رحلة الأحلام إلى بلاد العم سام (نيويورك،فلوريدا،هيرشي)

[semaasem]

بسم الله الرحمن الرحيم



اليوم راح اخذكم معاي تعيشون التجربة اللي عشناها في أمريكا


بس بالبداية أحب أذكر شغله ألا وهي (من لا يشكر الناس لا يشكر الله)


فأحب أتقدم بالشكر الجزيل للأخت (روونه) اللي ماقصرت ويانا وسوت لنا تجمعات طيبة

وفرت علينا الجهد+الوقت في البحث عن الكثير من المعلومات والفضل يعود لله ثم لها:e3:


واحب أقدم تحية خاصة حق بنات التجمع على وقفتهم مع بعض الصراحة ماقصروا البنات كلهم

يزاهم الله خير وحدة تساعد الثانية وأشكر وقفتهم وياي وردودهم على جميع استفساراتي كلكم جميعا بدون استثناء


تقبلوا مني :aha:


وأحب أهدي تقريري المتواضع اهداء خاص الى الاخت العزيزة (ميسورة) لانها بعد جم يوم بتسافر

ادعوا لها بنات انها تروح وترجع بالسلامة (الله يسهل دروبج ان شاء الله) وترجعين لنا سالمة

غانمة واهم شي الصوغة _03BA:

هذي أول تجربة لي في كتابة التقارير أتمنى من الله انه يوفقني في كتابته ويشهد الله ان الغرض من كتابة

التقرير هو اني ودي اساعد غيري مثل ماساعدوني البنات بتقاريرهم الحلوة يزاهم الله خير اتمنى انه يكون

مرجع لهم لبعض المعلومات اللي ممكن يحتاجونها واتمنى الاقي منكم التشجيع

ماراح اطول معاكم نبتدي على بركة الله





سفرتنا كانت يوم الثلاثاء الموافق 28/7/2009 على طيران

[/url][/IMG]




ورايي بالطيران الصراحة أعطيه مستوى جيد



انطلقنا من مطار الكويت الدولي الى مطار أبوظبي ترانزيت ساعتين ومن ثم الانطلاقة الكبرى الى مطار JFK الدولي

ولما رحنا بنركب الطيارة انننصدما المسافرين اللي معانا معظمهم اذا مو كلهم من الجالية الهندية والباكستانية

والبنغالية شكلنا غلط بينهم مرتين نتأكد من وجهة الرحلة ونشوف مكتوب متجهة الى مطارJFK فكرناها رايحة نيودلهي


توكلنا على الله وركبنا الطيارة الحمدلله كانت الكراسي مريحة والميديا مالتهم حلوة ومامداني استانس وآخذ أنفاسي الا

اللي جدامي تسدح الكرسي عالاخر :rgewrg: حكرتني وعيوني تعورني ماقدر اشوف الشاشة استأذنتها بلطف انها

تجدم الكرسي شوي ومو عاجبها تجدمه شوي وترجعه وكنا انا وياها :j013: طول الرحلة فعكرت علي نوعاما مزاجي

وهي كانت من الجالية البنغلاديشية او البنغالية مادري شيسمونها


المهم ماعلينا وصلنا مطار JFK نيويورك استغرقت الرحلة 14 ساعة تقريبا وعند هبوط الطائرة رجعت مرة أخرى

وطارت أعتقد بسبب ظروف الجو فكنت حزتها منهارة وخايفة واساسا انا من ركبت الطيارة هالمرة كنت ميتة من الخوف

وماقدرت انام من الخوف يمكن السبب هو ان قبل سفرتنا قريت خبر اختفاء الطائرة الفرنسية اللي طاحت فمتأثرة وايد

وعندما قرر الكابتن الهبوط هبط فينا هبووووط مو طبيعي واهتزت الطيارة هزززز اللي لا شعوريا قمت أصرخ واكرر

بسم الله ،بسم الله، بسم الله لما خف الاهتزاز ووقفت الطيارة الحمدلله :eh_s(1):




الى هنا راح اوقف ابي اشوف ردودكم وتشجيعكم لي باول تقرير اكتبه وترى توها تبتدي الرحلة

 

[cocoo]

بدايه حلوه


بانتظار الباااااقي

 

[عروس الدنيا]

هلا والله سمسومو لابده اهني و ما تقوليين .. لا يا العياره اثاريج منتي هينه راعية تقارير .. لووول
يلا كملي سوالفج ما تنمل منها

 

[Simply_The_Best]

سمسمه ؟!

