ســــايقه جديده

[اجمل 1981]

بنات حبيباتي حطيت هالموضوع حق البنات الجدد عالسواقه والبنات القديمات عالسواقه عشان ينصحونا .... بنات انا توني جديدة تدربت 7 ايام تقريبا وواسم الله اسم الله علي اسوق عدل بس اليوم بالزحمه وبالليل صارت معاي لخبطة شوي ... الشباب منهم اللي يساعدج ومنهم اللي يوقف ضدج منهم اللي يساعدج باللفة اذا كنتي خايفة تلفين ومنهم اليوم واحد حسبي الله علي ابليسه اشوفه وراي يقولي لحظة انا قلت يبي شي او عبايتي فيها شي المهم زين مني طلعت من الزحمة وطلعت من الدوار بسرعه خطفت نفسي ..بنات تعرفون اللي اول مره اسوق ومستانسه بسواقتي بس ها باقي ليي 4 ايام واقدم على التراي وان شاء الله بحيل الله اخذ الليسن ,,, المهم هاذا لحقني وقفت نعم اخوي جان يقولي شنو انتي ماتعرفين تسوقين عطيني رقم اهلج بكلم اخوانج قتله خير جان يقول دعمتني بنات اذا حكت سيارتج بتسمعين الصوت وبتعرفين ... المهم قلتله ماشفتك جان يقول اجل ليش تسوقين المهم رحت وخليته كان يقول كلمه زفره نزلت له قلت له نعم جان يقولي انتي شلختي سيارتي وانا معقوله ماحسيت المهم قلت له شنو تبي اصلحها لك انا مستعدة قالي لا ومشي ...شرايكم بنات هل انا غلطانه ام هو وعلى فكره الجيب كبير علي وانا وحدة حبتي صغيره... نوروني واذكروا لي مواقفكم ...:eh_s(2):

 

[اجمل 1981]

عن جد هاذا نرفزني وخلاني اعوف السواقه ,,, بنات شرايكم انطر الكم يوم عشان اخذ الليسن واتطمن اكثر بس انا صايره ادور الحجة عشان اطلع وكارهه قعدت البيت .....لحد يقسى علي ولحد يضحك علي ابي كلام جــــد

 

[اجمل 1981]

ناطره ردودكم حبايبي

 

[بنت النوخذا]

وطلعت من الدوار بسرعه خطفت نفسي ..
باقي ليي 4 ايام واقدم على التراي وان شاء الله بحيل الله اخذ الليسن ,,,
جان يقولي شنو انتي ماتعرفين تسوقين
جان يقول دعمتني
المهم قلتله ماشفتك جان يقول اجل ليش تسوقين المهم
نزلت له قلت له نعم
وعلى فكره الجيب كبير علي وانا وحدة حبتي صغيره.
.. نوروني واذكروا لي مواقفكم ...:eh_s(2):

انا بقولج شئ .... وبكون صريحه هالسولف مو مالت زعل
السواقه حبيبيتي و الشارع (( مو للوناسه )) الشارع في ارواح بشــــر
مااااا عندج ليســــن ( يعني انتي مو مأهله انج تسوقين ) حسب قوانين ادارة المرور
بعد طالعه من الدوار بســـــرعه والله راهيه
( قالج ما تعرفين تسوقين ) اكيد اهو صح لانه اخبر و اعلم منج بالسواقه و بالشوارع
بعدددددد (( ما شفتك )) حدج قويه انتي خوووش عذر لو شرطي
يسجل قضيه ترا هالكلمه تصير ضدج يعني يمسكها عليج
ما شاء الله (( نزلتي له )) والله انتي حددددج قويه وبطله
غلط حبيبتي بالله واحد عصبي ولاكج بوكس و طاقج ومنحاش بالله عنده سجين
ولا ما تقرين جـــرايد وحوادث الناس الي تنزل ...... انتي وايد راهيه
سايقه جــــــــــــــــــــيب ....... حبيبتي ترا الشارع في ناس تمشي مو قطاوه

و احب اقولج شئ و لازم تفهمين كلامي عدل ترا في ( حبس للنساء )
اتمني انج تبحثين عدل في القانون الجزائي لاداره المـــرور
يعني مو تصيرين راااااهيه بالشارع .... وارواح الناس مو لعبه و ناسه مثل ما انتي متصوره

واذا احــــد ( انا اقول احد ) تســـــبب في قتل احد بحادث مروري
ترا فيها قضيه جنائيه و حبس و ديــــه

