سؤال بخصوص اسماك الزينه..كل شوي تموت وحده منهم :(

[مـ ح ـد شـرآتـي]

صباح الخير




















بنات انا صارلي 5 ايام شاريه سمج زينه ومن انواع مختلفه

وامس اول مره اغير ماي الحوض لانه وصخ ما قمت اشوف السمج عدل من الوصاخه

وطريقتي كانت اني شلت السمج كله وحطيته بطشت فيه ماي وغسلت حوضهم بدون صابون وصبيت ماي يديد ورديت السمج مره ثانيه

ومايمديه مرت ساعتين الا ميته وحده منهم

واليوم بعد ماتت وحده

وعلى فكره ترى انا ما اكثر الاكل لهم اعطيهم بإعتدال <--- مسويتلهم رجيم ههههههه

تهقون شنو السبب اللي خلاهم يموتون من طريقة التنظيف ولا شنو تكون الاسباب



بليز هيلب ماي فيش

​

 

[loolat^mady]

أصلا سمج الزينه يموتون بسرعه وعلى حسب النوع ترى في انواع ما تتوالم مع بعض لأن يذبحون بعض!!
ولما تشترين سألي جم فترة حياتهم .. انا مره كان عندي وحده قال سنتين تعيش وفعلا سنتين ومااتت وعليا

 

[missdreamer]

انا عندي حوض سمج
كانو 16 سمجه وعقب 3 اسابيع كلهم ماتو والسبب؟؟ كنت احطلهم اكل يوميا !!
واضفت لهم سمج تايغر وماكنت ادري ان متوحش واذااااااااااهم والتايقر ماتو بعد لان ما توالمو
لما ماتو وفضى الحوض راح اخوي يابلي سمج من مكان غير عن الاولي ومبين نوعهم يستحمل >> اسأله اليوم واقولج
وعاشو عندي فتره طويله والسبب اني قمت احط لهم اكل مره كل 4 ايام ومرات مره كل 5 ايام
الحين حوضي بقى في 3 سمجات صامدين ودي اييب لهم ربع بس اخاف من سالفه التوافق
الصامدين من فتره يبت لهم 3 سمجات زينه صغار مختلفين عنهم والله القدم يطاردون اليدد لين لقيت اليدد ميتين

 

[missdreamer]

ذكرتيني بسمجي الي اول شي كانو شحلاااااااااااااااااااتهم كنت يايبتهم من الشاميه
كان في نفس الحيايا سووود وصغاااااااااااار ووورا بعض على طول وكان في سمجه المنشار وكانت خجوووووله كله منخشه
ودي اييب لي مثلهم مره ثانيه

 

[G!RLY-PAci]

انا دااااااااااااااايما اشتري الفايتر فش fighter fish
تعيش مده طويله نا كان عندي ثنتين وحده تمت معاي 5 سنين ووحده 3 سنين
بس لاااااااااا تحطين سمجتين من نفس نوع الفايتر فش مع بعض ترا راح يتذابحون ما يقعدون مع بعض
بعد من اسمها فايتر فش
وموفقه حبيبتي

 

[omali_store83]

اذا بتغيرين الماي لازم تخلين شوي من القديم وتضيفين عليه ماي يديد

والاكل كل 3 ايام مرة وشوي مو وايد​

 

[احبس دموعي]

اي انا بعد سمعت جذي ماتغيرين الماي كله تخلين نص لان القديم يكون فيه اوكسجين اكثر
ماعندي خبره بس قلت اللي اعرفه

 

[ميمي الحلوه]

انا عندي حوض سمج

من كثر ما اعتني فيه

بيضووو السمج وراح ييبون سموجات صغار خخخخخخخخخخ


طريقتي بالتنظيف شوفي اخلي نص الماااي او اقل من النص عاادي واضيف فوقه ماااااي نضيف

بس لازم تحطين فلتر..وتحطين الكوره مالت الاكسجين>>ما اعرف اسممها لووول

كوره لونها ازرق تطلع فقعات وااايد..علشان الاكسجين من غير الاكسجين الاساسي مع الحوض

يعني يكون عن\دج اثنين فاهمه

واما الاكل عااااااااااادي انا يوميا احط..اذا ماحطيت يقمون ياكلو بعض من الجوع لوووووووووووووول

كل حزت عصر احط لهم شووي ما اكثر واايد

علشان حتى الاكل يغير لون المااي اذا كثرتي

اذا في شي راح اضيف ان شاء الله^_^

 

[مـ ح ـد شـرآتـي]

يعطيكم العافيه بنات على الردود اللي ترد الروح

قبل امس جيكت على الحوض الا فيه وحده ميته

شكلهم مسوين انتحار جماعي :eh_s(13):

وبخصوص سمجة الفايتر انا عندي وحده بس مخليتها بحوض لحالها

ومن قبل امس للحين الوضع الامني مستتب اشوا مافيه وفيات هههههههههههه

​

 

[Tkanh]

حبيبتي هذا كله من العين

اعيون الناس ماترحم

انا كان عندي 20 وماتو الحين بقا 3

 

