شخصيتي صارت ضعيفه

[الجنوبيه]

السلام عليكم ورحمة الله وبركاته

بدش ف الموضوع ع طول




امي زوجي الله يحفظهااول كانت تهاوشني بدون سبب وما كنت ارد وابكي ف الحمام واخاف منها

لدرجه راحت عند ابوي وقالت خذ بنتك مانبيها لولدنا كنت وقتها معاي ولد وحامل ووقتها عمري 19سنه

والله ثم والله ماسويت لها اي شي

وكنت لم اقوم اجهز ولا خذ الغدا واساعد تهاوشني تقول الشغالات هم اللي ياخذو
وصارت فيني عقده منها لانها حرمه قووووويه الله يحفظها

ودارت الايام وتزوج ابنها الاصغر من زوجي

وام زوجي ماصارت عصبيه مثل الاول بس مازلت اخاف منها


زوجة اخو زوجي انسانه غيووووووره بس غيرتها لصالحها وذكيه وماتخلي حقها وعرفت كيف تكسب ام زوجي

لدرجه ام زوجي تعتمد عليها بكل شي
هي اكبر مني ب4سنوات تقريبا


العقده اللي فيني ان

ام زوجي دايما تهاوشني اذا طبخت لزوجي وصارت فيني عقده من المطبخ اذا اريد شي من المطبخ كأني بسرق

خبرت زوجي بالموضوع وتقبله مني

احنا عندنا شغالتين للمطبخ بس خالتي مره ف رمضان قالت تريدنا احنا نطبخ
وتورطت بس توكلت على الله


انا حرمه مش فنانه ف الطبخ ولا تعلمته بس ربي كان معي والكل مدح طبيخي ولله الحمد

وزوجة اخو زوجي مع اني اسمعها تقول انها فنانه بس الكل انتقد اكلها حتى زوجها قال لاتطبخي واحنا صيام

بس ماشاء الله عليها استمرت لين ماتمكنت وخالتي دايما معاها وواقفه في صفها


وانا اذا دخلت المطبخ هاوشتني معرف ليش

كل شي اسويها لها الكلمه الطيبه واللي اشتريه لامي اشتريه لها حتى اولادي اخذتهم مني وعادي هذي جددتهم ملابسهم عندها

وفوق هذا تقول
انتي مومهتمه باولادك:eh_s(11):


واذا اخذت ملابسهم تهاوش لين ما اتفقنا نص عندها ونص عندي

وكل من هب ودب تقولهم فلانه مش مهتمه باولادها انا اشتري لهم واغسل ملابسهم وووووو
اما عيال عيالها الثانيين ماتقولهم شي


صرت اجلس ف غرفتي وما انزل عندهم تحت احس شخصيتي صارت ضعيييييفه

كيف اتصرف اخواتي الله يجزيكن الجنه

صارت الحين تقول وتلمح فلانه طبخت وسوت ماشاء الله عليها فنانه


كيف اعيش حياتي مثل الناس واطبخ مثل الخلق واخلي خالتي تعتمدعلي لان زوجه ولدها الصغير ماخذه عقلها

وكل ماوصتني خالتي لشي تقوم هي بسرررررعه وتسويه

وتامروتنهي فالبيت ع كيفها والكل يحبها ويحترمها

كيف ارجع ثقتي وما اخاف من خالتي واخذحريتي في البيت

لاحديقولي انتقلي زوجي رافض نهائيا هالفكره

 

[ناتشوو]

اولا شيلي مرت حماج من بالج
مو وقت غيرةفي ناس
مو زين تضيعين الوقت بالغيرة منهم ولا كراهيتهم
لا
استفيدي منهم
مرت حماج ماشالله مو كاملة
بس فيها سنع واصرار

انت صار اللي صار
كنت صغيرة ولج اخطائج
بس انت كبرتي
لا ترددين انا ضعيفة وماعندي شخصية
لا
احس ناقصح تركيز وشوية ركادة
وهذا مخلي ام زوجج تعصب
اذا اتهمتك بشي تحسينه مو فيك
ردي بكل ادب وهدوء وبرري موقفك