طلعتـي منتـي هينـه لووووول و تقـول أنـا ما عرف و عليميـة و مـا أدري شنـو

إي والله عيـــــــــــــــــــــــارة على قولة عروس لوووول


و على طاري الكراسي الي بالطيـارة ... إنتـي أشـوى !! هالبنغاليـة بس جدمت الكرسي ... أنـا طحت في واحـد أمريكي معقـد يمكـن فيه 50 سنـة و رايـح مع أمـــه ..... و إلا تخيلي شسـوى !؟!

أنـا و ولدي الصغير قاعـديـن وراه و ولدي حاط لعبـة البي أس بي بالمخبى مالت الكرسي ... و إلا يقـوم من كرسيه الخبـل المعقد و يشيلها و يقطهـا علي ؟!!!!! أنـا فجيت حلجي من كثر الصدمـة و ودي أحذفـه فيها ... و قعد يتحلطم يقـول اللعبـة معــوره ظهـره !!! عفيـه ظهـر حس باللعبـة الي في مخبى الكرسي .. قولي شلون عرف إن في شي بالمخبـى ! اتصدقيـن دخـل إيـده بالمخبـى و قعد ينبش فيها ... لو فيك خير جـان عنـدك زوجـة و لا صديقـة ... مالت عليه رايح مــع أمـــه ....... من يبيـه قطيعـه تقطـعه :eh_s(6):
حتـى قبل لا نصعد الطيـارة عنـد الكـاونـتر ... متحـاوش معاهم قلت حـق روحـي لا يحـوشك هذا ويانـا . ويـه ودر !! شنـو محظوظـه أنـا لوووووووووول

يـــــــــــــلا يا حلوة .... معـاج في التقرير للعـم ســـــــام

 

[ميسوره]

انتي اهني حياتي مشكوره على هالدعوه الحلوه وعلى الاهداء خنقتني العبره ترى انا حساسه
وانتي ماشاءالله عليج ماخليتي شي بالسوق وهم تبين صوغه
الظاهر اوصلت الجنطه علشان جذيه لاهيه عنا


متابعينج

سماسم شيفكج من فلفولتي ههههههههه

 

[صبا q8]

يلا سمسمة لا يوقف لايوقف
عاد هالله هالله بالصور الزينة والشرح المفصل

 

[semaasem]

cocoo



مشكورة حياتي على التشجيع

وان شاء الله تستمتعين بالرحلة





bcde600



؟!؟!؟!؟ مافهمت ولا شي ومممممم اعتقد الموضوع ماله علاقه بالرد بس عالعموم هم مشكورة عالمرور!!!!





عروس



لووووووووول أحرجتيني محد هين حبيبتي وينها جوري خلتيي تشوف

ومشكورة حياتي على التشجيع طبعا انا ما استغني عنكم بنات التجمع الغالي ماتشوفوني كتبت لكم شكر خاص بس ماقلتيلي شرايج بالبوكيه

عسى عجبج وانتي اللي سوالفج عسل وماينمل منها والله تابعيني علشان تعرفين اختج شسوت وشهببت بأمريكا




سيمبلي


بل بل بل شفيكم كليتوني انتي وعروس الله يشهد اني أبي أفيد غيري مثل مافدتوني انتوا بتقاريركم الروعة وطبعا انا ما أقايشكم انتوا بالتقارير

بس نسوي اللي نقدر عليه والعين ما تعلى عالحاجب عاد انتي خبيرة والصراحة تقريرج اللي 2005 من التقارير اللي جدا فادتني بالسفرة

وكان له الفضل بعد الله طبعا في دقة السلف هو وباجي تقارير البنات ما انسى بعد تقرير روونة وكل التقارير يزاكم الله الف خير عليها

