رحلتنا الى استراليا صيف 2008 بالصور مره ثانيه

[سمسميه]

نزلت الموضوع مره ثانيه لعيون الي طلبوا يشوفون الصور وماكانت طالعه عندهم
وهذا رابط الموضوع الاصلي
http://www.q8yat.net/showthread.php?t=209923&highlight=%D3%E3%D3%E3%ED%E5

السلام عليكم
من بعد ذكر -لا اله الا الله-
يسعدني اشاركم روعة الرحله الى استراليا اغسطس 2008
مدة الرحله اسبوعين واشتملت زيارة المدن التاليه سدني - مالبورن - جولد كوست
اخترنا طيران الخطوط التايلنديه وكان طيرانهم حلو ومواعيدهم حلوه بعد

الرحله الاولى من الكويت الى بانكوك(ترانزيت) وكانت مدتها 7 ساعات تقريبا

هذي صورة الطياره من مطار الكويت

واليكم هذي اللقطه من نافذة الطياره

وصلنا مطار تايلند ويدوب نزلنا على طول كان النداء الاخير للطياره الثانيه من بانكوك الى سدني ومدة الرحله 9 ساعات!!!

صج صج تعبنا من طول الرحله والافضل لو ان الواحد يريح بتايلند شويه يوم او يومين ثم يتابع السفر

واليكم هاللقطه ايضا من نافذة الطياره

يتبع ---

 

[سمسميه]

اول ما وصلنا سدني كان عندهم مغرب وكنا ميتين من اليوع لكن للاسف مطارهم كل المحلات والمطاعم الي فيه مسكره!!
لان الديره اغلب محلاتها تسكر 6 مساءا ما عدى الخميس اعتقد تظل لي ال 9
طبعا فرق التوقيت بينا وبينهم 7 ساعات
على طول خذينا تاكسي ورحنا الفندق(شقق فندقيه)

الفندق موقعه ممتاز كل شي ينراح له مشي ومن حيث النظافه بعد حلو بس للاسف نسيت اصوره من داخل!!
بس فيه عيب كبير!! غرفة النوم الرئيسيه بابها ما فيه قفل!!!!!!!!
وهذي المشكله واجهتنا بكل الشقق الفندقيه الي سكناها البيبان بدون قفل!!

غرفتنا كانت في الدور 75!!



هني اول ما وصانا كان ليل

وهني مغرب

وهني صبح

تحسون مستانسه على المنظر!!خخخخخخخخ

يتبع---

 

[سمسميه]

واجهتنا مشكله وهي ان جناطنا ما وصلوا بالمطار لان نسوهم في بانكوك!!
والصراحه تبهذلنا يومين بدون ملابس !! على الي يينا فيهم من الكويت
احنا لابسين صيفي واهم درجة الحراره عندهم 15 بررررررررررررررررررد
اشوه اني يايبه معاي جاكيتات للياهال دخلتهم معاي بجنطه صغيره بالطياره ووعدونا الخطوط التايلنديه ان من باجر اييبون لنا الجناط لي الاوتيل
اول شي ضاق خلقنا بس لما شفنا الديره اشحلاتها خلتنا نتاقلم مع هدومنا خصوصا ان السوق كله مسكر من الساعه 6 المغرب!!

نزلنا تعشينا جدام الاوتيل اكو مطعم فاتح يبيع اكل تركي حلال كلينا منه بيتزا وتمشينا شويه تالي رحنا نمنا لان كنا تعبانين من الرحله

ثاني يوم اتفقنا مع الريسبشن نبي رحله نشوف فيها معالم سدني وقالت لنا الموظفه جدامكم نص ساعه بس قبل ما يمشي الباص يالله تلحقون عليه
وفعلا لحقنا عليه الساعه 8 ونص بدت الرحله حول معالم سدني والخين اخليكم مع الصور



هذا الجسر الي يم دار الوبرا

وهذي دار الاوبرا

وهذا منظر يطل عليه مرتفع نزلنا عنده سايق الباص للتصوير

لاحظو هالورده الغريبه منتشره عندهم وايد

يتبع---

 

[سمسميه]

