ساعدوني

[الـلـؤلـؤه]

السلام عليكم

بنات بنات انا ميداني والحين تعرفون فتره تهيئه برياض الاطفال
وعندي نص ساعه اقعد فيها بروحي مع الاطفال اطالعهم ويطالعوني:eh_s(6): امس غيرت الجو شوي ولعبت معاهم فتاحي يا ورده :eh_s(3): مساكين ضايقه خلوقهم
فابيكم ما عليكم عليكم امر تعطوني العاب ممكن العبها وياهم بالصف

قبل كنا نلعب وايد بس امس الالعاب كلها راحت من بالي ونسيتها ما قدرت العب الا فتاحي يا ورده :eh_s(22): فبليز بليز اللي عندها لعبه لا تبخل علي فيها وجزاها الله خير

 

[الضاميه]

متى بدات التربيه العمليه ؟

 

[معلمة روضه]

من الاسبوع اللي طاف بنات التربيه العمليه داوموا من الاثنين....انا معاي وحده وكاسره خاطري من صج...وبصراحه حتى انا محتاره معاها ما ادري شسوي فيها خصوصا انها اول مره تصير عندي وحده...

انا اقول لج لا تحاتين عادي هالنص ساعه لعبيهم بر وبحر ...بر يوقفون وبحر يقعدون....اهم شي انتي تعرفين المعلمات اللي معاج شنو يبون؟؟

ولا زم تضبطين الصف علشان ما يصير حوسه...يعني ساعة الضحك ضحك وساعة الجد جد....علشان ما يفشلونج عند المشرفه إذا دخلت عليج....ديري بالج ترى المستوى الثاني شياطين..ولاتطقين احد

 

[الاسطورية]

عندي فكره حلوه تحطين اسماء حيوانات في اناء وتسفطينهم مثل القرعه والياهل يسحب واسم الحيوان الي يطلعله يقلدون صوته وتسولفون عنه شوي بعدين تسحبون اسم حيوان ثاني

 

[ArEEj]

ترى مو الا العاب
أستفيدى من هالوقت حفظيهم آيه تكسبين فيهم أجر
قولي لهم قصه بأسلوب حلو
ممكن تستخدمين القصص اللى بركن المكتبه تساعدج حيل
اكتبي اسمائهم واحد واحد على السبوره وبعدين اختبري ذاكرتهم
كل واحد يقوم يدور اسمه
ممكن تكتبنهم أرقام من الواحد الى العشره
ترى يستانسون حيل لما تمسكينهم القلم ويكتبون على السبوره

 

[لوميه]

حبوبة استفيدي من الوقت علميهم عالحلقه والسلوكيات ...
حفظيهم دعاء ، نشيده ، قوانين ...

تكلمي معاهم عن حياتهم ... وعلميهم على شغلات مهمه بالصف ...وبره الصف ....

 

[أوركيد]

مو ضروري العاب ..

حفظيهم بهالفترة أشياء تفيدج بعدين ..نشيدة خاصة فيج ..ترحيبية او الاركان او العدد ....الخ

اقري لهم قصة ...

عطيهم تطبيقات للأعداد ولا الكلمات اللي اخذوها بأولى ...

 

[:: عائشه بقلبي ::]

ترى مو الا العاب
أستفيدى من هالوقت حفظيهم آيه تكسبين فيهم أجر
قولي لهم قصه بأسلوب حلو
ممكن تستخدمين القصص اللى بركن المكتبه تساعدج حيل
واذا ضايق خلقك تبين جو فكاهي لعبيهم تقحيصات يعنى جنهم يشفطون بالسياره خخخخخخخخ انا عيالى يموتون باللعبة هذي

 

[زلابيا]

البنات ما قصروا كل شي قالوا ماشاءالله

صج علميهم وعوديهم على اسلوبج وطريقتج عشان لي صار وقت حضور المشرفه لج الا انتي ضابطه اليهال وماشيين معاج سيده ...

الله يوفقج انشاءالله

 

[الـلـؤلـؤه]

مشكورين حبيباتي على المساعده

مو المشكله انا قعدت قريت قران معاهم وقلنا نشيده بعدها سكتنا ابي شي يديد ما لقيت عشان جذي سالتكم

مشكووووووووووووووووووووووووووورين واللي عندها زياده لا تبخل علينا بعد

 

[سوق الجمعة]

العبي معاهم بس بنفس اللعبة تكسبينهم شغلات تفيدج بالحلقات ..لا تضيعين عليج وقت التهيئة لانهم راح يدخلون عليج من اول خبرة فتداركي الوقت.. مثلا حفظيهم الالوان بلعبة ان طفل يسحب كرة من الكرات الصغيرة الملونة ويقول لونها وتسوينها مسابقة انج تحطين كرسي اذا صبي فاز يصير ملك واذا بنت تصير اميرة وتلبس تاج .. اهم شي لا ترخين معاهم ترى انا بالتربية العملية عطيتهم وجه وفسقوا علي وفضحوني عند الموجهة ...