زوجي مغثه و نشبه و عله و عظم بالبلعوم كل شي يطري على بالكم

[Sisyphus]

زوجي مغثه و نشبه و عله و عظم بالبلعوم كل شي يطري على بالكم


الحقوووووني وربي بموت بموووووت
زوجي مو طبيعي
جنني
طير عقلي
احس بشق هدووووومي وانحاش بالسكه و اصايح
احس احيانا ودي احط طلقة رصاص بحلجي وانتحر
و احيانا ودي ادخل ايدي داخل مخي و العب بفيوزاته واصير مجنونة رسمي
و اذا قام يسولف زوجي تجيني رغبة اني اشلع اذني واحذفها عالارض و اطاااااامر فوقها
او اسخن قفشة عالنار و اجويها

لا تلوموني
تكفون لحد يلومني
انا بيطير عقلي اذا كان باقيلي عقل اصلا
عمركم شفتوا واحد مثله
خلوني اعلمكم وتكفون ساعدوني

زوجي طيب و حبوب و كريم وماعليه
لكن فيه اطباع تخليج تكرهين الساعة اللي ابوج تزوج فيها امج
بعطيكم امثلة و امااااانة كل وحده تحط نفسها مكاني لو في شخص وراها جذي شبتسوي

انسان حبوب و يحبج وانتي تحبينه
لكنه يبي يتملكج تملك بنسبة 10000 ٪
يبيج متفرغه له 24 ساعة
يبي تفكيرج بس فيه
خل اقولكم امثله
من تزوجت ممنوع انام عند اهلي ابدا
ممنوووووع
والسبب لانه عيب انتي عندج بيت
انزين بسهر عند خواتي
لااااا مستحيل تسهرين
لج جم ساعة في يوم من ايام الاسبوع تشوفين اهلج و قبل الساعة 8 انتي بالبيت


ممنوع تطلعين مع رفيجاتج وخواتج طلعة وناسة
لازم معاي انا
وترى ماراح تطلعين معاي انا باستمرار لانه يعتمد على مزاجي وهالمزاج يجي مره بالشهر او اكثر

يتدخل بكل صغيرة وكبيرة
تخيلوا انا كنت نفاس فبنتي الاولى
و جنني يبيني ارجع لشقتي و اخلي بيت اهلي
ارجع لشقتي و اقعد بروحي وانا والده قيصري ومحتاجه من يساعدني
محتاجه ناس اكلمهم
يقولي لا الاحسن تنفسين فبيتج مو بيت اهلج عيب عليج
و قام يحن علي وانا والده قيصري يقول يلا ردي بيتج
خلاني اكره بيتي
هو يروح يطلع برا وانا داخل الشقة انحبس نفاس ولا عندي من يهتم فيني
يا فلاااان حرام عليك
يقول لا عادي انتي عندج خدامة تسوي اكلج شتبين بعد؟؟
يبا ابي عالم اسولف معاها*
يقول انا ارد اخر اليوم اسولف معاج
بالله هذا كلام؟؟؟


اذا بطلع لزيارة والا شي
يالهووووي عالتوصيات و الكوارث اللي تصير
لازم يشوف كل هدومي قبل اطلع
و قبلها بيوم يحاتي انا شنو بلبس ههههههه تخيلوا
ولا تبرد جبده الا اذا لبست دراعة واسعة
و يضيق صدره اذا كنت لابسه بدله قصيرة ويمكن يتهاوش معاي احيانا بسبب انها تكشف جسمي
مع اني دايما البس الساتر
و قيسوا عليها المكياج و قصات الشعر و الصبغ

طبعا خلوا هذا كله خلااااص ما منه حل
انا يأست
اللي ابيه منكم بنات ابي حل لمشكلة ثانية
مشكلته اذا مثلا اقتنع اني مثلا احب اروح السوق باستمرار و هالطبع ما يعجبه
يصير بينا حوار عجيب غريب

