زيارتي الأولى للكويت...

[مليكة على أريكة]

السلام عليكم ورحمة الله وبركاته

كيفكم يابنات؟
هذا موضوعي الأول في المنتدى واللي مسجله عشانه
فياليت تفيدوني وماتخذلوني.
وماتقولون لي ارجعي للتقارير والمواضيع في القسم.

أنا بصدد زيارة للكويت ان شاء الله في أيام العيد بزور وحدة من قرايبنا

وبنجلس ان شاء الله ثلاث أيام في الكويت

خايفه أطفش دلوني ع أماكن أزورها وتكون حلوة ومميزة عندكم
غير المولات والمجمعات وهل في المولات شي مميز غير التسوق؟
زي دبي تلاقين الاكواريوم وسكي دبي و...كلها في المولات

أرجوكم ساعدوني ممكن أسواق شعبية حلوة او متاحف او حدائق او....اي شئ جميل ؟

 

[مليكة على أريكة]

معقولة ...ولا رد؟
لايكون وحدة من الثنتين:
١-مافيه غير المجمعات لكن الاولى تردون تقولون مافيه غيرها.
أو٢-غير مرحب بزيارتي�� وهذا احتمال ضعيف من الوجوه الطيبة

 

[CSS_]

ابدا عزيزتي لا هذي ولا هذيك اذا ماشالتج الديره تشيلج عيوننا <3

اول شي ارحب فيج مقدما واتمنى لج زياره ممتعه بالكويت (F) ..

بالنسبه للاماكن اللي ممكن تقضين فيها وقت غير المجمعات

عندج:

١) النادي العلمي.. فيه اكواريوم وسينما 3D وفيه قسم اعتقد اسمه الاكتشافات او شي جذي ممتع للصغار "نفس الالعاب بس بشكل علمي" .. وطبعا فيه مطاعم وكافيه وغيرها ..
٢) عندج من الالعاب او الملاهي: - المدينه الترفيهيه ومكانها الدوحه - والشعب - وحولي بارك .. وعندج بمجمع الافنيوز العاب .. ومول 360 في العاب بعد ..
٣) بالنسبه للاسواق الشعبيه.. عندج المباركيه سوق شعبي وفيه مطاعم شعبيه.. عندج بعد يوم البحار او البحاره ويكون عالبحر وفيه اقسام او محلات شعبيه تبيع حلوى وملابس والعاب شعبيه ومحلات بقاله ونخي وباجله ومشويات وجذي يعني اشياء شعبيه راح تحبينها اعتقد;p وطبعا اذا حابه تاخذون معاكم "زوليه" وتقعدون عالبحر الجو بالليل حلو <3
٤) وبالنسبه للحدائق اعتقد او غالباً بكل منطقه في حديقه شوفي اي حديقه قريبه لمكان سكنج او فندقج واخذي زياره لها:*
وفيه متاحف اعتقد فيه موضوع مثبت بالقسم معروض فيه اسامي المتاحف واماكنها

طبعا ماذكرت كل شي اسمحيلي ذاكرتي لج عليها شويه لوول اتمنى من البنات يفيدونج بشي غير اللي ذكرته:*

واخيراً حيااج الله بالكويت ديرتج الثانيه وبتنووورينا ياجميله:* <3

 

[CSS_]

http://www.q8yat.com/t989397.html

^ هذا موضوع المتاحف واماكن غير المجمعات اذا حابه ..

http://www.q8yat.com/t304156.html

^ وهذا الموضوع جميييل فيه اغلب الاماكن الترفيهيه شوفي اللي يعجبج والقريب من مكان اقامتج وروحيله :**

وسامحيني عالقصور كان ودي افيدج اكثر والله

 

[مليكة على أريكة]

ياحبي لك❤❤
الله يسعدكِ ويوفقكِ ماقصرتي ياالغالية
ارتحت من ردك ❤❤

 

[آلعناآأ]

،





حيآج الله ياقلبي بديرتج الثانيه

و ماقصرت الاخت

و ترا الكويت صغيره افتري بالسياره اي مكان يعجبج دشي

 

[مليكة على أريكة]

تسلمين يالعنا ع المعلومة &#55357;&#56856;
لكن اختصار بدال الفرفرة قلت أسأل

 

[بنت الاحلام]

في اسواق كثيره مع الذوابط وكل شي ما تملين اذا جيتي الكويت

كل شي حلو فيها

 

[مليكة على أريكة]

في اسواق كثيره مع الذوابط وكل شي ما تملين اذا جيتي الكويت

كل شي حلو فيها

ياحبي لك ❤
قلت ماأبغى أسواق الا الشعبية

 

[ام رينـاد]

حياج الله

 

["حلاوه"]

هلااا حبيبتي
حياج الله ف بلدج الثاني الكووويت عروس الخليج

انتي طلبتي أسواق شعبية عندج ( مثل ماذكرت وحدة من خواتي المباركية ، وسوق الفحيحيل فيه كذا اسواق شعبية ب منطقة الفحيحيل، وسوق الجمعة يفتح يوم الجمعة بمنطقة الري )

والحدايق ( حولي بارك ، حديقة الشعب ، المدينة الترفيهية ، مرح لاند ، شاطئ العقيلة ، حديقة الحيوان ، الغابة الصغيرة ، والحدايق العامة اللي بين المناطق للقعدات والشوي وفيها العاب للاطفال ، حديقة الاحمدي )

والكويت توونس ماتملين منها ان شاء الله
​

 

[مليكة على أريكة]

تسلمين ياحلاوة ماقصرتي الله يسعدك ويحقق أمانيك
وأشكر الجميع ع المرور الرائع

وياليت اللي عندها اسماء اسواق او محلات تبيع أشياء غريبة أواني أو كماليات تفيدني؟

 

[مليكة على أريكة]

تسلمين ياحلاوة ماقصرتي الله يسعدك ويحقق أمانيك
وأشكر الجميع ع المرور الرائع

وياليت اللي عندها اسماء اسواق او محلات تبيع أشياء غريبة أواني أو كماليات تفيدني؟