السلام عليكم .. حبيبتي انا درست الكورس الماضي لغة عربية الصف الرابع الابتدائي كان كورس عملي و الحمدلله تخرجت .
حبيت انقل لج ما اقدر على جمعه من تجرربني المتواضعة في مجال التدريس خلال فترة التربية العملية /
بخصوص قراءة الدرس / فقرة الدرس عندج أكثر من طريقة :
1- كلفي وحدة تسجل صوتها بالبيت و تقرى الدرس بالبيت و انتي تشغلينه لهم .
2- وزعي بطاقات مكتوب فيها جمل الدرس و رقميها و تقرى البنت الجملة الاولى و الثانية الجملة الثالثة لين تخلص الفقرة .
3- تجيبين لهم لوحة القارئ الصغير انا سويتها بالكورس اللي طاف في دسمان و استانسوا عليها البنات كانت مثل المسرح و حطيت وراه كرسي تقعد البنت فيه و تاخذ كتابها و تقرى خصوصا بالحصة الاولى من كل درس لأنه يكون أغلبه قراءة جهرية و فهم شامل .
4- جيبي لهم لعبة ميكروفون و اللي تقرى الفقرة يكون المايكروفون عندها .
5- ههذه وحدة من رفيجاتي بالتربية العملية سوتها جابت لهم لوحة على شكل تلفزيون و تطلع فيه البنت على انها مذيعة و تقرى الدرس .
-------------------------------------------
اسئلة المناقشة :
1- توزعين اوراق على ادراج البنات و تطلبين منهم يقرون السؤال اللي فيه و يحلونه .
2- تخلين البنات نفسهم يسئلون على الفقرة و وحده تجاوب .. - لازم ماللي تسأل تكون شاطرة عشان السؤال يكون مهم -
3- تسوين صندوق اسئلة للمناقشة و يسحبونه البنات و يجاوبون عليه .
4- توزعينهم مجموعات و كل مجموعة تختار رقم سؤال و تجاوب عليه .
معاني الكلمات :
- ممكن تستعينين بلوحات / بطاقات / صور توضيحية .
- هذه طريقة مطورة اذا تبين تشجعين طالباتج و تعلمينهم مع انهم غير مطالبين بهذا لكن ممكن تخلينهم يبحثون بالمعجم عن معنى الكلمة .
- ممكن لوحة مكتوب فيها مجموعة مفردات و يجيبون معناها و جملة عنها .
التقويم :
هذه عاد شكثر اللوحات و الافكار و ممكن نفس اللوحة تستخدمينها اكثر من مره .
انا شريت القرص الدوار اللي عليه الوان من دسمان و قمت من فترة لفترة اجيبه للبنات و يجاوبون عليه يكون كل لون مخصص له سؤال .
- تجينين صورة صنبور مياه و تخطينها بلونه و تتفخين 3 او 4 بلونات زرق و تخلين السؤال داخلها و تلزقينها تحت صورة الصنبور على انها قطرات ماء ساقطة من الصنبور و كل طالبة تطلع تفجر البلونه و تقرى السؤال و تجاوب عليه .
- ممكن تكلفين طالبة في يوم تخلينها اهي اللي تسأل و انتي تكونين مكانها معلمة .
و عموما التنويع في طرق التدريس حلوة بعد .
1- التعلم باللعب مثلا اذا كنتي بتعلمينهم مهارة معينة .. اوراق عمل تكون بنفس الوقت العاب
( كلمات متقاطعة / توصيل / تركيب / صورة و تعليق / دهليز ... و هكذا ) .
2- التعلم بالتلقين هذه طريقة المحاضرة لابد منها لكن اذا ظليتي عليها صارت مملة .
3- التعليم الجماعي : مثلا تخصصين اسبوع كامل لهذا النوع على اساس اخر الاسبوع مجموعة تربح و تفوز
و هذا يكون عن طريق مجموعات مع تكليف احد الطالبات كل يوم بأن تكون قائدة مع وضع قواعد مناسبة .
4- التمثيل : عن طريق مشهد تمثيلي يجسدونه البنات .
اخيرا حاولي ان تكون حصتج كلها نشطة و اذا حسيتي ان البنات ملوا خليهم يوقفون و يتحركون الى الامام و يرجعون الى اماكنهم
كنوع من التنفيس لهم مو طول الحصه قاعدين في كراسيهم ... مع وجود المحفزات و الهدايا و الاناشيد التعليمية المفيدة ..
هذا اللي في بالي حاليا و الله يوفقج
