سؤالي تخيلي نفسج مهندسه او شنو انتي تحبين تشوفين في بلدنا ؟

[رحيل الشمس]

بنات انا بسالكم سؤال الكويت بلد غني ولله الحمد ابي اعرف ليش ماتطونا لحد الحين ما اشوف اي تغيير ليش مانشوف شوارع وسيعه وكلها اشجار ورد وبيوت تفتح النفس مثل بعض مو القسيمه غير والحكومه غير وشرط الوانهم حلوه مو كل واحد على كيفه ولا احد يحط بيت بنفسجي صح حرية راي لكن داخل البيت مو بره هم منظر البلد بعدين ليش مايحطون شلالات اي شفيها بالفلوس كل شي يسر شلالات صناعيه في كل مكان وليش مايحطون لنا مثل الهايد بارك العالم تمشي فيه اي والله ياخي فلوسنا راحت بطن ابو براطم وغيره وغيره وغيره ولابين الكل حاقد طيب انا ليش مانفش البلد وخليها متعه لناظرين في كل مكان احطلي منظر وجميل وبعدين ليش مايهتمون في المستشفيات وخلونها راقيه والمدارس انا ماودي ادش بالمواضيع هذي لاني راح اكتبها بموضوع ثاني انا بس اتكلم عن الشغلات الي تغير بنفس الواحد وتطور البلاد بعدين ليش مايحطون قطار اي قطار بس مو مثل سالفة سعد الفرج بالمسرحيه لاانا برايي للعمال يقشونهم خط خاص لهم ويشيلون الباصات الي تقلب الجبد وليش مايخلون منطقة كامله حق السوقه لا ومدشها سياره ويشيلون هالمجمعات ويخلونها منتجعات وليش مايحطون مكان للامهات تغير نفسيتها من هموم البيت باي حزه تناسب كل ام لج كرت دشين هالمكان الكبير اللي كله مناظر خلابه وترتاحين عقب تروحين لبيتج مو سوق تفترين الين ينبط راسج عقب عيالج الله يصلحهم يخلصون على الباقي المهم ما ابي اطول ولا انا لو علي ودي ودي ودي لكن ابشوف انتم شنو ودكم فيه.
سؤالي تخيلي نفسج مهندسه او شنو انتي تحبين تشوفين في بلدنا من تغيير عن كل شي خلونا نشوف وجة نظركم؟

 

[جاي الضحى]

رد: ليش يا تجـــــــــــــــــــــــــــــــــــــــار

رحيل الشمس أرحب فيج ترحيب حار بينا بالمنتدى وأحي أفكارج الفوللي. :rerrerek:

كنا ومازلنا نطالب ونشجع أفكار مثل أفكارج.

للاسف أغلبية الناس والجهات المختصه مشغولة بالساحة السياسيه هامله الشغلات العمليه إلي تأثر بشكل مباشر على جودة حياتنا، نفسيتنا، صحتنا ومستوانا المعيشي. ناسين إن بالشغلات إلي ذكرتها فيهل تنميه للذوق العام وراحة نفسيه! :0bee2e8d89:

يوم عن يوم تشوفون الفرق يكبر بين المرافق التابعه للقطاع الخاص عن القطاع الحكومي. أصبح الفرق شاسع. القطاع الحكومي أصبح بالخلف بعيد حتى عن المقارنة. بحث الناس عن كل ماهو خاص يدل إن الناس تدور الزين مع إن الحكومي مجاناً بس أصبح الحكومي ما ينفع حتى لو بلاش! والسالفه تشمل مدارس مستشفيات جمعيات.

شخصياً على صعيدي وعلى صعيد العايله واجهنا أشخاص كانت تحارب أي تغير حتى لو للاحسن ما راح أدخل في هالمجال لأني أبي الموضوع يغلفه طابع التفاؤل؛ الطموح والعزيمه.


أنا من عشاق ومقدرين منظر الزرع والاشجار وأيدج بأهمية عملية التخضير كل التأيد وتذكرت المرحوم أبونا يابر كان يحث على التخضير وكان يحب حديقته الخاصه و النخل وايد. الله يرحمه برحمته.

