رحلتي سان فرانسيسكو .. لاس فيغاس .. لوج انجلوس .. صور

[ام حمادنه]

اول شي احب اقول للي يحب امريكا بجنون ومتعلق فيها موضوعي مايصلحلكم لاني مابي معارضات انا هذا رايي

بدايه

قررت اروح امريكا نظرا للكلمه الشهيره اللي لوعو جبدي فيها ( امريكا غير )

انا مادري بشنو غير صراحه

بس خلوني استرسل (اهم شي الاسترسال لووول )

بنات انا طبعي نادر مااروح الديره واذمها او مااستانس فيها كل ديره لها جو خاص ووناسه وفيها شي يريح

قررنا نروح امريكا انا وزوجي نظرا للمدح الغير طبيعي عليها. من اهلنا وربعنا وتقارير المنتديات السياحيه

كنت ابي نيويورك واورلاندو

بس كل الحجي والكلام والنصايح قالت لنا انه اورلاندو عائليه واكثرها حق جهال غير حذي حاره وانا مستحيل اقط فلوس علي بلد حار اقعد بالكويت ابركلي انا اهم شي عندي بالسفر الجو والسوق والعمران صراحه

فقررنا وجهتنا تكون سان فرانسيسكو .. لاس فيقاس .. لوس انجلوس

 

[ام حمادنه]

سان فرانسيسكو لان قالولي تعتبر اهي اوربا الامريكيه طبيعه جو ووووو قرقر واجد

لاس فيغاس حلوه فنادقها ومولاتها ومدينة الانوار وووخخخخ

لوس انجلوس اهي المدينه السياحيه والسوق وهوليوود وترللي كرللي

حتي لما استشرنا اهلنا وخبراء امريكا بالمنتديات وحتي اللي يشتغل بسفريات قال تعتبر احسن الولايات للسياحه

توكلنا علي الله وفيزنا وحجزنا عاليونايتد.

الطيران حيل حلو من اكل وراحه وخدمه حتي افضل من اللفتهانزا والبرتش بنظري

بنات علموني شلون انزل الصور من الجلكسي ماعرف

 

[فرزاشيهـ]

متاابعتج عااد كان خااطري رحلتي الجايه تكوون لامريككا لاني توني راده من السفرر


بس ماسنعت لها مدح مثل اوروبا بس كلام الانترنت و الافلام مو مقصرين ف ناطره تقريرج

 

[فرزاشيهـ]

نزلي برنامج اسمه دروب بوكس اسهل برنامج لرفع الصوور موجود بالسووق بلاي بالجالكسي

 

[ام حمادنه]

وصلنا واشنطن ترانزيت استقبال الموضفين لنا صراحه حلو نفسيتهم حلوه ومافي مثل ماقالولنا تحقيق وخرعونا. حيل حلويين

طرنا من واشنطن الي سان فرانسيسكو ست ساعات يعني التوتل طيران 19 ساعه ياساتر مادري شلون عدت
طبعا الطيران الداخلي كئيب وتعيس هم اليونايتد بس فرق عن الدولي

وصلنا اوربا الامريكيه سان فرانسيسكو .. وسكنا في اليونيون سكوير يعني قلب المدينه ..
شارعنا في محلات ومطاعم اهو الشارع الحي بس صغير . لاتتخيلون انه اكسفوورد او المارين بلاترز ولا الاوبرا لالااالا صغير حيل يخلص بسرعه

يعني سوري بس هذي اوربا الفقر مو اوربا مع احترامي.

من وصلنا لين رحنا لامطره ولاقطره هذا غير الشمس انا مادري شلون شمسهم تصلخ صلخ حاااااره وان وقفتي بالظل متنا برد جو معقد الحمدالله والشكر ..
وشوارعهم وبيوتهم ذكرتني بلبنان طبيعه اقل من عاديه تكاد تكون موحلوه
السوق عااااادي يعني سوري بس سوق لندن يفوقه بدبلات الدبلات .. رخيص رخص التراب .. جذاب ومشلوعه عينه اللي يقول رخيص التاكس بروحه مبلغ الرخيص عندهم الجمعيات تارغت وول مارت
وبالنسبه للماركات مافرق عن اوربا بس لندن احلي منهم. مطاعمهم عاديه مورخيصه يعني ريوقنا في اي هوب بيضين وجاي 15 يعني مايعتبر رخيص. صراحه

جيز كيك فاكتوري اللي مادري اكله شنو في زود عن فرايديز وشيلز اللهم الكيك بس عجيب

طبعا انا رحت اماكن في سان فرانسيسكو ربعنا واهلنا اللي راحلوها قبلنا ماشافو اماكنا .. بير 39 مطاعم عالبحر ومحلات سيفونيرز مادري شنو المميز اللي ذبحوني من الكويت يقولولي لايطوفج يعني اوكي المكان حلو بس مو اللي واااو ياالهي ..
سالساليتو عجييييييبه لان طابعها اوربي تهبل بس حسافه صغيره بسرعه تخلص

رحنا السجن الكتراز حلو ماعليه ونيس جنه فلم

خلصنا سان فرانسيسكو وركبنا طيارتنا ورحنا لاس فيغاس

 

[ام حمادنه]

فرزاشيه مشكووره حبيبتي الحين انزله

 

[فرزاشيهـ]

شووقني مووضووعج ابي راايج بالنهايه هل تستاهل الرحله او لا

 

[ام حمادنه]

صور من سان فرانسيسكو

 

[ام حمادنه]

مادري شفي الصور ...