فحبيت اخذ الاجر والدعاء خصوصا في هالشهر الفضيل+أفيد البنات اللي ناوين او مفكرين يسافرون بالاضافة الى اني أرسخ سفرتي

في ذاكرة التاريخ اتمنى من الله التوفيق


وبالنسبة للامريكي المعقد لوووووووووووول أتخيل الموقف حده موصاحي الحمدلله والشكر شلون حس فيها انزين حتى لو مضايقته يقدر

يقولكم بأسلوب حلو مو يحذفها عليج يالله نعيش ونشوف يتسلطون علينا بالسفرة هالاشكال انا ماذكرت مواقفي كلها مع هالبنغالية بس فهمتكم

انا كنا حاطين على بعض طووول الرحلة تصدقين كنت متلحفة ومغطية ويهي بالكمبل مال الطيارة بريح شوي ولا شافها ريلي تبي تشيله

من ويهي بس شافته اخترعت ووخرت ايدها أخييييييييييييه لو قايل لي حزتها جان علوم مايدرون انهم عندنا يخمون شوارعنا واللي حارني

انا يوم وصلنا ولا يطلعون مواطنين امريكان شلووووون يدبرون عمرهم مادري يم زوجي باكستاني يوم وزعوا الابليكيشن امريكي وعنده

مطعم بنيويورك كان يشتغل خياط بالكويت تخيلي مواطن امريكي مايعرف انجليزي يسأل زوجي عن كل شي بالابليكيشن خذتني السوالف


يالله ربج كريم....ومشكوووورة حياتي على التشجيع

 

[semaasem]

ميسورتي



وييييي لا تقلبين تقريري بجي وصياح كافي علينا المسلسلات الرمضانية


لا والله بعد قلبي تستاهلين كل خير والله عزيزة وغالية يا احلى ميسورة



( ميسورة الأصل أحلى من الصورة )






صبا


مشكورة حبيبتي وافا عليج لا توصين حريص ان شاء الله اكون عند حسن ظنكم

 

[مشمشة رمانة]

هعهعهعهع لوووول سمسومة والله خوووش بداية يالعيارة يمة منج ومن يوورج موتقولين ماتعرفين بس والله تشوووق مقدمتج وعيشتنا الجو عدل

بس والله كسرتي خاطري على اللي جدامج انا صار وياي نفس الشي بس البطيران الداخلي وااحد امريكي اشطووولة وعلية متقلقص بالكرسي ويالله واهوة سادح الكرسي بكفية المكان وريولة ماغطهم برة الكرسي وتحسينة متاذي بس شسوي بعمرة الحمد الله على القصر هيهيهيي والله عذرتة الفقير وحزتها لوووول المطبات من صوب والحمال من صووب وهلي جدامي من صوووب كرهت عمري 5 ساعات وانا متحملة ولا قلتلة شي لانة ابروحة حالتة كسيفة لووووول

 

[أم@الحلوين]

حمد الله ع السلامه

وناطرين تقريرج الحلـــــــــــــــــــــــــــو ياحلوه

 

[dяέἆᶆ qûếếἦ]

الحمــد للــه على السلامة

وناطرينج إن شاءالله...

 

[semaasem]

مشمشة



مشكورة حبيبتي وسكتي انا ليلحين في ظل التعليم قاعدة اعوبل واعوجل بهالصور بس ان شاء الله تضبط وياي وصاجه صج القصر نعمة

ولازم تتسلط علينا السوالف مرات وقت السفرة بس شنسوي بعد الشكوى لله





ام الحلوين


الله يسلمج وان شاء الله خير




رفيلو



الله يسلمج وحياكم الله نورتي التقرير

 

[semaasem]

مشكورين بنات على تفاعلكم وان شاء الله تستمتعون وياي بالرحلة حياكم الله

 

[*صَبا*]

وانا ادور على باقي الرحله

المهم الحمدلله على سلامتج
وفي انتظار التقرير كـــامل

 

[Maltesers]

ناطريييييييينج سمسوووومه

 

