روايتي الثالثة (( يا دنيا ارحميني )) .. قصة واقعية .. ReRez

[بنت حمووله]

يالله وين الباااارت انا ناااطره

 

[shayomi]

يابنات اشفيه المنتدى صاير بطيء اذا بنتقل من صفحه لي صفحه كلكم جذي ولا بس انا

 

[spongebob93]

bnat al.mountda m3aleeq :s .., wya alkill atwaqa3 w mo shay yded y3ny .., w rerez allah y36eha al3afya nzlat part w kant btnazel al.thany w a3teqed enna ma b6al wyaha al.mountda .., lazem enqader w'63ha al7en .., atwaqa3 le al7en t7awel tnazel al.part 5al nan6er 3leha ma wrana shay

 

[*الغاليه*]

المنتدى صااير بطئ مع الكل من صفحه لصفحه نسووي رفرش الف مرره وننطرر اكثرر من ساااعه

الله يعين ريري متعلقه كل شووي يعلق عندهاا وعندنااا المنتدى

نطررروااا بنااات

,,,​

 

[ReRez]

انا اللي مستغربه منه البنات اللي يبون البارت ويقولون وين البارت!!!!
ليش المنتدى مو واقف عندكم ؟؟؟ ولا شالموضوووووووووع ؟؟

المهم هذا ثاني بارت انزله اليوم وبالصفحه اللي قبلها في بارت 23 حق اللي مايدري

تفضلو وبعدها انام لأني سهرانه للحين وكل هذا احاول بالمنتدى والله غفيت يم اللاب توب بس عشانكم

تفضلو
-----

- 24 / جرحتني !! -

- هدى سافرت لندن وفرح اقعدت بغرفتها تبجي بحسرة -

فرح : ( بعصبية ) ليش اهي تروح وانا لأ .. ليش يعاملني بهالطريقة ماقمت اتحمله ولا اتحمل خواته

- نواف فز وقعد يبجي قامت شالته ولمته على صدرها –

فرح : ( دموعها تنزل ) خلاص يمه لا تبجي .. بابا راح يرجع .. والله ابوك للحين يحبنا

( اقعدت فرح تواسيه - أو بالأحرى تواسي نفسها - فترة طويله لين اتعبت وبعدها نومته ونامت يمه )
---

- اليوم الثاني .. كلية الهندسة –
( ندى عندها اختبار عملي عند الدكتور ثامر )

- الدكتور ثامر يه يم ندى ونزل شوي لي مستوى كرسيها وقعد يطالع شاشتها واهو لازق يمها –

ندى : ( دنت شوي عند زميلتها )
الدكتور ثامر : ( يأشر عالشاشة ويبتسم لها و قام كمل يمشي بين الطالبات )
ندى : ( طالعت المكان اللي أشر عليه جان تلقى غلطة بالبرمجة .. عدلتها بسرعة وطالعته لقته يبتسم لها .. بسرعة لفت ويهها عنه وردت تكمل الامتحان )

- بعد الامتحان .. الكل قام بيطلع من الكلاس –

الدكتور ثامر : ( راح عند كمبيوتر ندى ) ندى لحظة شوي
ندى : ( كانت بتطلع جان تلتفت ) نعم دكتور
الدكتور ثامر : انتي مو مسيفه شغلج تبيني اسيفه لج يعني ؟
ندى : بلى دكتور حفظته بفولدري
الدكتور ثامر : مو محفوظ وكاهو للحين مبطل تعالي حفظيه لو سمحتي

( ندى راحتله والكل طلع من الكلاس )

الدكتور ثامر : شوفي مو محفوظ
ندى : ( احفظته بفولدرها الخاص ) كنت حافظته بس مادري وين اختفى
الدكتور ثامر : ( ابتسم ) عدلتي الغلطه اللي أشرتلج عليها ؟
ندى : ( ارتبكت ) اي دكتور مشكور
الدكتور ثامر : ( قعد يطالع ويهها وشعرها و ارقبتها ) العفو
ندى : عن اذنك دكتور
الدكتور ثامر : ندى انتي مرتبطة ؟
ندى : ( انصدمت ) شنو ؟
الدكتور ثامر : يعني مالجة مخطوبة .. تحبين واحد مثلا
ندى : ليش هالسؤال ؟
الدكتور ثامر : بعرف عنج اكثر
ندى : دكتور عن اذنك انا لازم اروح
الدكتور ثامر : ( يبتسم ) اي روحي .. اذنج معاج