خلوني اكنل واخلي الصور اخر شي

 

[ام حمادنه]

وصلنا فيغاس ...يمكن اقدر اقول انه هذي اهي اللي كرهتني بامريكا والله واقسم بالله اني وانا اتذكرها االحين تقلب جبدي
لوووووووووعه حررررررر شمس تصلخ بالعربي صحرا حتي زوجي يقول شنو جاي البحرين نفس المباني خصوصا الصبح فنادقهم االي ذبحوني فيها شفت بدبي احلي منهم مليون مره
غير شعبها الغير محترم يخزون الحجاب ويعلقون لوعو جبدي يعلقون عالحجاب ماعلقو عالاشكال الوصخه اللي عندهم وحده شمتنها مطلعه كرشها وتمشي بثقه غير السكاري المقططين بكل مكان

مولاتهم حلوه نفس طقة الكويت ودبي افنيوز وربعه محلاتهم والله ماشفت شي بهرني الكويت ترست عينه اللهم لك الحمد طبعا اللي يقولولكم الامريكان حلويين مايعرفون هذول همج يعني واحد يبيع بمحل ينكتلج ويقولج قف مي فايف عادي ..طبعا كل الناس تبي بقشيش التاكسي يبي فوق االعداد بقشيش له والمطاعم يدور فوق راسج. يذكرج انه كل شي بتحطينله راح يرجعله
يعني مره سويت تريتمنت لايدي ورحت دفعت فلوس جان تقولي جم بتعطين اللي سوتلج بقشيش !
هذا وانا دافعه فلوس الترتمنت .. شنو مصر !
وبعد ياحليل مصر جنيهين ويسكتون .. هذول لا يبيون عشرين دولار وطالع چبح

ودخلنا شوو ديسوليه الساحر ديفد والله حلو اهو احلي شي بفيغاس التعيسه

 

[sweet lady]

الحمدلله على السلامه
تصدقين انا مارحت لها وكل اللي أعرفهم يمدحونها ويطووفج نص عمرج اذا ما رحتي ومن هالكلام
بس مستقبليا بروح امريكا بس شكلج ماتشجعيين بالمره *

 

[ام حمادنه]

خلصنا من فيغاس الله لايعود الشر واتجهنا بالسياره الي لوس انجلوس الطريج اربع ساعات ... ااااه لاتتخيلون انه طريج النمسا والمانيا ولا لندن وبرا لندن لالالاا.صحرا ااا بررر تراب

بس باقي ناس يخيمون ويصير السالمي .. انا اقول لزوجي طول الطريج الحين بتطلع لنا لافته مكتوب صبحان ولا الوفره وزوجي يقولي قصدج شقرا واشيقر وام الجماجم لووووول

الشمس تصك العيون والله احسها بين حواجبي ياساااااتر

وصلنا لوس انجلوس

اقدر اقول حللها الله احسن مكان بكل رحلتي .. بسسس تقولولي تنصحينه فيها لا والله ماتسوي العنوه وودرب الطياره .. لا روحو اوروبا تكفون ارقي واحلي وابرد وابرك

المهم سكنا في بفرلي هيلز

ياجماعه افهموني عشرين يوم ماغيمت علينا شمس شمس والله صرت دعمه ( طبعا ياكثر اللي قالولي لا تبين طبيعه روحي الاسكا ... تبين مطر وجو روحي شيكاغو !! لحظه يالربع. وانا حالتي بتصير ابي مطر اركب طياره ست ساعات واروح للمطر بالاسكا .. واذا مليت ابي طبيعه ركبت طياره ست ساعات رحت طبيعه واذا ابي سوق ركبت طياره رحت ولايه كلها سوق !" لوووووول ياسفرتن قشره عزالله ))

رحنا شارع. هوليوود بوليفارد حلووو ونيس بس صغير يعني اصغر من شارع سالم المبارك وفي ناس لابسين متنكرين تصورين معاهم ورحلات تور

خذينا رحله تودينا بيوت الفنانين طبعا اهو مو بس توديكم بيوت الفنانين يودونكم مطاعم واماكن يحبونها الفنانين الممثل والمغني عندهم شي مقدس استغفرالله ... التور هذا عجيب وناسه رحنا بيت مايكل جاكسون جينفر لوبيز كيم كرديشيان وجوني ديب ووواااجد

