روايتي الاولى : (دليسا )

[سمراء اليل]

مشكوره لولوه علي ثلاث بارتات باليو مدري شنو اقولج بس شنو يعني كلمه سليب اول مره اسمعها

 

[Lolwa]

الفصل الثامن والثلاثون​

يروح رائد عند زوجته بعد ماخلصوا من كشفها وفحصها ​

رائد يشوفها تفتح عيونها :آآآآآه
رائد يفز : الحمد لله عالسلامه
فتون : الله يسلمك رائد
رائد : شلونج الحين ؟
فتون : الحمد لله ...آه مع انه راسي ليلحين فيه الألم...شقال الدكتور ؟> ----- خايفه
رائد : مامداني أكلمه كان وايد مستعيل بس هو شاك إنه فيج صرع ؟ انتي فيج صرع من قبل ؟
فتون : صرع ؟
فتون بقلبها : ما توقعت يقول ؟ عبالي بقول ضغط مرتفع .أي شي ثاني ؟
أول مره أسمع بهالمرض ...ماياني إلا وياك !! ​

( تطالعه بطرف عين )​

رائد : يعني ماياج وإنتي صغيره ؟
فتون بويه بريء : لأ!!
رائد ياخذ إيدها : سامحيني فتون ..أنا قسيت عليج وايد...
فتون طاقتها البوهه وبقلبها : وناسه من وين ياني هالدكتور اللي الله حاذفه لي من السما ...حظي حده حلو !!!اللي خلا رائد يصير حنون وياي فجأه ...وخلاني أهون عن الخطه اليايه !!!!
رائد : تأكدت ألحين إنج تحبيني ..كنت وايد قاسي عليج ..سامحني..ويحط راسه عندها ويبجي وتمسح براسه
فتون : مسامحتك ...قلبي وسيع ...وحبي لك مايختفي بيوم وليله ...
رائد : لأنج أصيله يابنت الأصايل ...​

فتون تستحي ​

رائد ياخذ التلفون يبي يدق على أهلها ​

فتون : شتسوي؟
رائد : أدق على أهلج أقولهم عنج ...
فتون : لأ لأ ..ترى ألحين الحاله ترد علي ..و لازم ما أنفعل علشان الحاله ماترجع ... ​

رائد : وليش تنفعلين إذا يوا أهلج ؟

فتون : آه آه ...مابيهم يضيق خلقهم علي لأن أول مره يصير فيني هالحاله ...الله يسامح اللي كان السبب ...
وانت موتبين لهم إن صار فيني جذيه ...مابيهم يضيق خلقهم ويكرهونك .....( تلف ويهها لكنها تطالعه بطرف عين )
أنا بنام الحين ...والمستشفى مايرضون يشوفون ريال هني لأنه قسم حريم ..ما أبيك تتفشل ..آه روح يالله آه رووح ......
رائد : أوكي أييج باجر عيل ..​

فتون تبتسم : اي أوكي أوكي ..​

ويروح رائد​

وبعد فتره يوصل الدكتور
الدكتور : شلونج ألحين ....( يقرا الكشف ) ....فتون ؟
فتون : آي بعدي تعبانه دكتور ....
الدكتور يشوف تحاليلها : لا لا لا ..أحنا صحتنا مثل الحصان ..الفحوصات تقول إن مافيج شي والحمد لله ...بس حالتج وانتي يايه شبيهه بالصرع ..غريبه ؟
فتون تتوهق :اي يمكن صج صرع دكتور ؟
الدكتوريضحك : لا يا بنتي اذا هذا اللي فيج صرع ووأنا أقرى التحاليل غلط ؟ عيل خل يصادرون مني شهادة الدكتوراه ...هههههاااااهاهاي...
فتون : ؟؟
يمسك الدكتورنبض إيدها ويشوف ساعته
فتون : يمكن عيل اللي صار فيني حاله نفسيه دكتور ؟
الدكتور : والله ما أدري الدكتور النفسي أهو اللي يشخص الحاله هاذي ...
عالعموم وين زوجج ؟
فتون : طلع ..لأن الحين منعوا الزيارات..
الدكتور : غريبه ؟ منع الزياره الساعه ثمان ونص والحين ست ؟
فتون بقلبها : شفيه هذا يحب يتحشر وايد ؟ وشكله رقله ؟​

الدكتور : بس حبيت أطمنه لأني غلطت وقلت حق زوجج المسكين انه فيج صرع وقوي وبغيتي تنشلين ههههه ...المسكين وايد زعل ... معذور يابنيتي ...الشغل وايد لود علي اليوم ...وموراضي أثبت عدل ...ماعليه نقليله سلامي وتعذري لي منه...بعد لازم الواحد يسوي شغله بأمانه هالأيام ...مايدري شنو يحوشه بعدين يموت ؟ ينشل ؟ يحترق ؟ كلشي جايز!!!!​

ويطلب من السستر تسوي أوراقها الخروجيه ..​

الدكتور :...يالله فايزه ماتشوفين شر إنشاء الله
فتون : مو فايزه إسمي فـــــ...!!!!​