وبعد ما خلصت الجوله لاهم معالم سدني وقفنا السايق يم الاكواريم الاسترالي واليكم بعض اللقطات من داخل الاكواريوم



الافاعي

الطيور

وهذا الكولا نايم
الموظفه الي تشرح هناك تقول ان الكوالا ينام 20 ساعه باليوم و4 ساعات ياكل!!
قلت بقلبي اكيد فيه عرج كويتي!!خخخخخخخخ

واكيد ما ننسى اهم حيوان تشتهر فيه استراليا وهو غني عن التعريف

الكنغر

لاحظوا اشلون مرتز حق الصوره!!خخخخخخخخخ

يتبع- - -

 

[سمسميه]

بعدين انتقلنا لقسم الاحياء المائيه واليكم بعض المقتطفات


هذا البطريق الاسترالي الصغير
سلم قلبه

وهذا نجم البحر اشكال والوان سبحان الله

طبعا في صور وايد عن حيوانات غريبه وعجيله بس اغلبهم احنا طالعين فيهم
مرتزين
هذا الي قدت اعرضه لكم
اليوم الي وراه تمشينا بسيدني بالمنطقه الي حوالينا مجمعات وتسوق
بس لاحظت ان سوقهم مو لي هناك ! يعني اغلبه بضايع صينيه او ماركات والماركات ما عندهم اخر كوليكشن يعني سوقنا احلى منهم
سوقهم عادي جدا
سدني قعدنا فيها يومين والثالث توجهنا فيه للمطار علشان نروح لمدينة الثلج مالبورن



انتظروني في الجزء الياي مع احداث مدينة مالبورن

يتبع---

 

[سمسميه]

الرحله لى مالبورن
اتجهنا للمطار الظهر على الطيران الداخلي"الاكوانتوس" مدة الرحله كانت ساعه تقريبا
وصلنا مالبورن وكان حده برررررررررررررررررررررد
اكثر من سيدني واول ما وصلنا كان يطق مطر
شي عجيب جو رائع رائع رائع
طبعا على ما وصلنا الاوتيل وهو "ستامفورد بلازا" صار المغرب وطبعا كل شي كان مسكر!!
هذا عيبهم بسرعه يسكرون

الاوتيل مع انه 5 ستار بس بصراحه ما عجبني تحسون انه قديم ومدودم!!
وهذي لقطه من اللوبي

وبالزاويه صورت لكم هالبوكيه

طبعا حطينا اغراضنا بالغرفه وطلعنا نتمشى شويه حوالين الاوتيل المدينه حيل هاديه وكشخه منطقه راقيه
وبعدين رحنا حجزنا لرحلة الثلج لباجر لان ماراح نقعد الا يوم واحد وراح نمشي
قعدنا من الصبح من الساعه 6 صباحا لان الرحله راح تنطلق 6 ونص بيمرنا الباص
لان مكان الثلج يبيله 3 ساعات ونص على ما نوصل راس الجبل
طول الطريج الصراحه كانت المناظر خياليه وخلابه الصراحه كلمة روعه شويه عليها سبحان الله
الخضره والبقر والغطيطه الي فجاه ندش فيها شي ولا في الخيال
واخليكم مع هالصوره

بعدين كانت معانا حماتي وتعبت شويه من الارتفاع بالجبل الظاهر صار معاها هبوط !!
فلهينا معاها مسكينه وقمنا نحاتيها
ولهالسبب للاسف ما صورت وايد بهاليوم لان كنا محتاسين شويه بس ان شاءالله تكون كمية الصور الي باعرضها كفيله بوصف روعت المكان

يتبع---

 

[سمسميه]

بنص الطريج وقفنا سايق الباص علشان ناجر تكرمون بوتات وجاكيتات لان الدرجه على راس الجبل راح تكون تحت الصفر

خذينا العده وكملنا طريجنا واول ما وصلنا الصراحه فزت قلوبنا من روعة الي شفناه
اخليكم مع الصور


هني الكل قااعد يتزلج ويتزحلق على كيف كيفكم!!
شوفوا بنتي مسكينه طاحت وتزحلقت من الثلج!

