ساعدوني ياابلات وماراح انساكم بالدعاء

[ابلة كويتية2006]

انا مدرسة اول سنة تخصص علم نفس و كل درس يمر علي و خبرة اعتبرها يديده علي المشكلة الحين بالموجهه راح تحضرلي هالاسبوع اول مره اجرب هالشي و موعارفه تحضير اول درس حق اهمية الهواء للكائن الحي حتى الهدف الوجداني و الحركي حق يوم السبت و مو عارفه اكتب و شنو المنبه و الحلقة بكبرها فاتمنى انكم تساعدوني و محد شجعني على الاشتراك في هالمنتدى الا مساعداتكم حق بعض و اذا الله قدرني اساعدك باي شي اقدر عليه

 

[الضاميه]

هلا وحياج الله

المنبه تقدرين تخلينه قصه انج تقولين كان في بنت تبي تزور صديقتها المريضه وقبل جم يوم من الزياره اشترت ورده وحطتها بعلبه ولما راحت تقدمها لصديقتها لقتها ميته

تسالين الاطفال ليش ماتت الورده
الاجابه لان البنت احرمتها من الهواء والهواء تحتاجه الكائنات الحيه
وتقولين تصرف البنت غلط يجب ان نحرص على توفير الهواء للنباتات وهالشي يعتبر سلوكي

وبعدها تسالين الاطفال بس النبات يحتاج هواء

قوليلهم وهم الانسان والحيوان يحتاجون الهواء

وبعدين اساليهم من اعطانا الهواء يقولون لج الله سبحانه وتعالى

وحطيلهم ايه قرانيه عن الهواء

وخليهم يقلدون صوت الريح ويحركون ايدهم مع التقليد

وبس هذا اللي اعرفه

وبالتوفيق مقدما

 

[:: عائشه بقلبي ::]

حبوبه الاهداف
يتعرف على اهميه الهواء للكائنات الحية
يحرص على الابتعاد عن اماكن الهواء الملوث
يتنفس الهواء بعمق 3 مرات

========

المنبة : قصة بمسرح العرائس
ولد امه شرت له شتله بيوم التخضير وراح قام حطها بكبته
لما قعد الصبح لهاها ميته ليش ؟
حرمها من الماء والهواء
هي تحتاج ماي وهواء
فامه قالت له ما يصير هذي كائن حي وتحتاج تتنفس الهواء مثلنا وتشرب الماي
وتسالينهم
منو بعد يحتاج الهواء غير النبات

ممكن تحطينها عن طريق لعبه
وتري سيديات الروضه فيها فليم روعه وقصير عن حاجه الكائنات الحيه للهواء خليه تغذيه راجعه

 

[ArEEj]

يتعرف على أهمية الهواء للكائنات الحية
يقدر أهمية الهواء
يقلد حركة التنفس

المنبه : كيس مربوط بداخله نبات ميت
تقولين للاطفال أحضرت لكم هدية جميله من البيت وأجعلى أحد الاطفال يفتح الكيس وعند أخراج النبات أرسمى الدهشه على وجهج والحزن
ماذا حدث لوردتى الجميله ؟؟ لقد كنت أسقيها بالماء كل يوم ؟؟؟؟
لما يفكرون خليهم يتكلمون على الهواء وأهميته بالنسبة للانسان والحيوان والنبات
والسلوكى قولي لهم ما رأيكم ان تشاهدوا قصه جميله على جهاز الكمبيوتر وشغلى قصه عن الولد اللى ما يفتح النافذه وما يهوى الغرفه تلقينا بالسي دي
ووقفى عند المنظر الاول وقولى لهم ما رأيكم بسلوكه ؟
وبعدين افتحى المنظر الثانى عشان يشوفون السلوك الصحيح
وقولى لهم انتم تفتحون النافذه بغرفتكم ؟
يلا خل نقلد حركه التنفس
شهيق وزفير
وروحى معاهم وفتحوا الدريشه اللى بالصف وقولي لهم بنخلى الهواء يدخل بالصف لاننا نحتاج الهواء ...
حطى أغنيه عن الهواء وغنى معاهم
اذا عندج مسابقه سويها
يعنى بختصار سوى كل شي عندج ​

 

[rose2006]

ممكن تسوين مجسم للبيئات وركزي على بيئة الهواء وشو ملوثاتها