ويروح الدكتور ويحاجي السستر : مايه البديل؟؟ تراني مداوم صارلي 24 ساعه ماظقت فيها الراحه ولا النوم قمت أطق روس؟
السستر : لأه دكتور لسه ماجه ؟
الدكتور : دقي عليه هالسرسري طيح الله حظه ...
السستر : منا دئيت عليه بس مايــــ .....​

ويروحون بعيد​

فتون :؟؟؟؟
شالدكتور السكران ؟ بس أشوه صار من حظي ...وتضحك​

وتدق على ريلها وتقوله إيجيها , ويردلها , ويسوي الأوراق ويسأل السستر : يعني عادي ترد البيت الحين ماعليها شر؟ ​

السستر : آه عادي هيا ما عندهاش ....
فتون تقاطعها وبصوت عالي : اي عادي عادي ..يالله سوي الاوراق بسرعه ...ترى بدا راسي يعورني ...
وتطالع زوجها :رائد راسي يعورني لا تتكلمون وايد وإلا ترى أتعب والحاله ترجعلي !!
رائد خايف ويسانعها: أوكي أوكي ..ويمسك إيدها ....يالله سستر بسرعه واللي يعافيج حدنا مستعيلين ..
السستر : !!!!
مو مخليه السستر تنطق بكلمه....تخاف لا تغلط بكلمه يمكن توديها بداهيه ..فكلما تكلمت إصرخت اهيا وراها ​

وماصدقت خلصوا​

وهما رايحين​

السستر تناديهم :لوسمحت أخ رائد !
رائد : نعم ؟
السستر ماسكه أوراق وأشعه : مش عايزين التحاليل؟؟
فتون معصبه : خليهم عندج ...يالله رائد ودني البيت تعبت
رائد يمسكها من خصرها : إنشاء الله يالله إمشي ..
فتون : آي آي ..​

السستر تكلم زميلتها : ايه ده ...شيء غريب والله هي..أول مره تمر الحاله دي عليا ؟
زميلتها : منتي قديده ...حتشوفي حالات كتييييير ..
السستر :؟!!!!!؟؟​

رائد بالسياره وهو يسوق : يالله الحين تردين البيت وترتاحين ان شاء الله مايصير فيج الا العافيه ...
فتون : آه آه ..اي إن شاء الله
فتون بقلبها وهي تبتسم بمكر : دام إن الخطه الأولى فشلت ..مايرقعها إلا خطه أقوى منها...
ما قدرت تمسك روحها وفلتت منها الضحكه ​

وتحط ادها على حلجها وترفع راسها مع ضحكة الانتصار ​

هها ها ها ها ها هاااااه​

رائد : شفيج ؟
فتون : ها ؟ اي ..اي ...تذركت نكته قالتها لي السستر وضحكتني ..
رائد : متى ؟ لمن كنت طالع ؟​

فتون : إي ..

رائد : قوليها خن نضـــــــ...........​

ويسولون ويضحكون ​

ويطيح الحطب ​

وهم بالسياره ​

إلين​

فراش الزوجيه !!!!​

 

[sweet.sanfoora]

امبييه ف فتوون حقيرة ! حلاته يحووشها صرع صججججج

وبثث

ثانكيوو يا عثل

 

[39la o f9la]

Ahm shy !! Ftoon 78eera wai3
5l t9eer feha 9j 3shan t7is*

 

[Lolwa]

sweet.sanfoora

39la o f9la


ثانكس عالردود الحلوه والحماسيه

وفتون شخصيه مغايره لبطلتنا دليسا
لكنا نشوفهم بنفس قوة الشخصيه وعدم رضوخهم للإنهزام

انزين سؤال لمتابعيني الحلوين ؟
هل القصه فيها خيال زايد عن اللزوم ؟
والا المستوى متوسط بالنسبه للخيال ؟؟؟

أمبيه ناطركم وايد مفاجآت
أستمربالمفاجآت والا مصختها ؟

أرجو انكم ما تحقروني وتجاوبون على اسألتي بما اني أول مره أكتب

وثانكس

 

[سمراء اليل]

يمااي من فتون بس بصراحه البارت صغير شويه

 

[Lolwa]

بحط بارت بعد اشوي

 

[sweet.sanfoora]

انزين سؤال لمتابعيني الحلوين ؟
هل القصه فيها خيال زايد عن اللزوم ؟
والا المستوى متوسط بالنسبه للخيال ؟؟؟

أمبيه ناطركم وايد مفاجآت
أستمربالمفاجآت والا مصختها ؟

أرجو انكم ما تحقروني وتجاوبون على اسألتي بما اني أول مره أكتب

وثانكس


بالعكس ما فيها خيال زيادة عن اللزوم احسها واقعية !

