زوجي يقلدني بكل شي@@ اللي تعرف تحلل بس تدخل plz

[om MaRyooM]

السلام





بنات بدش دووووغري بالموضوع





زوجي حبوب وطيوب وشخصيته تهبل بس في شي محيرني فيه :eh_s(10): صارله سنتين تقريبا شي جذي



قمت ألاحظ اذا سويت شي يحاول يسوي مثله


شلون


يعني مثلا


من جم شهر شراله ايفـون بعد اسبوعين باعه ماعجبه وعلى قولته (مو سوالفي الواتس اب وهالمصاخة) وطافت السالفة


من فترة رحت شريت ايفون وغيرت خطي ..

ثاني يوم جان يقولي شكلي برد اشتريه واحط الوتس اب واغير خطي @@ استغربت لأن مو اول مرة تحصل مثل هالاشياء




مثال ثاني

رحت اسوي ليزر ... جان يقولي ليش ماانا اسوي بعد:bbbiu:





مثال اخر


اول امس رحت طلبت فيزا من البنك لأني كنت محتاجة جم شغلة من النت

جان اشوفه يدق عالبنك ويطلب فيزا !!!!!!! مع ان ادري ان موسوالفه يطلب من النت وجذي




آخر مثال


كنت باخذ دورة icdl للكمبيوتر .. جان اشوفه يروح دورة تبع لدوامه حق الـicdl وفعلا دش الدورة وخذا الشهادة :eh_s(10):

يحسسني احنا بتنافس:eh_s(4):




بنات شرايكم

انا تعجبني شخصية زوجي وادري انه مايحب التقليد وواثق من نفسه
بس مستغربة من هالجم شغلة !!
شنو تعليقكم .. جد محتارة

 

[حلوه ولمآحه]

ههههههههه
اذا لقيتي حل قوليلي معآآج ،،
الله وكيلج حتى اذا حطيت ماسك للبشره قال سويلي معاج ،،
وانا حامل اكل فيتامينات >>كلا معااي شكووو قلت شرايك تاكل من المثبتات بعد
شريت ايفون خذا هو بعد
مركبه بالرينقوآآ ركبه هو بعد
اخر شي مسحته مسحه
مآدري شقصته ،،
سالت خواتي قالوا انه بعضهم مايحب المره تزيد عليه بشي ،،

 

[LoLaTi]

كل السوالف عاديه الا سالفه الليزر:eh_s(10): ليزر شنو بالظبط؟؟؟؟

 

[شوق روحي-305-]

هههههههههههههههه

مااادري والله امرهم عجيب الريايل....

مادري ليش بعض المرات احس الريال صج لما قالوا .... ياهل..

 

[دلوعة صلوح]

الوضع عادى كل الريايل جذى كل ما سوت مرتة شئ سووة معها بس الليزر اول مرة تمر على هههههههه

 

[lolayasmeen]

ههههههههههههههههه بكل سهوله علشان يحسسج انه يعرف لهالشغلات تري مو بس انتي
تعرفين اما انا ريلي يغار مني مو بس يقلد لي رجعه

 

[حكستار]

ههههههههههههههههههه
يمكن جت كذيه....مو قاصد شي!!

 

[dectora 7elwa]

هههههههههه
عادي
1)تحبين نفسج وهو مو كل اهتمامج شوي اهتمامج خاف فيه مع الحمل
اذن لازم يتابعج
2)زوجتي مايصير تمر بخبره او تجربه انا ما اعرفها
لان مايصير الزوجه تكون اكثر اطلاعا من الزوج
3)الغيره
انامره صك على صبعي باب السياره وصار في شرخ فحطولي جبيره وكانت ايدي اليمين فتاثرت شوي حياتي
النتيجه
ما كان يوصلني ولامكان مع اني ما اقدر اسوق
و3يوم رد البيت شاري ضباب من الصيدليه ولابسه بايده يقول حاس بعواااار مو طبيعي
الله يخليكم لبعض

 

[ثريا الكون]

اظاهر هرموناته الانثويه صاعده هل يومين

 

[iLLuMinaTion]

ليزررررررررر عاد

 

[raneen]

هههههههههههههههه حبيبتي يمكن هو يحب يكون كل شي مشترك بينكم
او من كثر مايحبج يسوي نفس سوالفج بس الليزر هذي ضحكتني بس اعتقد قصده على خط اللحيه وهذا عادي وايد سمعت ريايل سووه ...
او يمكن صدفه ....
الله يخليكم حق بعض...

 

[أتراب]

يمكن يتشجع لما يشوفج تسوين
شي فيسوي مثلج عادي ترى
وايد تصير​

والبنات شفيكم علقتوا على سالفة الليزر
ترى لريال اسوون حق اللحيه​

 

[اخت خالتهم]

يمكن عشـان يلقى حـوار معـاه
او اهو يحب يكـون أحسن شي
او ما يبيج تكونين أفهم منه بأي شي ..

