السلام عليكم
ههه ادري تو الناس حدي متاخره بس الموضوع جذبني لووول
انا كنت ادرس باستراليا وتوني متخرجه فرش
تزوجت قبل التخرج ب سنه ونص واليك ماحصل ...
ملجت وريلي كان للحين بجامعة الكويت طالب خريج ... فاضطريت بعد ملجتي ب 12 يوم اسافر بدونه
رديت استراليا كملت الكورس الثاني كله ورديت .. في عطله الصيف مالت استراليا (يعني شهر 12 مو شهر 7) تزوجنا و اهو تخرج شهر 1 ... وبعدها سوى اوراقه معاي كمرافق
شرط التعليم العالي ان المرافق اييب ورقه من التامينات ان اهو غير موظف ومايستلم راتب.. وبس يمشون حق الزوج تذكره وحده بالسنه و 80% من معاشج الحالي.. يعني احنا كنا ناخذ 2900 و اهو يعطونه 2320 دولار... وال20% الباجيه حق البيبي ااذا وجد.
وبعدين بالنسبه للدراسه كلام الاخت sereen عين الصواب وعلى قولة واحد الله يذكره بالخير ( لائحة البعثات تنص على .... ) الي قالته الاخت 1 و 2 و 3 ولا واسطه ولا غيره تقدر تمشيه لج
وبعدين اذا في مثل حالتي تخرجتي و انتي متوفقه ... التعليم العالي يعطونج فرصه انج تكملين ماجستير على حسابهم
بس بشرط انج تكملين بنفس الديره الي تخرجتي منها ... وفي هذي الحاله زوجج يكون مرافق ويقدم على نظام الاوفست.
هالنظام يعني ان التعليم العالي يتكفلون فقط في مصاريف الدراسه مالته للماجستير... و يكون هالشي منفصل نهائيا عن بعثتج يعني بالكويتي جذي راح تاخذين 80% زياده لانه مرافق و بنقس الكويت يتكفلون بمصاريف دراسته ... يعني بعيثه مو بعثه
بالنسبه حق هالنظام اذا كان زوجج موظف اذا قدر ايييب من الدوام موافقه اننه يطلع يدرس او يكون مرافق اصبح نور على نور لان هذا واحد من شروطهم.
ولازم التقديم يكون في فترات محدده من السنه و انتي عليج اتيبين ان كوندشنال اوفر قبول غير مشروط مادري شسمونه اهم من الجامعه الي تبينها
وثالثا تكتبين كتاب حق الوزيره تطلبين فيه الالتحاق بالاوفست . واهم بالوزاره راح يعطونج صيغة الكتاب .
وبس
ومثل ما قالت الاخت sereen دايما خليج متابعه اوراقج وامورج معاهم لا تخلينهم لا كيفهم لان وايد برود وعادي بعد 4 سنين يقولون لج وييي هالجامعه مو معترف فيها او غيره من الامور السخيفه.. انا اخذت ورقة لمن يهمه الامر من الوزراه اني طالبه عندهم وجامعتي كذا و تخصصي كذا واننهم معترفين فيها لان انا بعد صارتلي شوي مشاكل باول سنه مع التخصص.
واذا الله كتبلج وحملتي حالج حال الموضفات ... لج اجازه امومه ووضع لمدة كورس مع راتب كامل واذا تبين زياده نص راتب واذا تبين بعد يقولون لج روحي قعدي بديرتج هههه
واذا تخرجتي وانتي متوفقه ترى لازم يعطونج 1000 دينار... واذا تتفوقين بالسنين الانتقاليه لج 500 وغالبا ما تاخذينها على شهر 4 مع السنه الماليه الجديده ..
وعلى كلام مسؤولتي الحلوه بالوزاره
تقول اذا تخرجتي قبل موعد انتهاء البعثه لازم يمشون لج معاش لي وقت الانتهاء يعني انا تخرجت شهر 11 و بعثتي تنتهي شهر 3 السنه الي بعدها ... سولي كتاب ودزوه حق المكتب الثقافي عشان يمشيلي معاش هالجم شهر
وبس ان شاءالله اكون فدتج ومبروك اذا تزوجتي.. واهم شي وانتي تختارين الريال.. اختاري الي باله طويييل ترى مو الكل يقدر عالغربه ولازم يكون متفهم وضعج عدل
وبس