واستمري بالمفاجلآت قلب

ما عاش اللي يحقرج

وبثث

ثانكيوو

 

[سمراء اليل]

انزين سؤال لمتابعيني الحلوين ؟
هل القصه فيها خيال زايد عن اللزوم ؟
والا المستوى متوسط بالنسبه للخيال ؟؟؟

أمبيه ناطركم وايد مفاجآت
أستمربالمفاجآت والا مصختها ؟
لا حيالها و زايد بس استمري بالمفأجات

 

[سمراء اليل]

اف بالفون اللي باط جبدي الخطا: لا خيالها مو زايد

 

[Lolwa]

أوكيه

ثانكس حبايبي

 

[Lolwa]

الفصل التاسع والثلاثون​

بقهوة طلال بالليل ​

طلال صاحب القهوه ...عمره فوق الأربعين ..لكنه مومتزوج ولا يفكر بالزواج لأنه مايحب يتقيد بمراه معينه !!!!!!...تعرف عليه بدر من جم سنه بالشاليه ...وبعدين بطله طلال محل القهوه هذا...وبدر وايد يرتاحله ويفج قلبه له لأنه يدري انه عاقل وله وقاره (باستثناء الحرام اللي يمشي فيه !!!!)
و اذا حب يزوره ويستشيره في أموره اللي مضايقته ...يلجأله دايما عنده بالقهوه ... ​

طلال: هلا بوناصر( اللقب المشهور فيه )
بدر : هلا بومبارك ...ويرفع ايده للكل ....شلونكم شباب ...
الشباب : هلااااا بونصووور..
طلال : اقعد اقعد ..منزمان ماييت القهوه ؟؟؟
بدر : بعد شسوي والله أشغال..ومشاكل .
طلال : اي معذور ...سمعت أهلك طردوك من بيتهم !!
بدر : لا ما طردوني ..بس أنا بغيت أعيش بروحي من غير ما أحد يتدخل بحياتي ...ووايد أريح ان الواحد يعيش بروحه ..
طلال : حظك عندك بيت وارثه من الوالد الله يرحمه ... عيل احنا !!! لازم نتزوج علشان نحصل بيت وانطر قرن علما اييك الدور ههه...
بدر : ها !!! بومبارك !!! وبعدين وياك ..ناقصني عين أنا !!اذكر الله ...
طلال : ههه شدعوه بونصور ليش عين ......قط مره حسدتك أنا ؟خلاص خلاص ماشاء الله ...باااال !!!!
بدر : المهم ....طلبتلي الشيشه ؟
طلال يحاجي الصبي ماله : يا مديح ..واحد فخفخينه لبومبارك وخلك خفيف ها..بسرعه ..
بدر : موتسونها حريجه نفس آخر مره ....احرقتني وبلاعيمي صار فيها مثل الصلبوخ اقطع اقطع منها ..
طلال يضحك : لا ماعليك ...صج ان مديح توه جديد هني لاكنه مصيره يتعلم ...لاتركون عليه انتوا بس ... وبيسوي شغله مضبوط ...
بدر : والله قهوتك كلماله وتصير حالتها من ردي لأردى ..
طلال : يه ؟؟؟ بدر اشفيك اليوم حاط حرتك فينا ؟ لا !! انا أخليك أحسن لين تهدى ...
بدر يمسك ايده : تعال يبا ...لا تاخذ بخاطرك ...أنا شوي متضايق وفيني وايد حجي ويايك افضفض ..
طلال : افا !! شنو اللي مضايقك ؟ قول ؟​

بدر يسردله قصته من بداية معرفته بفريده وهي بالمدرسه الين عدم موافقة عمها بالزواجه ​

بدر يكمل : وناطر أمها تيي بس ..لأنها أهم وحده علشان أخطبها منها وتكون خطبتي على اللي أحبها رسميه وأضمنها لين الله يهدي عمها ..أو نلاقيلنا منفذ ... أو واسطه ...أي شي .
بس أمها كلا كاشته فينا ومو مسانعتنا كلش ولا راضيه تيي الكويت علشن تعطينا مجال ان احنا نصيدها ...و هي أملنا الوحيد ...ماني لاقي منفذ يا بومبارك ...تعبت وأنا أحاول ادورلي الحلول ...
طلال : يعني انت تبيها ومومحصل فرصه تخطبها !!! انت قلتلي انها بعمر 19 ...ماكو إلا تنطرها تكمل الــــ21 وتطيح منها الوصايه وتكون بسن قانوني ...وتتخلى عن موافقه أي كان غيرها هي ...وتصير الزواجه رسميه بمجرد قبولها ...
بدر : يعني قصدك انطرها سنتين !!! ما أقدر أنطر ...أنا مادري شمخبيتلي الأيام !! يمكن عمها ينجح انه يحجزها مره ثانيه عنده ويزوجها غصب لولده ؟؟
طلال محتار : والله مصيبتك عويه صج ....بس في شغله لازم تعرفها ...ترى مايصير الزواج بمجرد انها تهز راسها بعلامة الرفض...فلا تحاتي انها تتزوج غيرك اذا هي مصممه برفضها لغيرك وتبيك إنت وملزمه عليك ...
بدر : والله ؟
طلال : طبعا ...القاضي مايسمح أبدا ولا يقبل شهاده والزواج الا بموافقه البنيه .... فأنا أقول لا تخاف من هالناحيه ومالك الا تنطر ...والله يفرجها لك مع الأيام ...
بدر : الله كريم ...​

