رجيمي ... يوميات ومعلومات وفضفضة بالصور

[بـ سـ كـ وتـ ة]

الجمعة 14 سبتمبر


قمت من النوم امبجر بنتي اسم الله عليها قعدتني من الساعة 7 وربع


تريقنا حمسة خضرة ... كل الخضرة اللي عندي حطيتها





مكوناتها (زهرة-جزر-باذنجان-كوسا-قرع-طماط-معجون-و brussels sprouts) ولما استوت رشيت عليها جبن بارميزان وموزاريلا


ولقطة أقرب





كليت معاها نص خبزة خفيفة وكملت الباجي بالشوكة


ماشربت غير كوب واحد ماي ليلحين

 

[بـ سـ كـ وتـ ة]

600 مل ماي الصبح

الغدا صمونة 8 انش من سب وي + عصير الربيع أناناس + بطاطة مقلية الحلزونية اللي على عود خشب

حبة بوملي



حبتين بيتزا سريعة بالدياي



وشريت لي بطل ماي صحة قزاز500 مل نفس هذا

شربته كله وقلت كل يوم لازم أعبيه مرتين

مجموع الماي لتر و100 مل + كوب عصير أناناس

الرياضة مشيت ساعة ونص تقريبا في جيان و360 والحين بسوي تمارين معدة ان شالله وأروح أنام

 

[بـ سـ كـ وتـ ة]

صباح الخير والورد والنوير

اليوم 15 سبتمبر

وزني



تريقنا



توست أسمر ولبنة وزيتون مع رشة زعتر ورشة زيت زيتون على أساس نص بالنص بينا آنا وبنتي

بس الكتكوتة معدتها نتفة كلت بس ربعها وآنا كليت ال3/4 الباقين بصدر رحب لول

حليب بالشوفان والموز ما كملناه شبعنا الحمدلله

 

[Madrideya ~]

بالعافية حبيبتي والله يخلي لج ينيييتج ويبلغج فيها عروسة ومبروك عليج النزول يلا ما بقالج شي عالهدف الاول شدي حيلج ونصيحة مني ابتعدي عن المطاعم الوجبات السريعة حتى لو كان طلبج صحي بس بالغالب هالمطاعم شبهه فهمتي علي صح

 

[بـ سـ كـ وتـ ة]

تسلمين حبيبتي ونفرح فيج ان شالله

والله معاج حق آنا أصلا صايرة ما أستسيغ أكل المطاعم بس شنسوي بعد

مرات أضطر لأني أغلب وقتي برة البيت

بس المفروض أحاول عالأقل أبعد عن اللحوم

بحاول كثر ما أقدر أركز عالخضار والسي فود إذا طلبت من برة والحديث معناه من ترك شيئا لله عوضه الله خيرا منه في دينه ودنياه

 

[بـ سـ كـ وتـ ة]

اليوم الأحد 16 سبتمبر 2012





تريقت نص فطيرة جبن لوزين





وكوب شاي وحليب





نص لتر ماي





تغديت



بطل ماي 300 مل





3 حبات ملفوف و4 ورق عنب يعني 7 قفاش عيش





وسلطة (خس - خيار - ذرة - جزر - فلفل بارد - ذرة) بديت شوي أتقبل الفلفل البارد إذا مخلوط مع الأكل



كوب عصير برتقال فريش



وبعدين شربت نص لتر ثاني ماي



والعصر كليت تفاحة خضرا



والعشا سباجيتي بكرات اللحم 4 كرات لحم homemade وسباجيتي 3 قفاش









طبعا صحني الصغير بس لما صورته بروحه بين كبير



عادي أدري شكل الصحون يضيق الخلق بس أهم شي الأخلاق



وما شربت شي صراحة مع إني عطشانة



بس صايرة أتأذى في النوم كل شوي وانتو بكرامة داشة حمام



آنا ما عندي مشكلة بس مرات حوستي في الدار تقعد بنتي على ما ترجع تنام إلا طارت نومتي​

 

[بـ سـ كـ وتـ ة]