[ebtesam]

معلومة الماي جديدة انا اعرف انهم يموتون اذا طعميتهم يوميا لازم كل 4 او 5 ايام مرة شكرا على المعلومة

 

[حنطاويه كويتيه]

على حسب الحوض اللي عندج اذا مالح ولا حلو؟ وما يصير اطلعين السمك من الحوض تشيلين ربع او ثلث الماي وتنضفين الحوض من داخل باسفنجه بعدين تترسين باجي الحوض ماي جديد بس لازم حرارته تكون نفس حرارة ماي الحوض عشان مايموت السمك بسبب اختلاف حرارة الماي. وبالنسبه للاكل اكليهم مره الصبح ومره بالليل وشوي مو وايد وكسريلهم الاكل عشان يقدرون ياكلونه.
اتمنى اني اكون قدرت افيدج واذا حابه اي مساعده انا حاضره

 

[يوآش يوآش]

البنات قالوا اللي بقوله ما يقصرون : )

 

[dnyay_mll]

بما اني مربية اسماك وصار عندي خبره كافيه ولله الحمد فاي استفسار اقدر افيدج

شوفي حبيبتي اذا الحوض يديد لازم يموتون جم سمجه لان الحوض لان الحوض لازم يكمل دورته البيولوجيه وتبدا تعيش فيه البكتيريا النافعه فطبيعي يموتون الحين نصيحتي لاتشترين سمج غالي لفتره اسبوعين وبعدها كيفج

ولازم تحطين فلتر زيين عشان مايتوصخ الحوض وتقعدين تغسلين كل شوي

وضروري تغيرين ربع ماي الحوض بالاسبوع مرتين عشان في بالماي نسبة امونيا ولازم نتغلب عليها بهالموضوع

وشكلج ماحطيتي لهم دوا الكلور حق الماي روحي اخذي لج غرشه من ماركة تترا موجوده بكل مكان وعلى حسب حجم حوضج تحطين الكميه لان الماي العادي مترووس كلور وهذا يذبح السمج

اما الاكل مايسيير تيوعينهم حرام الناس اللي تنصح ان السمج مايكل الا كل 3 او 4 ايام مو عارفين شالسالفه هذا الصيام للسمج عشان مايتوصخ الحوض لكن بوجود فلتر زين ماراح يتوصخ ابد وكليهم مرتين باليوم بكميه زينه عشان يكبرون بسرعه والوانهم توضح

ووممكن اعرف شنو الانواع اللي عندج وشنو توكلينهم وكم حجم الحوض

واذا ماتعرفين نزلي صوره للحوض والسمج وبفيدج ان شاءالله

 

[مـ ح ـد شـرآتـي]

مشكورين بنات على ردودكم​

دنيا ملل اذا رجعت لبيتي بعطيج قياسات الحوض​

وخلال الاسبوع اللي طاف ماتوا 2 بعد :bbbiu:
من 16 سمجه الى 11 سمجه... وبالنسبه للأكل لا انا ما ايوعهم بالعكس يكسرون خاطري خخخخخخ اعطيهم كل صبح
ونوعيته جنه اوراق ملونه وثاني صاير كور صغار​

انا الصراحه مو راعية تربية حيوانات وسمج بس ياني هديه الحوض وابتلشت ههههههههه​

وبالنسبه لأحجامهم فيه عندي انواع سمج بدت تكبر ويتغير جلدها

وعلى طاري الماي والكلور انا اعبيهم من الحنفيه وصرت اخلي نص واعبي نص والفلتر شغال هل يحتاج اشتري دوا للكلور ولا لا..؟؟​

انطروني اليوم بالليل بحاول ادور صور بالنت تشابه اللي عندي​

 

[<<المها>>]

انا ماعندي حوض سمج .. بس ناويه اشتري وبصراحة استفدت

من المعلومات الموجودهـ ... مشكوووووووورين بنات ماقصرتوا

 

[( المـلاك )]

حبيبتي يمك الماي كان شوي حار
خبرج جونا شلون صاير
و الماي بدون بيلر يطببببخ

و سمج الزينه اذا صغار ترى الماي لي صار شوووي بس حار يموتون بسرعه

 

[قدساويه!!]

انا بس صفيت على وحده وكاسره خاطري قاعده بروحها هههههه

 

[dnyay_mll]

حبيبتي دام ان الماي اللي بالحوض طاف عليه 3 ايام خلاص عيل الكلور تبخر

المشكله بالماي اليديد اللي تحطينه

شوفي عندج حلين اما انج تاخذين دوا الكلور

او انج تحطين ماي حسب الكميه اللي بتضيفينها للحوض من الحنفيه وتخلينه يوم كامل جذي الكلور بيخف منه وبعدها ضيفيه عالحوض

 

[نويرة الكويت]

ويه الله يعينج اختي

بس شوفي انا اختي عندها حوض سمج وتحطلهم ماي بارد واحيانا تحطلهم قطعه كبيره من الثلج لان يبون الماي بارد والنظيف

بس لاتحطين لهم ماي دافي ولا حار انتبهي