مثلا
هو: انتي تحبين تروحين السوق باستمرار
انا: لا انا ماحب
هو : بلى تحبين
انا : لا والله يابعد قلبي ماحب
هو: يعني ما يهمج السوق؟
انا: لا ما يهمني حبيبي
هو: اوكي
انا : فهمت فكرتي؟
هو: اي حبيبتي فهمتها
-- لحظات صمت--
انا: شفيك
هو: قاعد افكر
انا: شتفكر فيه
هو: ليش تحبين تروحين السوق باستمرار

طبعا لا تتخيلون الصدمة على ملامحي
اسولف معاه بالساعات احاول اخليه يفهم الصورة
واخر شي يردني للمربع الاول و يطلع ما كان يسمع شي
او بالاصح يسمع لكن يكون متشبث بالفكرة
اتمنى وصلتكم الفكرة

و الشي الثاني انا ما صار فيني صبر
قبل كنت هاااااديه وعلى طول اسامحه
الحين بسرعه اتضايق و تبرد السالفة وانا ابقى متضايقه من الحره اني يأست من اسلوبه
متتتتتعب حيل حيل بالتعامل معاه
ماعندي امل يتغير
احس مهما اكلمه و اقعد معاه و اوضحله ضيقي يقول اوكي بتغير
و عقلها يرد مثل ما هو

ساعدوني شلون اتعامل معاه ياعالم
يابشر
وربي تعبت

 

[في سحابه]

حبيبتي والله ,, الله يكون في عونج يارب ويفرج عليج


كل شي يتغير بالتعامل ,, والمرة تكسب ريلها بأسلوبها

حاولي تسايرينه في كل شي بس فية اشياء من شخصيتج لاتغيرنيه مهما كان

هذا رأي انا نشوف باقي البنات شوة يقولن لج ,,

الله يوفقج ياروحي ولاتتعبين عمرج بالتفكير ,, كل باب وله مفتاحه

 

[MRS.]

الله يعينج زوجج له طريقه تعامل وللامانه مابي افتي بالطريقه انصحج تاخذين استشاره او تكلمين والدتج تساعدج
​

 

[Gatwa DaloO3a]

لووول فيه صفات من زوجي ..

باختصار زوجك نظام شياب ..و ترا مسكين لانه يحبك يسوي كذا

ادري انه شي يخنق ..


"الاهتمام الزايد مفعوله بالضبط نفس الاهمال .. "


وهالشي يعطي انطباعات ثانيه .. يعني شنوو هو فاااضي ماعنده شغل ماعنده اهتمامات بس مجابلني ٢٤ ساعه !

يعني هو حلو الاهتمام اكيد و انيي اكون من اولوياته ،، بس انه مجابلني ٢٤ ساعه عاد احس فيه خلل


صارحيه قوليله ماتحب تشوف زوجتك مستانسه يعني ؟


وسالفة النوم في بيت اهلك هذي مو لازم تحنين عليها ،، بس الاشيا الثانيه مثلا اذا قال بيطلع معاك وانتي مع خواتك ، قوليله حبيبي عاد زوج اختي ما يسويها ويطلع معانا ، وهم يمكن يستحون منك ويبون ياخذون راحتهم بالكلام والسوالف ..

حاولي توصلين له ان فيه حريه المفروض تكون موجوده في بعض الاشيا

 

[أبلة فاتن]

الله يعينج واي وانتي تسولفين احس ببجي شنو هذا ... شنو يشتغل زوجج ليش جذي شكاك ؟؟

 

[نـعـومـه]

زوجج فيه حب تملك

بس مو لي درجه تبين تنتحرين !؟!

سالفه نومه عند الاهل هم موضروريه موكل ريال يحب !! طلعات مع صديقات هم موكل ريال يحب شدراه منو هذيل ؟!؟ زينين ولا لا !!