اليوم مشيت من الصالون لي البيت

وصعدت الدري ونزلته في الدوام أكثر من مرة

واشتغلت في البيت تنظيف وطبخ أكثر ساعتين تقريبا

وبعد شوي بسوي تمارين معدة وظهر لأن ظهري صاير وايد يعورني ... الحمدلله يا رب

مستانسة وايد لأني طبخت حق غدانا باجر في الدوام وراح يكون أكلنا صحي بإذن الله

 

[بـ سـ كـ وتـ ة]

بنوتات بقولكم شي يمكن يفيد بعض البنات (هذا إذا في أحد قاعد يقرا هالبوست )

الحرمان عمره ما ياب نتيجة ... تدرين ليش؟

لأن الحرمان مرتبط عندنا بالعقاب ... الطفل لما يغلط نعاقبه ونحرمه من شي يحبه

ومحد طبعا يحب العقاب

وانتي لما تسوين رجيم المفروض ما تعقابين نفسج

لا تقولين آنا معاقبة نفسي عالوزن اللي وصلته عشان جذي راح أحرم نفسي

خلج مستمتعة برجيمج ... انتي أول وتالي قاعدة تسوين رجيم اشحقه؟

مو عشان ادلعين نفسج؟ مو عشان تستانسين وتلبسين اللي بخاطرج وتحبين نفسج أكثر؟

لما اتيين تاكلين شي لا تسئلين نفسج هالشي يمتن ولا لأ؟

حاولي تغيرين نوعية الأسئلة اللي تسئلينها بينج وبين نفسج

قولي هالشي لما آكله راح يفيدني ولا لأ؟

إذا يفيدج اكليه بدون تردد ... بس راعي الكمية

أكيد ما راح تاكلين كيلو بطاطة حلوة وتقولين وزني ما ينقص

إذا كانت الإجابة لأ ما يفيدني

السؤال الثاني ... هل راح يضرني؟

إذا كان يضرج حاولي كثر ما تقدرين تقاومينه ولا تقولين ما أقدر

ما في شي اسمه ما أقدر ... في شي اسمه مابي أقاوم

وإذا كلش كلش عن خاطرج اكلي منه نتفة لا تكثرين

ودااااايما حاربي العدو اللدود للرجيم ... الفراغ

لا شعوريا إذا كنتي فاضية تفكرين بالأكل وكل خمس ثواني مشتهية شي

أكبر دليل إن مرات نحتار من أي مطعم نطلب لأن احنا همنا الوحيد نملا وقت الفراغ

أما الإنسان المشغول ما يحس بوقته إلا مر وفجأة أحد ينبهه إن صار وقت الوجبة

يا ما صارت ... كنتي مشغولة بشي وايد تحبينه ومستمتعة فيه بعدين ما وعيتي إلا بطنج يصوصو ههه

حاولي تشغلين وقت فراغج كله بأشياء مفيدة وممتعة

يا رب تقدرنا نحقق كل أحلامنا ونصير ناس أفضل

اللهم أعني على ذكرك وشكرك وحسن عبادتك

 

[بـ سـ كـ وتـ ة]

سوري بنات ماقدرت اكتب يومياتي اليوم ان شالله باجر انزلها

 

[بـ سـ كـ وتـ ة]

حدي لاهية بدوامي وبيتي هالأيام عذروني

الحمدلله بعدي ملتزمة بس أمس ما سويت رياضة كلش غير المشي وصعدة ونزلة الدري في الدوام

بس ضاق خلقي اليوم لاحظت بوادر ترهل في فخوذي عشان جذي بدءًا من اليوم بإذن الله راح أسوي رياضة حق فخوذي وأواظب عليها

حتى لو مرتين بالأسبوع عالأقل ويومين زنود عشان ألحق عليهم

ان شالله أضعف بدون ترهل يا رب

 

[Madrideya ~]

أهلين بسكوته عذرج معاج يا قلبي انا الحين لا شغل ولا مشغلة بس من الاسبوع الياي يومي مزحوم حيييل قاعدة احاتي الرياضة لانه كلش ما عندي فجة ,,
ان شاء الله مع تنظيم الوقت يصير يومي اوك ... وكلامج عن الحرمان حلو واقنعتيني بصراحة بس انا وحدة ما اعرف اسوي كنترووووول من دون حرمان
بس بعد كلامج العسل قررت مره بالأسبوع اخلي وجبة وحدة من الاكلات اللي احبها جذي ما اكون حارمة نفسي مؤ ! وشسمة كلامج عن الحرمان بنزلة بحملتي مالت رشيقات عيد الاضحي عشان الكل يشوفه لانه هناك في نشاط وبنات وايد ومتاكدة انه الكل راح يستفيد منه ... بعد اذنج طبعا ؛/

