سفرتي الى هونج كونج صيف 2009

[nouna82]

السلام عليكم و مبارك عليكم الشهر


ودي اسولف لكم عن سفرتي هالصيف ل (هونج كونج )

طبعا رحنا على الامارتية طيران من ابدع ما يمكن من جميع النواحي الصراحة
طرنا من الكويت 4 الفير و وصلنا عالساعة 5 وشي مطار دبي تيرمينال 3 ,,قعدنا 3 ساعات بالمطار و بعدها طرنا حق هونج كونج يومها تعبنا وااايد ترانزيت 3 ساعات + 8ساعات طريج من دبي لي هونج كونج

 

[nouna82]

اول ماوصنا كاان رطووووبة و مطر الجو مو لي هناك ,,, طبعا سكنا في فندق نيكو هونج كونج هوتيل في كولون في شارع مودي و قريب يم هاربر سيتي مشي تقريبا 20 دقيقة و الفندق عندهم خدمة الباص ببلاش يطلع كل نص ساعة يفتر بالمولات اللي يم الفندق ( هاربر سيتي مول و نيو وورلد مول و سوقو )

 

[84 Miss Chocolate]

وناسه كملي هونج طونج واييييييد حلوه خصوصا الاوشن بارك نبي بارت عنه و علييييكم بالعاااافيه

 

[اسطورة زماني]

يااااي اموت بالهونج كونج

يلا كملي متابعينج لايوقف

 

[nouna82]

اهلا اهلا ببنات المنتدى

اول ما وصلنا حطينا راسنا و نمنا من التعب خاصة ان وقت هونج كونج يفرق 5 ساعا

ت زيادة عن وقت الكويت

ثاني يوم قمنا و ريقت اليهال لان الفندق ماكان مع الريوق (على فكرة سفرتنا كانت 9 ليالي في هونج كونج و ليلتين في دبي ) فكنت يايبة معاي توست و جبن كلاس لبسنا و طلعنا رحنا اوشن بارك طبعا عن طريق تاكسي ودانا ب 190 دولار هونج كونج تقريبا 7 دنانير .كان يووووم حاااار شمس حنانية جنكم في اسبانيا و بالظل هوا بارد .
اوشن بارك هذي مدينة ملاهي بهونج كونج تنقسم الى قسمين، الاول فيه برشوت و مكان الباندا و انواع الديناصورات و القسم الثاني تروحيله بالتلفريك فيه العاب مثل قطار الموت و الجندول و الدبوس و فيه اكواريوم كل انواع الاسماك و الشارك والدولفين .

 

[nouna82]

اول ما وصلنا اوشن بارك رحنا شفنا الباندا ( طبعا راح احط لكم بعض الصور ) اليهاااال كيفووا بعدها طقنا اليوووع ماكووو مطاعم بالقسم الاول فركبنا التلفريك و رحنا القسم الثاني ندور مطعم نمشي نمشي وبالاخير طحنا على ماكدوونالز المنقذ طبعا قزرناااها ماكدونالز بهالسفرة لان قامت تقلب جبدي من اكلهم انصدمت من الجاينيييز كلش مووو حلوو مع اني مغرمة بشي اسمة جاينييييز فوووود

عيب المكان ان شمس حاارة و زحممممة ,, بعدها رحنا دولفين شو وااااو كاان صج عجيب خاصة اني اول مرة ادخل شوو حق الدلافين ... والله الله حفظنا الشو كان مفول زحمة كنت صج احاتي انفلونزا الخنازير .. مدة الشو ثلث الساعة عيالي مبتهرين شلون الدولفين يرقص و ينقز و يغني ! يقولون ماما هذا اكيد مووو صجي

 

[بكرا أحلى]

الحمد لله على سلامتك

كملي 00000000متابعينك

 

[nouna82]

العجيب بهالدولة انها نظيييفة و هواها نقي ،تصدقون بعز الزحمة و اللود على الحمامات عشاكم هم تلقونها نظيفة و تلق .... الصراحة عمري ما شفت دولة بكل الدول اللي زرتها الحمامات بكل مرافقها سواء الملاهي او المولات تلقين الحمامات جذي نظيفة

طبعا كان جو بذاك اليوم حيييل حااار خسنا من الحر !!! بس اشوه شفنا المنقذ اللي هون علينا >>>>>>> الجندوووووول :eh_s(1): صج كنا محتاجين شور سريع يبرد علينا :dddds: اهو المشكلة ان زحمة على الكيو طااابور على ماتوصلين حق اللعبة وتخيلوا شمس حنانية !! اصلا لو حاطين تااان جاان صبغنا على برونز .


ردينا عالثمان الفندق لان اهي اوشن بارك تسكر 8 .تسبحنا و طلعنا رحنا تمشينا بشارع اسمه ناثان روود

ناثان روود : عبارة عن شارع فيه مطاعم و محلات مساج و محلات متنوعة ومزدحم من الناس

اول ماوصلنا ناثان روود 10 دقايق من فندقنا جاان يتكودون علينا هنود يسوقون عن جم مطعم هندي بهالشارع و ريلي اوردي طاقة اليوع فتشوق و رحنا( مطعم الضيافة ) بس الصاعقة ان المطعم في شقة بعمارة بالدور الاول !!!!! 4 طاولات كااان الوضع لوعة بالنسبة لنا حتى اليهال احتجوا شنووو هذا :eh_s(14): قلت لا خلاص مانبي ججان يقولي الهندي ليش شفيج انتي ماتدرين ان البلدية كل اسبوع اتي اتجيك على كل مطاعم البلد من حيث النظافة و نوع الاكل فلاتخافين بهونج كونج كل المطاعم نظيفة بس هم ماحبينا المكان فطلعنا و شفنا بيتزا هت و تعشينا فيه و ردينا الفندق عال 12 ...