طلال : منت ياي ويانه شاليه سعود ؟ نعوض عن شاليه أمجد اللي مختفي ومادري وين الله قاطه ؟؟ وهم علشان تنسى همومك ؟
بدر : لا ...هديت السوالف والله تاب علي ...وأدعيلك انت بعد انه الله يتوب عليك و تهد هالطريج الفاسد اللي بيورطك يوم من الأيام..
طلال : هههههه ...لا ماراح أتورط لاتخاف ... محسوبك حذر وفطين ...وبعدين بعدنا صغار عالتوبه ..و تعودنا على هالطريج وصعب نهده بيوم وليله !!!!
بدر : كا أنا هديته بيوم وليله والله هداني والحمد لله ...
طلال : أحسنلك ..هههه ..
الا صج ماتدري وينه هالأمجد ؟؟ يحوسون ربعه يدورون عليه مو محصلينه ؟ يبون الشاليه ماله ...
بدر : حتا انا أدوره ماني ملاقيه ( ماقاله ان عم حبيبته يصير بو أمجد ...مايبي يبين حق أحد ..وخاصة طلال ...ولا ياب سيره حجزه عند الشرطه بسبب اقتحامه ليدة حبيبته ...وعم علشان لا يورط نفسه ويفضح عمره ...وفضل انه يحتفظ بروحه بالمعلومه ويمثل دور البريء اللي مايعرف شي )
طلال :بدر يالله انا بشوف زبايني ..تامر على شي ثاني بو نصور ؟
بدر : سلامتك بو مبارك ...يعطيك العافيه​

باليوم التالي

ببيت بوناصر ​

فتون زايره أهلها ( وأصبحت الزيارات يومين بالأسبوع بس )لأنها غرقانه بحبها و بحياتها الزوجيه السعيده والحب اللي توه انبنى من طرف رائد!!!​

ومواعده نورا تجيها عند أهلها ​

وتجي نورا قاطتها أمها وتدش ...​

وهم رايحين عند غرفتهاي شوفون سالم نازل من الدري ...
سالم وهو يطالع نورا : فتون ؟ شخبارج ..ولهنا عليج والله ؟ منزمان ماييتي ؟
نورا موملقيته ويه وتتعداه بالدري : فتون يالله بسرعه شفيج واقفه ...بعد شوي أمي بتييني ..ماعندي وقت وايد ...
سالم :؟؟؟؟
فتون تطالع أخوها وتطالع نورا : آه ...يالله يايه يايه ...
وتطالع أخوها بنظرة استغراب وترفع جتوفها لي فوق
سالم انتبه ان نورا زعلانه من شي !!! ​

بس بشنو ؟وده انه يعرف ...

بغرفة فتون ​

فتون : شفيج عالريال دقرتيه المسكين ...كان يقصدج بكلامه لي ..
نورا :أدري ... بس باط جبدي ليش مايبيني للزواج ؟ وقايل حق أمه انه كلش مايبي يتزوج ؟؟ ليش عيل يسوي جذيه اذا هو مايبيني ؟؟
فتون : انتي الله يهداج ماترضين تكلمينه !! موشجعينه كلش انه يتقرب منج...والا هو ميت عليج يبيج ...
نورا تفز : والله فتون ؟ شدراج ؟؟؟
فتون : اي والله وربي ...كل ما شافني سأل عنج ...شلون نورا ..ماراحت نورا المكان هذا ..شنو كلت نورا؟؟ .... شنولبست ؟... أذاني ولوعزني ...كل كلامه عنج ..
نورا فرحانه : والله ؟؟؟
فتون : اي والله ...شفيج ؟تبيني أعطيه رقمج يكلمج ...وايد يحن علي اني أعطيه رقمج ... فقلت أستشيرج بالأول...
نورا : ها !!! أي عطيه ...لأ لأ لا تعطينه بعدين أبوي لي عرف يذبحني احنا عايله محافظه حيل ...و مايرضى بهالسولف موليه ...
فتون تفكر : عيل خليني أنا أصير الواسطه بيناتكم اذا تبون تتعرفون على بعض ...
نورا : شلون يعني ؟؟
فتون : نستغل جيتج عندنا هني وتتواعدون مع بعض .. وأنا أدبر لكم المكان والوقت ...
نورا : بس هاذي فيها مجازفه ..أخاف !!
فتون : كيفج عيل خلج بصوب وسالم بصوب لين يلقاله وحده غيرج يسد حبه فيها ..
نورا : لأ لأ لأ ..خلاص سوي اللي تشوفينه ...
فتون تبتسم : خلاص اتفقنا ... بس ترى أنا عندي شرط ....​

نورا : وشنو هالشرط هذا ؟

فتون : أبيج تدورينلي أي معلومه عن بدر رفيج أمجد أخوج ....تلفونه ...وين ساكن ....وين يدرس ...شنو سيارته ...من عايلته ؟؟؟ أي منفذ تشوفينه ...بس أهم شي عندي رقمه ....
نورا : ليش ؟؟؟ شنو تبين فيه ؟؟ فتون إنتي متزوجه !!!
نورا : يالهبله مولي ... هاذي وحده بسويلها معروف ... تحبه وتبي تتعرف عليه ...و أنا وعدتها اني راح أساعدها نفس حالتج الحين مع سالم ..
نورا : آآآآه !!!!​

فتون : ها شقلتي ؟ تسوين عاللي قلتلج اياه ..
نورا : بس صعبه ؟ شلون ؟؟

فتون : والله عاد دبري حالج ...فتشي بأغراضه ..أو أغراض أبوج ..أي مكان يترددله أخوج فيه ...ناس يعرفهم ...​

نورا : لحضه لحضه ..تذكرت..

