دشوا نسولف

[english muffin]

هلا بنات
خندردش
لين دريتي انج حامل متى اخترتي دكتورتج والمستشفى وعلى اي اساس ؟
انا ببدا
انا اول شي فكر فيه ريلي وكان مصر اهي الخبرة و قعد يدور ويروح كل المستشفيات حق يحصل احسن دكتورة
انا عن نفسي قلت له اهم شي عندي الغرفة تكون شرحة لان انا بسرعة اتضايق لين غرفة كئيبة وظلمة وجذي
صج المستشفى الي اراجع فيها وبولد فيها واايد اغلى من الباقي بس انا عندي اهم شي في الحمل اهي صحتي وصحة البيبي والباقي يهون والا انتوا شرايكم؟

وثاني شي
شرايكم بالتوزيعات؟ انا عن نفسي احس التوزيعات هبة قديمة حلاته شي جوكلت مثلا مغلف بطريقة راقية وبوكس وجذي
حتى قاعدة افكر اسوي توزيعاتي جوكلت على شكل مرضعة داخل بوكس مغلف بطريقة حلوة لان انا من الناس الي لين احد يعطيني كيف اواي اقطهم هههههه للاسف

وثالثا
شرايكم باللي يطقمون كفر سريرهم مع البيبي و تلبيسة للصواني والكلينكس و بعد يسون تلبيسة للدلة انا احسه اوفر
حلاته طقنج من زارا هوم هههه واللله وايد ناعمين

 

[كتالونيه]

انا بالنسبه لي كل مستشفى فيه الشي الزين والشي الشين
انا انشالله ابجرب مستشفى لندن واخذت غرفه ملكي لانه شرحه
حيل والدكتوره سوفيت لانه الكل يمدحها والله يهون علي
اما بالنسبه للتوزيعات بصراحه مايسويت لانه كل
وحده من خواتي بتجيب سله من باتشي واختي الثانيه
بتجيب من واو وباقي خواتي بيجوبون شغل حريم
والشاي والقهوه كل وحده تقول بتجيب
والكفر انشالله اباخذه من سويت هوم
وطبعا لازم الاطقم الشاي والقهوه البسهم طبعا
مولبس دفاشه لا لبس ناعم
وبس
وانشالله اذا ولدت ابقولج بالتفصيل

 

[نفول]

ويييينج انقلش مانشوفح بالتجمع
حبيبتي انا ريلي بعد اهم شي الخبره وحماتي وايد جربت دكاتره وعالجت عند وايد وكان يستشيرها
والحمدالله قالت لنا عن دكتور ايامه برويال حياه بس مع الاسف ماااااادي ماعجبني وبعديت قالت روحو عند تومسو بدار الشفا
ورحنا وحسينا بالفرق عجييييب ماشالله يهبل وفوق كل هذا عنده خبره وخلوووووق وطيب
وكله يطمنج ويذكرج ان كل شي بيد الله الحمدالله معني مااحب دار الشفا ولا غرفهم بس مابي اغير المستشفي علشان غرفه واتوهق بالدكتور
والحمدالله كل مااسال احد يمدحهم وكل مكان فيه الشين وفيه الزين

والتوزيعات انا ابي شي بسيط وناعم احس سوالف اول احط مع الكاكاو صنم وعلبه شكبرها
انا لنا اروح موعدي وانطر السياره علي ماييبونها اشوف الناس الي طالعين من الاستقبال شنو معطينهم
مره شفت صندوق خشب اكبر من كف الايد بشوي ومزين ومكتوب اسم البيبي
ومره شفت وحده ماسكه ريش بايدها بس مادري شسالفته

الكفر مالا داعي اسوي نفس مطارات الجاي و القهوه لانهم بيكونون داخل ومااحب البسهم افضل اخذ ياذهبي او فضي
وانا خاطه ببالي كفر ناااااااااااعم مافيه ولا شي وابي لون هااادي بس مادري شنو فيني وشنو الالوان الحلوه حق الكفرات

 

[english muffin]

يالله بنات
ابي وايد آراء

 

[سمسمة كويتية]

أنا ما أتوقع اسوي استقبال بالمستشفى
حزة ولادتنا امتحانات و ناس مسافرة ما أتوقع احد يقدر اييني
و أكثرهم بيون البيت بعدين