اهلك اشلونهم معاك؟
تحسين انك طبيعية معاهم ؟
تحصلين انتقادات ع عيالك او شخصيتك من
امك او خواتك ؟

 

[العطر2011]

حبيبتي منو الي بيده القلوب ؟
ويقلبها كيف يشااء ؟؟

منو بيده حاجتج وبكلمه تنتهي مشكلتج ؟؟

سبحانه رب العالمين
هو بيده القلوب كلها وبيده يرزقها حبج
وانتي تدورين رضاها
ادعي ربح لجي بالدعاء والتضرع
واسأليه ان يعينج ويرزقها حبج

ماسمعتي الرسول صلى الله عليه وسلم يقول (اني رزقت حبها) ؟؟

هذا رزق فادعي الرزاق ان يرزقج اياه ويرزقها بعد

وبعد ما يكون قلبج كله واثق بان المحبه من عند رب العرلمين مومن عند البشر
بذلي الاسباب ..

اولاً لا تفكرين من جانب سلبي ابداً وتذكري (ان الفأل الطيب من الاسلام)
وثانياً حرصي بين فتره وفتره تتذكرينها بهديه او ورد
ثالثاً خليج اجتماعيه وحبيبه بس افراط ولا تفريط
رابعاً لما تروحين بيت اهلج سوي طبخه خفيفه ووديها نقصه لخالتج
قولي لها اهلي حبو طبختي واشتهيتج تذوقينها وتنقصتها لج
خامساً دخلي المطبخ ليش ما تدخلين ريلج من حقه ياكل من ايدج
واذا خالتج قالت شي خل ريلج يرد عليها بلطف واحسان لانها (امه)
ويمدح اكلج
سادساً موضوع عيالج زيدي برعايتهم واسألي الله باسمه المستعان
ان يعينج بان محد يشوف تقصير منج في اعيالج

وبجذي اتمنى اكون سددت وقاربت

واسال الله لج السداد والتوفيق
وان يأمن قلبج باسمه المؤمن
ويجبره باسمه الجبار
وعسى ربي يصلحج ويصلح لج الي حولج

 

[صمتي عذابي:(]

سلام. قلبي لاتهتمي. ياروحي. وانا. حاسه. بشعورك. انو. غيرك. ينمدح. وانتي. تسوي. ومع. ذلك. محد. مهتم. بالعكس. خليك. واثقه من. روحك. وسوي. وحطي. اهم. شي. زوجك. هو. اللي. يشوفك ولاتخافي. ابدا. خليك. قويه الله. يوفقك. يارب. ويبعد. عنك المشاكل. ياروحي

 

[shog]

بختصار طلعي شقه شمقعدج عندها، اشتري راحتج، لو انا بدالج من زمان شلت شلايلي وطلعت، خصوصيه اكثر وتدشين المطبخ على راحتج لا حسيب ولا رقيب!!!!

 

[al-musk]

حاولي ترددين دايما انا قويه انا ما اخاف وحطي في بالج مدام مو مسويه شي غلط ليش اخاف

ودشي المطبخ واذا زفتج ردي عليها وناقشيها بس بدون هواش خل تعرف انج مو مسويه شي غلط وحطي حدود حتى لو تبدين من الاول بس لازم تبدين

وعسى الله يسهلج

 

[يارب يطيب عبود]

حطي لك مطبخ بقسمك
واطبخي علي كيفك
ونزلي لهم العصريه حلا موالح اي شي
ولا ترددين كل شوي أنا شخصيتي ضعيفه

 

[يارب يطيب عبود]

حطي لك مطبخ بقسمك
واطبخي علي كيفك
ونزلي لهم العصريه حلا موالح اي شي
ولا ترددين كل شوي أنا شخصيتي ضعيفه

 

[فراشه بيضا]

مو ضعيفه
انتي طيبه

 

[فراشه بيضا]

مو ضعيفه
انتي طيبه

 

[M!SS.LOBY]

بالعكس انتي طيوبه

 

[ام زهقانه]