ودي في كل إلي ودج فيه شي شي وأضيف عليهم:

وودي انشوف إنضباط بالسياقة وإحترام لقوانين المرور. والشرطه تكون محل ثقة وزارة الداخليه. الكل يلتزم والكل يرتاح ويريح غيره.

وودي انشوف الإهتمام بالرياضة و بمواهب اليهال. ودي أنشوف تشجيع للاندية الرياضية وتصير المدارس على حلقة وصل بالاندية.

وودي يسوون بين فتره وفتره إحتفالات فخمه ما أقصد حفلات غناء ورقص لأ إحتفالات عروض رياضيه أو فاير وركس أو عروض للمواهب على مستوى جهات مو على مستوى فردي مثل ما نشوف الحين شي يضحك وبنفس الوقت يحز الخاطر.

الله يعطيج العافية. أنا أشجع أفكارج جداً. :ggdw:

أهل الكويت يستاهلون الزين إن شاء الله ايي اليوم إلي يتمتعون فيه بالشغلات إلي حالياً نتمناها. ​

 

[وطن Q8 النهار]

رد: ليش يا تجـــــــــــــــــــــــــــــــــــــــار

الوزير الفاضل \\ صفر
يخطط لتزيين وتشجير المقابر !!!!!!!!!!!!!!!!!!!!!

بالله عليكم هذا تفكير

اخاف صج الاموات بيدرون عاد

زين الشوارع وبعدين لاحقين ع المقابر ماراح يطيرون

وبعدين اي تزين شوارع اللي تتكلمون عنه
بذمتج انتي شايفه خيطان ولا الجليب ولا حولي !!!!؟؟؟

عسى ما سنعنا شي جوو الزلمات وخربوا >> خرب الله راسهم

والله شوفي حديقه الشويخ بس مري عليها قاعدين ويشون لحمات والله لا يوريج الريحه
ولا خلصوا خلوا وساختهم ومشوا

اول شي نضفوا ديرتنا من الزلمات ذيج الساعه والله مابتلقون انضف من شوارعنا

 

[جاي الضحى]

رد: ليش يا تجـــــــــــــــــــــــــــــــــــــــار

عسوله وطن النهار تطرقتي لجانب يجب إن يلفت إليه النظر كجزء من دراسة تطوير الديره; الا وهو وضع ضوابط على الجميع تحد الكل من التعدي بالتشويه أو التلف على ممتلكات الدوله. لنصل إلى ديره أفضل كل الجهات المفروض تتعاون. احنا نطلب من جهات معينه انها تدرس وتخطط وتنفذ وجهات اخرى مختلفه تسعى إلى المحافظه على هذي المشاريع عن طريق المراقبه ووضع عقوبات حازمه على من يتعدى على أمن وممتلكات الدوله سواء مقيم أو مواطن. يعني الكل لازم يتعاون للوصول للافضل.

الدول الأخرى المتقدمه عندها المجرمين؛ المرضى؛ متعاطين المخدرات والمافيا؛ جرايم كل يوم ما قالو بس محنا حاطين شي زين. إنت تحط أحسن شي وتحط ضوابط وياويله إلي يتعداها. مو الناس الزينة تنحرم على أبو إنا اكو ناس مو زينة! وهذا إلي صاير لاسف بالكويت؛ الناس السنعه تفضل انها تقعد بالبيوت ما تطلع عشان لا يتعرضون لمواقف ومناظر بايخة من ناس غير مباليه بالاخرين وهذا ماهو شي عدل إن الناس الزينه اهي إلي تدفع ثمن أخطاء ناس غيرها. ​

 

[ii DareeN ii]

رد: ليش يا تجـــــــــــــــــــــــــــــــــــــــار

تم تعديل العنوان بواسطة مشرفة القسم

عنوان غير مناسب لمتحوى الموضوع

 

[رحيل الشمس]