حبيبتي الغاليه ربي يحفظج يا رب
بس اللي سويته غــــــــــــــــــــــــــــلط
ارجع اقولك انا مو قاعده اخوفج .... انا قاعده ( انبــــهج للغلط )
احنا ناس كبار و نسوق من زمــــــان و للحين اخاف
ما انزل من السياره
ولا ارادد احد
ولا اداحر احد يشخط ما يشخط
ولا اسرع
ولا اقول ما شفتك و ما ادري شنو

ديري بااااالج يا الغاليه
ترا في ناس يشوفج عليميه و غشيمه
و يستغلونج و يتحرشون و ممكن تتسببين بحادث
بعد ما جربتي الســــياكل و التشفط و التقحص

وديري باااالج تنزلين من سيارتج
او تقولين حق واحد نعم شنو قلت انتبهي


وربي يحفظج يا رب
:eh_s(7)::eh_s(7):

 

[بنت النوخذا]

انا ما اخوفج بس انبهج
و لا ابيج تتصورين انه الناس كلها طيبه و زينه
و الشــوارع و ناسه
ترا بالشارع اشكاااال من الناس
في المعصب و السكران و المحشش و راعي المشاكل ......... الخ


حبيت عمري و الله اخاف عليج
ترا الوقت يخرع

 

[اجمل 1981]

هـــلا حبيبتي بالعكس نصيحتج احطها بعين الاعتبار واخذ فيها ياقلبي صاجه بكل كلمه قلتيها ... ترا هاذا هالشي يصير لي ويصير لكل سايقه جديده الله يحفظنا ويستر علينا بالبدايه خذيتها وناااسه بصراحه مثل ماقلتي ... لكن على قولتج ارواح الناس مو لعبه ولا ويطلعون لج الهنود من كل صوووب والله الله سترها معاي بكل مره ...

 

[اجمل 1981]

اقولج الظاهر هاذا مراقب سواقتي وشايفتيتوني عليميه ,,, وقال خليني اشخطها بكم كلمه عشان تخاف بعديين سياره في خدش ما ادري مني مو مني الله اعلم

 

[اجمل 1981]

بنات شدعوه محد يرد بس بنت النوخذا

 

[FeShinGoOo]

عاااااااااااااااادي يماا لفيت على ناااااااااااااااس ويامااااااااااا بغيت ادعم اوادم يمشون بالشارع ويااامااا حككت ارصفه وياما كسرت مرفقاات الدوله لوول حبيبتي تكبرين وتنسين بس نصيحه هالفتره لاتسوين بروحج خلي احد كبير معاج + خلج بالشوارع الداخليه وحاولي تركزين خلاص انتي عرفتي اصول السوالق بس الحين لازن تتعلمين اصول الشارع لازم اتجيكين عالمنظار على طول يمين يسار وراج وتنتبهين على المنظره الجانبيه ساعات تكون يمج سياره بس ماتبين بالمنظره لازم تركزين وتكونين دقيقه بس هاذا الي قالج حكيتي سيارتي شكله جذاب لانج ماحسيتي فيه معقوله حديد يحك حديد وانتي ماحسيتي ؟؟
بس شكله شافج عليميه ويبي يخرعج

 

[^ريما^]

عادي كل شي يصير في البدايه بعدين تعودين بس انتبهى
ونصيحه سوقي الصبح الشوارع فاضيه بس حاليا لاتطلعين
وماعندج ليسن انتظري وباجر تملين من السواقه

 

[اجمل 1981]

اي والله حقير حسبي الله عليه ونعم الوكيل وحاسه ان احد مرسله علي ( هاذا موضوع ثاني مابي ادخلكم فيه ) وعلى قولتج شاف اني عليميه واستغل الوضع يالله هانت كلها يومين وابشركم بالليسن بس مع ذلك الواحد يكون حذر حتى لو الواحد متعلم ومع الوقت وكل ساق الواحد اكثر يخاف اكثر لان اخطائه تكثر اكثر بس بنات فيه نقط مهمه قالياها مدربي واهو ماشاء عليه شاااااطر ويعرف كل شي قلت له اني اسوق الجيب وانا توني جديدة اخاف منه وانا جيب مو الكبير الوسط ( سوزكي) اللي يسمعني على هالجيب يقول لكزس خخخخ المهم يقولي ابالعكس الجيب امان اكثر للواحد لييش لانه مرتفع اي شي ماراح يتضرر كثر السيارة الصغير وحديده قوي ويقولي عالدوار انتبهي للي جاي من جهة اليسار قلته خليني اطلع اهو قاعدة الاولولويه للي قادم من جهة اليسار صححح ايه يقولي ان دعمج انتي راح تتضررين اكثر لانج عند الباب اما اهوا الداعميه اهيا اللي راح تتضرر عرفتوا ويقول انتي عليج من اللي قدامج اللي ورا مالج شغل فيه ... شغلات وايد تعلمتها منه وشغلات انا تعلمتها بس فيه عندي مشكله بالمصافط ما اعرف منين ادش خخخ اليوم دشيت غلط وصفطت غلطت وانحكرت بين جيب وسوبر يالله جاني واحد مصري ساعدني خخخ وابي احد يقولي تجربته بالتراي

