رفيجتي جذبت علي .. أحسها كبيره في حقي !

[جاكليت]

بنات أنا عندي رفيجه وايد أعزها
واهيا تحبني وايد بس اتصدقون صار لها موضوع وجذبت علي وانا بالصدفه عرفت الصج وااايد تكدرت و زعلت بس ما قلت لها واهيا وصل لها خبر اني زعلانه فدزتلي مسج تقولي انا توني أدري انج زعلانه وتحلف انها تحبني وايد
طبعا انا لما دريت انها مجذبه علي ما قمت ارد عليها لأنه بالنسبه لي قويه في حقي ان صديقتي اتجذب علي .. انتو شرايكم؟

 

[*أبلة*]

حبيبتي

عطيها العذر

ما تدرين شنو ظروفها

او شنو السبب اللي خلاها تجذب

طبعا احنا ما نبرر الجذب

بس يمكن ما تبي تكدرج .. او الشي اللي خشته عنج يمكن يجرحج او يزعلج او لاي سبب ثاني

ارد واقولج عطيها العذر

لا تخلين الشيطان يدش بينكم

تصير .. والله تصير .. حتى بين الخوات

احسني الظن فيها وردي عليها وتكلموا بالموضوع من غير زعل ولا عصبية

ترا مو حلوة تخشين بقلبج واهي تحاول تكلمج وانتي حاقرتها

اذا تبي صاحبك دوم حاسبه كل يوم

الله يهدي النفوس ويخليكم حق بعض

اللهم آمين

​

 

[DeSeRt RoZe]

واجهيها عشان تعرفين سبب جذبها
وبعدها يصير الحساب
بس لا تظلمينها
يمكن يطلع سبب الجذب شي كبير ولمصلحتج

 

[UNiQe^PRiNceSs]

حبيبتي لاززم تواجهينها وتعرفين السالفه بالضبط
وليش اهي سوت جذي
ما يصير تتهربين منه .. عشان لا تخسرون بعض
انتي ما تدرين اهي ليش سوت جذي هطيها فرصه

 

[حورية فلسطين]

لازم تعطيها فرصة وتعرفى منها ليش كزبة عليكى
ممكن لشيئ وخايفة هاد شيئ يجرحك اكثر من اى شيئ تانى
حاولى تقعدى معها وتعرفى سبب الكزب عندها

 

[آلسحرآلحلال]

لازم تسألينهااا ..وتعرفين السبب

 

[مجنونة بس عاقلة]

واجهيها واعرفي السبب

 

[!! الواصليّـــــة !!]

واجهيهااا .{
بس لما تحسين انك ريلاكس ومومتنرفزه .. لأنك لو واجهتيهاا وانتي متنرفزه بتكبر المشكله ما تنحل !
.

إسأليني انا :/

..

وطبعا مايحتاج اوصيك عليهاا وانك ماتفرطين فيهاا اذا انتي شايفتهااا صديقه قريبه لك وبينكم عِشره .{
وتذكري اننا كلنا مانخلوأ من العيوب
والكمال لله وحده
..
ولو نبي صديق خالي من العيوب بنعيش بدون صديق طبعاً
..
؟

 

[Ocean]

واجهيها وشوفي ليش جذبت ... يمكن عدها ظروف او منحرجه منج ... و انشالله تردون احسن من اول

 

[alb7ranya17]

ذاا الله يسامح احنا شنو يالعبيد ما نسامح توكلي وسامحيها وبلاش الزعل

 

[Bq]

سامحيها الانسان مو معصوم عن الخطأ
ويمكن اهي اضطرت تجذب صج انها
اكبيره اب حقج بس المسامح كريم

 

[سعودية!!!]

عطيها فرصة.:...الله يصلح مابينكم...صدقيني انت ماكتبتي لنا الا انت شاريتها ليه تصرفاااتك تخسرهااا :|

 

[• قلبه نصيبي •]

كلميييها وسأليها ليش جذبت عليييج !

 

[ام حديجان]

عطيها فرصة توضح لج السبب

وو


المسامح كريمـ

 

[شوق00]

رايي راي خواتي لا تسكبين فيها واجهيها وتفاهمي معاها
وشوفي عذرها شنو وليش سوت جذي بس لا تتركينها

 

[جاكليت]

يعطيكم ألف عافية يا قلبي

 

[pride&prejudice]

أنا صارت فيني مع صديقتي لا تبنين حواجز بينج وبينها وتخلين الزعل يطول عذريها يمكن كان عندها ظروف لمن تهدين كوني مستعدة تسمعينها وتفاهمي معاها لا تهدمين علاقة صداقة علشان غلطة يمكن مقصودة لكنها صغيرة والله يردكم حق بعض ولا يفرق بينكم

 

[@فطفوووطه@]

صارحيها واساليها ليش جذبت عليج هذا اذا تحبينها واجهيها عشان تستمر صداقتكم والله لايفرقكم

 

[كريستال ليدي]

كلميها و عرفي السبب و بعدين حكمي

 

[spanish-girl]

اكيد في سبب خلاها تجذب عليج حبوبه عطيها فرصه وسئليها شنو السبب والكلام اخذ وعطى لا تسدين الباب دام انكم تحبون بعض لا تخسرون بعض