فتون : شنو ؟
نورا : مره وأنا طالعه مع أمجد بيوديني مجمع أعدل فيه البي أس بي ...ولا تيينا وحده جميله ولبسها ضيج وقصير يفشل جنه إسمها ليال ...تسلم على أمجد بس لاحظت على أمجد انه يحاول يصرفها ...قالتلي اي شي تبينه تعالي لي بناية المهرود مادري المهاريد شي جذي ... جان ياخذها أمجد على كتر ويساسرها لين قالت حق امجد : خلاص عيل ...الله يهديك ....خو قول من الأول انه الخريطه عطيته الدكتور ..خرعتني وخليتني أييك هني!!!
لين سلمت علي وقالت حق أمجد يسلملها على بدر( الظاهر كانت تعرفه ) و راحت...وأمجد يقول انها وياه بالكليه تدرس بس يايه علشان الخريطه اللي مساعدها يسويلها يايه لأنها ماتعرف وطلبت منه يساعدها ....ماتدري انه موعنده ....بس هددني اني ما أماشيها وراح يقص ريلي لي شافني عندها أكلمها ...​

فتون سرحانه :......
نورا : فتون ؟؟؟؟ فتون ؟؟؟​

فتون : هلا !!! ​

نورا : ماقلتيلي المعلومه هاذي مفيده ولا لأ؟؟
فتون : إي ... بس مو وايد ...أهم شي عندي الرقم ...حاولي تيبينه ..​

بيت عارضيه ​

وقت العصاري​

تجي فريده من الجمعيه وتلاحظ سيارة عمها لكنها تستجمع قواها
فريده : لي متى وأنا أنحاش منه ؟؟؟ لازم أواجهه اليوم وأفتك من هالسالفه ...خلج قويه ...ولي لزم ياخذج صارخي بألى صوتج يمكن يخاف ويهدج ؟؟
وتدش البيت​

وتلقى عمها بويهها ويمه ايديده !!!​

بو أمجد : شلونج بنت اخوي...؟
فريده: هلا عمي ؟
بو أمجد : تعالي سلمي علي ..لا تخافين يبا ...
فريده تتردد​

عارضيه : أمي تعالي ...عمج عنده سالفه تهمج وايد ...ولازم تقعدين وتسمعينها ...
فريده وهي تسلم على عمها بيده : شنو ؟؟؟ شنو صاير ؟؟؟
بو أمجد : قعدي يابنتي وأنا أقولج ....​

فريده قلبها يدق بسرعه خايفه من اللي بيقوله عمها وخاصة ايديده هالمره صافه وياه ...
شنو اللي عنده بيقوله ؟؟؟
شنو هالخبر اللي لازم أسمعه وأنا قاعده ؟؟؟​

الله يستر ؟؟؟؟​

 

[سمراء اليل]

ابي البارت الجااااااااااااي بسرعه

 

[Zhoor el7lwa]

يسلموووو...الله يستر

 

[sweet.sanfoora]

شنوو الخبر

عفيا لوولو قوليلي!

 

[39la o f9la]

Ambaih ftoon waaayed ba6a chbdy !!!
O amoot w3rf 3m freeda shnoo yabi ygoool


Tslmeeen 3l part el 7lw

 

[Lolwa]

الفصل الأربعون ...صدمه ....​

بو أمجد : موضوعي اللي بتكلم عنه وياج يانت أخوي ...هو عن أبوج ...
فريده : شفيه ؟؟؟
بو أمجد : يا بنتي ... أبوج هدج وانتي بعمر صغير ...وهاجر ولا سائل عنج ..بس يعطيج مصروفج بحسابج ...وكل شوي يغير مكانه وتكلمينه على فترات متباعده ...لكنه يقولج انه بيغير مكانه ويرد يتوه عنج وتردين تدورينه بتعرفين وين مكانه اليديد...الى وهذا احنا على هالحال لي الأبد .....صح ؟​

فريده : اي صح !!!​

بو أمجد يمسح على ايدينها : يابنتي هذا الكلام كله غلط ...وهو اللي طلب مني اني اقولج هالجذبه ...​

فريده مستغربه : شنو اللي غلط ؟ موفاهمه !!!...​

بو أمجد :يا بنتي ...بعد مانحشتي عني .اتفقت مع أمجد انه يدورج ويلاحقج طمع مني بأملاكج ...أعترف انهم وزوني عليج ...وخلوني أقصبج تتزوجين واحد انتي ماتبينه ...بس الحادثه اللي صارت وعتني ...خلتني أحط حد حق الجذبه اللي انا وأبوج متفقين عليج فيها من قبل تقريبا 15 سنه ...​