 

[اجمل 1981]

بنات شفيكم وين الردود شدعوه بنات ترا هالموضوع جدا ويهم شريحه كبيره من البنات عطونا خبرتكم لو موقف واحد حصل معاكم ترا مراح تخسرون شي

 

[YA B3DHUM]

انا توني هذا تقريبا نحسبها ( ثاني كورس لي اسوق )
ياما لفيت ياما دعمت هذا لازم اول شي لانج ماتعرفين

حطي باقات عن الشبباب اهممم شي
انا باقات ويلحقوني ونوعي ارتبك اذا لحقوني :eh_s(2):
والله يوم الخميس رايحه الكليه واحد على يميني وعلى يساري مع هذا حاطه باقات ماادري وين يشوفون الصراحه :eh_s(1):
وحدي ارتبكت وقمت ارجف وماعرفت اسوق حييل حيييل خفت ويحدوني بعد عبالهم انا جيمس بوند ولا شي :eh_s(14):

ديربالج يعني حطي باقات مو اي احد يسوي لج حركات توقفين له ( بالفهم يعني ) صبي يسوي لج حركات شيبي فيج !! بيغازل ورقم لا تعطين ويه كلش خلج سيده
وطالعي الجامات ال3 لي بغيتي تلفين ولا شي شوي شوي :eh_s(4):
ولا تسرعين خلج على اليمين لان مني يسوقون شوي شوي هذا لانج توج بعدين عاد قحصي نفسي لووووووووووول

 

[اجمل 1981]

بنات شنو احســــن سياره لي بالوقت هاذا ...؟؟

 

[حساسة مصر]

انتي مش غلطانة .. بس هو شكله بيستهبل ..
و انتي لما تاخدي الليسن احسن سوقي عشان تكوني في الامان
او اطلعي ومعاكي حد بليل و سوقي علي كيفك ...
وماتخافيش السواقة سهلة و مالكيش دخل باللي حوليكي ولا اللي يتكلم معاكي ..

 

[حساسة مصر]

بصي سيارات متسوبيشى - لانسر روووعة في الوقت ده و تتحمل

والـ سوزوكي حلووووة كمان

 

[ابدا يالغالي مانساك]

ربي يحفضج من السيارات ويكافيج شرها
وانتي ياختي وش لج بالجيب واني مبتدئه وتوج جديده علي السواقه
كان اخذتي لج سياره علي قدج كامري او هوندا او التيما وغيره وربي يحفضج ويستر عليج

 

[شب وحرمل]

اي محد مكسر مواترنا غير هالعليميات يمسكون يسار وماشين 20 ولي راحو يمين بعد موووليه يمشون صفر ومن اقصى اليساار بيحذفون يمين والعكس صحيح يبه لاتسوقين حدج الجمعيه وردي البيت موناقصين زحمة الشوارع

 

[شب وحرمل]

انا توني هذا تقريبا نحسبها ( ثاني كورس لي اسوق ) :d
ياما لفيت ياما دعمت هذا لازم اول شي لانج ماتعرفين

حطي باقات عن الشبباب اهممم شي
انا باقات ويلحقوني ونوعي ارتبك اذا لحقوني :eh_s(2):
والله يوم الخميس رايحه الكليه واحد على يميني وعلى يساري مع هذا حاطه باقات ماادري وين يشوفون الصراحه :eh_s(1):
وحدي ارتبكت وقمت ارجف وماعرفت اسوق حييل حيييل خفت ويحدوني بعد عبالهم انا جيمس بوند ولا شي :eh_s(14):

ديربالج يعني حطي باقات مو اي احد يسوي لج حركات توقفين له ( بالفهم يعني ) صبي يسوي لج حركات شيبي فيج !! بيغازل ورقم لا تعطين ويه كلش خلج سيده
وطالعي الجامات ال3 لي بغيتي تلفين ولا شي شوي شوي :eh_s(4):
ولا تسرعين خلج على اليمين لان مني يسوقون شوي شوي هذا لانج توج بعدين عاد قحصي نفسي :d لووووووووووول

انتي يالعياره شدخل الشباب والملاحق بالموضوع والاخت مادونا وناا مادري حاطه باقات ويلحقونج خخخ اقول يمكن بيشوفون الي داخل عنده شنب ولا لا !

 

[ice mo0oca]

امممممممممم انا اقول اكيد احد دازة مثل ماقلتي عشان تدعمين سيارته الظاهر طايحه بجبده السيارة