اما طلعات مع خواتج قوليله قنعيه هذيل خواتي ومايصير تحرمني منهم

ريلج مشكلته شوي لزقه ولا مو شين شين

الله يكون بعونج

 

[al-musk]

لازم تحاولين تتأقلمين شوي وتسايسينه مع انه خنقه ولازم يعرف انه قاعد يخنقج وهالشي ممكن يخسرج فيه مع الأيام .. وحاولي تفهمينه ان الحياة شراكه .. باجر مع العيال واللوية والمسؤوليات أظن يخف عليج

الله يعينج

 

[شواآاقه]

مافيها شي
طلباته كلها من خوفه واذا طبقتيها مع الوقت بيتغير وشوي بيفج بس المهم انج تنفذين طلبه منج وتلتزمين بكلامه
اهو بس سالفة يخاف عليج ويرتاح لمن تكونين بالبيت لانه واضح بطبعه يحاتيج
ترى مع العشره كل شي بيتغير ويطخ عن حنته
الحمدالله طبعه هين واحسن من وايد رياييل اسم الله عليج اقري باجي المشاكل بالقسم وتعرفين انه الحمدالله انه هذا عيبه موشي ثاني

والله يسخره لج ويحنن قلبه عليج حبيبتي

 

[رنيم الروح]

لووول فيه صفات من زوجي ..

باختصار زوجك نظام شياب ..و ترا مسكين لانه يحبك يسوي كذا

ادري انه شي يخنق ..


"الاهتمام الزايد مفعوله بالضبط نفس الاهمال .. "


وهالشي يعطي انطباعات ثانيه .. يعني شنوو هو فاااضي ماعنده شغل ماعنده اهتمامات بس مجابلني ٢٤ ساعه !

يعني هو حلو الاهتمام اكيد و انيي اكون من اولوياته ،، بس انه مجابلني ٢٤ ساعه عاد احس فيه خلل


صارحيه قوليله ماتحب تشوف زوجتك مستانسه يعني ؟


وسالفة النوم في بيت اهلك هذي مو لازم تحنين عليها ،، بس الاشيا الثانيه مثلا اذا قال بيطلع معاك وانتي مع خواتك ، قوليله حبيبي عاد زوج اختي ما يسويها ويطلع معانا ، وهم يمكن يستحون منك ويبون ياخذون راحتهم بالكلام والسوالف ..

حاولي توصلين له ان فيه حريه المفروض تكون موجوده في بعض الاشيا

نفس كلامي ونفس زوجي عنده بعض الصفات وخاصة اذا بطلع مكان واذا حاولت اقنعه يردد نفس الكلمه
اخاااف عليك :eh_s(4):

 

[a7la_7b]

الله يعينج حاولي تغيرينه بطريقتج

 

[لي لي78]

الله ايكون في عونج وانشاء بيتغير

 

[غلايو]

انا بعد زوجي جذي بس اخف

يعني بروح عرس بنت صديقه امي

يقولي لا بتتعدلين وبتصيرين حلوه وبيحسدونج! ولا لا انتي معرسه ليش تروحين؟ ولا بيخطبونج وبعدين بتقولين انا استاهل واحد احسن منك!!! انا انجلط وانطم واسكت ،،


بروح بيت ربيعتي الي معاها من اول ابتدائي وكنا نسافر اهلي مع اهلها وجذي وامها ربيعت ماما واايد كأنهم خوات
يمنعني يقول لا اخوانها بيسولفون معاج! مع انهم ابداً ما كلموني ولا يدخلون لما نكون موجودين عندهم من لما كنت صغيره


بروح الصالون كل شوي يدق يتطمن ها شسويتي حد قالج شي ترى انا واقف برع من تخلصين اطلعي!

بروح المول مع ابوي! يقولي لا ابوج معارفه وايد وبيشوفونج الرياييل وماعرف شنو مع اني اتغشى مرات!

واذا قلت شي قالي انا مقصر! طلعه و اطلعج
كل مكان اوديج
خلاص بس

مره كنت بروح القريه مع اهلي
قالي لا باجر انا اوديج!
مع اني ابي اروح مع اهلي لان حلو لما نكون مع بعض نسولف ونضحك
ويوم سرت معاه ملل في ملل و لوعه جبد

تدرون خذت بلاك بيري والله شهر و عفته منه
الا منو كلمتي و ليش كتبتي جذي ليش حطيتي هالصوره ليش ليش ليش

ليما كسرته وقلت هات ايفوني الجديم

بس شسوي

مافي حد كامل
وماعرف كيف اتعامل معاه لان ما اقدر اتوقع رده فعله
يعني عادي يوديني مكان زحححححمه وكله شباب ويكون مستانس
وعادي يدخلني فلم و جدامنا ولا ورانا ريال يتم يعصب!
مزاجي ويقولي انتي مزاجيه!
تعبت نفسج ويمكن اقل عنج بشوي
ص رت اتجنب هالمواضيع!