أما الاشياء الثانية ما فكرت فيها للحين أنا نوعي ما أفكر بالمستقبل دايما باللحظة الاخيرة

 

[صحكة الايام]

موفقه

 

[الحــــــلا كله]

انجلش وينج اشتقنالج بالتجمع
لج وحشه

 

[english muffin]

كاني موجودة

احنا في البحرين مانسوي استقبال في المستشفى
تسوي في البيت
في المستشفى يزورون عادي

 

[om 7sony]

انا اخترت دكتورتي عقب تفكييييير
كان اهم شي عندي الدكتوره ،،،،، وبعدين تيي المستشفىً

بديت اراجع عندها من السابع ( صج طولت على ما استقريت على دكتوره)
وبالنسبة للاطقم ،،، الناس اذواق بس بالنسبة لي ما احسه شي حلو
يصير اوفر
حلاته كل شي مرتب ومتناسق بس مو كلللله طقم واحد
وارجع واقول الناس اذواق

 

[منتهى الرقه89]

هااي انقلش فقدنااج ولج وحشه،.
شلونج عساج بخير انتي والبيبي.،


والله انا ماحب البس واطقم نفس الكفر والصواني والكلينكس وعزج الله الزباله ،، احس ووع وفشله انا والطاوله لبس واحد

لا حلو يكون الكفر ناعم وراقي واللبس نفس اللون مايكون شاذ او اذا كلش الكفر واللبس واخد اووكي.،

بسس ان المطارات والمفارش والصواتي والكلينكس كلنا طقم واحد نووووو وي لاا ماحب.،

والتوزيعات حلو يكون شي ذرب مايكون خرابيط
احبه يا ان شوكليت بروحه ويكون شي مرتب

او كتيب دعاء مزين او دهن عود مثلا

لكن المرايه والشمعه و القلم والبدكير موحلوين لاستقبال ولادة .، رأيي الشخصي.،

واهم ماعليج اختاري الدكتور اللي يريحج.،
ومري التجمع لاتقاطعين

 

[جنا الخليج]

اهلااااااا انجلش لج وحشه ويينج مابينتي بالتجمع فقدناج ؟؟

انا عن نفسي اول شي خبرة الدكتوه ونظافة المستشفى والرعايه والاهتمام والسمعه الزينه
وعن التلبيسات لااااا طبعا نو واااي اطقم انا والمطارات شالسالفه ؟؟
حتى تلبيسه ماراح البس المطارات شكووو وين قاعدين؟ وانا راح احط اطقم جااي وقهوه راقي وكشخه ويكلف فمالا داعي اخشهم والبسهم ؟
والناس اذواق

 

[شـيـوخـهـ]

بالنسبه حق الدكتوره اخترتها لاني مو اول مره اولد عندها وبناء على تجربتي معاها انها حيل مريحه بالولاده وهاديه
بخصوص المستشفى اخترتها هم على اساس الدكتوره ترتاح فيها والسسترات متعاونين معاها

وبديت مراجعاتي من ثاني شهر حمل ..

بخصوص التوزيعات ما احبهم ومو من النوع الي يجذبوني او احب اقدمهم حيل احب يكون الحلو مميز وعليه القيمه والموالح بعد الي اهي الفطاير والورق عنب احب يكون مميز شغلي واحب اهتم بالاستكانات والفناجين وصواني التقديم

بخصوص الكفر انا مااسوي استقبال بالمستشفى فالكفر ما احطه بالبيت لاني ما استقبل احد لي ارتفع تقريبا لي يصير لي فوق ال ٢٠ يوم
بس احب القميص يكون مميز مو خبه حلاته شي مرتب وناعم والكفر احتمال اشتري شي ناعم للمستشفى لي زاروني اهلي واهل ريلي واحب شغل دبنهامز وزارا هوم و صفاه هوم
ما احبه يكون نفس القميص ونفس كيسه البيبي والزباله مكرمين والكلينكس احب يكون اللون يمشي مع بعض بس مو طقم

 

[english muffin]

كلنا اتفقنا ما انطقم
عيل وينهم الي يطقمون هههههههههههه
وايد اجوف بنات هني يطقمون