فريده كلها آذان صاغيه ومنتبهه لعمها !!!​

يكمل :بعد ماسجنوا ولدي ...أوتعيت انه الله موراضي عاللي أسويه وعرفت ان اللي جاه عقاب خفيف من الله ينبهني عن خطأي وخلاني أندم عليه .....كانت نيتي اني اخذ كل أملاكج واحطها بإسمي بناء على رغبات اللي حولي بعثر اني راح أمسكهم وأنميهم ..وأنا صدقهتم ...بس الحمد لله ...كنت متردد اني اسويهم وبآخر لحضة أشوفج تجين عندي البيت وتاخذين سيارتج وتطيرين فيها وتنحاشين مني ...حسيت وأنا أشوف الخوف بعيونج جني حيوان مفترس ...بس يبي يدور عالفريسه بيعضها ويتركها للذئاب يخلصون عليها ومايخلون منها عظمه وحده صاحيه ...حسيت بظلمي لج ...أوتعيت وندمت ( ويقولها منفعل ووجهة باين فيه علامة الندم والحزن ) ...سامحيني يا بنتي ..​

فريده : لا تقول جذي عمي ...محشوم ...انت عمي وأنا احترمك وأقدرك أعطيك هيبتك وأحسن ان الله عوضني فيك ..​

بو أمجد يندفع بالكلام وما يخليها تكمل : وأبوج يا فريده ...أبوج يافريده ...مو مهاجر ...طول هالوقت مومهاجر ...موجود بالكويت ..سامعتني !!! موجود بالسجن من 15 سنة بتهمة سرقة أموال الدوله ...​

فريده تنصدم لكنها تتكلم بهدوء : شــ شــ شــ شنو ؟​

بو أمجد يشرب الماي اللي عالطاوله لأنه ريجه نشف ​

وياخذ فريده ويدخلها بسرعه غرفة يدتها الفاضيه ويقفل الباب ما يبي أحد يسمع ...واليده بالصاله مخلينها بروحها !!!!​

عارضيه :!!!!!​

يكمل: اهو وياه مجموعه عصابه تملك شركه نصابه مقامها كبير بدوله ثانيه استغلت أبوج ...بالبدايه ماكان عارف هالسالفه ...دخل وياهم بنيته تجاره شريفه ....لكنه انصدم منهم لمن قالوله ان البوليس الدولي كشفهم وهم بديرتهم يمارسون سرقة الكويت !!!!...وطبعا كان أبوج وياهم مسافر بحجة سفره لقضاء عمل !!...
الأمن الدولي هناك اقبضوا على كبير العصابه واتهموه بالسرقات هاذي وباستدعاء من أمن دولة الكويت وعن طريق الانتربول ..
وعلشان يوخر رئيس العصابه من الصوره ويبريء عمره انصحوه ربعه بأنه يسوي خطه على ابوج ويسغلونه أحسن استغلال ...​

ويكمل وهو يتساسر : طلبوا العصابه من أبوج (واستغلوه وهو بره ديرته )انه يسلم نفسه ويعترف بالسرقات كلهم !!!!! علشان ينشال من رئيسهم الاتهامات الموجهه عليه...وحملوه مسئوليه القضية الكبيره ووعدوه بمبلغ جدا كبير مقابل سكوته وانصياعه وإعترافه للإنتربول ...ووعدوه بعد انه بيهتمون بالقضيه ويحطونله محامي كبير ....ينحكم فيها مو أكثر من خمس سنين !!
لكنهم أيضا بالمقابل هددوه اذا فتن وتكلم عنهم راح يقتلونه ويقتلون كلمن يعزه ...وأكيد انتي من اللي يعزهم ....
فإضطر انه يجذب للسلطات ويعترفلهم بكل العمليات وينصاع لهم ويستسلم ...لأنه ماعنده خيار ثاني يلجأله...
...لين حاكموه بهذيج الديره وماقدر محاميهم عالقضيه وخسرها ..فيابوه ينسجن بديرته هني !!!! ولأنهم خمس قضايا سرقه وكل قضيه لها حكم خاص فيها وعلى حسب طريقة السرقه والمبلغ المسروق......فجمعوهم وصارت 20 سنه !!!!!​

فريده تحط ايدها على يبهتا وتزل راسها​

يتابع بصوت خفيف : حطج عند يدتج أمانه وطلب منها انها تربيج أحسن تربيه واعتمد عليها لأنه واثق فيها ويعزهاعلى عكس بنتها اللي الله ماوفقهم بالزواجه وماكان بيناتهم حب واللي هدته وتطلقت منه وسافرت تكمل دراستها علطول بره!!!....​

فكتب كل أملاكه اللي حطهم بكذا عماره يشتغل فيهم بالعقار بأسم يدتج علشان مايتصادرون منه لكنه ماقال ليدتج عن الموضوع ( ويدتج حسبالها انه الأملاك والغنى اللي ياله فجأه جذيه من تجارته والله موفقه فيها !!! على نياتها ترى وليلحين ماتدري ....وتوها من العام حولت بعض هالأملاك باسمج لمن شافتج كبرتي وأوتعيتي ..وكانت ناويه على باجي ممتلكاتج بس صار اللي صار فيها وأعاقها عن تكملة أعمالها بهذا الصدد !!​

أبوج اكتفى انه يقولي أنا بس عن موضوع السرقه كان واثق فيني ومعتمد علي

ويحط ايده على ويها يمسح دموعه : وانا اللي بغيت أجحد فيه وأخونه !!​

فريده :!!!!!!​

يكمل بعد خلص وريح من البجي : ...طلب مني أبوج اني اعتني فيج وأشوف طلباتج و ما أبين لج السالفه بالمره... واذا كبرتي وسألتي عنه ...ماأبين لج أسباب هروبه واكتفى بسبب واحد بس و انه كان مهاجر وماراح يرد لديرته وخلي الأسباب مجهوله ....​

