماله ذنب قبل فتره طحت عليه يكلم وحده بالمسن

وكلام حب وغزل ولما واجهته نكر مع انه البنت تعرف عنه كل شي بس حلف على المصحف انه هذي

وحده تبي تخرب زواجنا ومسك المصحف وحلف انه ما يكلمها ولا راح يكلم احد غيرها المهم عديتها

الفتره اللي طافت من شهر خمسه وريلي متغير يعاملني باسلوب جاف واذا رحت زوراة لاهلي ما

يجيني ويقولي نامي عند اهلج مافي بينا حوار مع انه زوجي من النوع ما يسكت ويراعيني ويهتم

بمشاعري وما يقصر بالمصروف الحين كل شي تغير ما يبي يعطيني اي شي ودايم يتحجج ما عنده

ويطشر فلوس من كل صوب الا علي طلعات ما طلعنا من فتره طويله والا قبل نطلع بالاسبوع مرتين

او ثلاث وبأي حزه امس يعني طلعني طلعه العيد واهو مبوز وما يحاجيني وداني سينما ومطعم وطول

الوقت يتثاوب حاولت اسوي جو بس ماكو فايده رجع البيت حط راسه ونام جاني فضول زوجي

متغير علي حيل مسكت التلفون جيكت على الرسايل والا كل شي ممسوح الوارد والصادر دخلت على

السجل والا في مكالمات فيديو لرقم معين مده نص ساعه ومكالمات صوتيه فتره طويله صادر ووارد

ومسجات ورقم ثاني نفس الشي دقيت على الارقام والا يطلعون لي بنات سويت نفسي غلطانه وسديته

من امس للحين وانا شابه بقلبي النار مو عارفه شسوي ادري بزوجي يخوني مو بس بالكلام لا حتى

بالعلاقه لانه مقصر من هالناحيه صار له فتره بنات والله تعبت من هالريل لا هو صوب واهله صوب

ثاني قبل لا اعرف هالعلاقات الي عنده كنت اقول اتحمل اهله وبلاويهم علي عشانه بس الحين زهقت

خصوصا بالفتره الاخيره كل كلمه والثانيه يهددني بالزواج واهله مشجعينه على هالشي وطايحله مدح

ببنات خلق الله جدام اهله واهم مستانسين اي هذي حلوه لا هذي جيكره الله لا يوفقهم لو انا مقصره معاه

بشي والا انا شينه اقول من حقه بس حسافه ضيعت من عمري سنتين بالقهر والبجي والحسره الحين

اللي ابيه اواجهه بارقام البنات والا اشتري جهاز تنصت واحطه بسيارته واسجل مكالماته وحزتها

يكون عندى دليل هالمره صج بخربها طقت جبدي منه ابي دليل قوي ضده علشان ما ينكر ويطلع نفسه

من السالفه اشرايكم بنات ابي احد ينصحنى قول لي شنو احسن طريقه أدبه وابرد جبدي فيه ورجاء

بنات مابي ردود تجرح اللي عندها كلمه حلوه ختقول واللي ماعندها تدعيلي ربي ينصرني
 

الصعيريه

New member
إنضم
12 يوليو 2009
المشاركات
11,646
مستوى التفاعل
1
النقاط
0
الإقامة
الكويت
رد : خيانه زوجي

ياحيااااتي

أصعب وأمر شي الخيــاااانه ومحد يرضاها على نفسه

ويعني على شينه قواة عينه
على خياناته لج قاعد يهددج بالزواج وأهله ماشالله عليهم يشجعوونه مآيدرون عن بلاااويه

كلميه وواجهيه بالارقام ووريه السجل وفهميه إن تمآدى بدخلين أهلج بالموضوع عل وعسى يتسنع

والله يهديه ويسخره لج إن شاءالله ويبعد عنه بناات الشوارع عديماااااات التربيه
 

love love

New member
إنضم
1 سبتمبر 2006
المشاركات
21,799
مستوى التفاعل
2
النقاط
0
الإقامة
Home
خلي عندج دلييل قوي وواجهييه علشان لا سمح الله باجر لي صار شي وصار طلاق لا يقول العيب منج

وان شاءالله الله يهديييه يااااااااااارب ويهدي سركم

مشاءالله حسيت انج قووويه وقادره تحلين المشكله وصبووره لو وحده ثانيه والله جان بوقتها دششت التلفون ابلعوومه لما درت انهم بنات
 
إنضم
31 أغسطس 2010
المشاركات
3,964
مستوى التفاعل
19
النقاط
0
الإقامة
موجوده :)
رد : خيانه زوجي

الله يعينج ويصبرج-والله اسمع وااااجد من هالسوالف يعني وااجد الحين من المتزوجين يحاجون وشغله عاديه عندهم ومن باب الحريه والزوجه طقاااق واخر همهم كل هذا بسبة ربع السو -- واجهيه خل يتسنع
 