لما اضيق اصيح مع نفسي ومن يقولي ليش قلت له اهلي راحوا مثلاً دبي وانت كنت فالنادي وانا بروحي ومن اسبوع وانا محكوره
يقولي ليش ماقلتي ياحبيبتي كنت بخليج تروحين عادي!!!!!!!!!!!!!

وحزتها ابطها واقول كل شي انت لما كنت ابي اروح ذاك اليوم ماخليتني وعصبت و لما ولما لين ما خف من طبعه بخصوص طلعات اهلي
ماعرف هالرياييل كيف تفكيرهم

 

[manoooram]

الله يصبرج ويعينج
طبعه صعب الله يهديه
في البداية حاولي تماشينه وتجارينه والله المستعان

وان شفتي نفسج مو قادرة تتحملين وابتديتي تتنرفزين
حاولي تغيرين سير الموضوع بشي ثاني واذا ما فاد
طلعي لج عذر بتروحين حمام او أي شي
و قومي عنه

حاولي تتفاهمين معاه ان تحبينه وهو كل شي بالنسبة لج
بس في أشياء مضايقتني 1 - 2 - 3 والله يسخر لج اياه ويهديه

 

[بنوته ستايل]

ولله كل صفاته عاديه وغي صفات حلووووووه واجد لانها تدل ع حبه لج..

صج الحريم ماينعرف لهم اذا زوجها اهملها ومادرا عن هوا دارها قالت مايهتم فيني ومايحبني
واذا يبيها عنده وتقابله ويقابلها ويحبها ويخاف عليها ويغار عليها قالت قاعد ع قلبي وغاثني..



انا اقول قولي الف حمد وشكر ع زوجج غيرج مومحصله هالاهتمام والخوف ..
اعرف وحده تقعد عند اهلها بالاسابيع وزوجها هايت واذا بغت ترد بيتها يتضايق مستانس ع فرقاها..


ربي لايغير عليج الا للاحسن..

 

[Infinite Love]

ماعليه باين توكم متزوجين تحملي مع الوقت بيخف خاصه بعد البيبي
و شي حلو متعلق فيج انتي حاولي معاه قوليله عشان نشتاق لبعض
او قوليله سويتلك مفاجاه و حجزيله سفره له يسافرها مع واحد من ربعه
​

 

[كيوت جيرل]

انا مع بنوته ستايل كلها صفات طبيعية وحلو انه مهتم
حمدي ربك بالعكس واحسن يكثير من غيرة

 

[انصاريه قمره]

نفس اللي عندي لي لقيتي حل قوليلي

 

[Um Rashed]

أغلب الرياييل جذي ما أدري شنو تركيبتهم الله يعينج

 

[PuPa^^SWeeT]

شوووفي اللي فعلا اهو غلطان فيه


سالفة نومتج بالشقة بالنفاس و توج قيصرية





بس الباجي عاادي فيه منه 50% من ريلي


بس مو مزعج بالعكس



حلووو انه يغااار عليج و يخاف عليييج



وسالفة نوومتج ببين اهلج ولا سهرج ببيوت خواتج يعني مو ضرورية حيل

 

[om MaRyooM]

زوجج فيه غيرة مرضية زائد حب تملك لدرجة كبيييرة

مانقدر نعطيج حل سحري

لكن الحل الاكيد انج لازم تتسلحين بالصبر والدعاء والهدوووووووووء

وانصحج روحي لاخصائية علاقات اسرية عشان تعلمج شنو انسب طريقة للتعامل مع جذي شخصية


ماعليه مافي شي مستحيل .. بالنهاية هذا زوجج ومايسوي جذي الا لأن يحبج
والله يعينج على مابلاج