شريت جدر الكهربــا عشان أطيب خاطر ريلي .. لكن في مشكله !!

[UM M&M]

ذلك اليوم كنت رايحه أنا و ريلي حق جمعية جيـان الي بمول 360
جان أشوف جدر الكهربا كان بخاطري من زمااااان .. قلت حق ريلي باخذه مشتهيه اطبخ فيه
قالي بس أكيد تطبخين مو هبه يومين و بعدين تقطينه حاله حال الباجي

قلت لا بطبخ لك فيه اللي تبي :weight_lift:


عاد شريته ماركة ( تيفال ) شكله يونس ومشوقني اطبخ فيه
بس بغيت أسألكم بنات في أحد مجربه ؟؟
و اللي مجربته تقولي شلون استخدمه
و شكثر احط عيش و شكثر احط ماي ..؟

و يصير أحط مع العيش دياي ؟؟



ترا انا ماعرف اطبخ عيش كلش .. بس شريت هذا عشان اطبخ حق ريلي لأن مشتهي أطبخ له
اللي تعرف لاتبخل علي و بدعيلها ان شالله

 

[شمسيه]

السلام
اختي اول شي زيت علي النار مع دارسين وحبتين هيل وفلفل اسود وكزبره حب حتي يحمي الزيت وبعده البصل بعدين ضعي اللحم وكشني وقلقلي بعدين اطحني شوي طماط وصبيه عليه وحركي
وصبي 2كاس ماء وحكمي الاغلاق 15دقايق اذا اللحم طازج بعدين ضعي الرز وحركي با الملعقه وحطي ملح
وغطيه15 دقيقه وبا العافيه

 

[كريستال ليدي]

انا مجربته لما كنت برة الكويت و فعلا ممتاز حق الطباخ و يوفر عليج الوقت و المجهود

و اذا على الكميات ترى مكتوبة في الورقة اللي مع الجدر او على الكرتون مال الجدر

و على فكرة انا كنت اسوي فيه مشخول و معدس و مموش و ساعات كنت اخلط العيش مع خضرة مثلجة و اسويهم فيه يطلع روعة و ساعات احط مع العيش قطع دياي مفيوحة و قطعة ماجي و مرات احط مع العيش شعرية و دايما يضبط معاي

و الله هالجدر اختراع عجيب بس حق اللي تعرف تتفنن فيه

 

[أموت وأحيا به]

والله أنا نفسي أشتريه 00 بس مادري يكفي مقدار عيش كبير ولا بس شويه00لأني أطبخه حق حموله
ياريت تفيدونا

 

[ام خالد 78]

بنات يعني كميه الماي دبل كميه العيش ولا اقل

 

[<<لمار>>]

ماجربتة بس امى تسوى فية المرقوق اذا سافرنا وايد حلو

 

[المالديف]

انا شريتة بس سويت فية العيش وضبط معاي

 

[UM M&M]

مشكورين ماقصرتوا

اذا جربته بقولكم