- اطلعت من الكلاس معصبة حيل .. واقعدت تتمشى بروحها –

عثمان : ( مشى يمها ) اشلونج ندى
ندى : ( طالعته مستغربه ) هلا اشبغيت ؟
عثمان : ماعرفتيني انا اللي ..
ندى : ادري انت اللي دعمتك عند الكافتريا
عثمان : اذا مو ذاكرة اسمي معاج عثمان
ندى : هلا اخوي
عثمان : جني ييت بوقت مو مناسب .. احسج معصبة
ندى : ( تنهدت ) لا مو معصبة بس ماحب توقف يمي والناس تطالعنا .. في شي تبي تقوله قبل لا اروح ؟
عثمان : باين عليج بنت محترمة و زينه عشان جذي بغيت اسألج سؤال و ادري مو من اختصاصي هالشي .. بس لازم اقوله
ندى : و شنو هالسؤال ؟
عثمان : ليش تماشين دلال ؟
ندى : نعم ؟؟
عثمان : البنت موزينه .. والله انها كلمت نص ربعي اذا مو اكثر
ندى : لو سمحت اول شي ما اسمحلك تتكلم عنها بهالطريقة ثاني شي انت قلتها بالسانك مو من اختصاصك هالشي .. عن اذنك ( خلته ومشت )
عثمان : ( قعد يطالعها بعدين كمل طريجة )
---

- بيت ندى –

سامي : اشفيج أمل ؟ شكلج متضايقه ؟
أمل : وايد متضايقه
سامي : ليش عسى ماشر ؟
أمل : تذكر يوم قلتلك ندى اطلبتني اقول حق اللي يبون يخطبونها عن مرضها قبل لا اييون لنا
سامي : اي و اشصار ؟
أمل : قبل اسبوع دقو وقلتلهم .. وبينت لهم ان حالتها مستقره ومافيها الا العافية .. بس حسيت الأم ماتقبلت الموضوع .. قالت اكلم الولد وادق عليكم
سامي : ومادقت عدل ؟
أمل : اي والله مادقت .. و ام محمد توها كلمتني قالت الناس اعتذرو ومافي نصيب
سامي : خيره .. اكيد في نصيب احسن ناطرها
أمل : اي بس ماني عارفة شقولها
سامي : والله مادري .. ماعرف حق هالمواضيع .. عبود نايم ؟
أمل : اي
سامي : حسافة كنت بلعب معاه
---

- الساعه 7 بالليل .. بيت أم حمد –

( فرح نازلة من شقتها ووراها الخدامه شايله نواف .. رن تلفونها وكان فهد اخوها )

فرح : ( ردت عليه ) هلا حبيبي
فهد : هلا فرح .. بدش بالموضوع على طول .. في شي بطلبج اياه وماني عارف اشلون
فرح : اطلب اللي تبيه
فهد : انا محتاج فلوس
فرح : جم تبي ؟
فهد : انتي كريمه وانا استاهل
فرح : خلاص ان شاءالله الحين اسحبلك و اييبهم لي عندك .. انت بس تدلل
فهد : تسلمين حبيبتي .. مشكوره
فرح : يللا باي حبيبي

- مشاعل كانت بالممر تسمعها .. و أول ما اطلعت فرح من البيت راحت بسرعة و دقت على هدى ( بلندن ) عشان تقولها شسمعت –
---