واكيد ما نسينا نسوي رجل الثلج ولو انه معفوس شويه!!
خخخخخخخخخخ

الصراحه كان يوم رهيب نزل علينا السنو جنه مطر!!
مطر من ثلج يا جدعان
سبحان الله
وتمينا نلعب بوسط الثلج لما صارت الساعه 3 وشوي ركبنا الباص مره ثانيه لان ورانا درب 3 ساعات ونص لي الاوتيل!
طبعا الياهال نامو بالطريج لما وصلنا الفندق واحنا على طول قطينا روحنا ونمنا من التعب

يتبع---

 

[سمسميه]

ثالث يوم في مالبورن وهو اليوم الي لازم نروح فيه جولد كوست
قعدنا الصبح وقلنا بنطلع نتمشى على ما يصير موعد رحلتنا
تمشينا حوالين الاوتيل دشينا بوتيك جوتشي وشانيل وبعض محلات الماركات
اسعارهم نفس اسعارنا تقريبا بس لاحظت ان التشكيله الي عندهم مو احدث شي

على فكره خل اوريكم فلوسهم (الدولار الاسترالي) يضحكون جنهم فلوس لعبة مونوبولي!!

واحنا نمشي مرينا على هالمعالم

بعدين قعدنا بهالكافيه تريقنا قعدنا بالطاولات الي برا

وطلبنا هالبيض

كلوا منه الي معاي يقولون حلو اما انا اكتفيت بالموكا اللذيذه بهالجو البارد الصراحه حده واااااااااو

وبعدين رجعنا الاوتيل استعدادا للتوجه للمطار للسفر الى محطتنا الاخيره وهي جولد كوست

انتظروني بالجزء الثالث الرحله الى جولد كوست

 

[سمسميه]

اكمل البارت الاخير بالليل ان شاءالله

 

[على الدنيا سلام]

وااااااااو الحمدلله على السلامه بصراحه متشوقه اروح لاستراليا احس دوله ما تطوف ..

 

[Loora]

تــــــــــســــــــــلــــــــــم إيــــــــــديــــــــــنــــــــــج

ســــــــــمــــــــــســــــــــمــــــــــيــــــــــه
:ggdw::ggdw::ggdw::ggdw::ggdw::ggdw::ggdw::ggdw::ggdw:

 

[رزه واستايل]

وااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااو يشوق كملي:lkmnkl:

 

[سمسميه]

نكمل

الرحله الى جولدكوست
توجهنا للمطار الظهر على طيران داخلي"جت ستار" وزنا جناطنا ولا يطلع عندنا وزن!!!
لووووووووووول من اولها وزن
ب الجت ستار حدهم نحيسين ما طوفوا لنا ولا كيلو واضطرينا ندفع
المهم خل اقول لكم عن مطاراتهم تونس بس صغيره مو مثل مطار دبي او ماليزيا كبيره وفيها سوق
لا يعني المحلات الي فيها شويه واغلبها محلات تبيع سوفنير
وتوهم مستانسين ب كريسبي كريم صار له شهرين فاتح عندهم ويانين عليه طوابير

المهم صعدنا الطياره وكانت مدة الرحله حول الساعتين تقريبا واليكم هاللقطات من نافذة الطياره

اول ما وصلنا لاحظنا ان الجو مو بارد دافي شويه!
وعلى طول خذينا تاكسي لي الاوتيل
على فكره نظام التكاسي هناك عندهم حلو --وين ما كنتوا اتدقون على رقم موحد وتعطونهم عنوانكم دقيقتين ولا التكسي عندكم

المهم وصلنا الاوتيل(شقق فندقيه) "Q1 resort"الصراحه حده يهبل ويشرح القلب ,ويعتبر اعلى مبنى في استراليا شوفوا هاللقطات من الاوتيل

هذا ركن من اللوبي

وهني الشقه من داخل

هذا المطبخ

وهذي الماستر روم

لاحظوا السهم الاحمر!!
هذي دريشه زجاج دايركت على التواليت!!
يعني فضيحه الي يقعد بغرفة النوم يشوف كل شي من التواليت!!
بس اشوه اكو ستاره