ابلة لولوة

New member
إنضم
1 يوليو 2010
المشاركات
457
مستوى التفاعل
0
النقاط
0
الإقامة
بيت العز
الله يهديه

سمعي احسن حل تواجهينه وخلي ارقام البنات معاج واذا طحتي على صور او مكالمات مسجله احتفظي فيها

وتكلمي معاه شسالفت هالعلاقات وشيبي منهم وذا شفتيه خايف بينيله انج قويه وهدديه اذا مابطل هالسوالف بتفضحينه وبتفضحين البنت اللي يحاجيها

بس طبعا تهديد موتسوينها صج احنا بنات الحمايل نخاف الله بس تهديد عشان يتأدب وهذيك التعبانه تفج عنه
 
إنضم
26 أكتوبر 2008
المشاركات
1,046
مستوى التفاعل
0
النقاط
0
حبوبه مادري شقولج والله ماقدرة انام من قريت موضوعج
شوفي وسمعيني عدل انا انقطعت عن المنتدى من فتره وكنت قبلها كاتبه عن خيانة زوجي وشلون كنت اتحمل واقول عشان العيال وابجي وامرض وانقهر وصار فيني اليما صار على احد من الحزن والتعب والمرض وهو ما تغير لا وازيدج من الشعر بيت من رابع يوم رمظان لي بعد العيد وانا بحال ما يعلم فيها الا رب العالمين ..اذا كنتي لقيتي مسجات له فانا شفته بعيني وهو يتمشى معاها بواحد من المولات وكنت بطيح غشيانه بس كان على لساني كلمة يارب يارب قويني عليهم اثنينهم يارب احرق قلبهم مثل ما حرقو قلبي بايام رمظان .. المهم ماطول عليج يوم صرت جدام ويهه قلت له هذه الي بتهدم بيتنا عشانها؟؟؟ كفوووووووووووك دام نزل مستواك لي هالمستوى لا اشوف رقعة وجهك بلبيت وروح عيش حياتك مع هالاشكال وهي وهووو ولا كلمممممممممه ولا حرف كان بينشل وهو واقف من شدة نبرتي وكلمتي وانا واثقه من نفسي وهذا كله بفضل رب العالمين والاستغفار والدعاء رجعت بيتي وصليت وطلبت من الله سبحانه يهديه لعياله ويقوني ..
وركزة على نفسي ما بجيت ولا صرخت ولا مرضت مثل كل مره لا اول شي سويته شفت كل الامرو الي احبها وحطيت فيها جدول ونفذتها كلها مع عيالي طلعت استانست مشيت وهو يدش البيت ويطلع اقسم بالله كانه خياااال مو موجود وماقولج حاول وحاول وصارخ وحتى مد ايده علي وما خلاني هالشي اضعف تميت ادعي ربي ولا انطق معاه بحرف .. لين اجه بيوم وهو عيونه تدمع ويعتذر وندمان على ان بيتنه خرب عشان وحده من الشارع وانه حس اني ماصار يهمني وان الدنيااا فيها الي اهم منه وهم عيالي ونفسي ..
ادري اني طولة عليج حبوبه بس اتررررركي اهله انسيهم ولي شافوج حاقره كل استفزازاتهم بيتعبون ويسكتون .. وبالنسبه له اهو احقررررررريه ومجرد انه مسح المسجات الي بينه وبينهم يعني لج مكانه عنده ومايبي يزعلج بس انتي خلج طبيعيه وحاولي تحسسينه بانج مهتمه بامور ثانيه وااهتمي بنفسج وبصحتج واستانسي قد ما تقدرين خليه كل مايدش عليج يلاقيج فرحانه ومبتسمه ..وهالله هالله بسورة البقره والاستغفاررر وان شاء الله ربج بينصرج على بنات ابليس وعلى كل من يفرق بين المره وزوجها ..
عذريني على الاطاله حبوبه بس من حر ماااافيني
 
إنضم
9 يونيو 2006
المشاركات
1,557
مستوى التفاعل
0
النقاط
0
العمر
39
الإقامة
قلبــــــــــــــــــــه
رد : خيانه زوجي

كانج قاعدة تقولين قصتي مع شوي اختلافات بسيطة انا ماسكت واجهته بس بهدووووووووووووووووووووووء وماننفعلت تدرين شنو تفشل عينهاماحطها بعيني
شنو تفشل واجهته باعصاب بارده وبالخير قلتله انا تغيرت وبتشوف لو مهما تحاول ماراح تلاقيني مثل قبل