- بلندن –

هدى : ( سكرت السماعه وويها معتفس )
حمد : خير اشفيج ؟
هدى : ( ساكته )
حمد : اشفيج هدوي صاير شي لهم ؟؟
هدى : كمل ريوقك لا تفكر بشي
حمد : اخواني فيهم شي ؟؟ فرح و الولد فيهم شي تكلمي ؟
هدى : الصراحة مشاعل اسمعت فرح تتكلم بالتلفون مع واحد
حمد : شنو؟
هدى : اي وقالتله حبيبي اطلع واشوفك وبتعطيه فلوس
حمد : اهي متأكده ان واحد غريب
هدى : اي تقول قالتله وين ماتبي اشوفك واعطيك الفلوس
حمد : ( ساكت ويتنفس سريع )
هدى : حمد ؟
حمد : ( قام وطلع من الشقه )
هدى : حسبي الله عليج يا فرح .. عذبتي اخوي .. الله يستر لا يصيرله شي
---

- بعد اسبوعين .. بيت فاطمة –
( الكل كان موجود .. حتى ندى )

فرح : ( تبجي ) مايرد علي كلش .. ماقمت اتحمل يمه والله تعبت
ريم : اخاف شافله شوفه اهناك
فاطمة : ريم !!
ساره : ريم اشهالكلام .. امه مريضة واكيد مشغول معاها لا تزيدين عالبنت
فرح : ( تمسح دموعها ) انا مو مرتاحه كلش .. وقررت اسافر له
فاطمة : لا يمه اذا ماناداج لا تروحين
فرح : بلى بروح
ندى : فروح حياتي صج مايصير تروحين و اهو مايدري
فرح : واشلون يدري اذا اهو كلش مايرد على مكالماتي ولا يشبك ؟؟
نوره : ( شايله نواف ) وهذا بتخلينه اهني ولا اهناك
فرح : طبعا اهني .. بخليه عندج يمه
فاطمة : يمه فرح سمعي الكلام و عفية لا تروحين
فرح : والله راح اروح ولحد يحاول يقنعني
ساره : اشلون تدلين مكانه ؟ ماتاخفين تروحين وتضيعين ؟
فرح : بخلي أحمد يساعدني
نوره : هذا اخوه اكيد بيقوله
فرح : عاد اذا ركبت الطيارة خل يقوله بس حاليا بحلفه مايقول شي
ندى : ( تتطنز ) اي صح راح يسمعج
فرح : ( تطالعها ) يسمع .. ان شاءالله يسمع
نوره : زين فروح اشكثر صارلكم انتي وريلج ما صار بينكم شي حميم
فاطمة : نوره و ويعه عيب .. انتي شكو
نوره : لا يعني يوم يه اهي كانت بالنفاس اكيد ماصار شي صح ؟
فرح : اي ماصار شي تقريبا 5 اشهر
نوره : اوله .. وايد .. عيل اذا رحتي روحيله وانتي عروس يديده
فاطمة : نورو سكتي خلاص
نوره : عادي يمه كلنا متزوجين .. وي نسيت ندوي للحين بيبي
ندى : ( ابتسمت وقامت ) اصلا انا تأخرت لازم ارجع البيت
فاطمة : لا يمه تو الناس
ندى : لا صج لازم اروح .. اشوفكم وقت ثاني .. مع السلامه
الكل : مع السلامه
فاطمة : الله معاج يمه
---

- اوصلت ندى البيت لقت امها وابوها وعبود بالصالة –

ندى : السلام عليكم
أمل وسامي : وعليكم السلام
أمل : ها اشلونهم ؟
ندى : زينين الحمدلله .. يمه ممكن اكلمج شوي ؟
سامي : اسرار بنات يعني ؟
ندى : ( ابتسمت )
أمل : ( قامت ) دير بالك على الولد
سامي : بعيووني عبود
أمل : ( تكلم ندى ) يللا يمه