وهذي زاويه من التواليت

يتبع---

 

[سمسميه]

الاوتيل مكانه وايد حلو وكل شي يمنا ينراح له مشي وايد عجبني الاوتيل
شوفوا الفيو الي تطل عليه غرفتنا

ملاحظاتي على جولد كوست لاحظت ان وايد فيها عرب وخليجيين يعني بالضبط جني قاعده باوتيل بمصر!!
ولويه يعني ياهال وخدم!!
يعني اكو شارع يمنا كل مطاعم وسوق صغير بمنطقة "surfarce peridise" بالليل يصير جنه الهايدبارك كله خليجيين وعبي واكو ناس يطبخون عشاهم واييبونه!!
والله العظيم --لا ويعطون منه المهرج الي يبيع البالونات طايح بريبيع كل يوم عشا غير!!
مو مثل سدني ومالبورن طبعا هالشي لان جولد كوست اهيا الي فيها الالعاب والملاهي والفن كله فيها مثل ماراح تشوفون بالصور

طبعا من اول يوم احنا يايين متشوقين حق ال movie world اول رحله لنا كانت هناك اخليكم مع الصور

هذي صور التذاكر حجزناهم عن طريق الاوتيل واستلمناهم من شباك الموفي وورلد

وهذي صورة البوابيه

من اول ما دشينا الصراحه انبهرنا من حلاة المكان
العاب اتينن ترتيب عجيب وفناتق وشخصيات يعني شغل عدل

هذي صوره للممر الرئيسي الي تصير فيه العروض

حتى الكلينكس الي يتوزع هناك على شعارهم

طبعا في صور اكثر بناتي صوروا مع تويتي وشريك و كات وومن وباتمان وباغز بني و و و
الصراحه الالعاب اتينن وفيها فناتق ما طلعنا منها الا الساعه 5 وهو موعد اقفال ابوابها وكان يوم حده عجيب


يتبع---

 

[سمسميه]

قسمنا جدولنا بالجولد كوست الي قعدنا فيها اسبوع او 8 ايام تقريبا ان يكون يوم لعب ووناسه ويوم سوق في احد مجمعاتهم
الصور الي بحطها لكم الحين من النت لاني بصراحه ما صورت بالسوق
المجمعات الي رحنا لها
australia fair

هذا كبير ويعتبر من اقدم المجمعات عندهم حلو اغلب المحلات موجوده فيه


Robina Town Centre

هذا بعد حلو بس حاليا فيه تصليحات مسددينه شويه

Pacific Fair

هذا احلى واحد استانسنا عليه حتى استايله حلو المحلات برا وداخل

runway village
هذا صغير بس هم حلو
ان شاءالله يكون السبيلنغ صحيح

يعني سوقهم ما شي حاله مو واو من اشهر المحلات الي شفناها متكرره باكثر من مول
target

big w

k mart

mayer
هذا حلو وفه ماركات بعد

كنا نطلع من الاوتيل لي الساعه 5 بعدين نرجع نريح ونتغدى وبالليل نرجع نطلع مره ثانيه مشي حق المنطقه الي حوالينا فيها محلات ومطاعم نقعد فيها لي ال 10 ونرجع انام على طول من التعب
وطبعا الصلوات كنا نصلي جمع تقصير الظهر والعصر بعدين المغرب والعشاء اكو اماكن فيها مصلى للمسلمين وساعات ندور لنا ركن هادي نصلي فيه
وبالنسبه للاكل الصراحه مو لذيذ واحنا بعد كنا نتجنب الايدام علشان سالفة الحلال وعلى اخر الايام طحنا على مطعم ستغافوري يبيع عيش ونودلز طحنا فيه

والحين بحط لكم باجي الرحلات الي رحناهم بالترتيب


يتبع---

 

[سمسميه]

الرحله الى sea world

طبعا نفس الطريقه حجزنا بالاوتيل ورحنا استلمنا التذاكر من الباب للسي وورلد
اول ما دخلنا صعدنا هالتلفريك علشان نشوف معالم المكان