الواضح بهالشارع ان عال 12 بالليل يتكودون الهنود و الافريقان فاحس شي مخيف شوي

 

[nouna82]

ثاني يوم >>> يوم الشوبينج <<< :ada:


طبعا المجعات اللي في كولون و قراب صوب فندقننا اهي كالتالي :

1)هاربر سيتي : مجمع كبييير كبييير يبيلكم يومين او ثلاث على مااتخلصونه .. عبارة عن ماركات عالمية و ماركاتهم و محلات عادية ... حيل حيل عجبني من احلى المولات

2)نيو وورلد مول : ماعجبني عادي يعني .

3)سوقو : حلو المجنع

4) ميرامار: مارحتله





الفندق عنده شوتل باص ياخذ نزلاء الفندق ليه هالمولات فري كل نص ساعة يمشي من الفندق

اول موول رحتله اهو هاربر مول طبعا :dddds: مر اليوم كله و ماخلصت نصه .... ميزة السوق كان كله سيل و عجييييب و السيل يوصل 70%

 

[Forever & Ever]

الحمدلله على السلامه

كملي ناطرينج

 

[ZoooQa]

عليكم بالف عافيه

ودي اروح هونغ كونغ الكل مدحها و متابعه تقريرج انشالله
بس 9 ايام في هونغ كونغ كم كفاهم بدجيت ؟؟ شكثر صرفتوا فيها مع الفنادق بدون التذاكر

و شنو اغلى شي فيها ... المواصلات؟

 

[nouna82]

عليكم بالف عافيه

ودي اروح هونغ كونغ الكل مدحها و متابعه تقريرج انشالله
بس 9 ايام في هونغ كونغ كم كفاهم بدجيت ؟؟ شكثر صرفتوا فيها مع الفنادق بدون التذاكر

و شنو اغلى شي فيها ... المواصلات؟

والله انا اشوفها عادية مو غالية وايد و المواصلات حدة عادي

فندقنا 5 نجوم و مكانه وايد ممتاز 320 دينار ب 9 ليالي سعره وااايد مناسب

 

[nouna82]

طبعا يومين قزرناها بهاربر سيتي لان المجمع وااايد كبير

يم هاربر سيتي مكان اسمه ستار فري عبارة عن : مينا كل يوم الساعة 8 باليل يحطون ميوزيك و انوااع اللايت شو على مباني هونج !!! كااان الوضع حييييل واااااو لان بعد انا ماقلت لكم ان احلى مباني شفتها بحياتي ... استكشفت شي ان دبي تقلد هونج كونج بالمباني و حتى بالمطار لان احلى مطااااااار بالعالم مطار هونج كونج

 

[غـــــلاM]

مشاءالله تبارك الرحمن
ياااارب اروح انا بعد

 

[nouna82]

اليوم الرابع رحنا مول يديد اسمه تامس سكوير : عبارة عن مول كبيير فيه 8 طوابق يجمع بين ماركات عالمية و ماركات عادية و بنفس شارع المول كله محلات على الشارع و بالدواعيس و بنهاية الشارع مول ثاني اسمه سوقو . تامس سكوير بقسم هونج كونج (بلد هونج كونج تنقسم الى قسمين الاول هونج كونج و الثاني كولون و يتوسطهم و البحر و جسر ) مثل تركيا تنقسم الى قسمين الجانب الاسيوي و الجانب الاوروبي


تامس سكوير كان وايد حلو قضينا فيه كل يومنا و تغدينا فيه و لان المولات كبيرة فبسرعة يطير الوقت ,, عالثمان ردينا الفندق و رحن شارع اسمه ليدز ماركت

ليدز ماركت : عبارة عن بسطات و مكاسر يبيعون الاشياء التقليد و اشياء خرابيط اي وحدة بترووح راااح تستمتع فيه و عادي تردله مرتين او ثلاث نفس حالتي:eh_s(6):

 

[nouna82]

ماكووو تعليقات وايدة !!!!


الظاهر لاني ما اعرف اسرد القصة فسوالفي ماتشوق

 

[nouna82]

اليوم الخاامس رحنا دزني لاند كانت الرحلة صج تونس و تينن
دزني لاند هونج كونج اغلب الالعاب اللي فيها حق اليهال من عمر 4 ليه 14سنة , مافيها العب خطرة اللي يستانسون فيها الكبار بس احنا على نفسنا حييييل كيفنا فهاليوم

وصلنا عالساعة 12 الظهر و طلعنا الساعة 8 ونص ....بعد الفطور بسولفلكم

 

[سالمه]

تقريرج روعة كملي متابعينج

 

[شرطيه حلوه]

واااي تقريرج وايد حلو
العام كنتن بهونج كونج وصج وايد حر خيسه هذا عيبها
خصوصا أوشن بارك ما قدرنا نكملها من الحر لأن كان معانا يهال وكانو يحنون من الحر
صج دزني عجيييييييييييييب وايد استانسنا فيه بس عيييبه مافي مطاعم
السوقه الصراحه ما قدرنا نخلصه
قعدنا بهونج كونج 6 أيام
أحس السوق مالهم يبيله أكثر
كمليناطره تقريرج
وعليكم بالعافيه

 

[يامنيتي]

تقرير حلو وروعه

يعطيج العافيه