- اصعدو غرفة ندى .. و اقعدو عالسرير –

أمل : ها حبيبتي اشفيج ؟
ندى : يمه اشصار عالناس اللي قلتيلهم اني مريضة ؟ مادقو صح ؟
أمل : ( اسكتت )
ندى : يمه والله عادي .. انا اصلا مابي اتزوج بس فيني فضول بعرف اشصار
أمل : ( اسكتت )
ندى : أدري مايبون اييون .. طبيعي يعني أي واحد مايعرف البنت وقايل حق امه تخطبله اكيد بيدور الأحسن .. منو بيختار زوجة مريضة .. يعني الريال بيتزوج ولا يزيد همه ؟
أمل : لا يمه لا تقولين جذي انتي مافي منج
ندى : اوكي معاج .. بس هم مافي واحد بياخذ وحده فيها صرع
أمل : ( بجت ولمت ندى ) انتي مافيج شي .. والله مافي مثلج
ندى : ( لامه امها ) حياتي زين ليش تبجين ؟؟ والله عادي عندي وتره خيرة عشان لا اتعب اكثر .. وبعدين يمه الزواج مو راحه بالعكس زيادة تعب و عوار قلب وراس
أمل : ( وخرت عنها و امسحت دموعها ) مو دايما الزواج جذي
ندى : اوكي 90% جذي
أمل : الله يعوضج خير يا بعد عمري
ندى : ( ابتسمت ) ان شاءالله
أمل : تعشيتي ؟
ندى : اي تعشيت عند خالتي
أمل : تنزلين تقعدين معانا ؟
ندى : لا والله بنام
أمل : خلاص عيل نوم العوافي يمه تصبحين على خير
ندى : وانتي من أهله

- اطلعت أمل من الغرفة .. وندى قامت بدلت ملابسها و البست بجامتها وانسدحت وتلحفت –

ندى : ( تتذكر كلام أمها وكلام الدكتور و كل شي صارلها ) الحمدلله على كل حال .. خيره .. كل شي خيره

- معنها قاعده تحاول تخفف على نفسها بس هم ماقدرت توقف دموعها وغصبن عليها انزلو على المخده .. بعدها اقعدت تبجي حيل و تشاهق و غطت راسها عشان لحد يسمع صوتها –

ياقلبي شوف هالدنيا .. تعبت ومابقى بي حيل
أعشم حالي و أتصبر .. و أقول باكر جروحي تزين
و يجي باكر بلا فرحة .. يعاند قلبي وجرحه
و أقول ال آآه .. وتقول البشر ( الله ) وماتدري
----

- بيت أم حمد -
- بعد الغدى بالصالة .. محد موجود غير عبير و أحمد وفرح –

فرح : أحمد ممكن أكلمك بموضوع
عبير : ( قامت ) قايمه بكرامتي قبل لا أنطرد
فرح : ( ابتسمت لها )
أحمد : خير اشفيج ؟
فرح : ابي منك خدمة
أحمد : وانا على أي اساس اسويلج خدمة ؟
فرح : علساس انك حماي أخو ريلي
أحمد : انتي وصلتي كلام حق ندى وانا للحين مو ناسيه .. انتي اللي خربتي بينا
فرح : انا ؟؟ وانا شكو .. انت اللي خربت كل شي بيدك
أحمد : يعني افهم انج ماوصلتيلها شي
فرح : بلى قلت لها انك تكلم وحده وتقولها حبيبتي وحياتي .. و انت بنفس الوقت تطلب من ندى انها ترجعلك .. شي طبيعي ماراح اسكت يعني
أحمد : عاد تروحين تخربين جذي مره وحده
فرح : أحمد مو هذا موضوعي
أحمد : بس انا هذا موضوعي
فرح : ( صوتها بدى يتغير جنه فيها بجيه ) أحمد انا يايتك اطلبك خدمة .. والله اني محتاجة مساعدتك الله يخليك اسمعني
أحمد : ( اكسرت خاطره ) اشفيج ؟ عسى ماشر ؟
فرح : حمد مايرد علي كلش صارله اسبوعين وانا قمت احاتي
أحمد : غريبه مايرد عليج .. اليوم الصبح مكلمه ومتطمن على امي
فرح : مادري اشفيه علي .. زين ابي منك خدمة
أحمد : آمريني
فرح : ابيك تساعدني من غير لا يدري عشان اروحله
أحمد : شنو ؟؟
فرح : الله يخليك .. بس احجزلي و عطني العنوان وبس مابي شي اكثر
أحمد : لا لا فرح طلعيني من السالفة مالي شغل
فرح : ( دموعها انزلت ) الله يخليك قاعده اترجاك
أحمد : ( عوره قلبه عليها ) زين ليش تبجين الحين ؟
فرح : والله ولهت عليه وايد الله يخليك لا تردني
أحمد : زين لو نقوله احسن صدقيني
فرح : ( امسحت دموعها ) لا لاتقوله بس ساعدني
أحمد : بعدين كل شي يرد على راسي
فرح : لا صدقني انا رايحه اصلح كل شي بينا
أحمد : اهو في شي صاير بينكم ؟
فرح : والله مادري .. ها راح تساعدني ؟
أحمد : اوكي خلاص راح اشوفلج اقرب حجز
فرح : مشكور وايد .. بس عفية لا تقول حق احد .. ولا حتى حق مشاعل لأنها راح توصـّل الأخبار لهم
أحمد : ولا يهمج خلاص ومالي شغل بحمد .. ومايقص هالراس غير اللي ركبه
فرح : تسلم أحمد مشكور ماقصرت ( قامت ) عن اذنك رايحه اجهز الجنطة
أحمد : نطري تو الناس اشفيج
فرح : ( ابتسمت ) لا ميخالف بسوي كل شي من الحين عن اذنك ( اصعدت فوق )
---