وبعدين نزلنا وقمنا نتمشى على ريولنا ونشوف المكان


طبعا المكان كله عن الاحياء المائيه مثل الدلفين ونجم البحر واللخمه والقرش و و و
شوفوا الدلفين والماي اشلون صافي

وبعدين رحنا لمدينة الالعاب الي داخل السي وورلد وكان الثيم مالها syseme street

استانسنا فيها وشرينا خرابيط وتيشيرتات على شخصيات السيسيمي ستريت
وما طلعنا منها الا وهي تسكر ابوابها الساعه 5



يتبع---

 

[سمسميه]

الرحله الى infinity

هذي لعبه اتينن حدها فن ووناسه رحنا لها بالليل لان مكانها يمنا رحنا لها مشي

طريقتها يعطونكم قفازات وجوارب بيض تلبسونهم وتدشون مكان ظلام بس فيه اضاءه ليزر ما تشوفون الا الليزر وانعكاس الليتات على القفازات والجوارب

والارضيه مره تصير جام!
ومره تصير مثل النقازيه!
ومره الجدران مرايا! ومره اشياء منتفخه تفقص!
واشياء مدندله من السقف مثل المطاط!!

يعني حدها تونس وفن اشياء غربه واخر شي يصورونكم صوره تذكاريه لان ممنوع التصوير بالكاميرات الشخصيه داخل نفس هالصوره

يتبع---

 

[سمسميه]

الرحله الى دريم وورلد dream world

ايضا هذي ما اشهر الملاهي الي عندهم بس انا اعطيها تقييم 8 من 10 الي شفناهم قبل احلى منها لكن هم استانسنا فيها وشفنا فيها اشياء غريبه وحلوه

هني رحنا شفنا جزية النمور وصورنا هالنمر الابيض سبحان الله

وبعدين شفنا بيت الbig brother
الي صوروا فيه النسخه الاستراليه

وبعدين رحنا عالم ال nickilodion
وهذا عاد كيفوا فيه الياهال كله العاب وملاهي ونطاطيات وهالسوالف
وصوروا فيه مع شخصية السفنجه وربعها

وشرينا بعد تيشيرتات وكبابيس ومداليات على شخصياتهم

هذا الطاووس كان قاعد يتمشى معانا طالعوا اشحلاته سبحان الله

ومثل كل مره طلعنا منها على الساعه 5
يتبع---

 

[سمسميه]

الرحله الى كافيه minus 5 المثلج

هذا الكافيه درجة الحراره فيه -5 برررررررررررررررررررررررررد



قبل ما اتدشون يعطونكم جاكيتات وقفازات وجواتي لان داخل وايد برد ويعطونكم جهاز بيجر يرن لما تكملون نص ساعه داخل علشان تطلعون

يقدمون لكم داخل منيو تختارون شنو تشربون طبعا الاختيارات الغير كحوليه شويه فاخترنا عصير الاناناس والبرتقال
ولازم نشربه بسرعه قبل ما يتحول ثلج!!!!!!

من داخل كلشي مصنوع من الثلج الطاولات والكراسي والقلاصات كل شي مثلج!

وقبل لا تطلعون يصورون صوره تذكاريه نفس هذي لان الكاميرات الشخصيه ممنوعه داخل

يتبع---

 

[سمسميه]

الي لاحظته على اهل البلد انهم وايد مضيافين ويرحبون بالسواح وبنفس الوقت حيل حيل نظاميين ومرتبين
البلد وايد وايد نظيفه وما شفت ولا قطو بالشارع
بس الي تشوفونه ومنتشر بكل مكان خصوصا المناطق القريبه من الشاطىء هذا الطير

عاد ايي مندفع يجبل على الويه!! يخوف
واكو طير ثاني بعد اكبر منه اسمه ibis عاد هذا صج يخوف وما يغشمر عادي يطب على الطاوله ويبوق الاكل!
مسكينه حماتي طب عندها وخطف بيتزتها! لووووووووووووول

في عندهم رحله برمائيه شكلها حلوه بس الصراحه ما مدانا نروح لها وهي عبارره عن باص يمششي على اليابسه ويدش بالماي !!





يتبع---