صح انتي طيبه تسكتين هاديهتستسلمين ما تعاندين
خلي لج مره اصرار بشي بحياتج وشوفي اشلون
راح تفرضين رايح
بعدين نصيحه خلج ع حياتج
ابرك لج من قلوب قاسيه الي ما عليها حلا
الله يقولو ا علي نياتكم ترزقون
الله يحفظج

 

[Gatwa DaloO3a]

حبيبتي حاولي تفرضين شخصيتك ، دامك محترمه وماتسوين شي غلط ، لا تستحين ولا تخافين ، طلعيلهم شخصيتك

طبعا القوه مو انك تعلين صوتك وتعاندين

لا ! .. القوه انك تصرين على الشي اللي تبينه وتحققينه ب اسلوبك الخاص ، يعني لو انتي تبين تطبخين و هي ما رضت او شي اسأليها " ليه طيب؟ وش السبب .. بس انا ياخاله نفسي اسوي شي ل زوجي " وكذا حاولي تاخذين وتعطين ،، مو تقولك لأ وتروحين ، وقيسي على هالمثال باقي الامور ..

يمكن وقتها يوم كان عمرك ١٩ تحسك صغيره و تعاملك معاملة الام اللي تفرض عليك رآيها وتقولك سوي ،

حاولي تاخذين وتعطين بالكلام ، لا تصيرين " هذاره " .. تكلمي معاها بالاشيا اللي هي تجذبها وحاولي تكسبينها

انتي عودتيها على انك " المستضعفه " .. و حاولي تغيرين وجهة نظرها فيك .. استغلي وجود زوجة اخو زوجك في انك تصيرين افضل منها


لا تعطين اشارات سلبيه ل مخك وتقولين " انا ضعيفه " .. قولي انا قويه !

 

[manoooram]

انتي منتي ضعيفه
انتي طيبه وصغيره بالسن على شان جذي ما عرفتي تتصرفين يا قلبي

وباعتقادج الخاص ان ضعف شخصيه وهو العكس كونج مسالمه فتسكتين

حبيبتي في بيت شعر يقول :
عين الرضا عن كل عيب كليلة .. و عين المقت تبدي المساويا
على نفس وزن لا حبتك عيني ما ضامك الدهر
قد يكون من الأسباب اللي خالتج ما تتقبل منج شي وهذا أمر وااااارد مع الكل


وبالنسبة ان تخافين
لا تخافين ولا شي خالتج مو وحش على شان تخافين منها
كلميها باحسان واحترام وعديها مثل أمج في حال اذا بدر منج تصرف ما عجبها
وضحي لها ان مو قصدج وبرري لها تصرفج وانتهى الموضوع
ولا تنطوين ولا شي نزلي وراسج مرفوع وبسطي حالج

ونهائيا لا تطرين سالفة ما عندي شخصيه ولا انا ضعيفه
لأي أحد حتى لو بينج وبين نفسج لأن هالشي يحد من بناء ثقتج بنفسج ويدمرها

خلج قويه وبيني لهم شخصيتج يا قلبي بالحق

 

[يونييك]

حبييبتي هذي مشكله وإرده للي يسكنون مع الحموله
كل اللي بقوله لج وباختصار توددي لعمتج
اولا لانها ام زوجج وجدة عيالج
وترى اهي تحب عيالج المفروض تستانسين
حطي في بالج
انا احب عمتي وعمتي تحبني
وانتي طالعه اذكريها بهديه(قطعة قماش/بخور/عود او اي شي
مؤ شرط يكون مكلف
حتى لو من الجمعيه مثلن منظفات او فطائر او اي شي
اهم شي تتوددين لها وبحب
وافرضي نفسح مثل حماتج الثانيه
وعلى فكره (البقاء للأقوى)
انتي مش ضعيفه وتقدرين

 

[عزيز قلبي]

