ساعدوني بافكاركم .. اي لون اصبغ ..؟؟

[FeShinGoOo]

قووه بنااات


عندي غرفة فاضيه بالبيت وناويه باذن الله اسويها مكتبه وبنفس الوقت حق القعده والاسترخاء
يعني ابي مكتبه صغيره وطاوله وكرسي او كرسيين بالكثير

صارلي شهرين مفتر راسي مادري اي لون اسويها

الحين خطر فبالي المشمشي مع الاسود .. بس ماقررت يعني بس مر اللون فبالي مرور الكرام .. وهم خطر فبالي الترابي مع الفوشيا .. او الترابي مع الكحلي والتركواز


بنات عفيه ابيكم تساعدوني
باقتراحاتكم .. او بصور ..
ابي شي مودرن وبسيط وراقي .. ماحب الخبه وماحب الاثاث الكلاسيك


وهم عندي سؤال بالنسبه لورق الجدران وين احصل الورق اللي ملمسه مثل المخمل بس يكون ساده ؟؟

 

[&أوراد&]

حبيبتي الاسود والمشمشي راقي بس يبيله مساحه كبييره والأسود يكون تج خفيف بس واذا انتي تبينها مكتب أخذي الألوان الفاتحة لانها تعطي مساحه وهدوء وورق الجدران تلقينه بالصراف فرع الشويخ

 

[FeShinGoOo]

مشكوره اوراد حياتي ماقصرتي

بس ابي مفترحات مثل شنو الوان فاتحه انا ماحب الازرق ولا الاخضر ولا الاصفر ومابي لون واحد ابي ادمج

عكوني افكار

 

[Maybe_87]

حبوبة غرفة القراءة حلاتها تكون ريلاكس
اختاري الفواتح وبعدي عن الغوامج
اللون الأبيض يكون الأساس
ونسقي معاه لون ثاني
وبالنسبة لورق الجدران شوفي أبيات
يمكن عندهم طلبج

 

[FeShinGoOo]

مشكوره مي بي ومعاج حق حلاتها فاتحه مع اني ماحب الفواتح وايد بس فبالي الحين المشمشي والبيج ..

يالليت تعطوني صور وافكار اكثر بنات

 

[ريمية السعودية]

وش رايك بلون الرمادي مع الفوشي والمكتب والدولايب يكون لونها ابيض..

 

[ســتارز]

حطي طوفتين مشمشي فاتح وطوفتين بيج هادي اللي على بني مو على اصفر

وسوي البردة دانتيل فقط يعطيها ستايل انجلش

وورق الجدران في بابيات وفي بالغانم اللي قباله

 

[عآشقه طآغيه]

آمم آشرآيش بَ اللونين !!
( بنفسجي مخملي , وردي فآإتح )

 

[FeShinGoOo]

ريميه ماحب الرمادي كلش اختنق منه ..

ستارز فكرتج حيل حلوه وفعلا خاشه صوره نفس الوصف اللي وصفتيه ششكلي راح اطبق هالراي

عشوقه هم فكرتج حلوه وغريبه

 

[*lavandula*]

اذا انت تبينها للاسترخاء اتصحش بدرجات الازرق او درجات الاخضر لانه هاللونين حيييييل يرحون الاعصاب

 

[المشتاقة لله]

المشمشي او البيج الغامج مع الابيض راح يطلع شي مع اضاءة صفرا

 

[شندوخه]

روحي شوفي ابيات رحتله من شهرين لقيت فناتق والوان صبغات اتينن
كان في قعده لونها مشمشي بذهبي اللون وايد حلو وهادي
وورق الجدران كانت تشكيلته حيل حلوه
اخذيلج فره فيه وسجلي بنوته الافكار اللي دشت خاطرج بعدها اخذي قياسات الدار اللي بتسوينها وكلمي المهندس اللي بالمحل يلبقها لج
على فكره المهندس موجود بايكيا وابيات ومجانا يلبق الدار او الصاله بالاغراض اللي شريتيها منهم

 

[FeShinGoOo]

حبيبتي شندوخه ماقصرتي ياعمري ان شاء الله بفتر وباخذ افكار ولازم امر ابيات حق ورق الجدران