بعدين ثاني يوم رحنا يونفرسال ستوديوز صراحه عجيب يهبل يهبل

ورحنا دزني لاند فاااااااشله كلها العاب جهال وممله والتذكره الواحد 35 دينار علي خرابيط

رحنا لاهويا حلوه بحر ومحلات حلوه ماعليها

رحتا الاوت لت ديزت هل طبعا رفعوه السما لي .. اوت لت سلوفلكيا اللي يبعد عن فيينا ساعه احلي مليار مره منه

طبعا انا قعدت عشر ايام تخيلو اقول لزوجي عقب خمس ايام وين نروح نبي نصرف خخخخ ماندري وين نزوح كل مكان رحناله

رحنا سوق بفرلي هيلز الماركات حلو ماعليه
رحنا ماليبو اللونق بيتش مافي شي مميز



بناااااات والله مااقص عليكم والله ماتسوي مافيها شي يسوي

واكتشفت بعدين انه كل اللي مدحولنا امريكا ماشافو اوروبا
بنات والله تري شريجتي موامريكيه لووووول بس جد جد انتو ماتدرون الصوره اللي كنت حاطتها لامريكا في بالي اانعدمت

الحين لما اشوف فلم اقول بيني وبين نفسي جذابين ديرتكم تلوع الجبد

بنات حرام ماتسوي 20 ساعه ماتسوي الفلوس ماتسوي والله والله اني ماعمري كرهت دوله جذي

طبعا انا رحت بالهالويين كل مكان قرع لوووول

بنات روحو اوربا هههههه والله عالاقل جو نظيف شعب راقي اماكن ترد الروح مطر غيم رقي

وبس هذي تجربتي لامريكا التعيسه ... وان شالله بحاول انزل صوري

 

[ام حمادنه]

اي بنات بقولكم شي صدمني لما رديت وقلت رايي بامريكا

شكثر قالولي مدحيها حتي لو مااعجبتج انتي رايحه امريكا مو اي احد يروحلها

اكتشفت يابنات انهم يمدحون امريكا بس عشان مايفشلون نفسهم ..

انا انصدمت في ناس جذي ! شنو المشكله اذا قلت رايي بدوله يعني انا سافرت غيرها واعجبوني .. وين المشكله اذا رحت دوله وماحبيتها !! هذا رااي وبقوله وين الفشله والعيب مادري ... عقول الله يكفينا شرها

 

[عيون&الريم]

ههههههه ههههههههه هههههههههه ياحياتي والله فعلا انا 3مرات رحت لاس فيغاس صحرااا وحر بصيف اما الشتاء بررررد انا متحجبه ومحد تكلم مع اني ارد الفندق متاخر وافترر بكل مكااان بالعكس ماشفت شي منهم ...التكاسي ناااااااااااااااااااااااااااااار ااجر سياره ابرك لي هههه انا رحت من فيغاس لي لوس انجلوس بسياره ههههه صحرااا حررااا منظر يخرع ماكو احد
دزني لاند جدا رائعه حدي استناست فيهاااا يمكن لاني صغيره واحب الالعاب وجو دزني ..رفيجاتي كلهم يقلون دزني فلوردا اكبر واحلئ من كلفورنيا وشفت فيديو عنها فعلا اكبرررررر واحلئ .....مطاعمهم غاليه...الصيف بامريكا ببعض الاماكن مووت الكويت ابرك والبعض ابرد ....

 

[فرزاشيهـ]

ههههههههههههههههههه شكله حدج كرهتي امريكا

بس شووفي للامانه يمكن انتي كنت راسمه فكره انها بتكون اب براد و مستوى اوروبا

انا اعرف نااس راحو دول شرق اسيا (ماليزيا / الفلبين / الهند ) دروا يسبون و متحسفين و حر و رطوبه يبه انت رايح دول استوائيه شنو متوقع ثلج مثلا !!

بس فعلا كلامج الافلام مرفعه مستوى امريكا حيل و كانها مثل اوروبا وانه جوها بارد و الخ .،،

ثانكس عل تقرير ناطرين الصور

 

[SILVER ROSE]

هاردلك حبيبتي
تعوضينها بسفرة ثانية..الحياة تجارب

 

[فجورتي الحلوه]

حطمتيني لاني كنت ناويه اروحلها بالصيف ان شاء الله بس خلاص غيرت رايي
انزين انتي بأي شهر رحتي ومن تاريخ جم لي جم قعدتي فيها
والله يعوضج بسفره احلي ان شاء الله والاهم انج جربتيها والحياه تجارب

 

[ام حمادنه]

انا رحتلها من نص عشره لي اول. 11

 

[حناينq8]

معوضه حبيبتي
بس اتمنى اشوف صور للرحله اذا تقدرين

 

[حبيت طيفه]

مشكوره علي صراحتج وعسى الله يعرضك بسفره احسن منها عاد انا كنت شايشه علي امريكيا بس كل مااذكر ان طريقها طويل اهون اقول خليني علي اوربا احسن وطريقها مقدور عليه