قمت احس الناس من يشوفون انسان طيب ومتواضع ما يعطونه اهتمام

ومن الممكن يتطاولون عليه وما يحترمونه والانسان اللي يطالعهم من طرف خشمه

يحترمونه ويقدرونه ابني حق نفسج شخصيه جديده خل يكون عندج لسان الملسونه
يخافون منها دشي المطبخ بكل ثقه دام ان زوجج رافض فكرة الطلعه من عند اهله
وسوي اي طبخه تشتهينها واذا دشت لج امه تقولج ليش تسوين قوليلها والله اشتهيت
يعني شسوي اذا ما عندي مطبخ ولا تحطين عينج بعينها لما تتكلمين واتكلمي بثقه مثل ما تحترم هذيج لازم تحترمج
ولعلمج ممكن احترامها لهذيج ياي من خوفها من ولدها اذا تحبه تحب زوجته وتخاف علي زعلها
لانه بيزعل علي زعلها صديقتي نفس مشكلتج ما يحترمونها ولاشي ويحترمون مرت حماها لانه له شخصيه
ويخافون منه والله يوفقج

 

[Patcholli]

انتي داشه بعدة مشاكل مو مشكله وحده

الاولى خوفج من ام زوجج

ثاني شي غيرتج ومقارنتج من مرت حماج

ثالث شي ضعف شخصيتج

الحل ..

اولشي اولشي مالج شغل فبنت الناس ذكيه غبيه شاطره مو شاطره هاذا مو سابق ولا تحدي
انتي غيرانه منها بدون ذنب اهي ماضرتج ولا اذتج اذا استغلت شطارتها وعرفت تدخل قلب ام زوجج فهذا مو عيب ولا غلط ولا حرام .. والظليمه شينه لا تخلينها عدوه حقج بدون سبب بالعكس تقربي منها وحبيها وصيرو مثل الخوات عالاقل توقف معاج وتدافع عنج ..

ثاني شي ام زوجج ..
انسي انج بنت صغيره بالعمر انتي الحين كبرتي وصرتي ام عيال
ريلج معاج وموافقج ويدري بسوالف امه
قوي شخصيتج ولا ترضين بالغلط
اللي يهينج لاتسكتينله حتى لو حرمه كبيره واجب عليها تحشمج مثل ماتعرف تحشم غيرج
ماقولج قلي ادبج بس اقولج ردي بكل احترام بدون خوف انتي مو ياهل
لاتحسسينها انج تبين رضاها ..!! رضاها ماراح يدخلج الجنه عشان تنزلين موضوع هالكبره وتكتبين اشلون اخليها تحبني وتثق فيني ..!!
عقب كل الكلام الي قلتيه عنها وعن شرها ليلحين كرامتج تسمحلج انج تدورين حبها ورضاها ؟

لازم تحطين حد .. تقوين شخصيتج .. تشيلين المقارنه ..

ولازم ريلج يوقف معاج ويساعدج بهالشي ..

 

[امـ خــزامـى]

البنات ماقصروا

وربي يسخرلك

 

[عسل حدي]

شنو الام علبالها اذا زوجت ولدها يابت خدامه يديده لبيتهم؟
ولا علبالها شرت بنت الناس وصارت تحت طوعها
هالامهات مثل ما يه يوم خذت ولد الناس من اهله وعاشت حياتها ليش ماتخلي بنت الناس تعيش حياتها مع ولدها

 

[زيــQ8ــون]

ماااااااااالج شغل فيها ,,, انتي ماسويتي شي غلط شحقه الخووف؟؟
اهي محترمه مرت حماج لانها ماتسكت اذا احد اهانها ,,, انتي مشكلتج تسكتين ردي عليها وين الغلط؟؟ اذا ريلج عارف ان امه قشره مو قايلج شي انا ما اقولج اغلطي عليها لاء رد عليها رد محترمه خليها تبلع لسانها ,,, ترى اذ شافتج ساكته بتطااول عليج وبتحن ع راس ولدها يتزوج عليج ,,, انا ما اقول جذي عشان اخوفج لاء اقولج عشان ماتنصدمين من الواقع وتقوين شخصيتج ,,, ولاترددين بينج وبين نفسج انا ضعيفه قولي انا قويه مو ضعيفه وبتشوفين الفرق ان شاءالله ,,, والله يوفقج ويساعدج ع اللي تبينه ...​