 

[ليدي بجد]

بالعكس انا اشوف شي ايجابي لسببين
اولا لو بغيتي شي سواه او شراه ما يقدر يقولك لا انتي مره وانا ريال او لا.. باختصار
ثانيا يمكن معجب بشخصيتك يعني يحسك فاهمه بالشي الزين والمفيد او الي عالموضه فيثق بتفكيرك وافكارك..ويطبقها..مثل لو عندك صديقه من او قريبه من تقولك على شي ثقين بكلامها وتسوينه والباقي لا..
وهالشي اشوفه ايجابي واحسن من تهميش المره والادعاء انها ما( تفهم وجاهله وناقصه عقل وكل شي يسوونه الناس تسوينه بدون تفكير والا يقص عليكم يا الحريم طبيب التتجميل وبس ماعندكم الا التشري والاسراف) وهذي عبارات تقريبا ما في رجل الا قال شي منها لزوجته.......الا زوجي طبعا,,هههههههه
بس هي مشكله بحاله وحده بس
انه ممكن تنجبين مره وحده بس..(بسم الله عليك)
يعني لو حبيتي تسوين عمليه تجميليه تحت بعد الولاده...وراح قلدك......هنا بتكون اول واخر خلفه لك..على الارجح:krkrkr:
تقبلي هزاري بصدر رحب

 

[اميره1980]

يااااااااااااا رييييييييييت ريلي مثل ريلج ما شاء الله يقلدج بالشغلات الحلوة و المفيدة الله يخليه لج
المفروض تستانسين ان قاعد يعدل من نفسه و يطورها
و يا بنات على سالفة اللليزر ترا لا تضحكون في رياييل شعر جسمهم وايد بمكان معين و يحاول يخفف منه على الاقل و ساعات يطلع مكانه دمامل من كثرة الشعر
رفيجتي زوجها سوه ليزر حق منطقة تحت اللحية عرفتوها؟؟ المنطقة اللي تصير بين الوجه و بين الرقبة لان بعد الحلاقة و لمن ينبت الشعر يطلع حبوب و دم

 

[الـــغـــلآ]

عادي طبيعي

بالعكس وناسه و يمكن انتي لما تسويين الشي تحط الفكره براسه و يشوفها حلوه و يسوي مثلج

 

[كيم كارداشيان]

حبوبة بخبرج شيء ..

بعض الرجال ما يعرفون يخططون لحياتهم .. بمعنى ما عندهم حدس إختيار الأفضل

وهالنوع عادة يكونون مرتبطين بالشخص الأقرب .. مثلا .. في المراهقة يرتبطون بالربع .. تلاقينهم يقلدون ربعهم .. ويسوون مثل ربعهم ويلبسون مثل ربعهم


في البيت يقلدون الأخ الأقوى شخصية .. سواء كان أكبر أو أصغر ..

وفي الحياة الأسرية يقلدون الزوجة .. ومع الوقت يقلدون حتى طريقة كلامها

وهالنوع تلاقينهم يحاولون بكل قوة إثبات تفردهم وتميزهم وإنهم أصحاب الأولة مثل ما يقولون

بمعنى ...

هو شرى الايفون المرة الأولى مشيا مع الصرعة ..
حس إنه ما انسجم وياه + إنتي ما كان عندج .. ويمكن إنتي تكدرتي لأنه شراه .. فحس إن هالجهاز فاشل.. باعه

انتي شريتي أيفون .. ( طبيعي البنات يفهمون في الكنولوجيا وميزاتها أكثر من الشباب) .. حس إن فيه شيء مسلي .. غير جيه حس إن هالمرة ما بتتكدرين .. وطبعا حب يستوي مثلج .. (موب يقلدج لاحظي .. يتميز مثلج ) .. فشراه

مع ذلك تلاقينه يقول للجميع : شريته وما عجبني وبعته .. وعقب حسيت اني ممكن أتعلم عليه .. وشريته ! (يعني ما اييب طاريج موووول)


نفس الشيء الليزر .. حس إنه تجربة يديدة ومفيدة وحب هو يتميز فيها

والاي سي دي ال

وغيره وغيره


هالنوع من الازواج طيبين .. وعندهم حس تعلم .. ويحبون يطلعون على اهتمامات الزوجة (حتى لو ميك أب ) .. ما عندهم مشكلة يشترون لها أي شي أو يسألون عن أي شيء

بس لما حد يسأل هم يريدون يوضحون إنهم أصحاب المبادرة .. وإن الزوجة خذت بشورهم ,. وهالشيء يسبب يعض المشكلات ..

 

[Beauty is Me]

ليزر يحددون اللحيه

لا يروح تفكيركم بعيد لووول

 

[بخـــارى]

لانه يحبج

 

[الشيخة@]

لا مولهدرج عاد اقعدي وياه وقوليله ليش تسوي كذا معاي مو لهدرج عاد حتى ليزر لا قويه شوي