- قبل سفرتها بيوم راحت الصالون سوت كل شي .. جنها عروس يديدة و صار اليوم اللي لازم تسافر فيه فرح .. كانت طيارتها الساعه 10 الصبح .. واهي قامت من 7 الصبح راحت مع أحمد وودو نواف وخدامتها عند امها وبعدها خذاها المطار –

أحمد : فرح لا يضيع منج العنوان .. أول ماتوصلين دقي علي خل اعرف لا تخليني احاتي
فرح : خلاص اوكي
أحمد : يللا روحي الله معاج
فرح : مشكور احمد .. مع السلامه
أحمد : مع السلامه

- صار وقت رحلة فرح .. اركبت الطيارة و اقعدت مكانها و قلبها يرقع .. أول مره تسافر بروحها .. رايحه ولا تدري شنو ممكن تكون ردة فعل حمد اذا شافها –

- بعد 6 ساعات تقريبا اوصلت لندن و عطت العنوان حق التاكسي اللي بيوصلها .. و انزلت عمارة فخمة نظام فندق ( اهي العمارة اللي شارين فيها شقق لهم ) –

- اصعدت بريل مترددة .. سمت بالرحمن .. و طقت الجرس .. بعد 3 دقايق .. افتحت لها هدى باب الشقه –

هدى : فرح ؟؟!!! اشيايبج ؟
فرح : ( صج ما تحب هدى بس ارتاحت يوم شافتها عالأقل ماضاعت ) هلا هدى
هدى : ( وخرت عنها خلتها اتدش وسكرت الباب ) اشيابج ؟
فرح : ييت اشوف حمد وخالتي
هدى : ( بنفسية ) حمد بالمستشفى عند امي
فرح : متى يرجع ؟
هدى : مادري .. بس ماتوقع راح يستانس .. بالعكس بيعصب لأنج ييتي
فرح : ميخالف راضيه .. وين غرفته ؟
هدى : ( راحت حق غرفة حمد و فرح الحقتها ) هذي
فرح : اوكي مشكورة ( دشت الغرفة حطت جنطتها )
هدى : افف الله يستر بروحه تعبان من المستشفى .. اكملت الحين ( خلتها و راحت الصالة )

( فرح سكرت الباب و بدلت ملابسها و امسكت التلفون اللي بالغرفة ودقت على أحمد طمنته انها اوصلت وبعدها حطت راسها ونامت )