 

[بـ سـ كـ وتـ ة]

اي معروف ... شيين ينظمون الوقت

الصلاة والدوام

وما عليه ان شالله يمديج خصوصا إذا من الحين حطيتي لج جدول والتزمتي فيه من
اول يوم يصير سهل الروتين

أما إذا سويتي مثلي وقلتي بداوم أول أسبوع أشوف الوضع بعدين أخطط كل يوم راح
تأجلين

وآنا مثلج بين فترة وفترة أعطي نفسي وجبة فري عشان ما أخرب كل تعبي وبنفس الوقت ما أمل

وحياتي الكلام وصاحبة حلال عليج ان شالله عاد يفيد أحد

بصراحة محد مشجعني غيرج ... أحبج في الله

 

[بـ سـ كـ وتـ ة]

هالأسبوع والله حوسة شي مو طبيعي
وبيتي صار اييب المرض استغفر الله يبيلي أتفرغ له وأسنعه
أمس ما سويت رياضة اليوم ان شالله أسوي لازم لازم لازم لااااااازم ههههه
هالأسبوع الحمدلله راضية عن نفسي وعن أكلي
واليوم شربت لتر ماي وكوب شاي وكوب شاي وحليب
الغدا أول أمس سويت برياني دياي بالعيش الأسمر وايد كان لذيذ وما في فرق بينه وبين العيش الأبيض كلش
بس فيه ألياف وفيتامينات وفوايد أكثر طبعا
وأمس الغدا كان فري
والعشا غالبا مشويات أو ما أتعشى لأني صايرة أشبع من الغدا ما أيوع عقبه
اليوم تريقت فطيرة جبن أبيض ما كملتها فخليت الباقي اهو السناك
وتغديت عيش تقرييا 7 قفاش كبار بس هم ما كملتهم شبعت بسرعة مع قطعين سمج فيليه بالليمون
وبطل ماي
ان شالله ما يصير 30 الشهر إلا وآنا واصلة حق هدفي الأول بإذن الله
ويا رب ما اتيي السنة اليديدة إلا وآنا وزني 70
عشان أبدا بداية فريش وأكمل ريجيمي وأوصل حق الوزن اللي أبيه ان شالله
مدريدية بليز لا تقطعين ترى بديت أمل لأني أحس إني بروحي

 

[حلم86]

السلام عليكم رشيقات المستقبل​

شخباركم وشخبار اكلكم؟؟​

انا بحرينية بالصدفة شفت هالموضوع وتابعت كل صفحاته وعجبني الموضوع وصاحبة الموضوع اكثر وكل اللي شاركوا في الموضوع ما شاء الله عليكم الكل يشجع واني حاليا اسوي رجيم فياليت تقبلوني بينكم​

في حال قبلتوني بكتب قصة حياتي ههههههه​

الله يوفقكم ويعطيكم على قد جهدكم يا رب:yaaaaaarb:​

 

[بـ سـ كـ وتـ ة]

وعليكم السلام ورحمة الله وبركاته

هلا فيج حبيبتي وهلا بأهل البحرين كلهم

حياج الله حبيبتي ... كتبي قصة حياتج أفا عليج

ناطرة على أحر من الجمر إن الموضوع يتحرك لأنه صار وايد ممل

موفقة ان شالله وخلينا نشد حيلنا ونسيطر على حياتنا

 

[Madrideya ~]