وسبحان الله ضغطت عليه فترة وبعدين الحمدلله مع الدعاء والصبر تغير
 

لذيذة

New member
إنضم
24 ديسمبر 2008
المشاركات
133
مستوى التفاعل
0
النقاط
0
الإقامة
بلاد الحب
الله يصبر قلبج حبيبتي
بس ترا كل الرياييل تقريبا يسوون جذيه
اذا فيه اطفال لازم تضحين شوي عشانهم حرام تهدمين البيت
والمغازل موجود عن رياييلنا والمشكله ما يعتبرها خيانه او حتا حرام
فيه طرق وايد تقدرين تردينه لج اذا تعرفين انه يحبج. وان علاقاته مجرد لعب
لان انتي الباقية وانتي الواقع وانت احق منهن فيه
اذا تحضرين محاضرات حق د.ناعمة الهاشمي ترا وايد تفيدج وموقعها بلقيس مفيد حيل
لا تسجلين له مكالمات كافي انج دريتي لا تعورين قلبج
ولا تواجهينه لانه راح يطلع منها نفس كل مرة ولا تقولين كرهته وبخليه يولي لا هذا زوجج وهذا جهادج بالدنيا
لازم تردينه لج من غير ما يدري ولا تفكرين باهله اذا حبج ما يقدرون ياثرون عليه
وشيليهم من بالج بس فكري فيه اهو
اقري عن انماط الشخصيات في موقع بلقيس واستراتيجيات الزوج الخاين راح تستفيدين ان شا الله
بس لازم تقتنعين انه لج بروحج ومو بكيفه يروح مني ومني لا
ماله غيرج
وادعي. ربي يعينج ويهديه*
 

قلبي سلومي

New member
إنضم
4 أبريل 2010
المشاركات
5,285
مستوى التفاعل
8
النقاط
0
الإقامة
في قلب الكويت وزوجي
رد : خيانه زوجي

انا بعد زوج خاني
وتعبت وصارخت ولا هامه
ولا وكان يبي يطلقني عشانها
بجيت وبجيت لحد قلت بس
هقبها قمت اصير مثله بالحقران
وقمت اسوي مثل مايسوي
مثل شلون يحقرني عشان وناسته
واختها تحسف وتركها
بس اهم اللجوء لربج وبعدين اتبعي الطرق
 

غزالي وبس@@

New member
إنضم
6 يناير 2008
المشاركات
645
مستوى التفاعل
0
النقاط
0
الله يهديه ويسخره لج يارب انا اقول لازم يكون عندج دليل لانه ممكن يقلب السالفه من سمح لج تمسكين تلفوني انتي بشي وهو بشي ثاني فوق شينهم قواه عينهم وواجههيه لا لقيتي دليل لاتسكتين له الله لايوفق بنات الحرام ويسخره لج ويهديه ويصبر قلبج
 

*سوسو ستار*

New member
إنضم
23 نوفمبر 2006
المشاركات
2,965
مستوى التفاعل
0
النقاط
0
الإقامة
.. مـ ع ـشوقتي الكويت ..
الله يعينج حبيبتي ويصبرج



انا اقول لاتبينين له انج دريتي بخياناته او تورينه انج موواثقه واهتمي بنفسج اكثر وطنشيه شوي



والله يسخرلج زوجج ولايشوف غيرج ويرزقكم بالذريه الصالحه يآآآآرب
 
إنضم
30 أكتوبر 2010
المشاركات
8
مستوى التفاعل
0
النقاط
0
رد : خيانه زوجي

مشكورين بنات على الردود ماقصرتوا ربي يوفقكم مع ازواجكم ويسعدكم

حبيبت افضفض عشان ارتاح اشوي النار بتاكل قلبي

احاول اجمع افكاري وشنو بسوي معاه الله يعيني عليه
 
إنضم
23 أكتوبر 2010
المشاركات
14
مستوى التفاعل
0
النقاط
0
رد : خيانه زوجي

الله يهديه ويصبرج والخيانه اصعب شي بس انتي غلطانه الوحده مهما شافت على زوجها ماتخليه يدري انها عندها خبر لان بيصير عنده عادي وبالعكس ما انام عند اهلي ولا اعطيه مجال اني مو موجوده عشان يستانس ع كيفه واكشخله واعطيه من الكلام الحلو ولا احرق نفسي واصبري مصيره لج ولعيالج هذي فتره وتعدي ولا تعطينه مجال للهواش انه بيكون مستانس بدونج معاهم
 

مس لوتس

New member
إنضم
5 يوليو 2008
المشاركات
5,388
مستوى التفاعل
1
النقاط
0
الإقامة
بـــاريــس
هذي مو خيانه هذا زنا واجهيه بدليل خلي ردج إيماني من زني زنا ع جدار بيته يعني بيلقاها بأهله الزنا مه يعني نام معاها بفراش وبس الزنا بالنظر لغير المحارم _
وعيشي خ٧اتج