- بعد أقل من ساعة رد أحمد ودش الغرفة كانت فرح نايمة –

حمد : ( قعد عالسرير يم فرح ) فرح قومي كلميني
فرح : ( قامت و ابتسمت أول ماشافته ) حبيبي
حمد : ليش ييتي من غير علمي
فرح : حمد والله اشتقت لك وانت ماكنت ترد علي
حمد : ( طالعها مده واهو ساكت )
فرح : ( قربت يمه واقعدت على اركبها ولمته حييل وباست ارقبته واهي تبجي ) ولهانه عليك حيل .. والله ولهت على كل شي فيك
حمد : ( ساكت )
فرح : ( وخرت عنه ودموعها على خدها ) اشفيك حمد ؟ ماولهت علي ؟
حمد : فرح انا تعبان
فرح : ( امسحت دموعها ) اشفيك عمري ؟ خالتي فيها شي ؟
حمد : لا لا امي بخير
فرح : ( امسكت ايده ) عيل اشفيك ؟
حمد : انا بس كنت ياي اشوف ليش ييتي .. والحين لازم ارجع حق امي عندها جلسه
فرح : ايي معاك ؟
حمد : لا لا انا بروح و ارد بعد ساعتين
فرح : ( باست شفايفه بس اهو ما تحرك ولا تجاوب معاها .. وخرت عنه ) حمد ؟
حمد : ( قام ) نامي انا بروح ( خلاها وطلع )
فرح : ( حطت ايدها على شفايفها ودموعها تنزل ) اشفيك حمد اشصاير لك ؟

- بعد ما هدت شوي قامت اسبحت و اطلعت استشورت شعرها وحطت تاج ضعيف و البست قميص أحمر .. و حطت مكياج ناعم .. ودهنت جسمها وحطت عطر ريحته حيل حلوة .. و اقعدت عالسرير تنطر حبيبها و زوجها اللي ماجاسها تقريبا 5 أشهر -

( اتعبت من النطرة خافت اتدق عليه يعصب .. انسدحت تنطره أول ما اسمعت صوت أحد ياي .. اقعدت و وخرت الغطى عنها .. كانت تحس انها شوي مستحية لأن مدة طويله ماشافها بهالشكل .. بس تشجعت و اقعدت بشكل مغري شوي )

- أول مادش الغرفه تم واقف عند الباب يطالعها واهي تبتسم له .. ما رد لها الابتسامه .. راح بدل ملابسه و تم عالشورت .. دش الحمام بعدها طلع .. سكر الليتات و عطاها ظهر وانسدح -

( فرح انكسرت حييل من داخل و لا شعوريا ادموعها انزلت وقامت ترجف .. الحركة اللي سواها قوية حيل .. حست قلبها انطعن .. مو قادرة اتصدق ان هذا حمد .. راحت من وراه وحطت ايدها على ظهره )

فرح : حمد ليش ؟
حمد : ( مغمض عيونه ) تعبان وبنام تصبحين على خير

- فرح حست الدنيا تفتر فيها .. اكرهت نفسها حيل .. واكرهت حمد أكثر .. قامت دشت الحمام غسلت ويهها اهي تبجي بس من غير صوت .. قطت التاج بالحمام و لمت شعرها .. واطلعت بدلت والبست بجامة و عطته ظهرها وغمضت عينها ودموعها تنزل و ماتوقف –

فرح : ( بقلبها ) كسرت قلبي يا حمد .. جرحتني !!!

غيروك الناس عني ياحبيبي غيروك
وش لهم منك ومني ليش يبغوا يبعدوك

سمموا فكرك وجابولك كلام
غيرك خلاك طولت الخصام
وانت لوتدري الحقيقه
ماتفارقني دقيقه
غيروك غيروك
---

تحياتي

ⓡⓔⓡⓔⓩ

ينيت انا من المنتدى .. ومن اللي يطالبون بالبارت جني انا اللي مانزلته من كيفي :gr4uu:

 

[am_kshaa]

البارت حدى اينن
وحمد حقير
لان لو مصدق كلامه وعندة رجوله مايسكت على السوالف الى تنقال لازم يكلم فرح ويواجها
بس لان مومصدق كلام خواته وموقادر يواجه فرح
://////////////
يبط الجبد
والباجى لا تعليق

 

[PorscheGirl3]

وااااي قطيعه ماحب سوالف التشيش وااااااااااي
حرام عليهم يظلمون لبنيه ويخربون حياتها بروحه اللي فيهم يكفيهم
وااي بعد عمري فرح ماتستاهل
اما ندى اللي يستر شكله الدكتور مراح يخليها
مشكوووووووووره وااايد عل البارت تعبناج ويانا
ناطرين البارت الياي