[semaasem]

بسم الله الرحمن الرحيم




الحمدلله رب العالمين وصلنا مطار JFK بعد طول انتظار ولما طلعنا من الطيارة ولا مطار جون كينيدي ماشاء الله عامر الزززحمة

بكل مكان وصفينا بالدور واحنا ناطرين بالطابور ولا في واحد مصري يسولف مع سعودي ويقوله الله يعينا الحين من التحقيق (وانا مو ناقصة)

وقام يسولف مع زوجي عن الطيارة وهبوطها بعد ما سلم وعرف ان احنا كويتيين الله يهداه وايد متشائم وقاعد ويخرعنا من الامريكان

استغرب منه زوجي جان يرد عليه (ليه حضرتك مش عربي) يعني وضح لنا ان معاملتهم مع العرب X يزاه الله خير ماقصر هذا اللي

ناقصنا بعد هالتعب ويقول حق زوجي ان في وحدة قامت تصرخ بالطيارة وتذكر الله هي اللي حفظت لنا الطيارة لوووول طبعا زوجي الحبيب

فظحني وماقصر والكل عرف اني انا اللي صرخت للي عندها فضول وبتقول هالمصري شيايبه يقول عنده امتحان مهم مضطر يقعد جم يوم

ويرجع المهم طول الوقت وانا احاتي وأتدرب بيني وبين نفسي حق الاسئلة والتحقيق والسين والجيم وأدعي بقلبي لاني اول مرة أطب هالديرة

ومعروف عنه هالمطار بالذات انهم صعبين طبعا المطار كان حوسة ولوية وحرررر


ولما يا دورنا ولا ألف حمد وشكر لك يارب طلع الموظف خوووش ريال سألنا اسئلة عامة يعني مثل سبب الزيارة وجم يوم بتقعدون و...

وطلب منا نبصم الايد+العين وختم على جوازاتنا والحمدلله انا هني هم كبيييير انزاح من قلبي ورحنا نستلم جناطنا

بنات ماعليه ادري اني ليلحين ما ونستكم بالصور لاني ماكنت حاطة ببالي سالفة التقرير بالاضافة الى الخوف نساني الكاميرا والتصوير

بس لا تحاتون يايكم الخير يايكم



بعد ما رحنا نستلم جناطنا هني أحب أنوه عن شغلة وأنصح نصيحة للأخوات اللي بيسافرون خصوصا ميسورة احب اقدم لها نصيحتي الاولى:


1- الحرص على وجود خردة مبلغ 5 دولار للعربانه.


لان هناك مافي احد يساعدكم في حمل الحقائب والعربانات تاخذونهم ب5 دولارات


المهم خذينا الجناط ورحنا مستانسين وطايرين من الفرحة اللي ماتمت قالوا لنا روحوا الصوب الثاني أثاري لما كنا بالطيارة عبينا الابليكيشن

طبعا اسألونا اذا كان معانا مأكولات او مشروبات وزوجي حط نعم واحد من ربعه نصحه يحط لا ويفك عمره بس زوجي قال لا شلون اجذب

عليهم هذيلة امريكان يعرفون كل شي بالجنطة ولازم اكون صادق معاهم لانه ماتسوى علينا يفتحون الجنطة ويلاقون الاكل.


ولا هالموظف شوي جد وسأل زوجي عن نوع الاطعمة اللي معانا....وسلمنا الجوازات وانطلقنا الى عالم نيويورك


نصيحة 2- أهم شي تكونون صريحين معاهم ولا تفكرون تجذبون عليهم يعني اذا معاكم أكل لا تجذبون وتكتبون لا.



شافنا واحد باكستاني (طبعا هو أمريكي) وقاله زوجي اسم الفندق وخذا اغراضنا ورحنا معاه ما سألناه عن السعر وهذي كانت غلطة


من التعب كنا بس نبي الفراش ونهبنا نهبه خذا منه تقريبا فوق ال 50 دينار والمشوار أقل من هالسعر بوايد وما اكتشفنا هالشي الا بالرجعة

مع ان احنا رادين بليموزين وطلبناه من الفندق كنا موصين عليه وكان ارخص بس للأسف استغلنا وعرف ان احنا اول مرة نطب هالديرة

فكانت فرصته


نصيحة 3- اذا فكرتوا تاخذون تاكسي اخذوه من شركات التاكسي المعروفه واتفقوا على السعر بالبداية ولا تكررون غلطتنا.