والفلوس اللي تشوفينها تنحط لج بحسابج هاذي من ايرادات تجارة العقار تنظاف بحسابج دايركت من البنك كل شهر مثل ماطلب أبوج اني اسوي معاملاتها وأوراقها وهو بالسجن....​

فريده من الصدمه بعدها ساكته​

بو أمجد : فريده ..​

فريده تقوم وتبطل باب غرفة ايديده ​

وتروح غرفتها​

يناديها عمها لكنها مو حواليه ويركب وراها الدري بيلحقها ​

تجيله عارضيه وهي بالكرسي تسد الدري بعصاتها ...
عارضيه : خلها ... شكلها مصدومه ...روح وتعال لها بوقت ثاني.. ​

بغرفة فريده​

تنسدح بسريرها وتتلحف​

فريده بقلبها: كل هالمده أبوي كان هني عندي وأنا ما ادري عنه ؟؟؟​

كل هالمده كنت مخدوعه بأبوي !!!!​

كل هالمده طلع أبوي حرامي ومسجون!!!​

وتبجي وتنااااام​

ببيت بو أمجد​

بو أمجد ليلحينه عند فريده مارد
وسلوى لاهيه بالصالون عندها عرس مهم بتحضره اليوم
نور لليلحين بالدوام وأنوار بشقتها
فرصتها نورا انها تلعب بالبيت على كيفها وتدور باللي تبيه​

وتبتدي بغرفة أمجد علطوال​

وتاخذ المفتاح المعلق وتقفل فيه على روحها وهي داخل بتحوس وتدور!!! على شان تاخذ راحتها عدل ...تو الناس على ما نور ترد من دوامها وابوها توه طالع ...

نورا تفرك ايدها : من وين أبدي !!!​

تدور بمكتب أخوها وتبطل الدروج​

نورا : أمجدو يالخبل...شالدروج الفوضه ؟ الواحد مايقدر يدور بسهاله بأغراضك ؟​

وتشوف وايد أوراق
لكنهم كلهم مالهم معنى ...أو موعارفتلهم ..​

تشوف درج مقفول !!!​

هدته​

قعدت تدورمده بين ملابسه اللي بالكبت​

وتشوف مفتاح سبير​

نورا : شنو هذا ..أكيد مفتاح الدرج المقفول ؟​

بسرعه تاخذه بتجربه
ويتبطل الدرج !!!!​

تحوس فيه​

تشوف صوره لصك ملكيه خاصه بشاليه !!!!
باسم غريب
وورقه ثانيه مكتوب فيها​

أنا فايز الــ(.........) أقر واعترف بملكية أمجد الثامل للشاليه .....الخ
وانه وبمبلغه الذي دفعه لشراء الشاليه ويقدر بمئة وخمسون ألف دينار فقط​

نورا عيونها بتطلع من مكانها : شنو هذا ؟؟ من ويلك هالفلوس ؟​

وتكمل قراءه : .......ويكون ملكي بالاسم فقط ...يستفيد منه أمجد ....الخ
نورا : ايا المعفن ؟ عندك شاليه شاريه بسعر بيت وحاطه بإسم واحد ماتعرفه ؟ والتاريخ يقول انك شاريه من قبل خمس سنين !!! إلا أعلم أبوي فيك يالقواد ؟؟ ​

نورا ترد صك الملكيه مكانها بوعدها تدور: انزين انا اذكر انه كان عنده تلفون نوكيا قبل اي فونه اليديد...بس وين حطيته يامجيد ؟ وين​

تدور بين المخدات وتحت المطرح وبالكبتات ..

شافت بالكبت اللي فوق كرتون مال نوكيا
خذته : يارب يكون داخل ...​

وفعلا
تلقى جهاز النوكيا فيه​

بسرعه تاخذه وتطلع من الغرفه

وتروح غرفتها تحط الشب مال الرقم مالها داخله علشان تبطل التلفون
وتشوف مس كول ومكالمات صادره ​

ومن ضمن المكالمات الصادره تشوف اسم ....بدور بو نصور
نورا : هذا أكيد انت؟؟؟ لأني وايد أسمعه يناديك بو نصور اذا كلمك بالتلفون !!!
وبسرعه تدق على فتون تعطيها الرقم​

فتون مستانسه وتكتب الرقم : اي ...اي ...اي ...
انزين دام انه التلفون بيدج....ليش ماتدورين رقم ليال اللي تقولين عنها ؟
نورا تدور بالأرقام وتلقى اسم ليولتي !
فتون : اي يمكن هذا ؟ عطيني اياه بسرعه ..اي ..اي ..اي
طبعا ببلش من الحين أقول حق سالم ...أفا عليج ..أنا عند وعدي ...لا توصين حريص ... تستاهلين عالتعب اللي تعبتيه .....يالله عمري باي..​