 

[انااا وووبس]

لااااا - حراااااام ماأحب كسرة الخاطر لييييش كذا لييييش:eh_s(2):
والله مسيكينة تحملت وقاحة خواته وبعده عنها .. الله على الظالم
ريريز يسلمووو حياتي ونوووم العافية :eh_s(8):​

 

[ba6re8a]

اللللللللللللللله يللللللعنهم خووووووواته

 

[انا مميزه]

قوه ريري انا اول مره اكتب تعليق
بس انا متعابعتج من البدايه وكسرت حاجز الصمت البارت اليوم عجيب
وفرح كسرت خاطري والله قهر
اما حمدمالت عليه كلهم جذيه يقهرون ويغثون ومايحسون فينا
اما خواته مال تجيسنهم وتقطينهم تكرمين بالزباله
مالت عليهم ليش جذيه حقودات
بس ماعليج كلن يلقى فاله
وانا لو اني بمكان فرح والله ما اهين نفسي زياده خلاص الزم ماعلي كرامتي واهو خل ينفعونه خواته
ومشكوره على القصص الروعه اللي كتبتيهم وانا كنت متابعتج من اول قصه لج
وانتي انسانه مبدعه مع مرتبة الشرف والمفروض نسويلج تكريم ونعطيج درع للقصص الروعه:aha:
وشكرا مره ثانيه

 

[انا مميزه]

ريري ممكن سؤال؟
ماراح اقول جم عمرج
بس ابي اعرف شنو برجج؟

 

[إيمي1987]

روووووووووعة البارتات الثلاث
حمد ليش ما سمع من فرح ليش يظن فيها كل كلام ينقااااااال


بصراحة خوات حمد يبيلهم طق

اذا فزعتوا عليهم يا بنات ناادوني معاكم فيني حرة منهم


مشكوورة فديتج ع البارتات واخذي راحتج

 

[G!RLooNa]

وااااااااااااي خوات حمد حقااااره !

و ريريز انا يومين بعد المنتدى ما يفتح عندي

 

[المستبــده]

ريري انا ماراح اعلق على البارتات لانهم كلمة روعه شوي عليهم

بعلق عليج انتي


فديتج ليش معصبه والله ادري انه في بنات ردهم يقهرر
بس ما يسوى تقهرين نفسج عشانهم
صدقيني لو مو حابين قصتج ما يحنون ويطالبون بالبارت

ما عليه عمري اهم شي انتي لا تحرين نفسج وتعصبين

 

[sweety_love2]

كملي يا ريريز ما ادري شفي المنتدى هالايام والله كله معلق والصفحه يطلع فيها كلام خرابيط

يلاااااا ناطرينج

 

[7sawya 3sal]

waaaaaaaay aaaa7 9ij mw8if 5ays malt 3la 5wata g6e3a shno hathel

 

[ام جوري89]

والله رووعه البارت .. يعطيج الف عافيه ريريز ..

وصج بنات اي وحده تقول ابي بارت ياويلها !!

<< صج متى البارت ؟؟[/:COLOR] p

 

[مياسين الحب]

روعه البارتات وعلق معي هاليومين المنتدى مادري اشفيه
قلبي محروق ابي اعرف اش صار مع فروحه
حسبي الله على خوات حمد اللي مايستحون ولايخافون ربهم
ويكسرون قلب اثنين :eh_s(2):
يسلموووووووو:aha:

 

[mo9a7ya]

مشكووووره وااااايد على الباارتاات
ومالج شغل بأحد صج المنتدى يعل الواحد

بناااات اخر باااارتييين صفحه 114 و115

 

[شيخة الحلوين *]

يعطيج العافية
اي صح المنتدى معلق صارلة يومين

روعـــــــــــــــــة البارت

وفرح ماتستاهل حيييييييييل كسر فيها

لو يصارحها ويقولها شنو فية

يكون احسن يرتاحون اثنينهم

قطيعة تقطع خواتـــة

وندى بعد الله يشفيها يارب