ساعدوني ، بنتي عمرها 7 شهور علموني شنو اوكلهاااا

[decemberq8]

السلام ..

قلت مشكلتي براس الموضوع علشان إلي يعرف يدخل و يعلمني ..

انا توني اول بيبي .. ما عندي خبره ..

الله يسلمكم بلشت مع بنتي بالبطاط و الجزر و الكوسه و القرع .. خلال الشهر السابع مع الموز و العرموط كفواكه و ألحين بنتي داشه الثامن ..

شنو اضيف بعد ...

و جم وجبه باليوم ؟؟

و اشلون طريقة الطبخ ؟؟

يعني اذا ممكن جدول اسبوعي اعرف فيه متى و شنو اوكلها .. ؟؟

 

[Perfume]

حبيبتي بلشي تعطينها دياي مع عيش ابيض او خضار بس بدون ملح طبعاً
بعدين عطيها لحم ، السمج اجليه شوي لانه ممكن يسبب حساسية
ضيفي لها مع الخضار عيش مع دياي او لحم عشان تستفيد من البروتين
والفواكه بعد مهمة تفاح موز برتقال كمثرى

والصبح ممكن تعطينها سيريلاك في منه انواع وايد بالقمح او التمر او الفواكه

سوي لها شوربة خضار مع دجاج وشوفان
نوعي لها بالاكل كل يوم شي

 

[Perfume]

الوجبات مثلنا ٣ وجبات في اليوم
والعصر عطيها فاكهة
العيش والدياي واللحم تفوحينه عشان يصير ليّن والعيش بعد نفس الطريقة

 

[ام دندوونه]

الصبح عطيها سيملاك او جبنه كيري مع توست الغداء سوي عيش شوي مهروس مع مرقه خضرة والعصر عطيها كريم كراميل المراعي وعندهم تشكيله حلوة من الزبادي اللي بالفواكه والعشاء شوربه شوفان بالدجاج وحاولي تذوقينها من كل شي

 

[decemberq8]

مشكورين عالرد .. ما قصرتوو

 

[++MesK++]

واي دسدس شلووونج يا حلو تجمعنا و الله ايام

عطيها عيش بس لا تحطين بهارات

عطيها كوسه مع جزر مع بطاط كله مفيوح

اهم شي ابتعدي عن البيض و العسل و الحليب البقري لمن يصير عمرها سنه عادي

و انا ما اطحن بالخلاط لا اهرس الاكل بالشوكه و احط عليه نتفه من حليب الياهل عشان يصير لين

 

[لميس نفسي]

لالالاالالااااا


حرام عليكم شنو دياي ولحم وسمج مووزييييييينه اللحوم هالفتره حتى البيض موزين



حياتي بنتتتتج تووها صغيرووووونه


لاتكبرين معدتها وتقثينها


الحين خليج على الحليب مع وجبه وحده باليوم الوجبه يا سيريلاك يابسكوت يا تفوحين بطاطا مع جزر او كوسا مع قرع ..


وبعد كم فتره عيش ابيض بروحه من دون ملح او شوربه ماجي


عطيها روب لبن تشرب منه شوي



اما غداج العادي دجاج ولحم وعيش مجبوس او اي اكل مطبوخ ببهارات والوان صناعيه ابتعدددي عنهمم


توها بيبي ربي يحفظها لج ومعدتها ماتستقبل الاكل


لاتمت السنه على خير عادي تبدين تدخلين الدجاج واللحم والبيض والسمك


ترى حتى الخبز الحين مو زين عليها



وشوفي في موضوع مثبت (( الغدا علي والعشا عليج ) حيل حلو ومفيد دخلي واقريه وراح تستفيدين



عطيها كريم كرميل او جلي احمر حيل مفيد

 

[مشتاقة الى الله]

امممم

ينفع انا اعطي ولدي الشوفان اهو الحين عمره 4 شهور ما شاء الله

 

[Perfume]

حبيبتي مشتاقة الى الله انا بدأت مع ولدي من عمر ٤ شهور
اطبخ له قفشة وحدة من الشوفان واحط معاها نوع من الخضار كوسا مثلاً او بطاط

لميس حبيبتي الدياي واللحم ضروري للبروتين
السمج والبيض والحليب ومشتقاته لبعد السنة لانه ممكن يسببون حساسية

 

[بنت^كآليفورنيآ]

بصراحه صدمتوني ؟ شحقة كل هالاكل اهي نتفه 7 شهور
وجبه وحده باليوم كااافي؟؟؟؟
ليش 3 وجبات والحليب ؟ انا اعطيه وجبه وحده الغدا واذوقة من اكلي عشان لايكره الاكل

 

[لميس نفسي]

امممم

ينفع انا اعطي ولدي الشوفان اهو الحين عمره 4 شهور ما شاء الله

لا تووو الناس


ابدي لحسيها من عمر 6 شهور وشوي شوي دخليلها وجبة باليوم ...

 

[Perfume]

حبيباتي ٣ وجبات خفيفة
يعني سيريلاك الصبح
والظهر عيش مع شوفان او خضار وشوية دجاج او لحم
والليل شوربة خضار خفيفة
مو وجبات ثقيلة مثلنا
شدعوه وجبة وحدة في اليوم !!
وباقي اليوم بس حليب !!!! ما يشبع الياهل
بعدين الياهل من عمر ٩ شهور الى سنة خلاص ياكل مثلنا بس بدون بهارات حارة

 

[Perfume]

والفاكهة مهمة العصر بعد
تفاحة او موزة او كمثرى

 

[decemberq8]

مشكورين حبايبي على هذا التفاعل ..

و الله غطيت عن المنتدى شوي .. بسبة الدوامات ..

يعطيكم الف عافيه ..

انا الحين بنتي بالشهر التاسع ..

و الله اعطيها 3 وجبات باليوم و مرات 2 ..

بطاط و جزر و كوسه و قوع مع شويه عيش ..

سيريلاك ..

او توست و حليبها البودر ..

فواكه فريش او المعلبه إلي للاطفال

 

[decemberq8]

اهلين مسوك .. انتي اشلونج شخبارج شمسويه ..

شخباري ايام تجمعنا .. كان ممتع والله ..