المهم وانا بالطريج اللــــــه خذيت أنفاسي وأقول حق نفسي الله يا الدنيا انا بحلم ولا بعلم انا بأمريكا!! بنيويورك!!

هالمدينة اللي طول عمري أشوفها واشوف معالمها بالافلام الحمدلله يا رب اللي بلغتني شوفة هالديرة وهالمكان وتحقق هالشي بعد ماكان

مجرد حلم بالنسبة لي بيوم من الأيام.


كان الجو عليل ونسماته حلوة وطول الطريج عيوني طايرة على هالبنايات الأثرية الداثرة انصدمت من أشكال عمايرها عمارة كبيرة فيها

مليووون دريشة تحسون الناس متراصصة وفوق بعضها بنيويورك...شببهتها بلندن...أو بانكوك نوعا ما بس ليلحين ما اتضحت الرؤيا

ولندن كانت الأقرب مع ان نيويورك غير لها طابعها الخاص...الطريج كان ززززحمة وعلطول مزدحمة...تشوفون هالناس من كل

فج عميق ومن جميع الجنسيات والديانات....الحمدلله يارب.....الحمدلله يارب



وأخيرا وصلنا فندقنا بعد ما لاعت جبدنا من الزحمة وفندقنا كان

[/url][/IMG]




الفندق كان من فئة ** ونص ورايي بالفندق بصراحة جيد جدا والحلو فيه أنه مجدد عام 2008 يعني كل شي يديد

أحلى شي بالفندق عجبني هو: النظافة + الفراش كان مو طبيعي جدا مريح + الموقع


طلع علينا الفندق : غرفة 2 سرير مزدوج لمدة 5 ليالي السعر 1,010 دولار شامل التاكس

لما حجزناه كان غير شامل الافطار بس لما رحنا هناك قالوا لنا انه شامل الافطار


وراح أوريكم صور للفندق من عدستي المتواضعة

 

[mashmoshi]

التقرير وااايد بدايتة حلوة ناطرين التكملة بسرعه متشوقين لمعرفة باقي تفاصيل الرحلة

 

[semaasem]

تم حجز الفندق عن طريق النت وهذا الموقع اللي حجزت منه الفندق



www.hotels.com



وهذا عنوانه: New York 10001 235 W 35th St



أول ما وصلنا الفندق ولا استقبلتنا ذيج الموظفة الحليوة من ربع أوباما

وقامت تضحك ويانا وتلطف الجو شافت صورتي بالجواز وقامت تتغزل فيني وتقولي لا تشوفين صورتي بالجواز شلون تخرع

خلتني غصب اضحك بالرغم من التعب اللي احنا فيه قالت لنا ان الفطور شامل حجز الغرفة أيواااا استانسنا طبعا وعطتنا كروتنا

وتمنت لنا طيب الإقامة الفندق كان صغير نوعا ما يعني اللوبي مجكنم بس بشكل عام حلو هذا حال معظم فنادق نيويورك حسب مافهمت

يعني مو نفس نظام اورلاندو سمردحه...المهم احنا صعدنا الجناط لان مافي احد يصعدهم مو مثلنا متعودين عالدلع بس جناطهم غير

جناطنا...اللي اذكره ان كانت غرفتنا بالدور السادس



وهذي بعض صور الغرفة




بنات ماعليه الحين بروح الدوام وراح انزل لكم الصور بأقرب وقت

 

[ام البنين2000]

سمسومه حبيبتي انت هني وانا ما ادري توني انتبه

خووووووش بدايه يا الله ناطرين البقيه وكثري من الصور
عااااااااااااااااااااااااااااااااااااااااشت سماسم

 

[شنووفه]

اللله يالله ناطرييين ا لصور لايوقف ايوا ايوا