بسكوتة حبيبتي وآنآ بعد آحبج فـ الله ورآح آتم معآج للآخرر
وآن شاء الله قبل مآ نوصل 2013 آنآ ويآج فـ عالم الستينآت قولي آمين وآحنآ قدهآ شوية جهد ورآح نوصل بـ إذن الله
ومو بس الموضوع ممل القسم بكبره عكس قبل كآن نشآط على مدآر اليوم يمكن لأن غآلبية الشعب آتجه
للعمليآت وربط المعدة والتكميم وهالسوالف وما صاروا يحتاجون للدايت خبرج بعد احنا شعب ماكو ارادة
بس لو مهما كانت الظروف اخرر شي ممكن انا نسوية نلجئ للعمليات الجراحيية ربنا ما خلق اي شي فينا الا له فايدة وحكمة
نروح ونحورف باعمارنا ليشش ؟؟؟ ولا بعد الحين هابين بهبه ياكلون عشان يمتنون ويوصلون لوزن يأهلهم حق العملية ؛(
الله يهديهٌم صرآحة ،، شفايدة يسون هالعمليات وبعد 5 سنين ترد المعدة لحجمها الطبيعي قبل العملية وترد اجسامهم نفس قبل


آحسن شي الدايت والرياضة وآصلاً الدايت مو بس ينزل الوزن لا ! حتى يغير عاداتج الغذائية
يعني تخيلي يوم الاربعاء قبل امس خليته off ما خبصت وايد واحس لما اكلت عيش وانا صارلي فترة قاطعته بطني قام يعورني
حتى الكاكاوات والخرابيط لما اكلتهم اخذت قطعة وقطعتين معنى مسموح لي لان يومي off بس خلاص احس تعودت عالدايت
ومعدتي ما صارت تتقبل اي اكل وباي كمية نفس قبل ،، ~

 

[حلم86]

هلا حبيبتي بسكوتة

انا قصة حياتي بإختصار اني من شفت روحي وانا متينة ومن كبرت شوي وانا في انواع هالدايت واضعف شوي وارد امل واهد الدايت ويرجع الوزن عقب فترة وقبل 3 سنوات سويت دايت ونقصت 15كيلو والحمدلله كانت نفسيتي عال العال وفجاة انخطبت ونسيت الدايت وتزوجت وحملت وولدت وطبعا الوزن يزيد ويزيد والنفسية تتعب

واخر شي قررت اني اسوي برنامج تخفيف اكل عشان يكون برنامج حياة وتعديل عادات غذائية وفي نفس الوقت يضغفني مع المشي وبعض التمارين الرياضية طبعا

بديت البرنامج من 1/9/2012
وكان وزني 91.5 وطولي 161

حاليا وزني 85.8:ggdw:
وان شاء الله مواصلة لين يصير زني 65 ان شاء الله

ويا ربي كلنا نضعف​

 

[بـ سـ كـ وتـ ة]

ما شالله عليج خسارة حلوة في وقت قصير

الله يتمم عليج ان شالله

 

[بـ سـ كـ وتـ ة]

اليوم 23 سبتمبر

كان يومي زوين مو وايد زين

تريقت كوب شاي وحليب مع 5 حبات بسكوت ميري المربع عشان أقدر آخذ مضادي الحيوي

الغدا صمونة ستيك خفييييييفة كلش ما تغث ووايد لذيذة ما شالله ... استمتعت فيها

الإنجاز العظيم ... كان في بطاط مع الوجبة ما كملته آنا وايد أحب البطاط يعني فعلا حاسة إني سويت شي كبير

وبدال الدرينكس شربت نص لتر ماي

في الدوام رجعت شربت نص لتر ثاني ماي

وفي البيت تعشيت حبتين توست أسمر حشيتهم بيضتين وبقدونس وجبنة سلايس لأني وايد يعت من فرارة الجميعة

وشربت عصير كرانبيري سيزر والحين بشرب موسي ليمون لأنهم زينين حقي هالأيام


ادعولي ربي يشافيني

صورت العشا بس بالكاميرا مو التلفون فما لي خلق أييب الوصلة لول ونقول اشحقه نمتن

باجر ان شالله بداية فعلية وان شالله ما راح أقيس وزني إلا ب1 أكتوبر

ويا رب يا رب أكون واصلة عالأقل 75

 

[بـ سـ كـ وتـ ة]

نسيت أوضح

السوائل لتر ماي + كوب شاي وحليب + كوب كرانبيري + كوب موسي ليمون

الرياضة

المشي في المعرض + في الجمعية