فتون : يالله بدى اللعب الحين

وتضحك​

ريلها الحين نايم ....
تدق على سايق بيت أبوها يجيها ليعندها ويوديها مطعم بيتزا ان
تطلب من الموظف هناك انها تستعمل التلفون لأنها حاله طارئه وانها نست تلفونها ...وتبيه ضروري ضروري الحين مسألة حياة أو موت...
يوديها عند غرفة المدير
فتون تطالع المدير اللي قاعد : ممكن شوي ...!!!.... المكالمه خاصه شويه ؟؟
الموظف :آه ممكن ...!!!!!!!!!
لمن تأكدت ان راح وانها بروحها
تاخذ التلفون وتدق على بدر مع تغيير بالصوت ( بلحميه ) واللهجه المصريه : ألو ..السلام عليكو
بدر توه قاعد : هلا !!!
فتون :احنا اخترنا رقمك عشوائي علشان تفوز معانا ببتزتين كوباروببلاش ...بس لو ممكن تئولي عن العينوان علشان يوصلك وهوا حار ولزيز ...
بدرتوه بيتزا ببلاش ( يطالع ساعته ) 12:00
ويفكر : اي والله شتغدى اليوم ؟ ايني الأكل ببلاش وأنا بوكي مفلس أحسن مما أتعنى وأطلع بهالشمس اللي تحرق وروح بيت يدتي علشان أتغدى ..
بدرمستغرب : أول مره أفوز بشي وببلاش ... انتوا خوش مطعم .
فتون : بيتزا إن حاضريتاك بتعمل عروض ومسابئات عشان الإعلان والشوهراه..و بما ان الماطعام قديد لسا بالكويت ..
بدر : والله زين ...أوكيه عيل كتبي عندج ...
فتون مستعده وبيدها القلم : آه ... آه ...آه ..وباسم مين حاضريتاك ؟ بدر الــ(...)...متشكر بزرف نوص ساعه وقايين عانداك يا بيه ...
بدر : اوكيه​

فتون تسكر التلفون وتطلع وتشكر المدير
فتون : علشان تعاونكم بطلب من عندكم بيتزتين وبالحجم الكبار ​

و تروح حق العنوان ​

تطلب من سايقها يطق الجرس ويعطيه اليتزا
ويبطل بدر الباب وياخذهم
فتون تشوفه وهي قاعده يدام بالسياره ومنزله الكاب يغطي عيونها ...
فتون : والله ذوقج حلو يا أم السعف والليف!!!
وماتقاوم وبحركه خفيفه تصوره بتلفونها من غير مايحس​

بدر :مشكور ....ويسكر الباب​

بدر متشوق : ياسلااااام الواحد حده يوعان والبيتزا صج حاره ..خن نذوقها..انشاء الله طعمها مايصدمني ...​

فتون ترجع ورى بالمقعد الخلفي للسياره
السايق : خلا ص ماما ؟
فتون بقلبها : الحين ياي دورج ليال!... وين صاير مجمع المهاريد هذااللي تقول عنه نورا ؟؟
فتون تنتبه للسايق : ها ؟ اي خلاص
وتعطيه عشره : هذا لك ...ومو تقول لأحد ...ياويلك ...يالله يمدينا نرد البيت ( تطالع ساعتها مأشره عالوحده ونص ) قبل لا يقعد بابا رائد ..
السايق : انجين ماما..​

بيت عارضيه​

بالليل​

تقعد فتون وتنزل بالصاله
وتلقى يدتها بكرسيها​

عارضيه : هلا أمي ؟؟ شلونج ألحين؟

فريده : الحمد لله ...أشوه شوي...انتي اللي شمقعدج بكرسيج ليلحين ؟ موزين تظلين فيه وايد ؟
عارضيه : ماعلامي شي تحسنت يما ...ومليت من السرير وقامت تظايجني السدحه فيه وايد ...فقلت أتجول بالبيت شوي ...
فريده : شكلج قاعده فيه من ييت من الجمعيه الصبح اليوم لي ألحين!​

عارضيه تتذكر : عمج كان يحاتيج ...​

فريده : ....

عارضيه : توني يا أمي أسمع من عمج انه ابوج مسجون ...كل هالمده والله عبالي مسافر!!!
فريده مالها خلق تتكلم :...
عارضيه : لازم يابوج تروحين تزورينه ...​

فريده : شنو العشا ؟ ترى حدي يوعانه ...

عارضيه : هذا مهما يكون أبوج حتى لو سوى شي غلط وعاقبة القانون على غلطته ...بيظل أبوج ...وماتدرين عن أسبابه ؟؟؟.يمكن .يكون .......
فريده: أوفييييييه ...يبا اذا مافي عشى بروح اتعشى بره مع ميسا ..​

وتاخذ سويجها وجنطتها وتطلع ..​

عارضيه :!!!! الله يهديج يا بنتي ...​

 

[Lolwa]

39la o f9la

الله يسلمج حبيبتي

 

[Lolwa]

sweet.sanfoora

سمراء اليل


كا كتبت البارت فوق خخخخ

Zhoor el7lwa
الله يسلمج
وقراءه ممتعه


حياكم حبايبي
وشكرا للتفاعل

 

[Aloolah]

امبي صج صدمه
الله يعينج يا دلوووس على هالصدمه

وييييع فتووون اشتبين اف لزقه

ثانكيو حياااتي