دقوس كويتي لذيذ

[أم*سلمان]

السلام عليكم ورحمة الله وبركاته

بنات انا ميته و اتعلم شلون اسوي القووس الكويتي الاصلي اللي حمااره مو حيل احمر ولا حيل فاتح و ابي طعمه يكوون لذيذ


وابي اسوي صباره بس مو عارفه شلون

وشكرا

 

[ام الدرر]

دقوس الطماط
طماط بالخلاط
على النار زيت+شوية معجون طماط +ثوم مفروم ناعم +مكعب ماجي خضار حمسي شوي وحطي الطمام المطحون عليه وشوية ماي وخليه يطبخ نص ساعة

دقوس الصبار
نقعي الصبار بماي حار وخليه لما يذوب وعقب شخليه وخلي يطلع الحب بروحه
حطيه على النار وقطعي ثوم حلقات ضعيفة او جوانح وضيفيه على الصبار وخليه يطبخ لما يثقل شوي
في ناس تحط علىه شويه دقوس طماط يكسر الحموضة
وبالعافية ​

 

[موس شوكليت]

يسلمووووووووو الايادي

 

[بحر الود]

يسلمو

 

[جارة القمر]

تفضلي طلبج

http://www.q8yat.com/t343052.html


http://www.q8yat.com/t23067.html



الدقوس لم تحمسين له شوية كزبرة مع البصل تحليه وفي ناس تحب تحط ملعقة خل تحليه

http://www.q8yat.com/t623923.html#post17048774

 

[noynoy]

طحني طماط بالبروسيسور بدون القشر
و بجدر حطي شويه زيت زيتون و ثوم مهروس و بعدين حطي كزبره ناشفه و بهار حلو و كاري
بعدين حطي الطماط و خليهم يغلون غلوه وحده و قصري النار و خليهم بو 20 دقيقه
و دقوس الصبار ما اعرفله و الله

 

[اختكم بالله]

اب

اب

اب

 

[ام عزايز]

حطي بالخلاط طماط وبصل وثوم وفلفل اخضر شوي ومعجون طماط وملح وشوية بزار

وبالجدر حطي دهن وشويه ثوم بعدين كبي اللي بالخلاط عليه ولمايخلص وتسكرينه حطي عليه اشويه كزبره

 

[أم*سلمان]

مشكورين و جزاكم الله الف خير

 

[ســتارز]

انا دقوسي غير ماحبه ناعم كأنه مرق لا.. احب الطماط مقطع

اقلي الطماط المقطع مع الزيت ومعاهم فص ثوم واقلبهم لين يذبلون وبالشوكة اهرسهم شوي واحط قفشة معجون طماط واقلبهم واخر شي شوية ماي حتى يصير الدقوس خاثر

واحط عليهم فلفل اسود وملح يغلون شوي وبالعافية

 

[المهفة]

بما انج اختى تبين الدقوس الكويتى القديم
انا اعلمج طريقة امهاتنا اول وقبل لايصير عنهم خلاط
4 طماطات قطعيهم ارباع وحطيهم على النار وحطى عليهم 3 حبات ثوم مقشر بدون تقطيع وقفشة معجون وشوية ملح و\رة بزار وقصرى النار حدها وخلية ربع ساعة وتلاقين طلع ماية كلة وعقب دقية بالشوكة الخشبية وخلية 10 دقايق وبس
وبالعافية

 

[mannawy]

جربي دقوسي وصدقيني راح تحطين قفشتج فيه وتذوقينه خالي لان طعمه واايد عجييب
انا اقصص طماط واحط عليه نص علبة معجون طماط وازيد ماي واحطه على النار
من يغلي الطمام راح تلاقين القشر بروحه يطلع انتي بالشوكه طلعي كل قشر الطمام
تالي تحطينه بالخلاط وتخلطينه بس مو تسوينه كلش خلي شوي فيه طمام بس نااااعم
وبعدين بالجدر شوحي ثوم وزنجبيل وبصل بس شوي يشقر لونهم وبعدها صبي الصلصه وضيفي ملح وفلفل اسود

واذا تبين تحطين صبار هم ينفع بس بالعاده امي الله يخلي امهاتكم ويرحمهم برحمته تحط على الدقوس صبار اذا غدانا مطبق سمج حددده مو طبيعي

لا وابشرج بعد اكو دقوس باذنجان اذا جربتيه حده حلو بس حق الشتاء مع المموش وهو عباره عن باذنجان مكعبات تفوحينهم لين يلينون وتحطين عليهم معبوج احمر وشوية صباار يطلع طعمه مينووون

وتقدرين تسوين صبار عادي بس تشخلينه وتحطين عليه معبوج يطلع لذييذ ويلسع والكل يعرف المعبوج اللي بالقرشه فيه خل وثوم فالطعم يصير حلو

والله يتمم عليكم بالصحه والعافيه

 

[اليدي روزا]

يسلمو

 

[أمانيQ8]

نفس طريقة ام الدرر بس ما اطحن الطماط احمسه لييييييييييييييين يذوب واختار الطماط ناضي ولين اشوي

 

[هيونه البحرين]

بسألكم

يعني الدقوس هذا انتو تحطونه في غراش حق كم يوم و الا تستخدمونه نفس الوقت ؟؟
هو نفسه اللي بالبحرين نسميه اجار ؟؟
لان احنا الدقوس عندنا شي ثاني .. شكله بودره لونها برتقالي مايل للاحمر