السلام عليكم ورحمة الله وبركاته

اشكركم على مداخلتكم وعلى اهتمامكم بغيير الكويت للاحسن وعلى ماقالت اختي العزيزه جاي الضحى نتفائل ان هالامور تسير في يوم من الايام ولو اني اشوفها طالت وشكر لج عزيزتي وطن النهار وان شالله انشوف النهار في هالبلد الي كلن يفكر بمصالحه الشخصيه وبعدين بالنسبه للعنوان الي اخترته انا متعمده اخاطب التجار لان العتب الاول والاخير عليهم لانهم يملكون وبايدينهم الكويت تسير دوله متطور تطور ملحوظ مو العمار اسير بره بلادنا انتفرج على اماكن ونكتشف ان التاجر الكويتي له ايد فيها وماتبيني اقول ليش يا تجـــــــــــــــــــــار الكويت مو اولى من غيرها وبعدين النفع يعود لك ولديرتك لكن للاسف خيرها لغيرها وبعدين بنات خواتي الي دشو وشاركو يعطيهم العافيه والي دشو وشافو بس لو كل وحده فيكم تكرم وتكتب لو شي واحد شنو وحده يكون بالكويت وشكرا لكم.

 

[وردة النرجس]

شكرا لج على طرحج لهذا الموضوع

وبصراحة لو كنت مهندسة وبيدي القرار جان سوويت وايد أشياء طورت فيها ديرتنا الحبيبية

أول شي وسعت الطرق وبنيت الجسور علشان أخفف الزحمة

أبني جامعات راقية ومعاهد تبيض الويه

أبني مراكز ومجمعات ترفيهية وكامله فيها كل شي من مطاعم وسينمات وتسوق

وأسوى مجمعات الأوت لت بس شنو أخليها بعيدة شوى عن الديره يعني أوسع نطاق الديره وأخليها توصل لي الخيران وبعده

بس ها على شرط أني أكون سويت شبكة سريعه مثل الأندر قراوند يعني ربع ساعه ثلث ساعه إحنا واصلين الديره

وبس هذا الي يحضرني الحين

 

[ScarletteO'Hara]

موضوع حلو وايد
عن نفسي لو ان انا بيدي اني اغير بالديرة من الناحية العمرانية, اهدم المدارس المتهالكة الي درسوا فيها اهلنا و حاليا عيالنا مكانهم, اييب افضل الاجهزة الحديثة و القنيات الالكترونية الي تسهل على الطلاب استيعاب المواد الدراسية من غير تهميش دور المدرسين, و بعد مباني الزارات من غير استثناء يبيلها هدام و اعادة بناء من اول و يديد و تشطيبات تتماشى مع الحياة الحديثة و توفير اجهرة الكترونية متطورة بدال الملفات و الارشيفات الي ماسكين ملفات من سنين الطواعين, من ناحية ناطحات السحاب انا معاها طبعا لانها تعطي مظهر جمالي للديرة, بس احنا كمواطنين شنو راح نستفيد منها؟؟ اتمنى انه لو يصير تطور بالديرة بشي يفيد المواطن الكويتي بالدرجة الاولي

المناطق الصناعية اشوحها برا الديرة و استفيد من اماكنهم مثلا يعني شويخ يصلح مكانها كمنقطة سكنية, يعني بدال ما تطلعلنا بيوت بالصبية و الخيران ليش ما نستفيد من اماكن قريبة؟؟؟ و بعد حولي اشيلها من عرجها, مو فايدتنا بشي غير انها دولة مصغرة للزلمات, غير زحمة الشوارع الي فيها, انا لو دوامي مو هناك جان ما طبيتها طواعية الا للقوي الشديد, و بعد جليب الشيوخ هدام, حرام هذي المواقع القريبة الحلوة تكون جذي

و الله الواحد يقعد يحلم بس منو الي يطبق؟ الله يعيننا.......

 

[حمام شاقني فنه]

ديرتنا مفتقره للإزدهار العمراني وأنشطه السياحية فيها جدا ضعيفة
التعليم متدهور والصحه كذلك

أول شي راح اخطط لبناء المدينة الجامعيه =الي من دهر يتكلمون فيها ولاشفنا شي من هالمدينه =لووحتى حطو طووووبة حتى منها ماشفنآ

وثانيه نجي للصحه أبتدي بتشطيبات وترميمات لها =الوظع تعبان فيها

أمممممم أهندس طرق جديده وجسور تفكنا من هالزحمة =ذبحتنا هالزحمة

ندرس مشروع مترو الأنفاق هع

ترميماااات للمدارس بالكويت بشكل عام


امممممم
بس!>لاطرت ببالي فكره بعد رديت للموضوع+